Lūk 21

Arōng Dāli Pēk

Mk 12:41-44

1 # Mt 27:6; Zn 8:20 Isuo chu a tang a, ānchong ngāiin sumkoka nuompēk ei pēk u ngāi chu a mū na. 2Arōng anriang khatin lepton anni ei hong pēk um a mū na. 3Amā'n, “Ataktaka kei na ril a ni u zei, mītei ngāi dōra nēka hiva arōng anriangin ei pēk hi a tam uol. 4#2Ko 8:12Mītei ngāi dōrā'n chu ātampā ei dōn u nātā kēng ei hong pēk u, tenchu arōngin chu anriang chungā'm ei damna ranga ei dōn selep ha a pēk a,” a tī na.

Hun Hekna Ranga Sinsiana ngāi

Mt 24:1-35; Mk 13:1-23

5Hatuka lung āsapā ngāi le hanūk chu nuompēk ngāi le tempul ei ānliangzia rui chu senkhatin a ril u lāi han, amā'n, 6“Hiva neinun nei mu u ngāi hi, hun la hong suokin tia, lung khat chunga lung anthuo anmāka anpei lui rang khat ngal om nō ni,” a tī na. 7Amānī'n a kōma, “Mīnchūpū, hiva ngāi dōra hi hotik mo ei hong om rang? Hiva ngāi a hong āom rang tiang hong sinsiana mo ei om rang?” tīna a rakel u na. 8Amā'n, “Anhuonga nei om u nōkna rang anrēng u ro. Asik chu ka raminga mī tampā hong u'n tia, ‘Koi hi ama kā ni,’ hanūk chu, ‘Ahun chu anāi zei,’ hong ti u'n ti. Tenchu amāni chu zī u nō ro. 9Hatuka rālkāpna lē anbuoina thang na riat u le, na rathā manta u nō ro. Asik chu hava ngāi ha ei hong om mānsa rang ngal a ni. Tenchu ei hekna chu la hong len nō ni,” a tī na.

10 # 2Kh 15:6; Isa 19:2 Hatuka amā'n a kōm u na, “Nam lē nam andui u'n tia, rēngram lē rēngram andui u'n ti. 11#Isa 29:6; Zol 2:30Nīnū ānrikpā ngāi hong in tia, mun ateteia māitām lē ripui lēng in ti. Anvāna anchiruopā ngāi lē sinsiana lianpā ngāi om in ti. 12Tenchu hiva ngāi dōra a hong ātung mān, amānī'n na sūr u'n tia, na sinsak u'n ti, sinagog ngāia lē ankhumna in ngāia na betōk u'n ti. Ka raming sika rēng ngāi lē ramoppū ngāi matona anruoia om u'n na ti. 13#Fil 1:12Tenchu ānriatpū āni ranga nangni ranga chan asa chang in ti. 14Hasikhan na malunga mandettit u ro, hong mo nei masang u rang tīna aphāmān lei mandon u nō ro. 15Na rāldui u ngāi dōrā'n ei na duia, ei na makhal thei u nōkna ranga, chong theina lē hianna na pēk u ka ting. 16Nangni chu na nū lē na pā, na paruol ngāi, na ūnāi ngāi, na mal ngāiin na betōk u'n ti. Amānī'n senkhat chu na that u'n ti. 17#Zn 15:21Ka raming sika mī dōrā'n na mūmāk u'n ti. 18#Mt 10:30Tenchu na lū una samsang khat ngal anpei nō ni. 19#Mt 10:22Nei diar una le han nei dam una man u na ti.#21:19 Anpēngsōmna sika nā thi ngalā'm damna tak, tāituon damna āman tīna a ni (Lk 9:24; 17:33).

Antaknapui

20“Sipai ngāiin Zerusalem ei huol u na mu u tika, ei siatna rang anāi zei tī riat ro. 21Zudāi rama āom ngāi chu muolpui ngāia va rot u rase. Khopui sūnga āom ngāi chu apanga suok u rase. Khuona āom ngāi chu khopui sūnga lūt u nō rase. 22#Isa 63:4; Dnl 9:24-27; Hos 9:7; Mt 1:22Asik chu hiva ngāi hi phubalākna nikhuo ngāi a ni, anziaka om ngāi dōra chu ei kipna rang a ni. 23Hava nikho ngāia ānrāi lē nāitē ranū nēklāi ādōn ngāi chu a vān a duoi u! Asik chu hava rama han antakna alian sabak om in tia, hanūk chu hiva mi ngāi chunga taksitna hong tung in ti. 24#Isa 5:5; Dnl 8:13; Anl 11:2Amāni chu khendāi mēra la chul u'n tia, nam tin ngāi kōma selkeia anruoi u'n ti. Namtei ngāi hun anzui māseng, Zerusalem chu namtei ngāiin a chīl u'n ti.

Miring Nāipasal Hongna Rang Rui

Mt 24:27-31; Mk 13:24-29

25 # 2Pe 3:10, 12 “Ani, thā lē ārsi ngāia, sinsiana ngāi om in ti. Phila, nam ngāi chunga antakna lē rathā anvāina om in tia, amāni chu tipui lē tiduar ansok rahūna a rathā ta u'n ti. 26#Isa 34:4; Mt 24:29Anchina sika lē phila ii a la hong ātung rang ansabeina sika anmoia om u'n ti. Anvān ngāia thōtheina ngāi dōra chu annīk u'n ti. 27#Dnl 7:13; Mt 26:44; Anl 1:7Hatuka Miring Nāipasal chu thōtheina lē anlian chunga ansūma ei hong chu mu u'n ti. 28Hiva ngāi dōra anphut le, chung tiang thīr u tānla, en u ro. Asik chu nangni anratana nei om una rang hun a hong ānāi zei,” a tī na.

Theichang Kung le han Ankhīna

Mt 24:32-35

29Hatuka a kōm una ankhīna-chong khat a ril a, “Theichang kung lē thingkung atei ngāi dōra en u ro. 30Abuo annui ancher na mū u le, sūrlāi a hong ānāi zei tī nangni lenin na riat u na. 31#Mt 3:2Hantin han nangnī'm hiva neinun ngāi a hong ātung na mū u le, Pathian rēngram chu anāi zei tī riat u ro. 32Ataktaka kei na ril a ni u zei, hiva ngāi dōra a hong ākip suo māseng chu hiva ruola mi ngāi chu anpei pial u nō ni. 33#Mt 5:18Phil lē anvān anpei in tia, tenchu ka chong ngāi chu anpei pial nō ni.

34 # Mk 4:19; 1Th 5:2-7 “Tenchu anrēng u ro, hanōkten zū le rāhāiansaka, anrīanhāia lē hi damsūng ruia lunghāngnā'n na malung u chu manrik in tia, hava Nikhuo chu anlāiseka na chung una hong tung in ti. 35Asik chu hava nikhuo chu phil pumpuia ommun akhuor ngāi dōra chunga chāngtē anga hong tung rak in ti. 36#Mt 26:41Hasikhan, hiva neinun a hong ātung rang ngāi dōrāna nei zōk una rang lē Miring Nāipasal makunga andingna ranak nei dōn thei una ranga, ahun tina ameng chiana lē zārzong babanga lei om u ro,” a tī na.

37 # Mt 21:1; 26:55; Mk 11:19 Amā'n sūna tempula a manchū chachak a. Tenchu zāna chu a suok a, Oliv Muol ei ti una han a vā riak chachak a. 38#Zn 8:2Hatuka mī dōra chu zīnga a chong anngāi ranga tempula a hong u chachak a.

Currently Selected:

Lūk 21: RNL

Highlight

Copy