Yohannis 5

Yesus Isa Laafa Asunin Fati

1Esseen orfo Ayhudni meeni heebo faar sinna boor'a Yesus den Yerusalem kesi. 2Yerusalemuk fantuus girifaat kesfana finynyaasi tesha isa kuphira kuni aka faar. Es akaas Ibrawini meeni kaamak «Betezata» yisteratu teegtefa. Bar dey uuch tukbaasta ukbare yere finoba faar. 3Es finoossi showo mettan aaftishu, laafanawa engitfe meena esta kunsefer. #5:3 Girikni tichaassi faadba keeziistan hamma acheech kar'a fa baron aane daysifa.[Baasso dey akaasi shorkonon oodet feeseter. 4Aat aatta daamiisa wosiya kuphira kuni akaassi keretaafa akaason shorkit faar. Es akaasi shorkoneen orfo zeemme akaassi giri asu aaffa tesa meroossinnu farit feer.] 5Estak keezasire nangne neya laafa sinne fe isa asu feer. 6Yesus es asusin kunfeen biyaat hashneen kar'e showo neya ekkak feenamato araat: «Farutak sholefatoso?» yi. 7Mettan asus: «Daamtaaso! Akaas shorkefana kabaasik taan akaassi kessuni asuta aafewa; ta giruk hamfana kabaasik oom asu zeemfe» yi. 8Yesus dey: «Kabira opponeeson wor'a hamma!» yi. 9Mettan asus geregere farire oppobaason wor'e hami. Es bar sinnaas beysani wonakwa. 10Ayhudni meya fari asusin: «Hash hawung beysani wona sinna boor'a opponeeson wor'atak aane chimsifawa» yisete. 11Sinuntano bar: «Taan fati asus ‹Opponeeson wor'a hamma› yiwa» yire wolgi. 12Baasso dey: « ‹Opponeeson wor'a hamma› yi asus bar oonso?» yire mamussete. 13Yesus eksere daraasa ganesi giri sinna boor'a fari asus oo fatinamato aane aruwe. 14Esseen orfo Yesus fatina asusin betemeqdesiissi danne: «Ese haye faritwa. Haniistan denalo wuza neyista kar'noynamato hanneen ekalo boor'a wostotaatawa» yi. 15Asus hamme Ayhudni meyak: «Taan fatiis Yesuswa» yire make. 16Beysani wonaasik es baron zagina boor'a Ayhudni meya Yesus kesse girunoynamato kalak sholset feeseter.

17Sinuntano Yesus: «Abataas hash hawungneen kar'e wostedife. Ta dey wostenarwa» yire wolgi. 18Esenu beysani wonaason ooda beybaas bar bar sinnoynamato teetbaason dey Ha'ooseen isar zagire: «Ha'oos taak abatawa» yina boor'a Ayhudni meya akamanon woruk sholset feeseter.

Ha'oni Naasa Ha'suni Hugna

19Tusire dey baassok ekka yi: «Futo nittok makefawungwa, Abaas zagifeen biinaysontano naas teetbaasik isa wuzane zagunak aafa chimanawuza. Abaas zagifena barontu zuutire naas dey zagifewa. 20Abaas naasin keeshter sinna boor'a bar zaguna baron zuutire besifewa. Nittonu diinqotimato haniistan denalo wostonu besuna. 21Abaas kituussinnu kabgire kaa imfenasimato naas dey sholsefe baassok kaa imfewa. 22-23Asu zuuttere Abaasin ulfinsifenasimato naasin dey ulfinsunak mangsuni kar'aason zuutire naabaasik aatire imiwa. Es bari boor'a Abaas ooniistanu sinfaanane aafa mangsu kar'anawuza. Naasin ulfinsunoy bar wosi Abaasin aafa ulfinsunawuza.

24«Futo nittok makefawungwa, kaamnaason odefe barnawa taan wosi barik amanefe barna koi'ba foonto kaaba faarwa. Bar kituni keeruntu kaani keer finiteno basaasta aafa mangsu katona wuza. 25Futo nittok makefawungwa, kituni meya Ha'oosi naani kaamanon odosone wona yoonawa. Wonaas dey hashwa. Odefe baassonu kaak foosone. 26Abaas teetbaasik kaaba faanamato naas dey teetbaasik kaaba foonak imiwa. 27Asuni Naa sinna boor'a mangsuni kar'ni ha'suni hugna imiwa. 28Es barik diinqotiitawa, moogaassi fe baasso zuuttere kaambaason odosone dey moogaassin kesone wona yoona. 29Ma'aron zagi baasso kitun kabire kaak foosone. Mangunon zagi baasso kitun kabiseten baassosta mangsu katona.

Yesusnik Zaala Make Asuni Meya

30«Ta ta teetaasik isa wuzane zaguk aafa chimanawuza. Mangsu kar'anaas Abaaskin odena baron koi'bawa. Taan wosi basa safaraasontano ta safaraason zaguk aane sholefat sinna boor'a mangsuni kar'naas futowa. 31Ta ta teetaasiron zaala makefaanane kaamnaason futo zagire ephphetoonir aafewa. 32Taak zaala makoniis Abaaswa; Barnu taak makona zaalaas futonir sinnamato arifawungwa. 33Nitto Yohanniisiki wosinin wositi. Yohannis dey futok zaala makewa. 34Ta asuni zaala aane sholefat; Sinuntano nitto farutiktu Yohannis makena zaalaason makedifawungwa. 35Yohannis saamfat chaarsi tonane feerwa. Nitto dey garo wona es chaarefaasik girok sholseti. 36Sinfanaknu ta chowaason Yohannisniistan denalo makoni zaala faarwa. Ta koi'sunak Abataas taak imna wosto han zagifana barwa. Abataas taan wosinamato zaala taak makonirwa. 37Taan wosi Abaas taak zaala makewa. Nitto kaambaason isanne aane odosoweti. Gitobaasonnu aane biyosoweti. 38Bar wosina barin amano beyti boor'a kaambaas nittoossi aafa foona wuza. 39Nitto barik koi'ba foonto kaa danatinne faar sinna bestefaan tichaason wee'efetiwa. Es tichaasnu taaktu zaala makefawa. 40Sinfanaknu nitto kaanti foonak taaki yoo aane sholofeti.

41«Ta asunikin ulfina aane sholefat. 42Sinuntano Ha'ooson keeshto nibnitiissi aafa sinnamato arifawungwa. 43Abataasa sunak ye taan aane ephphatoweti. Oomiis teetbari sunak yeen barin ephpha taasetir. 44Nittotna nittotna wal ulfina sholet fe nitto isa Ha'ooskin bestoni ulfinaason aane sholefeti sinna boor'a aakkak amanok chimatirinso? 45Ta Abaasa sina nittotin malatonanne faar sinna bestonaatawa. Nittotin malatoniis nitto abdatefeti Musewa. 46Museni amaneseti sinfaanane taan dey amanoti kabawa. Bar ta chowaason tichire feer. 47Tichaason amano shakfaatine kaamnaason aakkak amanotirinso?»

Currently Selected:

Yohannis 5: YemsaNTL

Highlight

Copy