Matewos 3

Haphqife Yohannisni Misirachchuni Kaamaasi Mako

1Es kabaasik haphqife Yohannis Yuudani daastaki ichma daassi maket ye. 2Es maket yeenaas dey: «Samani taatoos tai'se sinna boor'a harmutiwa» yifar. 3Raajju sina Isayyasni matsafaassi: « ‹Daamiisa ugnanon hoossuti; sapsira dey zeephti› iyaafe ichma daassi chaaget fe asuni kaama» yistera makte bar haniiswa. 4Yohannis mayfena mayaas Gaalani esak wiche maama. Geshobaasta dey googoni talfa taar'et feer. Muubaas dey bilnganewa zaboni eesne. 5Es kabaasik Yerusalemun, Yuudani daa zuuttambaase asiissin, Yordanosni biratoosta fa daas zuuttambaase asiissi fe asuni meya zuuttere barki yeet feeseter. 6Boor'besiison harmifaafe Yordanoski akaassi barik haphuktet feeseter. 7Yohannis showo Ferisawini meenawa Seduqawini meena haphuktok barki yeesefeen biyaat: «Nitto ufoni naanggota; yoonak fa Ha'oosi gi'sin kesatik oonso nittok makeri? 8Ese harmuntiison besifa wosto wostoti. 9Nibnitiissi: ‹Abraham inno abawa› yifetimatotawa. Nittok makefawungwa; Ha'oos han shu'aaskitosin kabgira Abrahamni naanggota zagunak chimanawa. 10Hash anfala i'oosi diisi kunfarwa; ma'a gaana gaannoy i'oosikito zuuttera katerna geesi ha'tona. 11Ta harmiyaasik akaktu haphquna; ta chaa'mabaasi taar'anon kotanak chimnoynar tayistan akamanon denalo sina bar ta orfoosta yoonir. Bar Korto Ayyanaknawa geyaknatu haphquna. 12Meyaason sama ha'una manshiis kushubaassitu fa; oodaason mai'sire kaynuna; zagooson botobaassi gaagana; sinuntano ufaason tishunoy geesi kiichuna» yi.

Yesusni Haphuqto

(Mar. 1:9-11; Luqa. 3:21-22)

13Es kabaasik Yesus Yohannis barin haphqunak Galiilan Yordanoski akaaski ye. 14Sinuntano Yohannis: «Taan ne haphqutak sholsu sinna feen ne taaki yaafatoso?» yit kali. 15Yesus wolgire: «Taan kalataatawa; ooko sina baron zagunak sholsu sinna boor'a beywa» yin es kabaasik Yohannis «ma'i» yi. 16Yesus haphuktenanneen orfo geregere akaassin kesi. Estan samaas gachchen Ha'oni Ayyana nakalone faar sinna basaasta kerefeen bi. 17Kaama dey saman yaara: «Haniis ta shunfana naaswa; bariktu girefawungwa» yi.

Currently Selected:

Matewos 3: YemsaNTL

Highlight

Copy