Matewos 4
4
Yesusni Fattanto
(Mar. 1:12-13; Luqa. 4:1-13)
1Esseen orfo Ha'oni Ayyana Yesus dabulosnik fattantonak zoonsira ichma daassi hami. 2Estak Yesus acheechasir wonnewa waalne soomenanneen orfo makte. 3Fattanoni bar tai'sere: «Ne Ha'oni naa sinfaatane han shu'aasikito tusha sinanak ajajebbo» yi. 4Sinuntano Yesus wolgire: « ‹Asu Ha'oosi noonosin kesfa kaama zuuttambaase asiktano muu muuk aane feefe› yistera tichchewa» yi. 5Esseen orfo Daabulos Yesusnin Yerusalem ephphe taamme betemeqdesiisi tukta yeetaat: 6Eeka yi: « ‹Wochonees shu'aasta tuusa'onoymato neen oodanak Ha'oos wosibaason ajajonawa. Kushubesiisik dey neen kabugsonewa› yistera tichchewa; ese ne Ha'oni Naa sinfaatane yeet golo teetneeson ha'uwa» yi. 7Yesus dey wolgire: « ‹Daama Ha'oneeson fattanotaata› yistera dey tichchewa» yi. 8Hepsa dey Daabulos Yesusnin akama dicha aamta kisire yeetaat han daasi taatoni ulfinanon zuutire besaat: 9«Ne taak gandera sagadefaatane han baron zuutira neek imanawa» yi. 10Es kabaasik Yesus: «Hantan kes! Ne Sexana; ‹Daama Ha'oneesik kaa'no. Bar baron shiipho› yistera tichchewa» yi. 11Es kabaasik Daabulos barin beyi; Ha'oosi wosiya dey tai'sera barin argasit faaser.
Yesus Misirachchuni Kaamaason Galiilak Mako Ephi
(Mar. 1:4-15; Luqa. 4:4-15)
12Yesus Yohannis taatoni keer girubaason odenayse Galiila hami. 13Naaziretnon beyfaat Zabiloonnewa Niftalemne asi awurajja Galiilani baarisi ha'ta fa Kifirnahom yistefa katamaassi hamme di. 14Es bar dey sinnay raajju Isayyas ekka yit makena kaamaas sinanakwa.
15«Zabulonni daas, Niftalemni daas,
Yordanosni yesalo baarisi ha'ta fa;
Aazabni meenir sina Galiila;
16Talmaassi fe daraas;
akama chaarefa bi;
kituni yirara faana daasta diise baassok;
chaarefa kessa beste.»
17Es wonaastaneen kabire Yesus: «Ha'oosi taato tai'sewa; Harmutiwa» iyaafe mako ephi.
Yesus Kurxummi Eshefe Meyanon Teege
(Mar. 1:16-20; Luqa. 5:1-11)
18Yesus Galiilaki baarisi tesha aatfet hep ayni meya Phexiros yistefe Simoonninnawa ayba Indiriyasninna kurxummi eshak yugudobesiison akaassi ha'sefeen bi. Baasso wostoos dey kurxummini esha. 19Yesus dey baassok: «Taneen ane yaafaat asuni meyanon Ha'oosi taatosi wolgutik nittotin zagunawa» yi. 20Baasso dey geregere yugudobesiison beyfaat barneen ane hamete. 21Estan aatte oom hep ayna ayna Zebdewosni naanggot sina Yaqobnawa Yohannisna asin bi. Ababesi Zebdewosneen ane goonuusta diisefaat yugudobesiison mai'sifeen biyaat teege. 22Baasso dey geregere goonuusewa ababesiisna asin beyfaat Yesusneen ane hamete.
Mettanni Meeni Faru
(Luqa. 6:17-19)
23Yesus baasso Ayhudni shiiphoni keyaasikitosi assit Ha'oosi taatoni misirachchuni kaamaason maket daraasasi fa showo tesa meroson zuutire fatit Galiilani daa zuuttambaase asiissi biratet feer. 24Yesus zagina chowaasi wolla Soriyani daa zuuttambaase asiissi odte. Showo tesa merok mette asuni meyanonnawa rakkokna oottere fe asuni meyanon, dey kiina ayyana ephna baassotin, akataki merobesi faana baassotinnawa laafani meyanonna zuuttire ephphe Yesusniki teshshesete. Bar dey zuuttambesiise asin fati. 25Galiilani daastaki, asir katamaassin, Yerusalemun, Yuudan, dey Yordanosni yeesalon showo dara Yesusneen ane hamete.
Currently Selected:
Matewos 4: YemsaNTL
Highlight
Share
Copy
Want to have your highlights saved across all your devices? Sign up or sign in
The Word for the World Northern Africa
