Luqaasa 20

Yesuusa mawutay Ayihuditayis oychchi maaqqeeza

(Mat. 21:23-27; Mar. 11:27-33)

1Pettii gallas Yesuusa Xoossa Keethi gancce asa tamaarssodarannee Wonggile markkattodar, qeese halaqitay, higge asitamaaritaynnee gade cimitay wolla eziko yi7ii, 2«Ne yhayitita aba mawuter oothizako nuus odoba. Yha mawuta neesi inigeezay oonoo?» yeegii oycceeza.

3E unttiko, «Taakka yinttan pettibaz oyccoda, ane taasi mahoytta. 4Xammaqqiza Waannisa xinqqatay Xoossapenne asappee?» yeegeeza.

5U woli gancce yeegii tobbeeza: «Xoossapp giiko yeezin, abis ammanekasa?» yeegoda.

6«Asapp giiko, asii ubbay Waannisa nabe maaqqizana ammaniza gishos nuna shuchchar shocoda.»

7Yey gishos, «Anappezako nu erooya» yeegii maheeza.

8Yesuusa mahii, «Yikkee, taakka aba mawuter yhayitita oothizako yinttis odaamii» yeegeeza.

Biitta wootii aqiz asay aaziso

(Mat. 21:33-46; Mar. 12:1-12)

9Yeypp guye, Yesuusa yeegii yha aazisa asayis odeeza: «Pettii asii woyine tukkeeza. Wootizitayis mattaye inggii gaame wode gam77ii ye7odayis hara gade yhanigeeza.#Isa. 5:1 10Woyne aafa maxiza woday hellin woyine aafaypp ezisi dakkod garkk biitta wootizitayiko fa aylla kiiteeza. Zin wootizitay ye aylla aykkii yhadhdhii kallo kushe dakkeeza. 11Ma maaqqikka hara aylla kiiteeza. Ma biitta wootizitay eza yhadhdhii, toochchii kallo kushe dakkeeza. 12Yhattekka mahii hayidzantho aylla kiiteeza. Wootizitay ezakka yhadhdhii madunthii woynnee ganccaypp gaxa kessii oleeza.

13«Woyine goday, ‹Yeezin ta ab ootho? An ma ta qadhdhiza ta na7a dakkoda; oonii eree u eza bonchchekka ashshaamii› yeegeeza.

14«Zin biitta wootizitay athay na7a bi7ii ‹Yhay eza laattodaya, yhana ye7oytta eza wolla wodhoda, yeeziko laatay nuus maaqqada› yeegii tobbeeza. 15Woyine ganccepp gaxa kessii wodheeza. Yeezin, woyine goday ye asita wayssadee? 16Yi7ii ye biitta wootizunthan wodhoda, woyine gadana hara asayis immada. Asay yeya si7eez wode ‹Shinchchalle yey garkk baz hanippee» yeegeeza.

17Yesuusa unttan dakkii bi7ii,

«Yeezin ‹Gimbbe keexxiza asay boreez shuchchay,

keeth muumer tookkii aykkiz Kirkiro garkk ubbapp adhiz shuchchi maaqqeeza›

ginttinttii xaafintteezayis birshshithay abba?#Maz. 118:22 18Ye shuchchyil afa wodhiz ubbay gaccinttoda, shuchchay ezal afa wodhdhiz ubbitaykka gaacinttoda» yeegeeza.

19Higge asitamaaritaynnee qeese halaqitay yha aazisay odintteezay unttal afa maaqqeezana erii ye wode eza aykkodayis koyeeza, zin woyayis yashitteeza.

Giira bagga shiiqeez oyich

(Mat. 22:15-22; Mar. 12:13-17)

20Yey gishos, Yesuusa gade aqisiza Oroome kaatayis aathii immadayis koyii e doonapp buuta qaala naagiza. Yeya polisodayis geeshsh as aazii qohiz asita eziko azazeeza. 21Kiitinttii yhanigeez asay, «Asitamaarayyo, neenii odizayinee tamaarssizay likke maaqqeeza, ma Xooss oge tumatithar tamaarssizannee oonakka shaakkoozana nu eriza. 22Hano zin, Oroome kaatayis giira giirodayis beezinennee beezoosa?» yeegii eza oycceeza.

23Zin E u wozina iitatitha ereezi gishos 24«Ane tana pettii santte beezoytta, Ezal afar yez misilaynnee sunthay o bazo?» yeegeeza.

U mahii, «Qeesaareessii» yeegeeza.

25E mahii, «yeezako, Qeesareesa Qeesaares, Xoossiisa Xoossis inggoytta» yeegeeza.

26Yey gishos, E maheezi malssaypp woyay tiina buuta denggodays danda7ekkaya. U e mahiz malssa malabaz gi si77e geeza.

Yhayiqopp denddo bagga

(Mat. 22:23-33; Mar. 12:18-27)

27Yhayiqopp denddo baaya yeegiz Saduqaawitaypp pettay pettay Yesuusako yi7ii,#Haw. O. 23:8 28«Asitamaarayyo, pettii asii machcho ekkii na7a yelekkazar yhayqqiko, e ishay ye machchato ekkii na7ita yelii fa ishayis kochchii ashshoday garkk Muse xaafeeza.#Nam7i. 25:5 29Yeezako laappun ishitay yeza. Bayiray machcho ekkii na7a yelekkazar yhayqqeeza. 30E kaalaykka izo ekkii na7a yelekkazar yhayqqeeza. 31Hayidzanthaykka yey garkk haneeza. Laappunitay ubbay yhay garkk hanii izo ekkeeza, zin na7a yelekkazar yhayqqeeza. 32Wurssithal asitakka yhayqqeeza. 33Yikkee, laappun ishitay izo ekkeez gishos yhayqqopp denddiza wode iza o machcho maaqqadee?» yeegii oycceeza.

34Yesuusa mahii, «Asay yha alamayill ekkizannee geliza. 35Zin yhayiqopp denddii ye7od alamayill yezodayis beeziza asay ekkooyannee gelooya. 36Unttii kiitanchcho garkk maaqqiz gishos tiinapp yhayqqenna. Yhayiqopp dendeez gishos unttii Xooss na7ita. 37Muse Goda, ‹Afraame Goda, Isaaqa Goda, Yayqqooba Goda› maaqqii tusha wora gancce xuuggiz tama taarika xaafeezayid yhayqqeez asay denddizana beeziza.#Kes. 3:6 38Ubbay ezis path yeza maaqqiz gishos E pathi yezitay Godaypp attin yhayqqeezitay Goda baaya» yeegii maheeza.

39Higge asitamaaritaypp pettay pettay, «Asitamaarayyo, lo77o baz ne odeeza» yeegeeza. 40Yeyppe guye, hara oych oyccodayis yashitteeza.

Kiristtoosa o na7a

(Mat. 22:41-46; Mar. 12:35-37)

41Ezaypp maaqqii Yesuusa unttiko, «Asay Kiristtoosa wayizii Dawute na7a yeegee? 42-43Abis giiko, Dawute fa ubbas fa mazmuure maxaafayid,

«Xoossay ta Godayiko ‹Ta ne morkkita;

ne tokay yedhdheez besse oothod gatho,

taapp ushachch baggar bettoba› geeza»

yeegeeza.#Maz. 110:1

44«Yikkee, Dawute Kiristtoosa, ‹Goda gi xeegittar ezis na7a wayizii maaqqee?› » yeegeeza.

45Woya ubbitay si7odar fa tamaaritayiko, 46«Aduss afila ma77ii yuushshe dosizitaypp, gabe gancce bonchcho sarotho, Ayihuditay Woosa Keetha bonchcho oyde, mokinttiza karakka bonchcho aqo koyiz higge asitamaaritaypp naaginttoyta. 47Unttikka am7itay kara kallosiza, geesh as aazii as beezodayis woosa adussiza. U iita pirdde ekkoda» yeegeeza.

Currently Selected:

Luqaasa 20: MeloNTL

Highlight

Copy