Jaan 14

Jesu bä 'nyʋfɔlʋ möa' Tʋa ‑nyɛɛ

1«'Ana plɛ 'nyɩ ‑taaralɩ; 'ba toro Nyɔsʋa plɛ, ‑bɛ 'ba toro bɩa 'mɩ plɛ. 2Kʋfë ‑sümlö 'na Tʋa nyüköli. Ima 'nyɩ ɩ 'ia 'saa ‑a bä nɩ, 'nyaa kä 'amɩ ‑gbala. 'Ana kʋfa 'n mö 'känyɩgla. 3Ama mi, ‑bɛ ama ‑nyɩgla 'ana kʋfa 'kä nɩ, 'nyaa 'ana 'klɛɛ jia, ‑bɛ ‑plɩɩlɩ 'n kʋa' nɩ, 'amä bɩa 'lɩ kʋ. 4‑Plɩɩlɩ 'n möa' 'a jre 'lɩ, 'anya jre 'ia 'nyʋfɔ.»

5'Iibäa' Tomaa nɩ: «'Pläkänyɔɔ, ‑plɩɩlɩ ‑möa', anyɩ 'lɩ ‑a jre. ‑Asɩ anya 'ia 'nyʋfɔ jre le?» 6Jesu nya ‑gbala 'ɔɔn: «'Mɔɔ bä 'nyʋfɔ#14.6 'nyʋfɔ: Jesu bä 'nyʋfɔlʋ möa' Tʋa ‑nyɛɛ, 'ɔɔ bä 'cɩcasa nyra 'klä. Jaan 10.9., 'nyaa bä 'cɩcasa nyra 'klä#14.6 'klä: 'Cɩca 'klä, 'klä dëdrä.. Nyɔɔ ‑o nyɔɔ jöa' Tʋa ‑nyɛɛ 'mɔɔ 'ɔ ‑srörö kälɩ. 7'Ama jre ɩ 'mɩ nɩ, 'anya ɩ bɩa 'na Tʋ jrea. 'Bala 'saarɩ ‑gälɩ 'anya 'ɔɔn jre, 'anya 'jä 'ɔɔn.» 8'Iibäa' Filipë nɩ: «'Pläkänyɔɔ, srara amɩ Tʋlɔ, ‑bɛ ana plɛ 'mä blö.» 9Jesu nya ‑gbala 'ɔɔn: «‑Mää ‑mlatɩkä 'nyraa 'amɔ 'nyɩ 'nyɛ, ‑bɛ ‑kaapɩɔ 'mɩ jre, Filipë? Nyɔɔ ma 'jä 'mɩ, 'ɔ 'a Tʋlɔ 'jä. 'Iɛ ‑daaa ‑maa: ‹Srara amɩ Tʋ le?› 10'Sɩrɩ 'n bäa' Tʋ 'lɩ ‑bɛ Tʋ bäa' 'mɩ 'lɩ nɩ, ‑nyɩ 'dara 'iin wii ‑a 'la? Wiili 'n ‑gbalaa' 'amɩ nɩ, ‑mää 'na 'doo plɛ 'klɩ 'nyɩ 'ba 'imɩ. Tʋlɔ bäa' 'mɩ 'lɩ nɩ, 'ɔɔ ‑fɛɛɛ 'jrʋpa. 11'Ba toro 'mɩ plɛ: 'N bä Tʋ 'lɩ, Tʋ nya bä 'mɩ 'lɩ. ‑Bakää 'ama 'nyɩ 'dara 'iin wii ‑a nɩ, 'jrʋpalä ‑fɛɛɛrɛa' 'ää 'ba 'jä ‑bɛ 'amä 'mɩ plɛtoro. 12'Tasɩrɩa 'cɩcasa 'n ‑gbala 'amɩ: nyɔɔlɔ toroa' 'mɩ plɛ nɩ, 'jrʋpalä 'n ‑fɛɛɛa', 'ɔnya bɩa 'ään ‑fɛa, 'kä 'ɔnya 'mɩ 'wʋsi, 'be Tʋa ‑nyɛɛ 'n 'mö#14.12 'Sɩrɩ Nyɔsʋa 'mä 'lɩ nyüüa 'fɩɔ mlɩ 'ba nɩ, nyüüa 'fɩɔ 'nyɩ 'iin jre ‑a jre, 'fɩɔwʋ Jesu nya 'mä 'kuaa ‑tɔrʋpɩɔ sɔ. 'Ɔa 'wʋnyɛrɛnyüüa 'mʋgbɛ 'nyɩ 'iin jre ‑a jre 'sɩrɩ Jesu 'nyɩa' 'lɩkäwlanyɔɔ bä, 'sɩrɩ 'ɔ ‑sia' 'nɩmɩ nyɔɔ 'wʋ. 'Ɔ sɔa' 'kuaabre nɩ, 'kasa Nyɔsʋaa 'Jʋ 'ɔ bä. 'Ɔ ma bäa' 'lɩ nɩ, ‑plɩɩlɩ 'ɔ kʋa' 'ia 'doo 'ü 'järä 'ɔɔn; ‑maa 'ɔ sɔa' 'kuaabre nɩ, 'ɔ ‑gbaala 'ɔa 'Nyüna ‑Susu 'pläa 'fɩɔ ‑gälɩ 'kä. 'Unya bä nyüülü kä 'fɩɔ toroa' 'ɔɔn plɛ 'lɩ.; 13‑bɛ diili kä 'fɩɔ 'amäa' 'na 'nyrɩklɩ 'betre, 'nyaa 'iin nʋa, ‑bɛ nyüü 'mä 'iin 'jä 'sɩrɩ Tʋ 'bʋaa' 'wliklɩ. 14'Ama 'bete dɛɛ 'na 'nyrɩklɩ, 'nyaa 'amɩ 'ɛɛn ‑nyɩa.

15«'Ama ‑wa 'mɩ nɩ, 'ba ‑träärälɩ 'na 'papawii, 16‑bɛ 'mä Tʋ ‑gbala 'ɔmä 'amɩ ‑gbajinyɔɔ ‑moloo#14.16 ‑gbajinyɔɔ ‑moloo: Grɛɛkëwiili: «‑Tɔɔɔpanyɔɔ, plɛmlɩpanyɔɔ, 'klüjraranyɔɔ». ‑nyɩ; 'ɔ nyra 'amɔ 'mä ‑wälɩkʋ 'plɔʋplɔʋ. 17'Ɔɔ bä ‑Susulu sraraa' 'cɩcasa. 'Plä 'nyɩ 'lɩ ‑a bɩa 'ü 'nyiere 'uun 'klɩ, 'be 'ünyɩ 'uun jre ‑a jre ‑bɛ 'änyɩ 'jä 'uun 'wʋ ‑a. ‑Maa 'amɔlɔ nɩ, 'a jre 'uun: 'u nyra 'amɩ kʋwälɩ, 'unya 'amɩ 'lɩbäa. 18'Nëmä 'amɩ ‑gbokuidɛɛ 'lɩ ‑a tɩ, 'nyaa dɛrɩ 'blööa. 19Jrüü jiea 'mlɩ, 'plä ‑ka ‑nëmä 'mɩ ‑a 'jä, ‑maa 'amɔlɔ nɩ, 'anya 'mɩ 'jäa. ‑Bɛ 'n bäa' 'lɩ nɩ, 'ana 'mʋgbɛ 'anya 'lɩbäa. 20'A 'ia 'taɩn 'lɩ 'amä 'saa jre 'sɩrɩ 'n bäa' 'na Tʋ 'lɩ, ‑bɛ 'a bäa' 'mɩ 'lɩ, ‑bɛ 'na 'mʋgbɛ bäa' 'amɩ 'lɩ. 21Nyɔɔlɔ poa' 'na 'papawii 'nyakli ‑bɛ ɔ ‑trääräa' 'lɩ 'iin nɩ, 'ɔɔ ‑wa 'mɩ; ‑bɛ nyɔɔlɔ ‑waaa' 'mɩ nɩ, 'na Tʋ nya 'ɔɔn ‑waa, 'na 'mʋgbɛ 'nyaa 'ɔɔn ‑waa, 'kä 'nyaa 'ɔɔn 'na nyufa srara.» 22Judaa, ‑mää Isëkarioa nɔ ‑a, nya ‑gbala 'ɔɔn: «'Pläkänyɔɔ ‑asɩ 'i nʋ ‑bɛ ‑daa amɔ ‑nëmä ‑na nyufa 'klɩsrara, ‑bɛ ‑nyɩ srara ‑na nyufa nyüüa 'fɩɔ 'klɩ le#14.22 Juifëa plɛ nɩnɩa Mesii ma ji ɩ nɩ, 'ɔa 'klüa 'fɩɔ 'ɔmä ja, nyüüa 'fɩɔ 'mä 'ɔɔn 'jä; 'ɔmä nyüülü 'nyɩa' juifë bä 'üa ‑gä ‑tʋ, ‑bɛ 'ɔmä 'sɔɔwʋ Israɛɛlë 'pa.?» 23Jesu nya ‑gbala 'ɔɔn: «Nyɔɔ ma ‑wa 'mɩ nɩ, 'ɔnya 'lɩ 'na mlɩa wii ‑trääräa, 'kä 'na Tʋ nya 'ɔɔn ‑wa; anya 'ɔa ‑nyɛɛ jia, 'kä anya 'lɩ ana kʋfa nrörö. 24Nyɔɔlɔ 'nyɩ ‑trääräa' 'lɩ 'na mlɩa wii, 'ɔnyɩ 'mɩ ‑a ‑wa. ‑Bɛ wiili 'a nröröa' 'na mlɩ 'wli nɩ, ‑mää 'na 'mʋgbɛa plɛklɩa wii ‑a, ‑maa 'na Tʋlɔ blɔa' 'mɩ 'ɔa mlɩa wii bäsaa. 25'Nyaa 'amɩ 'iin ‑gbala dotro 'sɩrɩ 'n ‑ka bäa' 'ana ‑tɔrʋpɩɔ. 26‑Maa ‑Gbajisusulu, u bäa' 'Nyüna ‑Susu, u Tʋ 'mäa' 'na 'nyrɩklɩ jara nɩ, 'unya 'amɩ diia 'fɩɔ 'kpɩaa, 'kä 'unya 'amɩ wiili 'kä 'fɩɔ 'n ‑gbalaa' 'amɩ plɛpa. 27'N tɩɛ 'amɩ plɛgälɩflɛrɛkʋ ‑gba, 'n ‑nyɛɛ 'amɩ 'na plɛgälɩflɛrɛkʋ; ‑mää 'sɩrɩ 'plä ‑nyɛɛa' 'imɩ nɩ, ‑mää 'sɩ 'nyɩ ‑nyɩ 'amɩ 'iin. 'Ana plɛ 'nyɩ ‑taaralɩ 'plɔʋ, 'ɛnyɩ ‑gbagbakä bɩa. 28'A 'nu 'mɩ 'wli, 'nyaa 'daa: ‹Mö 'n mö ‑bɛ 'mä ‑srɩɩ 'ana ‑nyɛɛ dɛrɩ 'blöö.› 'Ama ‑wa ɩ 'mɩ nɩ, dɔrʋ nya 'amɩ 'blaa 'n möa' Tʋa ‑nyɛɛ, 'be 'ɔ 'bʋa 'ɔnya ‑si 'mɩ 'wʋ. 29'Nyaa 'amɩ 'iin ‑gbala 'sɩrɩ 'i ‑kaaŋlʋa' 'lɩjrä, 'ia 'taɩn 'lɩ ima jrälɩ nɩ, 'amä 'iin wii 'dara. 30'Nyraa 'amɔ ‑ka ‑nëmä ‑srɩɩ 'wʋ ‑a dɛtrɛ, 'be nyɔɔlɔ 'kamaa' 'plälä kʋa' ‑pɩ#14.30 nyɔɔlɔ 'kamaa' 'plälä kʋa' ‑pɩ: Sataan bäsaa. 'ɔɔ jö; 'ɔnyɩ 'na ‑gbanʋdɛɛ ‑a kä. 31‑Maa 'plä 'mä 'saa jre 'n ‑wa Tʋ ‑bɛ wiili kä 'fɩɔ Tʋ 'daaa' ‑a nʋa', 'iin 'n nʋ. 'Ba sɔwʋ amä mi!»

Currently Selected:

Jaan 14: Bakwé

Highlight

Copy