1 KORINTUS 11
11
1 #
1 Kor. 4:16; Flp. 3:17 Pinahangi panggeokangku, assimpole todo' nakke minahang ri panggeokanna Almase.
Belo-belo ri ulu bahine
11:2-16
2Nakke appakala'biri ri kau, saba' lalang risikuanna kau tulusu ngu'rangi ri nakke na a'bitantang jarre' riajarang kupabattu injo mange ri kaui. 3Mingka kukaa'raki, solanna muisseki passala inni, iamo intu Ulu battu risikuanna bura'ne iamo intu Almase, ulu risikuanna bahine iamo intu bura'ne na Ulu battu ri Almase iamo intu Allataala. 4Sikonjo bura'ne ngera dowaang iyareka tuassare injo panjanjang surangang labohongi ulunna, injo latua-tuai ulunna. 5Mingka sikonjo bahine ngera dowaang iyareka tuassare panjanjang surangang gele labohongi ulunna injo latua-tuai ulunna, saba' ia assimpolei bahine lagomisi injo uhu'na. 6Saba' ampa bahine inni gele a'ra' labohongi ulunna, injo ia parallui lagomosi uhu'na. Mingka ampa mange ri bahine injo se'rei nudaa ma'nassana ri pappa' iyareka rigomisi uhu'na, injo parallui labohongi ulunna. 7#Kej. 1:26-27Saba' bura'ne inni gelejuai parallu labohongi ulunna: Ia appakaassaui ja'bangang na kala'birang Allataala. Mingka bahine inni appakaassaui kala'birang bura'ne. 8#Kej. 2:18-23Saba' bura'ne inni assala'na gele nubattu ri bahine, mingka bahine inni assala'na nubattu ri bura'ne. 9Rie' pole, bura'ne inni gele ripaa'jari kanara bahine, mingka bahine inni ripaa'jari kanara bura'ne. 10Injomo saba'na, bahine inni parallui make tanra kala'birang ri ulunna rikanara sikonjo malaeka'. 11Manna appakonjo, lalang ri Karaeng Isa tide' bahine ampa tide' bura'ne na tide' bura'ne ampa tide' bahine. 12Saba' assimpole bahine inni assala'na nubattu ri bura'ne, appakonjo todo'i bura'ne inni rianakangi battu ri bahine; na iangase'na assala'na nubattu ri Allataala.
13Kaui tommo timbang-timbangi: Siratangika bahine inni ngera dowaang mange ri Allataala ampa gele labohongi ulunna? 14Gelejua alang inni lapappiissekangi mange ri kaui ma'nassana iamo nudaa mange ri bura'ne, ampa ia lambere uhu'na, 15mingka ma'nassana iamo kala'birang mange ri bahine inni, ampa lambere uhu'na? Saba' uhu' risareangi mange ri bahine inni laa'jari bohong.
16Mingka ampa rie' tau a'ra' lagagai, kambe iyareka sikonjo jamaah ri Allataala gele rie' kabiasaang appakonjo.
Kabiasaang daa lalang ri Panganreang Karaeng
11:17-34
17Lalang ripassala inni, nakke gelea akkulle appakala'biri ri kau, saba' pa'rappungammu gele appabattu kabajikang, mingka appa'rie'i nudaa. 18Saba' ripakaramulana kulangngere ma'nassana ampa a'rappungiko assimpole jamaah, rie' passisala pahangang ri kau, na passala injo so'di lohena kukatappaki. 19Saba' ri kau parallui rie' passisalapahangang, solanna kaissekangi sallo' inai ri kau attahang lalang ripasso'ri. 20Ampa asse're-se'reiko, geleko asse're-se'rei langanre ri Panganreang Karaeng. 21Saba' ripanganreang injo sikuanna tau kanrena to'jua lakanre la'bi riolo, jari rie' tau pa're na tau maraeng injo bengo. 22Apa tide' sapo kale-kalemu langanre surang langinung? Iyareka apa a'ra'ko attua-tua jamaah Allataala surang laappakasiri' ri tau tide' injo apa-apanna? Apa nuparallu lakupau mange ri kaui? Appakala'biri ri kau? Lalang ri passala inni nakke gelea appakala'biri.
23Saba' apa numaeng kutarrusang mange ri kaui, maeng kutarimai battu ri Karaeng Isa, iamo intu ma'nassana Karaeng Isa, ribangngi hattunna Ia laripassareang, ngalle roti 24na maeng injo Ia lapamasa barakkakangi roti injo; Ia latu'be-tu'bei na appaui, ”Iamo inni batangkalengKu, nuripassareang mange ri kaui; geokangi inni laa'jari pappiu'rangi mae ri Nakke!” 25#Kel. 24:6-8; Yer. 31:31-34Appakonjo todo'i Ia ngalle santeng, rimaenna nganre, ampai appau, ”Santeng inni iamo intu se're passitallikang bau nurisegele surangang raraKu; geokangi inni, ampa muinungi, injo a'jari pappiu'rangi mae ri Nakke!” 26Saba' ampa nganreiko roti surang nginungiko ri santeng inni, injo mupappissekammu kamamteanna Karaeng sa'genna Ia rie' pole. 27Jari, inai jua lalang ta'ra gele siratang langanre roti iyareka langinung ri santenna Karaeng Isa, ia dorakai mange ri tubuna surang ri nyahona Karaeng Isa. 28Injomo saba'na, parallui sikuanna tau laparessa kalenna riolo na maeng injo ampamu nganre roti surang nginung battu ri santeng injo. 29Saba' inai nganre surang nginung manna gele laakui tubuna Karaeng, ia appabattui hukkungang mange ri kalenna. 30Injomo saba'na lohe ri kaui tulamma surang tugarring, na gele siso'di' tumate. 31Ampa ditte riparessai riolo kalenta, hukkungang injo gelei tattaba mae ri ditte. 32Mingka ampa ditte nguppa hukkungang battu ri Karaeng, injo riajaraki, solanta geleki rihukkung assurangang lino inni.
33Injomo saba'na, Urang siana'ku, ampa asse're-se'reiko langanre, parralluko assitajangi. 34Ampa rie' tau pa're, baji'mu ia nganre riolo ri saponna, solanna andako asse're-se'rei larihukkung. Sikonjo passala maraeng lakuatoroi, ampa rie'a.
Currently Selected:
1 KORINTUS 11: LAI_SLY
Highlight
Copy
Compare
Share
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)