1 KORINTUS 2
2
1Appakonjo todo'i, rihattungku rie' mange ri kau, Urang siana', nakke gelea rie' laappau-pau nugele toje' iyareka pangisse' langkasa laappabattu harasiana Allataala mange ri kau. 2Saba' maeng kutappukimu gele kupappiissekang ri kau rimaraenganna Isa Almase, iamo intu Ia turisalli' injo. 3#Suro-suro 18:9Nakke maeng todo'ma battu mange ri kau lalang rikalammaang surang sanna' malla' na bentere. 4Baji' injo pauku iyareka kareba kupala'bang injo gele kupabattu lalang ripau-pau pangisse' nuappakatappa', mingka surang tappa' rikahasana Nyaha Tangkasa, 5solanna katappakammu gelei assandere ripangisse' rupatau, mingka mange rikagassinganna Allataala.
Pangisse' nunaba injo
2:6-16
6Manna mamo appakonjo kambe appala'bang kareba pangisse' mange ri iyai tubaji' injomo tappa'na, iamo intu pangisse' nugele battu ri lino inni, na nugele battu ri tukahasana lino inni, iamo intu tukahasa nularipakatide' injo. 7Mingka kareba nutapala'bang iamo intu pangisse' ri Allataala nuta'lengu' surang harasia, rigelenapa ripaa'jari lino inni, maeng lapakasadiamu Allataala tujunna kala'biranta. 8Gele rie' battu ri tukahasana lino inni akkulle laisse'i pangisse' inni, saba' so'di iyai laisse'i gelei lasalli' Karaeng la'biri injo. 9#Yes. 64:4Mingka assimpole rie' ta'ukiri:
”Nugele minang kajanjangang ri mata, na nugele minang kalangngerang ri toli, na nugele minang ammumba lalang ri atina rupatau inni: Sikuanna nulapakasadia Allataala tujunna ri iyai tungamaseang injo mange ri Ia.”
10Saba' mae ri ditte Allataala maeng assaremu tanra ri Nyaha Tangkasa, saba' Nyaha Tangkasa injo laparessai iangase'na, injo pole nutassa'bu injo lalang ri Allataala. 11Inaimo ri rupatau inni laisse'i, apa nurie' lalang ri kalenna rupatau inni passangadinna nyaha rupatau to'jua nurie' injo ri ia? Appakonjo todo'i gele rie' tau laisse'i, apa nurie' ri kalenna Allataala maraenganna Nyaha Allataala. 12Ditte geleki narima nyaha lino inni, mingka nyaha assala'na nubattu ri Allataala, solanna ditte riisse'i, apa nulapassareang Allataala mae ri ditte. 13Saba' kambe tatasserei sikonjo passala nugele kajanjangang mange ri iyai tunguppa injo Nyaha Allataala, kambe appau ripassala barakka' Allataala surangang pau nugele ripangajarang mae ri kambe kanara ripangisse' rupatau, mingka rikanara Nyaha Tangkasa. 14Mingka ri rupatau kasara inni gele narima apa nubattu ri Nyaha Allataala, saba' passala injo se'rei kaba'gaang ri ia; na ia gele akkulle lapahang, saba' passala injo akkulle ritassere ampa rie' Nyaha Allataala. 15Mingka rupatau nguppa injo Nyaha Allataala latassere iangase'na mingka ia gele ritassere ri tau maraeng. 16#Yes. 40:13Saba': ”Inaimo akkulle laisse'i pikkiranna Allataala, sa'genna akkulle appiu'rangi ri Ia?” Mingka ri kambe rie' pikkiranna Almase.
Currently Selected:
1 KORINTUS 2: LAI_SLY
Highlight
Copy
Compare
Share
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)