2 KORINTUS 11
11
1Sanna'i baji'na, ampa sabbariko mange rikaba'gaangku nuki'di' injo. Toje'i kaui sabbara mae ri nakke! 2Saba' nakke nyannung mange ri kaui surangang panyannung ri Allataala. Kanara nakke maeng appa'bajuang mange ri kaui se're bura'ne iamo intu Almase langurang ri kau assimpole ana'rara tangkasa mange ri Ia. 3#Kej. 3:1-5, 13Mingka malla'a, sikalinna pikkirammu ripa'lingui battu rikamallangang toje'mu mange ri Almase, assimpole Hawa ripa'maling-malingi ri saa injo rikasara'dekanna. 4Saba' sannangi juako, ampa rie' se're tau battu appala'bang Isa maraengang battu rinutapala'bang injo, iyareka appala'bang mange ri kaui Nyaha maraeng battu rinumaeng mutarima injo iyareka Injili maraeng battu rinumaeng mutarima injo. 5Mingka assituru' panguppaku manna siso'di' tide' jua kala'bianna risikonjo suro battu ri nakke. 6Toje'i nakke gelea ngisse' appau-pau, mingka gelei appakonjo ripassala'na kasara'dekangku; saba' kambe maeng tapappiissekangi mange ri kaui risikuanna hattu na lalang ri iangase'na passala.
Paulus gele kalenna jua lapariati
11:7-33
7Apa nakke anggeokang nusala, ampa kupakatuna kalengku laappakala'biri ri kau, saba' nakke appala'bang Injili Allataala mange ri kaui na gele juai parallu mubajara? 8Sikuanna Jamaah maraeng assimpolekalena tukurapusu na narima panambai katallasang battu ri iyai, solanna nakke akkulle anjampangi ri kau! 9#Flp. 4:15-18Na rihattungku lalang rikakurangang ritangnga-tangngamu, gelea appakasusa manna se're tau, saba' nukurang ri nakke, lapakaganna'i risikonjo urang siana' rie' injo battu ri Makedonia. Lalang ri iangase'na passala kujagai kalengku, solanna andai a'jari pamberaki ri kau. Na nakke tulusu laa'geo' appakonjo. 10Saba' kanabaang Almase lalang ri kalengku, kupattantui ma'nassana pa'bangga-banggaangku injo gelei lariampang manna ri inai jua ri kampong-kampong Akhaya. 11Ngura nagele? Barang nakke gelea ngamaseang ri kau? Laisse'i Allataala.
12Mingka apa kugeokang, latuli kugeokangi lamolo'-molongi ri iyai tua'boja injo hattu lalapappijanjangangi ma'nassana iyai injo assimpole juai kambe lalang ripassala a'bangga-bangga. 13Saba' tau injo sanging suro-suro palusu, sanging pajama jekkong, a'geo' assimpole suro-suro ri Almase. 14Passala injo gelejuai parallu appakalannasa, saba' manna Ibilisi a'geo' assimpole todo'i malaeka' Sinara. 15Jari, gelejua se're passala mara'-maraeng, ampa sikonjo pajampanginna a'geo' assimpole pajampangi kanabaang. Kala'busang ri iyai laassimpole surangang panggeokanna.
16Sikalipa pole: Andalalo rie' tau larapanga tau ba'ga. Ampa kau pole anrapang appakonjo ri nakke, tarimalaloa assimpole tau ba'ga solanna nakke rie' todo' pa'bangga-banggaangku manna siso'di'. 17Apa nukupau injo, nakke appau gele assimpole se're tau appau assituru' pau Karaeng, passangadinna assimpole se're tau ba'ga rie' kajarrekanna ma'nassana ia akkullei bakka' sumanga'. 18Saba' lohemo tau a'bangga-bangga assimpole ta'ranna tau lino a'bangga-bangga, nakke a'ra' todo'a a'bangga-bangga. 19Saba' sabbariko ri tau ba'ga, saba' kasara'dekammui: 20saba' kasabbarammui, ampa lapaa'jariiko tau ata, ampa lapa'maling-malingiko tau, ampa lakahasaiko tau, ampa rie' tau attampo-tampo mange ri kaui, ampa rie' tau lalappa'ko. 21Manna sarro siri'ku parallui kuani ma'nassana lalang ripassala appakonjo kambe sanna' lammaba.
Mingka ampa tau maraeng injo barani lapaa'bangga-banggaangi rise're passala, injo manna nakke – nakke appau lalang rikaba'gaang – barani todo'a! 22Barang iyai injo tau Ibrani? Manna nakke tau Ibrani! Barang iyai injo tau Israele? Manna nakke tau Israele. Barang iyai injo tuina Abraham? Manna nakke tuina todo' Abraham! 23#Suro-suro 16:23Barang iyai injo pajampangi ri Almase? – nakke appau assimpole tau pongoro – nakke la'bipa pole! La'bi loheang karesoku; la'bi sannakang nakke ripaantama' ri pattarungkuang; nakke nguppa panra'bung nugele siratang; biasa todo'a lalang rikabalaang langalle nyaha. 24#Ul. 25:3Pillimanga rirabung ri tau Yahudi, ampa rirabunga tappatampulo kurang se're rabungang, 25#Suro-suro 14:19, 16:22pintallunga sissa rirabung, pinsikali ribundu' surangang batu, pintallunga tallang ri lopi kudongkoki injo, siallo sibangngi ammanyu'-manyu' ritangnga tamparang. 26#Suro-suro 9:23, 14:5Lalang ripa'lingkaangku nakke sanging nguppa a'ba bakka' surang palukka', kasilakaang battu ri tau Yahudi surang battu ri tau gele injo Yahudi; kasilakaang ri kota, kasilakaang ri parang luara, kasilakaang ritangnga tamparang, na kasilakaang battu risikonjo urang siana' palusu. 27Nakke sanna' pakkaresoku surang anjama terasa; biasa todo'a gele tinro; pa're surang tirere; nakke biasa todo'a appuasa surang gele a'baju, 28na manna gelei kupau passala maraenganna pole, erang allo-alloku, iamo intu pangamaseangku mange risikonjo jamaah. 29Ampa rie' tau appisa'ring mangngang, gelejua nakke appisa'ring minahang lamma? Ampa rie' tau tatto'ro, gelejua nakke appisa'ring bissa' atengku kanara pa'risi?
30Ampa laparallua a'bangga-bangga, injo nakke a'bangga-bangga lalang rikalammaangku. 31Allataala, iamo intu Amma ri Isa Karaengta, turipakala'biri injo situlusu'na, laisse'i ma'nassana nakke gelea a'bura-bura. 32#Suro-suro 9:23-25Ri Damsyik gubernur turiangka' injo ri karaeng Aretas assuroi mange risikonjo pajaga ri kota Damsyik laanjakkala ri nakke. 33Mingka lalang rise're karanjeng nakke ripanaung battu rise're tontongang ansulukang tembo'na kota injo na ri appakonjona akkullea salama' battu ri limanna.
Currently Selected:
2 KORINTUS 11: LAI_SLY
Highlight
Copy
Compare
Share
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)