PAU-PAUWANNA SIKONJO SURO-SURO 24
24
Paulus ri a'rakanna Feliks
24:1-27
1Limangallo maenna injo rie'mu Imang Bakka' Ananias surang sikonjo tutoa-toa na se'rei pa'bisara turiareng Tertulus. Mange ngase'i ri gubernur na nalapabattui pappassalanai mange ri Paulus. 2Rikeo'i Paulus mange ri a'rakanna na pakaramulamu ripassala ri Tertulus, lakua, ”Feliks tumala'biri'ku, passabakang rikaresotamo natulusu rie' kasannangang ri antee-tee mae, na rikabajikantamo lohe sikalimo nubaji' rigeokang ri bangsa inni. 3Iangase'na injo tulusui na ri antee-tee juai mae kambe tapanai' sukkuru'ba. 4Mingka solanna andamo lohe hattummu la'busu, kuerai, solanna ripilangngerikang sinampe' lalang rikabajikanna nyahamu nubaji' injo kaissekanna. 5Kambe tauppai ma'nassana tau inni iamo ngerang garring a'lele, se'rei tau appa'rie' papparukkaang risikuanna tau Yahudi risibatu lino na ma'nassana ia se'rei ponggaha risossorang tau Nasrani. 6Ampa pole lasoba-sobai lapakarammasa katangkasanna Sapo Allataala. Injomo saba'na tajakkalai na a'ra'i taadeli assituru' hukkung Tora'ba. 7Mingka ponggaha tantara Lisias rie'i lapisangkaikang na laalle passai battu ri limamba, 8maeng injo lasuroi sikuanna tau appitina mange ri ditte. Ampa dittemo riparessai, akkullemu riisse' sikonjo pappitinaba mange ri ia.” 9Tau Yahudi injo pole lasokongi pappitina injo rilapauna ma'nassana palakara injo appakonjo toje'i.
10Gubernur injo a'bisara jo'jo'i mange ri Paulus ma'nassana ia akkulle a'bisara. Jari appaui Paulus, ”Kuisse'i ma'nassana attaungammo sallomu a'jari hakking ri tau lohe inni. Injomo saba'na gelema bata-bata kusa'bii palakaraku inni ri a'rakammu: 11Kau akkullei mupattantu ma'nassana gelepai la'bi sampulorua allo lappasa'na nakke mange ri Yerusalem laassambajang. 12Gelekale minang rie' tau lauppaa a'besere mange rise're tau iyareka a'bua' papparukkaang, baji' ri Sapo Allataala, iyareka ri sapo passambajangang maraeng, iyareka ri antee-tee mae tampa' ri kota inni. 13Iyai gele akkulle lapappijanjangang mange ri kau apa nulapappitinaang injo mae ri nakke. 14Mingka kulambusi kalengku mange ri kau ma'nassana nakke nyomba mange ri Allataalana puwa-puwaba ri minahangku ri Pa'lalangang Karaeng, iamo intu Pa'lalangang nulaareki injo se're ajarang bau. Nakke tappa'a mange risikuanna nuta'ukiri injo lalang ri hukkung Tora' na lalang ri kitta'na sikonjo nabbi. 15Nakke rie' panrannuangku mange ri Allataala, assimpole todo' iyai intu ma'nassana larie' katallasang muliang risikuanna tau mate, baji' injo tau naba iyareka tau gele injo naba geo'na. 16Injomo saba'na nakke tulusu kupa'gassing-gassingangi attallasa lalang ri ati tangkasa ri a'rakanna Allataala na rupatau. 17#Suro-suro 21:17-28Sungka'i attaungammo sallona mulianga pole mange ri Yerusalem langerang passare mange ri sikampongku na laassare passidakka. 18Rihattu kugeokanna ngase' injo, rie'mo lohe tau Yahudi battu ri Asia larapikanga lalang ri Sapo Allataala, sungka'i maemmo kutangkasi kalengku, gele lohe tau na tide' todo' karukkaang. 19Iyaimo intu sitoje'na parallu lamange ri kau ri inni na lapau palakarana, ampa pade' rie' passilolonganna mae ri nakke. 20Mingka lappasammu sikuanna tau rie' injo ri inni rikonni-konnina lapappiissekangi geo' daa anteekamua lauppa, rihattungku riparapa' mange ri Pangadelang Agama. 21#Suro-suro 23:6Iyareka ma'ringi kanara ripau nukupa'nga'ngarang injo, rihattu ammentengku a'bora tangnga ri iyai, iamo intu: Kanara passala attallasa'na muliang tau mate inni, nakke allo inni riparapa' mange ri kau.”
22Mingka Feliks tubaji' pangisse'na ri Pa'lalangang Karaeng, lapaono'i riolo palakarana na appaui, ”Rie'pai ponggaha pajaga Lisias ri inni, ampai kutappuki palakaramu.” 23Jari ia lasuromu tantara injo tulusu latahangi Paulus, mingka ritahang pantara juai, nagele todo'i ripisangkai baha'-bahaanna mange latilingi iyareka lajampangii.
24Sungka'i sikurangallomo sallona, rie'mu Feliks surangi Drusila bahinenna, se'rei tau Yahudi; ia lasuro keo'i Paulus, maeng injo lapilangngerimu ia a'bisara passala katappakang mange ri Isa Almase. 25Mingka rihattunna Paulus a'bisara passala katojekang, panahangang napasu daa na pangadelang larie' injo sallo', a'jari malla'i Feliks na lakua, ”Sa'gennamo injo riolo na konni-konnina a'lampamoko, rie'pa isse' hattu baji', nakusuro keo'ko.” 26Rihattu injo ia tajalli ma'nassana Paulus laassare doe' mange ri ia. Injomo saba'na ia sanging lasuro keo'i laa'bisa'-bisara mange ri ia.
27Mingka ganna'mu ruantaung, Feliks risambei ri Perkius Festus, na laa'bojai nyaha baji' mange ri tau Yahudi injo, Feliks lalappasangi Paulus tulusu ritarungku.
Currently Selected:
PAU-PAUWANNA SIKONJO SURO-SURO 24: LAI_SLY
Highlight
Share
Compare
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
