GALATIA 2
2
Paulus riakui risikonjo suro
2:1-10
1 #
Suro-suro 11:30, 15:2 Sampulo patantaung ribokoanganna mae, nakke a'lampaa pole mange ri Yerusalem surangi Barnabas na manna Titus kuurang todo'i. 2Nakke a'lampa assituru' pappisa'bi ri Allataala. Mange ri iyai kusesei Injili kupala'bang injo mange risikonjo bangsa gele injo Yahudi – lalang ri pa'bisaraang akkale-kale mange ri iyai turipattoa injo –, solanna anda tide' matu-matunna nakke akkareso iyareka maeng akkareso. 3Mingka manna appakonjoi Titus, tuminahang injo ri nakke, injo ia se'rei tau Yunani, mingka ia gele risuro passa laassunna'. 4Toje'i rie' tumassa-massa battu ri urang siana' palusu antamaki injo, iamo intu tuantama' sa'bu-sa'bu injo lamarampa' rikalaloasaanta nuriuppa injo ri Isa Almase, solanna rita'ra appakonjonai iyai injo akkulleki lapaa'jari ata. 5Mingka manna siso'di' gelekang a'ra' soho' surang tunru' mange ri iyai, bisannabali katojekang Injili akkullei tulusu ammari ri kau. 6#Ul. 10:17Passala ri iyai turirapang injo laripattoa – anteekamua pattolongannai riolo, injo gelei parallu ri nakke, saba' Allataala gelei mile-mile tau – manna injo anteekamua, iyai injo gelei assuro passa manna se're passala mae ri nakke. 7Sibale'na, iyai injo lajanjangi ma'nassana maeng ripassareammu pappala'bangang Injili mange ri tau gele injo assunna', assimpole mange ri Petrus ri tau assunaki injo 8– saba' Ia tumaeng injo assare kagassingang mange ri Petrus a'jari suro ri tau assuna' injo, Ia maeng todo'i assare kagassingang mae ri nakke lamange ri tau gele injo assunna'. 9Sungka'i lajanjang pangamaseang nuripassareang injo mae ri nakke, injo Yakobus, Kefas surang Yahya, turirapang injo benteng panyanggana jamaah, akkembelimaimu mae ri nakke surang ri Barnabas assimpole se're tanra passamaturukang, solanna kambe a'lampa mange ri tau gele injo assunna' na iyai a'lampa mange ri tau assunnaki injo; 10mingka kambe parallu sanging pangu'rangi mange ri tau kaasi-asi injo na toje'i injomo sukku' a'ra' kugeokang.
Paulus assigaga surangang Petrus
2:11-14
11Mingka rihattunnamo Kefas ambattu mange ri Antiokhia, nakke lambusui kugaga, saba' ia salai ta'ranna. 12Saba' rigelenapa rie' sikura tau kalompo'na Yakobus, ia nganrei se're mejang surang sikonjo urang siana' gele injo assunna', mingka sungka'i ambattuimo, ia a'lampai na lakaderei ngase'i saba' malla'i mange ri urang siana' assunnaki injo. 13Tau Yahudi maraeng tappa' injomo minahangi todo'i a'geo' munape' surang ia, sa'genna Barnabas minahang todo'i kamunapekannai. 14Mingka hattu kujanjanna ma'nassana panggeokanna injo gelei assituru' surangang katojekang ri Injili, nakke appau mange ri Kefas ri a'rakannai ngase', ”Ampa kau, se're tau Yahudi, tallasa assimpole gele tau Yahudi na gelei assimpole tau Yahudi, anteekamua kau akkulle lamassa-massa risikonjo urang siana' gele injo assunna' laattallasa assimpole tau Yahudi?”
Numakase're, mange pole ri tau Karisteng lo'lorang Yahudi
2:15-21
15Assituru' kalaherang, kambemo tau Yahudi na gele tau doraka battu ri tau maraeng. 16#Mzm. 143:2; Rom. 3:20, 22Ditte ri isse'i ma'nassana gele rie' manna se're tau ripa'naba kanara hukkung Tora', mingka patteteang katappakang jua lalang ri Isa Almase. Injomo saba'na, manna kambe maeng tappa'kang mange ri Isa Almase, solanna kambe ripa'naba kanara tappa' lalang ri Isa Almase nagele rikanara anggeokang hukkung Tora'. Saba': ”Gele rie' manna se're tau ripa'naba” karana rianggeokanna hukung Tora'. 17Mingka ampa kambe to'jua, rihattumba apparri-parri ripa'naba lalang ri Almase kaissekangi sanging tau dorakai, apa passala injo a'battuangi ma'nassana Almase lapaa'jarikang tau doraka? Gelei appakonjo. 18Saba', ampa nakke appaenteng muliang apa numaeng kusosara, kupappisa'bikangi kalengku assimpole tugele minahang ri hukkung Tora'. 19Saba' nakke maemma mate ri hukkung Tora', solanna nakke tallasa ri Allataala. Nakke maemma risalli' surangang Almase; 20nakke attallasa, mingka gelemo nakke jua attallasa, passangadinna Almase attallasa lalang ri nakke. Tallasa kuerang injo konni-konnina ri mata kasara iamo intu tallasa rikanara katappakang lalang ri Ana' Allataala tumaeng ngamaseang injo mae ri nakke na lapassareang kalenNa ri nakke. 21Nakke gelea nolla' pangamaseang ri Allataala. Saba' so'di injo rie' pappa'naba patteteang ri hukkung Tora', injo tide' matu-matunna kamateanna Almase.
Currently Selected:
GALATIA 2: LAI_SLY
Highlight
Copy
Compare
Share
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)