YAHYA 11

Lazarus ripakaattallasa muliang

11:1-44

1 # Luk. 10:38-39 Rie' se're tau attangngai garring, arenna Lazarus, battu ri Betania, desa pamarianna Maria surang uranna siana', Marta. 2#Yah. 12:3Maria iamo intu bahine maeng injo laminnayaki bangkenna Karaeng battu ri minnya' mur na uhu'na lapalu'lu'; Lazarus tau garring injo iamo intu uranna siana'. 3Bahine rua injo appikatu pau mange ri Isa, ”Karaeng, ia tau Mukamaseang injo, garringi.” 4Mingka rihattu lalangngere'na Isa kareba injo, Ia appaui, ”Garring injo gele juai langalle nyaha, mingka lalapappijanjangangi kala'biranna Allataala, solanna patteteang rigarring injo Ana' Allataala ripakala'biri.” 5Isa lakamaseang toje'i Marta na Maria surang Lazarus uranna siana'. 6Mingka rihattu lalangngere'Na ma'nassana garringi Lazarus, Ia laattu-attuangi ammari ruangallo pole ri tampa' pa'bangngianna; 7mingka rimaenna injo Ia appaui mange ri ana'-ana' gurunNa, ”Muliammuki mange ri Yudea.” 8Appaumu ana'-ana' gurunNa mange ri Ia, ”Guru, baukale juapai tau Yahudi inni a'ra' ambunduki batu ri Ditte, ngura a'ra' juapaKi muliang mange konjo?” 9Appihali Isa, ”Gelejua rie' sampulorua jaang lalanna siallo? Inai jua a'lingka ritangnga allona, gele latatto'ro bangkenna, saba' ia lajanjangi sinara'na lino inni. 10Mingka ampa rie' se're tau a'lingka ribangngina, lata'to'roi bangkenna, saba' tide' sinara lalang ri kalenna.” 11Appakonjomu pauNa, na rimaenna injo appaui Isa mange ri iyai, ”Lazarus, uranta siana', tinromu, mingka Nakke laa'lampa mange konjo Kuronrongi battu ritinrona.” 12Jari lakuamo ana'-ana' gurunNa mange ri Ia, ”Karaeng, ampa tinrona jua, lagassingi intu.” 13Mingka sitoje'na Isa labisarai passala matenamo Lazarus, mingka pa'ngare'nai Isa labisarai passala tinro injo tinrona toje' jua. 14Injomo saba'na Isa lapau lambusui, ”Lazarus matemu; 15Mingka Nakke sukkuru, gelea rie' rihattu injo, saba' appakonjopai la'bi baji' ri kaui, solanna akkulleiko tappa'. Konni-konnina maeko a'lampaki mange ri ia.” 16Jari Tomas, turiareng injo Didimus, appau mange ribahaanna, iamo intu ana'-ana' gurung maraeng injo, ”Maemoko a'lampa todo'ki mange lamate surang Ia.”

17Rihattu ambattunamo Isa, Ia larumpa'i Lazarus patangallomu ammonranna lalang ri kuburu. 18Betania seppa'i ri Yerusalem, larie' juai barang tallu kilometere derena. 19Ri injo lohemo tau Yahudi battu latimporongi Marta na Maria saba' matena uranna siana'. 20Sungka'i Marta lalangngere ma'nassana Isa rie'i, a'lampai laruppai. Mingka Maria lalang juai ri sapo. 21Jari appaui Marta mange ri Isa, ”Karaeng, so'di' rie'Ki ri inni, tantu gelena mate urangku siana'. 22Mingka manna konni-konnina kuisse'i ma'nassana Allataala laassare mange ri Ditte risikuanna nuriera injo mange ri Ia.” 23Appaui Isa mange ri Marta, ”Attallasai muliang urammu siana'.” 24Lakuamo Marta mange ri Isa, ”Kuisse'i ma'nassana ia laattallasai muliang rihattu attallasa'na ngase' muliang tau mate inni ampa larapi'mu allo kala'busang.” 25Appihali Isa mange ri ia, ”Nakkemo patteteang tallasa muliang surang katallasang; inai jua tappa' mae ri Nakke, ia laattallasai manna maemmu mate, 26na sikuanna tau attallasa na tappa'i mae ri Nakke, gele lamate sitarrusu'na. Tappa' juako ripassala inni?” 27Appihali Marta, ”Io', Karaeng, tappa'a ma'nassana Kaumo Almase, Ana' Allataala, tulabattu injo antama' ri lino inni.” 28Rimaenna appau appakonjo ia a'lampai mange lakeo' Maria uranna siana' na a'bisi'-bisi'i mange ri ia, ”Guru rie'i konjomange na Ia lasuro keo'ko.” 29Rilalangngere'na injo lassirimu ammenteng Maria ampai a'lampa mange laboja Isa. 30Mingka rihattu injo Isa gelepai ambattu antama' lalang ri desa injo. Ia rie' juapai ri tampa' passiuppaanna Marta sumpae'. 31Sungka'i tau Yahudi lohe assurangi injo Maria ri sapo injo latimporongi, lajanjangi ma'nassana Maria lassiri ammenteng na a'lampai ansulukang, lapinahangimu, saba' pa'ngare'nai ma'nassana ia a'lampai lamange ri kuburu apparau ri injo. 32Riambattuna Maria mange ri tampa' pammari-marianna Isa na lajanjangi Isa, ia a'demporoi ri a'rakang bangkenNa na appaui mange ri Ia, ”Karaeng, so'di injo rie'Ki ri inni, tantu gelena mate urangku siana'.”

33Rihattunna Isa lajanjangi Maria apparau na injo pole tau Yahudi lohe uranna Maria, a'jari simpummu pa'mai'Na. Ia sarroi pa'risi nyahaNa na lakua, 34”Ri anteei mae muloangang?” Appihali ngase'mu, ”Karaeng, maeKi na ritilingi!” 35Jari apparaui Isa. 36Lakua tau Yahudi Injo, ”Janjangimu, Ia toje'i pangamaseanna mange ri ia!” 37Mingka rie' sikura tau ri iyai injo appau, ”Ia appakaambula' mata tau buta, makala gele akkulle anggeokang, sa'genna gele mate tau inni?” 38Pela' pa'risi mu pole nyahana Isa, jari a'lampai mange ri kuburu injo. Kuburu injo se'rei liang batu nuritongko' pole batu. 39Lakua Isa, ”Palesangi batu panongko' inni!” Marta, uranna siana' tau mate injo, appau mange ri Ia, ”Karaeng, ia botto'mu, saba' patangallomu maeng matena.” 40Lakuamo Isa, ”Gelejua maemmu Kupau mange ri kau: Ampa tappa'ko lamujanjangi kala'biranna Allataala?” 41Jari lapalesangimu batu panongko'na kuburu injo. Jari Isa ammongai nai' ri langi' na appaui, ”Amma, Nakke masa barakka' mange ri Kau, saba' Kau maeng appilangngeri ri Nakke. 42Kuisse'i ma'nassana Kau sanging appilangngeri ri Nakke, mingka rikanara tau lohe ammenteng injo risiappuKu inni, Nakkemo appau, solanna tappa' ngase'i ma'nassana Kaumo maeng assuro ri Nakke.” 43Rimaenna appau appakonjo a'nga'ngarai Isa lalang risa'ra bakka', ”Lazarus, ansulu'moko mae!” 44Ansulu' toje'i Lazarus, bangkeng surang limanna ta'ka'ba' juapai kaeng balasung na rupanna ta'roko' juapai kaeng. Appaui Isa mange ri iyai, ”Pasalai kaeng rie' injo ri kalenna na lappasangi a'lampa.”

Passamaturukang larihuno Isa

11:45-57

(Mat. 26:1-5; Mark. 14:1-2; Luk. 22:1-2)

45Lohe ri tau Yahudi battu injo attimporong ri saponna Maria na mata kalennamo lasa'bii apa numaeng lageokang Isa, tappa'i mange ri Ia. 46Mingka rie' todo' sikura tau ri iyai a'lampa mange ri tau Farisi injo na lalagarai mange ri iyai, apa numaeng lageokang injo Isa. 47Jari imang ponggaha injo na tau Farisi lakeo'i Hakking Agama injo laa'rappung na appau ngase'i, ”Apamo parallu rigeokang? Saba' tau injo sanna' lohemo nugele samara lageokang. 48Ampa ia ripaloga, injo sikuanna tau laa'jari tappa' ngase' mange ri Ia na battu ngase'i tau Roma injo laalle tampa' tangkasa'ta surang bangsata.” 49Mingka rie' se're tau ri iyai, iamo intu Kayafas, Imang Bakka' ri taung injo, appau mange ri iyai, ”Kau tide' pangisse'mu, 50na geleko ngu'rangi ma'nassana la'bi riekang matu-matunna ri kau, ampa se're tau mate lasalama' bangsata na sikuanna tau ri bangsata lamate.” 51Passala injo lapaui gele nubattu ri kalenna to'jua, mingka assimpole se're Imang Bakka' ri taung injo na nguppai panjanjang ri Allataala ma'nassana Isa lamate solanna salama' bangsanai, 52na gele sangga bangsa injo jua, mingka lapparappung todo'i na lalapasse'rei ana'-ana' Allataala nuta'bere-bere injo. 53Pakaramula allo injo assamaturu' ngase'mu lalahuno Isa.

54Injomo saba'na Isa gelemu a'bora tangnga ri a'rakanna tau Yahudi injo, mingka Ia a'lampai battu ri injo na mange ri tampa' ambani injo ri parang luara, rise're kota nuriare' Efraim, na ri injomo Ia ammari surang ana'-ana' gurunNa.

55Rihattu injo seppa'mu allo Pa'lappasanna tau Yahudi inni na lohemo tau battu ri kamponnai a'lampa mange ri Yerusalem lalatangkasi kalenna ri gelenapa allo Pa'lappasang injo. 56Iyai injo labojai Isa na ammenteng ngase'i lalang ri Sapo Allataala, allagara ngase'i, ”Anteekamua panguppamu? Makala rie' juai Ia mae konni ripassua'-suarang inni?” 57Rihattu injo pole sikonjo imang ponggaha na tau Farisi injo maemmu assare parenta solanna sikuanna tau laisse' injo ri antee mae Isa parallui lapappiissekang, solanna akkulle lajakkala Isa.

Currently Selected:

YAHYA 11: LAI_SLY

Highlight

Copy