YAHYA 15

Poong anggoro toje'

15:1-8

1”Nakkemo poong anggoro toje' na AmmangKumo tuanjamana. 2Sikonjo tangke-tangke rie' ri Nakke nugele injo ambua, latatta'i na sikonjo tangke-tangke ambua injo latangkasi, solanna pela'lohe buana. 3Tangkasamoko kanara pau maeng injo Kupau mange ri kaui. 4Ammariko lalang ri Nakke na Nakke lalang ri kaui. Assimpole tangke-tangke injo gelei akkulle ambua battu ri kalenna to'jua, ampa gelei a'da'ki' ri poong anggoro, appakonjo todo'i ri kaui, geleiko ambua ampa geleiko ammari lalang ri Nakke. 5Nakkemo poong anggoro toje' na kauimo tangke-tangkena. Inai jua ammari lalang ri Nakke na Nakke lalang ri ia, ia lalohe buana, saba' pantaranganna Nakke geleiko akkulle anggeokangi manna se're. 6Inai jua gele ammari lalang ri Nakke, ia laripamballungi ansulukang assimpole tangke-tangke na a'jari kalotoro, maeng injo lapasse'rei tau na ripantama'i ri api laritunu. 7Ampa kau ammari lalang ri Nakke na pauKu ammari lalang ri kaui, ngeraimoko apa jua mukaa'raki, lamutarimai intu. 8Lalang ripassala innimo AmmangKu ripakala'biri, iamo intu ampa kau ambua lohe na ri appakonjona kaumo intu ana'-ana' gurungKu.”

Parenta laassikamaseang

15:9-17

9”Assimpole Amma ngamaseang mae ri Nakke, appakonjo todo'i Nakke ngamaseang mange ri kaui; ammariko lalang ripangamaseangKu injo. 10Ampa muturuki parentaKu, kau laammari lalang ripangamaseangKu, assimpole Nakke nuruki passuroanNa AmmangKu na ammari lalang ripangamaseanNa.

11Iangase'na injo Kupau mange ri kaui, solanna karannuangKu rie'i lalang ri kaui na a'jari sangka'i karannuammu. 12#Yah. 13:34, 15:17; 1 Yah. 3:23; 2 Yah. 1:5Iamo inni parentaKu, iamo intu solanna assikamaseangiko, assimpole Nakke ngamaseang ri kaui. 13Gelemo rie' pangamaseang la'bi bakkakang battu ripangamaseanna inni, iamo intu tau lapa'bisonaang nyahana passabakang ri baha'-bahaanna. 14Kauimo intu bahaangKu, ampa mugeokangi nuKupassuroang injo mange ri kaui. 15Nakke geleimoko Kuareki pole ata, saba' ata inni gele laisse', apa lageokang tau lapaa'jari injo ata, mingka Kuarekiko bahaang, saba' Nakke maeng Kupappiissekammu mange ri kaui sikonjo nuKulangngere battu ri AmmangKu. 16Gele kau anjo'jo' ri Nakke, mingka Nakkemo anjo'jo' ri kaui. Nakke maeng Kutantuangiko, solanna a'lampako na lohe buamu na tulusu pambuamu, solanna apa jua muerai mange ri Amma lalang ri arengKu, Ia lapassareangi mange ri kaui. 17Iamo inni parentaKu mange ri kaui: Kamaseangi parammu rupatau.”

Lino inni likingi mange ri Isa surang ri ana'-ana' gurunNa

15:18-27

18”Ampa lino inni liking ri kaui, u'rangimu ma'nassana ia la'bi rioloi liking mae ri Nakke. 19So'di injo kau battu ri lino inni, tantu lakamaseangimmu lino assimpole se're anunna. Mingka kanara kaui gele battu ri lino inni, mingka Nakke maeng Kujo'jokiko battu ri lino inni, injomo saba'na lino inni liking ri kaui. 20#Mat. 10:24; Luk. 6:40; Yah. 13:16U'rangimu numaeng injo Kupau ri kaui: Se're ata gele lala'bi langkasang battu ri tau lapaa'jari injoi ata. Ampa iyai injo maeng ma'ri'-ma'risi ri Nakke, iyai todo' injo lama'ri'-ma'risi ri kaui; ampa iyai injo maeng minahang ripauKu, injo laturuki todo'i paumu. 21Mingka sikuanna lalageokang ngase'i mange ri kaui kanara ArengKu, saba' Ia gele laisseki tumaeng assuro injo ri Nakke. 22So'di injo Nakke gelea rie' na Nakke gelea appau-pau mange ri iyai, tantu geleinna doraka. Mingka konni-konnina iyai injo tide'mo passassala rikadorakaannai! 23Inai jua liking mae ri Nakke, ia liking todo'i mange ri AmmangKu. 24So'di injo Nakke gelea anggeokang jama-jamaang ritangnga-tangngana assimpole nulageokangi injo tau maraeng, tantu geleinna doraka. Mingka konni-konnina manna injo iyai maengi lajanjang iangase'na injo, tuli likingi baji' mae ri Nakke iyareka ri AmmangKu. 25#Mzm. 35:19, 69:5Mingka pau nuta'ukiri injo lalang Kitta' Tora'na parallui ripa'rupa: Iyai likingi mae ri Nakke manna tide' jua pa'lalanganna.

26Ampa rie'mo Nyaha Paurang-urang nulaKusuro battu injo ri Amma, iamo injo Nyaha Katojekang nuansulu' battu ri Amma, Ia laassa'bii ripassala'Ku. 27Mingka kaui lassa'bi todo'ko, saba' kaui minang ripakaramulana assurang-surangki.”

Currently Selected:

YAHYA 15: LAI_SLY

Highlight

Copy