YAHYA 9
9
Tau buta minang riampana rilaherang
9:1-14
1Rihattu a'lampanamo Isa, Ia anjanjangi se're tau buta minang riampana rilaherang. 2Akkuta'nangi ana'-ana' gurunNa mange ri Ia, ”Guru, inaimo anggeokang kadorakaang, tau inni to'jua iyareka tau toana, sa'genna ia buta rilahereng?” 3Appihali Isa, ”Gele ia na gele todo' tau toana, mingka solanna sikonjo jama-jamaanna Allataala ripappijanjangangi lalang ri kalenna. 4Ditte parallui rigeokang jamaanna Tuassuro injo ri Nakke, ampa rie' juapa matanna allo; kalarie' bangngi sa'genna gelemo rie' manna se're tau akkulle anjama. 5#Mat. 5:14; Yah. 8:12Rihattu rie'Ku juapa lalang ri lino inni, Nakkemo sinara'na lino.” 6Sungka'na maemmo lapau ngase' Isa, appe'rui naung ri tana, na a'bua'i jammeng battu ri pe'runa, maeng injo laalle na lapadompolo ri matanna tau buta injo sumpae' 7na appaui mange ri ia, ”A'lampamoko, solori kalemmu ri kollang Siloam.” Siloam battuanna: ”Turisuro.” A'lampa toje'mu tau injo mange lasolori kalenna ampai muliang na akkullemu anjanjang matanna.
8Mingka limbo-limbona surang sikuanna tau maraengang, laisse' injoi riolo assimpole paera-era, appau, ”Gelejua ia inni, tau sanging attolong injo ngera-ngera?” 9Rie'mo tau appau, ”Toje'i, ia inni.” Rie' pole tau appau, ”Gele, mingka ia assintappai tau injo.” Tau injomo appau, ”Baa toje'i, nakkemo inni.” 10Jari lakuaimo mange ri ia, ”Anteekamua matammu akkulle ambula'?” 11Pappihalinna, ”Tau riareng injo Isa a'bua' jammeng, lapadompoloi ri matangku na appaui mae ri nakke: A'lampamoko mange ri kollang Siloam na solori kalemmu. Jari a'lampa toje'a mange konjo na sungka'i maeng kusolori kalengku, akkullemu anjanjang matangku.” 12Jari akkuta'nang ngase'mu mange ri ia, ”Ia ri antee mae?” Pappihalinna, ”Nakke gelei kuisse.”
13Jari iyai laerangi tau buta injo sumpae' mange ri tau Farisi injo. 14Ri allo hattunna Isa a'bua' jammeng na lapakaambula'i matanna tau injo, iamo intu allo Passambajangang. 15Injomo saba'na tau Farisi injo akkuta'nangi pole mange ri ia, anteekamua matanna akkulle ambula'. Pappihalinna, ”Ia appadompolo jammeng ri matangku, maeng injo kusolori kalengku, na konni-konnina akkullema anjanjang.” 16Jari rie'mo sibageang tau Farisi injo appau, ”Tau injo gelei battu ri Allataala, saba' Ia gele lakatutui allo Passambajangang.” Sibageang pole appau, ”Makala anteekamua se're inni tau doraka akkulle a'bua' tanra nugele samara appakonjo?” Jari ammumbamu passisala pahangang ri iyai. 17Jari lakuaimo isse' mange ri tau maeng injo buta, ”Na kau, apa panguppamu ripassala'na Ia, saba' lapakaambula'i matammu?” Pappihalinna, ”Ia se'rei nabbi.” 18Mingka ponggaha Yahudi injo gele tappa' ma'nassana sumpae' butai na ampamu akkulle anjanjang, sa'genna iyai lakeo'i tau toana 19na akkuta'nang ngase'i, ”Ana'mu inni, numupau injo ma'nassana ia butai rianakang? Ampa pade' appakonjoi, anteekamua ia konni-konnina akkulle anjanjang?” 20Jari appihalimu tau toana, ”Nutaisse' iamo intu ma'nassana ia inni ana'ba na ia butai rianakang, 21mingka anteekamua ia konni-konnina akkulle anjanjang, injo gelei taisse', na inai lapakaambula'i matanna, injo gele todo'i taisse'. Pakkuta'nangang tommoi mange ri ia, saba' ia bakka'mu, na akkullemu appau lasa'bii kalenna.” 22Appau appakonjoi tau toana, kanara mallakinna ri ponggaha Yahudi injo, saba' ponggaha Yahudi injo maemmu assamaturu' ma'nassana inai laani Isa assimpole Almase, laripela'i dere. 23Injomo saba'na tau toana appau, ”Ia bakka'mu, pakkuta'nangang tommoi mange ri ia.”
24Jari iyai makapinruannamo lakeoki tau buta injo sumpae' na appaui mange ri ia, ”Paui silambusu'na ri a'rakang Allataala; kambe taisse'i ma'nassana tau injo rie' kadorakaanna.” 25Pappihalinna, ”Apa tau injo rie' dorakana, gele kuisse'; mingka se're passala nukuisse', iamo intu ma'nassana nakke sumpae' buta, na konni-konnina akkullema anjanjang.” 26Akkuta'nang ngase'mu isse' mange ri ia, ”Apa lageokang mange ri kau? Anteekamua ta'ranna Ia lapakaambula' matammu?” 27Pappihalinna, ”Maemmu kupau mange ri kaui, na kau gele mupilangngeri; ngura kau a'ra'i mulangngere pole? Barang a'ra' todo'ko a'jari ana' gurunNa?” 28Laerang pattua-tuai iyai appau mange ri ia, ”Kau ana' gurunnako tau injo mingka kambe ana' gurunnakang Musa. 29Kambe taisse'i ma'nassana Allataala maengi appaui mange ri Musa, mingka passala'na Ia injo kambe gele taisse' battu ri antee mae assala'na.” 30Appihali tau injo mange ri iyai, ”Lannasa todo'a, kaui gele muisseki ri antee mae Ia battu, na Ia maemmu lapakaambula' matangku. 31Ditte riisse'i ma'nassana Allataala gele appilangngeri tau rie' kadorakaanna, passangadinna tau lambusu na tau anggeokang injo ria'ra'Na. 32Battu riolopa sa'genna allo inni gele minang rie' kalangngerang ma'nassana rie' tau appakaambula' mata ri tau rianakang buta. 33Ampa pade' tau injo gele battu ri Allataala, tantumu Ia tide' pakkullena.” 34Pappihalinnai mange ri ia, ”Kau inni rianakangko lalang rikadorakaang na kau a'ra' langajara ri kambe?” Jari lasuroimu ansulukang.
35Lalangngere Isa ma'nassana ia risuro ansulukang ri tau lohe injo. Maeng injo Ia assiuppai tau maeng buta injo na appaui, ”Tappa'juako mange ri Ana' Rupatau?” 36Pappihalinna, ”Inai, Karaeng? Solanna nakke tappa' mange ri Ia.” 37Appaui Isa mange ri ia, ”Kau gele sangga mujanjanna jua; mingka Iamo appau mange ri kau, Iamo injo!” 38Pauna, ”Nakke tappa', Karaeng! Ia joppa'i nyomba ri Isa.” 39Jari appaui Isa, ”Nakke rie' antama' ri lino langadeli, solanna inai jua gele anjanjang, akkullei anjanjang, na solanna inai jua anjanjang, laa'jari butai.”
40Pau-pau injo lalangngere ri tau Farisi lohe rie' ri injo jari akkuta'nang ngase'mu mange ri Ia, ”Apa kambe pole inni buta todo'kang?” 41Appihali Isa mange ri iyai, ”So'di pade' kaui buta, kau tide' kadorakaammu, mingka kanara mukuainna: Anjanjangkang, jari tulusu rie' kadorakaammu.”
Currently Selected:
YAHYA 9: LAI_SLY
Highlight
Share
Copy
Want to have your highlights saved across all your devices? Sign up or sign in
@LAI 2012 Indonesian Bible Society (Lembaga Alkitab Indonesia)
