LUKAS 21

Passidakkana se're balu-balu kaasi-asi

21:1-14

(Mark. 12:41-44)

1Rihattunna Isa rie' ri Sapo Allataala, Ia anjanjangi lohe tau kalumannyang lapuna passidakkana ri patti pamunaang passidakkaang. 2Ia anjanjang todo'i se're balu-balu kaasi-asi appantama' rua doe' seeng ri patti injo. 3Jari lakuamo Isa, ”Sitoje'na Nakke appau mange ri kaui: Balu-balu kaasi-asi inni la'bi loheang lapassareang battu ri iangase'na tau kalumannyang intu. 4Saba' iyai injo assarei passidakka battu rikala'bi-la'bianna, mingka balu-balu inni assarei battu rikaasi-asianna, la'bipa pole ia lapassareang ngase'i uppa-uppana.”

Sapo Allataala larisosara

21:5-6

(Mat. 24:1-2; Mark. 13:1-2)

5Sungka'i lohemo tau labisarai passala Sapo Allataala na ammangnga-mangnga ngase'i paballona sapo injo saba' ribelo-beloi ri batu ballo surang ri barang-barang battu ripakkoro'bangang, appaui Isa, 6”Larie' hattunna sallo' – apa mujanjangi ri intu gelemo larie' manna se're batu laripa'biang a'lonjo'; larisosara ngase'i.”

Pakaramulanamo kasissaang

21:7-19

(Mat. 24:3-14; Mark. 13:3-13)

7Jari akkuta'nangimu ana'-ana' gurunNa mange ri Isa, ”Guru, sikuraiya kajariangi injo? Na anteekamua tanrana, ampa laa'jarimu?” 8PappihalinNa, ”Tutuiko, solanna andako ripa'lingu. Saba' lalohe tau battu lapake arengKu na lakua: Nakkemo Almase, na: Seppa'mu hattunna. Akolalo pilangngerii. 9Ampa allangngereko passala pa'bundukang na kajujaang, akomo malla'. Saba' iangase'na injo parallu riolo laa'jari, mingka injo gele a'battuang larie'mu hattu kala'busang.”

10Appaui pole Isa mange ri iyai, ”Bangsa laassibali bangsa na pakkaraengang laassibali pakkaraengang, 11na laa'jari lidung bakka' na ri antee-tee jua mae larie' garring a'lele na kalarakang, na laa'jari todo'i passala nulaappakamalla' na tanra mara'-maraeng ri langi'. 12Mingka rigelenapa a'jari iangase'na injo larijakkaliko na larisissaiko; rierangko mange lariadeli ri sapo passambajangannai ampako lapantamaki ri pattarungkuang, na larirenrengiko mange ri pamarenta na ri tukahasa injo kanara arengKu. 13Passala injo laa'jari hattu baji' ri kau laassare passa'bi. 14#Luk. 12:11-12Injomo saba'na pa'batu ri atimu, jari andai mupikkiri riolo pau passa'bi ri kalemmu. 15Saba' Nakke jua laassare mange ri kau pappau pangisse', sa'genna tide'mo tau akkulle a'bali ri kau iyareka ripassala ribalimmu. 16Larisassali todo'ko ri tau toamu, ri urammu siana', ri bija-bijammu surang ri baha'-bahaammu na lohe tau ri kaui larihuno 17na larikali'kingangiko risikuanna tau kanara arengKu. 18Mingka tide' manna silahara uhu' battu ri ulummu latantang. 19Ampa tulusu jarre'ko, lamuuppai tallasa'mu.”

Passala sosara'na Yerusalem

21:20-24

(Mat. 24:15-21; Mark. 13:14-19)

20”Ampa mujanjangi Yerusalem laappu tantara, piisseki ma'nassana a'birimmu larisosara. 21Rihattu injo tau rieki injo ri Yudea parallui a'lampa nai' ri baho bonto, na tau rieki injo lalang kota parallui a'lampa dere, na tau rieki injo ri kampong-kampong andamu riolo antamaki ri kota, 22#Hos. 9:7saba' larapi'mu hattunna pa'balasang na sikonjo numaeng ta'ukiri laripa'rupa. 23Silakamo bahine tianang injo iyareka bahine appasusu injojuapa ana' lolo rihattu injo! Saba' larie' kajujaang sanna' bakka'na risikonjo pammariang na hukkungang mange ri bangsa inni, 24na lamatei ri mata pa'dang ampai rierangi assimpole turitarungku mange risikonjo bangsa, na Yerusalem larilisa'-lisa'i ri tau gele injo tappa' ri Allataala, sa'genna a'rupamu jammanna bangsa-bangsa injo.”

Hattu pariekanna mae Ana' Rupatau Pakkalebarang poong kaju ara

21:25-33

(Mat. 24:29-35; Mark. 13:24-31)

25 # Yes. 13:10; Yeh. 32:7; Yl. 2:31; Pan. 6:12-13 ”Larie' tanra-tanra ri matanna allo na ri bulang surang ri bintoeng, na ri linona tau inni lamalla'i na lata'bangkai riallangngere'na moro' surang bakka'na bombang ri tamparang. 26Tau inni lamate kale-kalei ripamalla'na kanara bentere'na battu risikonjo nua'jari ri lino inni, saba' sikuanna tukahasa ri langi' laa'dappe' ngase'i. 27#Dan. 7:13; Pan. 1:7Rihattu injomo lalajanjangi tau Ana' Rupatau rie' mae a'dongko' ri rammang lalang risikonjo kakahasaang na kala'biranNa. 28Ampa iangase'na injo pakaramulamu a'jari, ammentengko na ammongako, saba' gelemu dere Tuappakasalama'mu.” 29Maeng injo lapaui Isa pakkalebarang inni mange ri iyai, ”Pariatisai poong kaju ara intu iyareka poong kaju maraenganna. 30Ampa mujanjangi sikonjo poong kaju assu'la' injo baji' muissekinna ma'nassana a'birimmu bambang allo. 31Appakonjo todo'i, ampa mujanjangi passala injo a'jari, piisseki ma'nassana Pakkaraengang Allataala gelemu dere. 32Sitoje'na Nakke appau mange ri kaui: Tau konni-konni gele laallalo, rigelenapa iangase'na injo a'jari. 33Langi' na lino inni laallalo, mingka pauKu gele minang laallalo.”

Pappasang solanna tutu

21:34-38

34”Jagailalo kalemmu, na atimu andai tulusu appikkiri ripa'roa'-roakang na a'huja-huja surang rikabata-bataang tuju tallasa siallo sibangngi solanna rihattu rie'na Ana' Rupatau andai appabangka ri kau assimpole turipengko. 35Saba' hattu injo lapitabai ngase'i tau rie' injo ri lino inni. 36A'kaletutuiko na tuli ngera dowaangiko, solanna nguppaiko kagassingang lalappasa battu ri iangase'na nulaa'jari injo, na solanna attahangko ammenteng ri a'rakanna Ana' Rupatau.”

37 # Luk. 19:47 Ampa alloi Isa ngajarai ri Sapo Allataala na ampa bangngii Ia ansulu'i na a'bangngi ri bonto riare' injo Bonto Zaitun. 38Ngesalakale juapai lohemo tau mange ri Ia lalang ri Sapo Allataala laappilangngeri ri Ia.

Currently Selected:

LUKAS 21: LAI_SLY

Highlight

Copy