LUKAS 24

1Mingka mintara'na mae ri rahungkalena juapa ri allo makase'rena ri sijumaa injo a'lampaimu mange ri kuburu ngerang rampa-rampa numaeng injo lapakasadiai. 2Larumpa'i ta'bule'ngasamo batu panongko'na kuburu injo, 3na rihattu antamakinnamo gele lauppai batangkalenna Karaeng Isa. 4Riammenteng ammangnga-mangnganai juapa saba' ripassala injo, sikalinna rie' rua tau ammenteng riampi'na make pakeang ammillere. 5Sanna' malla'nai jari joppa' ngase'mu, mingka appaui tau rua injo mange ri iyai, ”Ngura mubojai Ia Tuattallasa injo, ritangnga-tangngana tau mate? 6#Mat. 16:21, 17:22-23, 20:18-19; Mark. 8:31, 9:31, 10:33-34; Luk. 9:22, 18:31-33Ia tide'i ri inni, Ia attallasai muliang! U'rangi numaeng lapau injo mange ri kaui, rihattunna juapa rie' ri Galilea, 7iamo intu ma'nassana Ana' Rupatau parallui ripassareang lalang limanna ri tau doraka inni na risalli'i, mingka laattallasai muliang ri allo makatalluna.” 8Jari ngu'rangi ngase'mu ripauna Isa injo. 9Sungka'i muliangimo battu ri kuburu, lalagari ngase'i injo mange ri sampulose're injo suro na mange pole risikonjo urang siana' maraengang. 10Bahine battu injo ri kuburu iamo intu Maria tubattu ri Magdala, Yohana surang Maria idonna Yakobus. Lohe pole bahine maraengang urannai mange lapappiissekangi risikonjo suro. 11Mingka ri iyai pau injo assimpole bura na gele tappaki mange ripauna bahine injo.

12Toje'i manna appakonjo ammentengi Petrus, ampai a'nyara-nyara a'lampa mange ri kuburu. Rihattu a'doa'na antama', nulajanjang sangga kaeng panroko' mamo. Jari muliammu, na tulusu akkuta'nangi lalang ri ati apamo barang numaeng kajariang.

Isa lapappijanjangang kalenNa ripa'lalangang lamange ri Emaus

24:13-35

13 # Mark. 16:12 Ri allo injo jua rie'mo rua ana' gurunna Isa a'lampa lamange rise're desa arenna Emaus, derena rie'i sampulo se're kilo battu ri Yerusalem, 14na lalagarai passala risikonjo numaeng kajariang. 15Rihattu allagarinna surang riassikuta'nanginna, rie'mu Isa laseppaki, ampai a'lingka minahang ri iyai. 16Mingka assimpole nurie' lajempangi matannai, sa'genna gele laisseki latanrai Isa. 17Appui Isa mange ri iyai, ”Apa intu mulagara bela ripa'lingkaammu?” Jari attaangimu lalang rikapa'risang. 18Rie' se're tau battu ri iyai, arenna Kleopas, appihali mange ri Ia, ”Barang Kau jua kale-kalemmu tau battu-battu ri Yerusalem, jari gele muisse' apa kajariang konjomange rikonni-konnina.” 19Lakuamo Isa mange ri iyai, ”Apa injo barang?” Lakuaimo, ”Apa kajariang ri Isa tau Nazaret injo. Ia se'rei nabbi, tau akkahasa lalang ri jama-jamaang na pappau ri a'rakang Allataala na risikuanna tau bangsaba. 20Mingka sikonjo imang ponggaha na sikonjo ponggahana bangsaba lapassareangi Isa larihukkung mate na maengimu lasalliki. 21Kambe riolo tajallikang ma'nassana Iamo lalapakasalama'i taunna Israele. Na inni lappasamu allo makatalluna, rimaenna iangase'na kajariang. 22Mingka rie' sikura bahine uramba lapakata'bangka ngase'kang: Rahungkale juapai a'lampaimu mange ri kuburu, 23nagelei larumpa' batangkalenna Isa. Jari muliangimu ngerang kareba ma'nassana kajanjangangi ri iyai rie' malaeka', lapaui ma'nassana Isa attallasai muliang. 24Rie'mo ri uramba a'lampa mange ri kuburu injo na lajanjangi naba toje'i pauna bahine injo, mingka Isa gele lajanjangi.” 25Jari appaui Isa mange ri iyai, ”Oe kau tau ba'ga, sabala toje'i atimu latappa' risikuanna numaeng injo lapau nabbi! 26Gelejua Almase parallui la'bi riolo marasai risikuanna injo ampai antama' rikala'biranNa.” 27Jari laseseimu Isa mange ri iyai nuta'ukiri injo passala ri Ia lalang risikonjo Kitta' Tangkasa, pakaramula battu ri Kitta'na Musa surang sikonjo kitta' nabbi-nabbi.

28Ambanimu ri desa nulamangei injo, jari Isa laattu-attuangi assimpole tau lalatarrusang lampana. 29Mingka sarro pamassainna ri Ia, lakua, ”Abangngimuki riolo surang kambe, saba' laa'birimmu bangngi na seppa' tommoi sa'ra' matanna allo.” Jari antama'i Isa laassurangi a'bangngi. 30Rihattu attolonna Isa langanre surang iyai, Ia ngallei roti, masa barakka'i, maeng injo latu'be-tu'bei ampai lasareangi. 31Rihattu injo ta'bungkaramu matanna jari laissekimu Isa, mingka Ia lannya' siba'laloi ritangnga-tangnganai. 32Allagarimu tau rua injo, ”Gelejua bakka' sumanga'ta, rihattunna Ia a'bisara mae ri ditte ritangnga lalang na rihattu laseseinna Kitta' Tangkasa injo mae ri ditte?”

33 # Mark. 16:13 Maeng injo ammentengimu na tarrusui muliang mange ri Yerusalem. Ri injo assiuppaimu suro-suro sampulo se're injo na tau lohe urang-uranna, asse're-se'rei. 34Lakuaimo suro-suro injo, ”Sitoje'na Karaeng Isa attallasai muliang na maeng lapappijanjangangi kalenNa mange ri Simon.” 35Jari tau rua injo lalagarai apa numaeng kajariang ritangnga lalang na anteekamua laisseki Isa rihattunna Ia nu'be-nu'be roti.

Lapappijanjangangi kalenna Isa risikuanna ana' gurung

24:36-49

(Yah. 20:19-23)

36Rilalagarinna risesena passala injo, sikalinna rie'i Isa ammenteng a'bora tangnga ri iyai na lakua mange ri iyai, ”Dame salehangang ri kaui!” 37Ta'bangka ngase'i na malla'i na pa'ngare'nai ma'nassana anjanjangi jiing. 38Mingka, appaui Isa mange ri iyai, ”Ngura ta'bangkaiko na apa saba'na rie' bata-bata lalang ri atimui? 39Janjangimu limangKu na bangkengKu: Nakkemo inni; karahama na mujanjangi, so'di jiing tide' assi na bukunna assimpole numujanjang injo ri Nakke.” 40Riappau appakonjona Ia lapappijanjangangi limanNa na bangkenNa mange ri iyai. 41Rihattu geleinnapa tappa' kanara rannu na takkajannakinna juapa, appaui Isa mange ri iyai, ”Rie' juapa kanremu ri inni?” 42Jari lasareimu Isa sipolong juku' tunu. 43Laallei Isa injo na lakanre ri a'rakang matannai.

44Appaui Isa mange ri iyai, ”Iamo inni pauKu, numaeng Kupau injo mange ri kau rihattungKu juapa rie' assurang kau ma'nassana parallui laripa'rupa sikonjo nurie' ta'ukiri ripassala'Ku lalang ri kitta' Tora' Musa na ri kitta'na nabbi-nabbi surang kitta' Zaburu.” 45Maeng injo labungkarangimu pikkiranna, jari lapahangimu Kitta' Tangkasa inni. 46PauNa mange ri iyai, ”Rie' ta'ukiri appakonni: Almase parallui sissa na attallasai muliang battu rikamateang ri allo makatalluna, 47na rie' pole: Lalang arenNa kareba passala jarra ripangampungang kadorakaang parallu ripala'bang mange risikuanna rupatau, pakaramula ri Yerusalem. 48Kaumo intu sa'bi ri iangase'na inni. 49#Suro-suro 1:4Janjangimu, Nakkemo laassare mange ri kau apa numaeng injo latallikang AmmangKu. Mingka paralluko ammari ri kota inni sa'gemmu risangkaki kahasa battu ri Allataala.”

Naimu Isa ri Suruga

24:50-53

50 # Suro-suro 1:9-11 Maeng injo Isa laurangii ansulu' battu ri kota Yerusalem sa'genna seppa' ri Betania. Ri injo Ia laangka'i limanNa na lasare ngase'i barakka'. 51Rihattu labarakkakinna juapa, Ia assisalaimu na tarangka'i mange ri Suruga. 52Joppaki ngase'mu nyomba mange ri Ia, maeng injo muliangimu mange ri Yerusalem surangang sanna' rannuna. 53Iyai injo sanging riekimu lalang ri Sapo Allataala na lapakala'biri Allataala.

Currently Selected:

LUKAS 24: LAI_SLY

Highlight

Copy