Luke 22
22
1ပါသခါမုန်းနူ မယ်တာအယ်ဒုန်း မူဇာ့ပါ ပွဲကတူးဘာထိတ်နူလော်။ 2ပရာလူတာဒူဒေါ် ပရာသိုက်မောရှေလိုင်ဆောင်းဆူးတဟယ်နူကမာသူးဘာဘွေယေရှုနဲခူး ကူထောင် ကြာထောင်တာကမာအမူး မူးနူလော်။အဝေသူးအုတ်ပရာတပူကမာအနက်တဟယ်ဒေါ် အော်သနက်ဘာအနက်တဟယ်နူလော်။ 3အဝေပရာမာတာဖော့တဆူးသာ့နု့အကားနူ ယုဒရှကာရုတ်နူ နတ်ကေးကာလေနူးအော်တုန်းအဝေကူးနူလော်။ 4ယုဒရှင်ကာရုတ် လေနူးဒုန်းစရားကူးဒေါ် လေပရွီးဘာတာခူတာနာ့ဒုန်း ကလေဖူဘွေယေရှုအခိန်နူ အော်ဒုန်းအဝေကူးနူလော်။ 5အဝေသူးတဟယ်သာနောက်သာဆူးဟော့ဖင်လောင်တာအုန်းလောင်ဒုန်းကဖီရူးဘိန်နူလော်။ 6ယုဒမယ် အဒူးဒွါးဒေါ်အဝေသူးနူလော်။ ပရာဇာ့အော်ရူးအော်ဘလုန်ခိန်နူ မကိုက်ဒေါ်ကဖူဘာ အစရာနူကမာဘာကမားနူ အဝေအုတ်ဒေါ့ယု့အခိန်နူလော်။ 7ဘာမာသူးသိုးတဟယ်ဒေါ် ပါသခါပွဲအနခူး ဒေါ်ကလဲအယ်အခိန်တူးလေဟုန်းနူလော်။ 8ဘုန်းနူဒေါ်ဘွေယေရှုနဲမွန်း ပေတရုဒေါ်ယောဟန် "ပါသခါပွဲယိုး ကလဲလေအယ်လေအွနန်းအနဲခူး လေပရောင်ယောင်းနာကာ" ဘွေဘလိုင်လေမွန်းအဝေသူးနူလော်။ 9နဲမယ်အဝေသူးနူ"ပါကဘာမာမလောတာကလောင်"အလွိုက်ဇိန်ဘလယ်မူးနူလော်။ 10ဘွေယေရှုနဲအဝေသူး "လေနူးဆော့ဒုန်းဝိန်ကူး ၊ဒေါ်တုန်းဝိန်ကူးနူ သူးကအုတ်ဆူပရာယောင်းဆူးပုန်အော်တပရာနူလော်။လေဇု့အာကာချုန်းဒေါ်သင်ဒုန်းအာလေနူးသင်တမာကူးနူလေဇု့ဆော့ဝေကာ။" 11ဘုန်မယ် ဆိန့်နူးသင်ဘွေ "ပါစရာဒေါ်အခီးအပရာတဟယ် မာပါသခါပွဲဒေါ်အယ်အွန်းကလဲမလောနူ သနူးသိုက်ငှားလော် နဲကနူကာ။" 12"သင်ဘွေကကာ့ထောင်သူးဒုန်းသင်လခူတတော့နူဒေါ် သူးကအုတ်ဆူဘာမွန်း အကလဲလွေးအော်ဒေါ့နူလော်။ 13ပေတရုဒေါ် ယောဟန် မာဇု့မကိုက်ဘွေနဲနူဒေါ် မာဘာရောင့်ပါသခါပွဲ အရောင့်ကဒွန်နူလော်။ 14ဘွေယေရှုဒေါ် အငေါ်ပဇာ့တဟယ်နူ တူးလေဒုန်း အကာအယ်ပသခါပွဲခိန်နူ ဘွေယေရှုနူ 15"ဘွေယေရှုနူဇာ့သူးမူးခိန်နူ သနူးအယ်ဘလုန်တာအယ်ဒူကာဒွန်ယိုးတဘလယ်နူလော်။ 16မော့ခူအဆူးအဂက်နူတာအယ်ဘူဇာ့မာဘာမွန်းအခိန်အနော်အနားပါသခါပွဲယိုးနူ ခေးဇာ့အယ်ဘယ်ကိုး ။"အဝေဆိန့်ဒေါ် မာလောင်မွန်းကနူလော်။ 17ဘွေယေရှု ဖိတ်ထောင်မွန်း စပျစ်ဆူးခွက်ဒေါ် ထော်ထောင်ဇိန်ဟော့ဘွေဒူလော်။ ဘုန်နူဖင်မွန်းအငေါ်ပရာမာတာဖော့တဟယ်နူ ဒေါ်နဲမူး "ဖိတ်ခွက်ယိုးဒေါ် ဖင်အွန်ဘက်ရောက်ကာ။ 18ဘွေယေရှုနူ ဖင်လောင်မူးတာအုန်းလောင်ဒုန်းခေးကာတူးဘွေမော့ခူဆူးဂက်ခိန်နူမယ်စပျစ်ဆူးယိုးခေးဇာ့အွန်းဘယ်တာဘလယ်တာဘလယ်ဘယ်ကိုး"နူလော်။ 19ဘုန်နူ ဘွေယေရှုနူ ဖိတ်ကလုန်မုန့်ဘုန် ထော်ထောင်ဇိန်ဟော့းဘွေဘူးယောင်းဘုန် ဘက်လေမွန်းပရာမာတာဖော့နူလော်။ မုန့်ယိုးဒါ့မယ်ဘွေအနဲဒုန်းအဘာတာဖင်လောင်ယုန်းလောင်သူးနူလော်။သူးတဟယ်နူဖင်ယုန်းရောက်တပရာဒေါ်တပရာကာ။ဒုန်းတာနသူးနူးခေးဒေါ်တာဖိတ်ကလုန်သူးငေါ့နခူးနူအယ်ဆော့ပွဲတာဒါ့ယိုးကာ။"ဘွေနဲမူးကနူလော်။ 20အယ်ဘုန်တာဒေါ် ဘွေယေရှု ဖိတ်ကလုန်စပျစ်ဆူးခွက်ဒေါ် နဲမူး"တာအာသွီယိုးနူမယ် ခေးသွီနူလော်။ဒေါ်သွီယိုးမယ် တာဖင်လောင်တုန်း အခီးအပရာတဟယ်နဲခူးလော်။ တာသွီယိုးနူမယ်မွေးဘွေတာအုန်းလောင်ယားလောင်အသားနူလော်။ 21ပရာတုန်းအကဆားအယ်ဘွေတပရာမယ် အအော်ဘလုန်ဘွေဒေါ် တာအယ်ကလဲယိုးနူလော်။ 22"ပရာဖော့ခူးယိုးနူ"မကိုက်ဘွေတာလားလောင်နူကသူးဘာနူလော်။ "ပရာဖော့ခူး"ယိုးပရာဒုန်အဆားအယ်ဝေတဟယ်နူအကာသူးဘာ တာသူးဒုန်းအဇာ့ရောက်ဒုန်းသဘိုက်ကလဲနူလော်။" 23ဘုန်နူ ဘွေပရာမာတာဖော့တဟယ်နူ "တာရီတာကေးယိုးတဟယ်နူ ပါးကမလာ့အော်ထောင်။"အနဲခူကောင်းရောက်တဟယ်နူလော်။ 24အငေါ်ပရာဇာ့တဟယ်နူ ပရာယိုတးပူအကားနူ ပါးအဒူခလုန်းတပရာ"အလေတရာအယ်ဟော့ရောက်မွန်းကနူလော်။ 25အခူစားဒေါ် ဘွေယေရှုနဲမွန်း ဆူးဖော့ဂက်ဖော့ကူးရူတဟယ် အာစဟွာတဟယ်နူ ဖီလောင်တာပရွီးဒေါ် အုတ်ယု့ဆူးဖော့ဂက်ဖော့နူလော်။.ခူနာ့ဒူတဟယ်နူ အနဲလောင်ဇိန်အနဲပရာလောနူးတဟယ်နခူးပရာမာရီတာနူလော်။ 26"သူးတဟယ်နူမယ်ဇာ့မာမကိုက်ကနူကာ ၊ဘုန်းသူးကားနူပရာဒုန်းပရာဒါပရာဇောင့်တဟယ်နူမာမကိုက်ဒေါ်ပရာအရှင်ခလုန်းနူလော် ။သူးကမွက်ပရာအုတ်ယူးတာအခူနူခိန် ဆောင်လောင်ဇိန်သူးနဲ မကိုက်သူးပရာမာတာဖော့ကာ။ 27ပရာအားပရာဘာတာဘူဟော့တဟယ်ဇာ့မွက်မယ်ပရာကူးရူဘူဟော့နူပရာသာ့နု့ကားနူအဒူခလုန်းမယ်ပါးတပရာသူးကနသု့ကားမား။ပရာအုတ်ဟော့ဘာပရာနူဧါး ။ဘွေမယ်ပရာဒုန်းအအုတ်ဟော့သူးဒေါ်ပရာမာတာဖော့ဒုန်းအဘူအယ်ဘူအွန်းသူးနူလော်။ 28အငေါ်ပဇာ့တဟယ်နူ ဘွေယေရှုခေါင်ဘာတာပေါင်းအခိန်နူသူးတဟယ်နူဘာအော်ဇု့းဘွေနူလော်။ 29မာနူဒေါ်မကိုက်စဟွာတပရာနူအကဖင်လောင်သူး တာပရော်တာပရောက်ဒုန်း သူးတာအုတ်တာကရူဆူးဖော့ဂက်ဖော့နူလော်။ တာပရော်တာပရောက်တဟယ်ယိုးနူမာမကိုက်ဖားဘွေဖင်လောင် ဘွေယေရှုတကူးနူလော်။ 30သူးတဟယ်နူသူးကအယ်ဘလုန်အွန်းဘလုန်ဇု့ခေးဓိန်း ခေးကလဲအော်ရောင်နူဒေါ် ကနောင်းဘာဒုန်းတာလအော်လဲနောင်းဒေါ် ကဇာ့ရောင်ဘာဣစရေးလာဖော့တဆူးနု့ဆွီးနူလော်။ 31ဘွေယေရှုနဲမွန်း"ရှိမုန် ၊ခေးကနဲနာဒေါ်နာဓိန်း။ပရာမာအယ်ရှုတ်တုန်တပရာနူမကိုက်အလားကေးချန်ဘုတ်ဒေါ်အဖိတ်ကေးအာဖလုံဒေါ်အဖီးနူနတ်ကေးကာနူကမာအုတ်းသူးတပရာဒေါ် တပရာနူမယ်အဝေသူးနဲခူးအကွီးအခိန်ခါရောက်နူလော်။ 32ခေးသဘားနီးသူးမကိုက်ဒေါ် သူးကအော်ဒေါ်တာယု့တာနာဒုန်းအကလုန်နဲခူးနူလာ်။သူးဇိန်ဒုန်းခေးဘွေအော်ခိန်နူ အုတ်ဟော့ကရူယု့ဆော့ပရာအားပရာကာ"နူမယ်ပေတရုအတာမှာလောင်နူလော်။ 33ပေတရုနူ"ခေးကလေဘာနာဇု့ဘလုန်နာမယ်ဒုန်းထော်ကူးနူဘုန်ဘုန်၊ဒုန်းပရာသူးဒုန်းကူးနူမယ်ခေးကလေလော်" အနဲဘွေကနူလော်။ 34"ပေတရုနာနူ ဇူဘယ်တရွန်် သလာ့မူးရှိုးဇာ့အူးနူ ဘွေနူခေးဇာ့သိုက်ကိုးာနာကနဲကနူသု့ဘလယ်နူလော်။" ဘွေနဲမူးပေတရူးနူလော်။ 35ဘုန်နူဘွေယေရှုနဲမွန်း"ခေးနူ ခေးမုန်လေနာဆွားဟော့မာရူးဒေါ်စခူးမာ ကောက်ဆွားမှာကားဖလာမာခေးဘလိုင်ဆွားနာနူလော်။ဘုန်းနူခိန်နူ သူးနဲခူးတာလာဖလက်အော်ဧါ"ဘွေလွိုက်ဇိန်နူလော်။အငေါ်ပရဇာ့တဟယ်နူ"အဇာ့အော်ကိုး"အနဲဇိန်ကနူလော်။ 36နဲမယ် ခါးယိုးနူမယ် ဆွားဟော့ရူးစခူးကာ ၊ဆွားဟော့ဒေါက်စခူးပါကာ၊ သူးပရာမာတာဖော့တဟယ်နူ နူးဒူရှိန်းဇာ့အော်မယ် ဆားကေးနူစဒုံးဒေါ် ပရီဟော့နဒူရှိန်းကာ။ 37လိုင်ဆောာင်းဆူးကူးနူ"ပရာနူတပရာနူမယ်တာခေါ်ဝယ်ဖော့ ပရာတဟယ်ကနဲခေးကနူ မကိုက်လိုင်ဆောင်းဆူးနဲနူ ခေးဘာထွားထောင်ဇု့နူလော်။"ဘာသားရားနဲမယ် လိုင်ဆောင်းဆူးကူး ခေးရီခေးကေးဘွေးထောင်နူလော်။ 38"ယိုးနူးဒူရှိန်းအော်နု့ဘာလော်"အငေါ်ပရဇာ့တဟယ်နဲနူခိန်"ဘွေနူဒါဟုန်း"နဲကနူလော်။ 39ဘွေယေရှုနူ မကိုက်အမာရူးကူးနူအလေထောင်ဒုန်းသံလွင်ခေါဘလော့ခူနူလော်။ အငေါ်ပရာဇာ့တဟယ်မယ်လေဇု့အကာချုန်းနူလော်။ 40အတူးလေဘုန်းဂက်ငါးကလောင်ဒေါ် ဘွေနဲ အငေါ်ပရာဇာ့ဒုန်း"တာမာဒေါ့မာနွားသူးဇာ့အော်နဲခူးသာဘားဒေါ်အော်ကာ။မှာလောင်မူးနူလော်။ 41အငေါ်ပရာဇာ့အော်ကလဲဒေါ်အလမောက်တကီနူ အဝေလေဒေါ်ဒေါကလိမ်းလောင်ခဓိန်း 42"ဖါးဘွေ မကိုက်နတာသနူးနူ တာပေါင်းတာဆားခွက်ယိုးဘာနူဇာ့လားအွန်းခေးကာဘွေ၊ နဲမယ်အကာမွေးဆော့နတာဘာသာ့ကာ၊ ဇာ့မွက်ဖော့ခူးအတာသနု့ကာ"အသဘားထောင်ကနူလော်။ 43ဘုန်နူခိန် မော့ခူနူ တနဲဖော့တပရာတူးလေဒုန်းဘွေအော်ဒေါ်မာကွားဘွေနူလော်။ 44ဘွေယေရှုနူ အကုန်းဘာခေါင်ဘာထူးအကုန်းကျန့်နူးဒေါ်သဘားလုန်းသူလုန်းသာ့နူလော်။အခူစားသိမ်းဆူးတုန်းအအော်ဘွေလော်တဟယ်နူ မာမကိုက်သွီဒေါ်လောင်ထိုင်းတုန်းဟယ်ခူလော်လောင်။ 45ဘွေသဘားကနူဘုန်နူ အကျေဘလယ်မွန်းတုန်းအပရာအော်နူလော်။အပရာတဟယ်နူငူးတုန်းတာသာ့ကျန့်ရောက်ဒူဘုန် အလောင်ရာဒေါ် မီးနူးမူးနူလော်။ 46အခူစားဘွေနူ နဲအပရာတဟယ်"သူးမီးခလူးမာရား ၊သိုင်းရိုက် ၊မကိုက်သူးကျန့်ဘာတာမာနွားနူ သဘား"နဲထိုက်သားမွန်းနူလော်။ 47ဘွေယေရှုနဲကနူခိန်ပရာပူဒူတပူတူးလေဒုန်းဘွေအော်နူလော်။ ပရာနူပူကားနူ ဘွေယေရှုအငေါ်ပရဇာ့တဆူးသာ့နု့ကားယုဒရှကာရုတ်နူအကာ့လေပရာတပူနူလော်။ယုဒနူအရူဘွေအာခလိုက်ဒုန်းတာနူဝီဘွေနူလော်။ 48ဘွေယေရှုလွိုက် မူးယုဒရှင်ကာရုတ်ဒုန်း"ပရာ့ဖော့ခူး"ယိုးနူနာကဆားအယ်ခူးနနူဝီဧါး"နူလော်။ 49ယေရှုအပရာတပရာနူ အုတ်ဆူဒေါ် "ဘွေ ပါကဘာပိုင်းဝေဒေါ်နူးဒူဧါး"အလွိုက်ကနူလော်။ 50အပရာတပရာနူဘိုက်ထောင်နူးဒူ ဒေါ်ပိုင်းလောင်နူးဒူဒေါ်ဘာတာသဘားအခူအနာ့အပရာတပရာနာကူးဒေါ်ဘာအာကားစီတဘိုင်းနူလော်။ 51ဘွေနူ"ဒါဟုန်း"ဖင်လောင်ငေါ့နူဘုန်အမာဇိန်နူးမွန်းနာကူးဒုန်းအလာတိုင်းနူလော်။ 52ဘုန်ဘွေယေရှု နူပရာဒုန်းအကဖူဝေတာဘားခူနာ့တဟယ်၊ပရာအော်ပုန်းစရားတဟယ်၊ပရာလောနူးတဟယ်အခူနာ့"အဘာသရားဒုန်းသူးဖူခေးမကိုက်ပရာတာကမာဒူဒေါ်သူးလေဟော့နူးဒူ၊နာတိန်းမာရား။ 53ခေးနူ ခေးအော်ဇာ့ရားကူးပူးနူခိန် သူးဇာ့ဖူခေးမာရား။နဲမယ်ခါးယိုးနူမွက်သူးအခိန်လော်။ခါးယိုးမယ်တာခု့ဟော့ဘု့ဒေါ်တာကေးအခိန်နူလော်"မယ်အတာမှာလောင်နူလော်။ 54ဖူဘုန်ယေရှုလေဟော့မူးဒုန်း တာသဘားအခူအနာ့သင်ဒူကူးနူလော်။ပေတရုနူလေဇု့းမူးဒုန်းအနော်နူလော်။ 55သင်ကားဒီကူးနူပေတရုဒေါ်ပရာအားပရာနောင်းလောင်ခွိုက်ရိန်ဒေါ်ကုန်မီခိန် 56ပမွန်တပရာအုတ် ဘီပေတရုဘုန်"ကယောင်းယိုးပရာမယ် ပရာဆွားဇု့ဘွေယေရှု"အယုန်းစမုန်းဒေါ်နဲနူလော်။ 57ပေတရုတရာအယ်ဇိန်ရှူပွန်မူပရာနူ"ပွန်မွန်တပရာနဲတာနူခေးဇာ့သိုက်ကိုး။"နူလော်။ 58အော်တပလောဖော့ခိန်နူဒေါ် ပရာယုန်းသားပေတရုဒေါ်စမုန်းဒေါ်"နာမယ်ဘွေယေရှုအပရာကား"နဲကနူလော်။ပေတရူးနူ "ဇာ့မွက်ကိုးခေးဇာ့အော်မငါးနူ"နဲဇိန်ဘလယ်ပရာတပူနူလော်။ 59အော်သားတနာရီအခိန်နူ ပရာတပရာယုန်းသားပေတရု"ပရာယိုးပရာနူကမွက်ပရာလေဇု့ယေရှုလော်။အတာမာငေါ့နူသားလူပရာ ဂါလိလဲငေါ့လော်"နဲနူလော်။ 60ဘုန်ခိန်နူ ပေတရုနဲမွန်း"နာနဲသရားနူမယ်ခေးဇာ့သိုက်ငှားကိုး"အနဲဇိန်ဘလယ်နူလော်။ ဘုန်းပေတရုနဲကနူခိန်နူ ရှိုးအူးသားလိမ်းနူလော်။ 61ဘွေယေရှုအုတ်ဘာ့ဇိန်ပေတရုနူလော်။ဘုန်နူခိန်ပေတရု နူနာသု့ထောင်ဇိန်နူးမွန်ဘွေအတာပရွီးတဟယ်"ဇူပယ်ရှိုးးဖားဇာ့အူးမူးနူခိန် ဘွေနူခေးဇာ့သိုက်ကိုး နာကနဲကနူ သု့ဘလယ်နူလော်။တာပရွီးတဟယ်နူအာသနဲထောင်ဇိန်မူးနူလော်။ 62ဘုန်ပေတရု ဆွားထောင်ဒုန်း ခေါကွင်ဒေါ်ငူးကာ့ကရီးမွန်းနူလော်။ 63ပရာဖူလေဘွေတဟယ်နူ မာဒေါ့မာနွားဘွေဘုန်ထော်ဘွေလော်။ <br> 64မာဘူးမုန်းဖလုန်ဒေါ်တာယားဘုန်"ပါးခက်ဖလိန်းနာနူနဲအုတ်"နဲကနူ 65အဝေသူးမာဒေါ့အယ်လောင်ဘွေဒုန်း ခလိုက်အမူးမူးနူလော်။ 66မုန်းလီးထောင်တဘလယ်နူ တာသဘားခူနာ့၊မောရှေလိုင်ဆောင်းဆူးစရာ၊ယုဒရွီးအခူနာ့ဒေါ်တာသဘားဒူအခူနာ့တဟယ်လမောက်နူ အထွန့်လွိုင်းဘွေတဟယ်နူလော်။အဝေသူးနူ 67"နာမယ်မေရှိယနူ မွေးဘားဧါ"လွိုင်းကနူဒေါ် 68ဘွေနူ"ခေးကနဲမယ်ဇာ့မွက်သူးကယူး၊ခေးကလွိုင်းဇိန်သူးမယ် ဇာ့မွက်သူးကရှိတ်ဇိန်။ 69နဲမယ် ခါးယိုးနူလေအလမောက် ဘွေနူ အကာနောင်းဘာဒုန်း ဖားဘွေကထိတ်ဒုန်းအကာထွိုက်တဘိုင်းနူလော်။ 70"မွက်ကနူမယ်နာမယ် ဘွေဖော့ခူးနူအာမွက်ဘားဧါ"လွိုက်သားမူးကနူဒေါ် ဘွေနူ"မကိုက်သူးနဲနူခေးဖီးထောင်လော်"နဲဇိန်ဘလယ်မူးနူလော်။ 71အဝေသူးနာဟူးဘာအဝေရှိတ်ကနူဒေါ်ပရာလွိုက်တာတဟယ်နူ "အဝေအုန်းလောင်ဇိန်အနဲဟုန်း"အနဲရောင့်နူလော်။
Currently Selected:
Luke 22: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Karen, Geko Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
