Matthew 2
2
1ဟေရုဒ်ဘုရင်လက်ထက်တွင် ယုဒပြည်၊ ဗက်လင်မြို့တွင် ကိုယ်တော်ယေရှုအား ဖွားမြင်တော်မူခဲ့လေသည်။ ၎င်း အချိန်တွင် အရှေ့တိုင်းမှ ပညာရှိအချို့သည် ယေရုရှလင်မြို့သို့ ရောက်ရှိလာကြပြီး 2.“ယုဒလူမျိုးတို့ရဲ့ ဘုရင်ဖြစ်လာမယ့် ကလေးကို ဘယ်နေရာမှာ ဖွားမြင်တော်မူပါသလဲ။ သူနဲ့သက်ဆိုင်တဲ့ ကြယ်တစ်လုံးပေါ်ထွန်းနေတာ ကိုမြင်ခဲ့ရလို့ သူ့ကို ဖူးမြော်ပူဇော်လိုတဲ့အတွက် ဒီနေရာကို အရောက်လာကြခြင်း ဖြစ်ပါတယ်"ဟု စုံစမ်း မေးမြန်းကြလေသည်။ 3.ဤ အကြောင်းအရာများကို ဟေရုဒ်ဘုရင် နားတော်သို့ ပေါက်ကြားသွားသောအခါ ဘုရင်နှင့်တစ်ကွ ယေရုရှလင် မြို့သူ၊မြို့သားအားလုံး စိုးရိမ်ပူပန်သွားကြလေသည်။ 4ဟေရုဒ်မင်းသည် ဘာသာရေးဂိုဏ်းချုပ်များ နဲ့ ကျမ်းတတ် ဆရာတို့အား ခေါ်ယူတွေ့ဆုံ၍ “ခရစ်တော်ကို ဘယ်နေရာမှာ ဖွားမြင်မလဲ"ဟုမေးမြန်းလေ၏။ 5.ထိုအခါသူတို့က “ယုဒပြည်ဗက်လင်မြို့မှာ မွေးဖွား မယ်ဆိုတာကို (ပရောဖက်)အကြားအမြင်ရပညာရှိတစ်ပါးက ကျမ်းစာ ထဲမှာ ရေးသားဖော်ပြထားတာကတော့ 6.“အိုယုဒတိုင်းပြည်၏ဗက်လင်မြို့ အသင်ဟာ ယုဒတိုင်းပြည်၏ မြို့များထဲမှ အရေးအကြီးဆုံး မြို့တစ်မြို့ပင်ဖြစ်၏၊ သင်၏မြို့မှ သိုးထိန်းသား တစ်ယောက်ကဲ့သို့ ယုဒလူမျိုးခေါင်းဆောင်တစ်ဦး ပေါ်ထွန်းလာလိမ့်မည်”လို့ဖော်ပြထားပါတယ်"ဟူ၍ ဘုရင်အား လျှောက်တင်ကြလေသည်။ 7ထိုအခါ ဟေရုဒ်ဘုရင်သည် အရှေ့တိုင်းမှပညာရှိများအား လျှို့ဝှက်စွာ တွေ့ဆုံ၍ကြယ်ပေါ်ထွန်းရာအချိန်အတိအကျကို မေးမြန်းလေ၏။ 8.ထို့နောက် ဟေရုဒ်ဘုရင်က အရှေ့တိုင်းပညာရှိများကို “ဗက်လင်မြို့ကိုသွားပြီး ဒီကလေး ကို သေသေချာချာရှာကြပါ။ တွေ့လျှင်ချက်ခြင်း ငါကိုယ်တော်တိုင် ဖူးမျှော် ပူဇော်နိုင်ဖို့ ငါ့ဆီကိုပြန်လာပြီး တင်ပြလျှောက်ထားစေ" ဟုအမိန့်တော် ချမှတ်လိုက်လေသည်။ 9အရှေ့တိုင်းမှပညာရှိတို့သည် ဘုရင်၏အမိန့်တော်ကို နာခံ၍ ဆက်လက်ထွက်ခွာသွားကြလေသည်။ သူတို့သည် ကြယ်ပေါ်ထွန်းနေသော အရှေ့အရပ်သို့ ဆက်လက် ထွက်ခွာခဲ့ကြရာ ထိုကြယ်သည်သူငယ်တော်ဖွားမြင်ရာ အရပ်အပေါ်၌ ရပ်တန့်သွားလေ၏။ 10.ထိုကဲ့သို့ ကြယ်ကြီးရပ်တန့်သွားသည်ကို တွေ့ရသောအခါ သူတို့သည် အလွန်ဝမ်းမြောက် ဝမ်းသာဖြစ်ကြလေသည်။ 11သူတို့သည် ထိုအိမ်ထဲသို့ ဝင်ရောက်သွားသောအခါ ကလေးငယ်ကို မိခင်မာရိနှင့်အတူ တွေ့မြင်ကြရလေသည်။ ထိုသူတို့သည် ကလေးငယ်အား ဒူးထောက်ပြီး ပျပ်ဝပ်ကျိုးနွံစွာ ရှိခိုးကြလေသည်။ ကလေးငယ်အား သူတို့ယူဆောင်လာကြသော ရွှေငွေရတနာ၊ လောဗန် အမွှေးနံ့သာနှင့် မုရန်ဆေးတို့ကို ပူဇော်ဆက်ကပ် ကြလေသည်။ 12.ထို့နောက် ဟေရုဒ်ဘုရင်ထံ ပြန်မသွား ကြရန် သတိပေးသည့်အိပ်မက် မြင်မက်ကြသောကြောင့် သူတို့သည် အခြားသောလမ်းမှ မိမိတို့နေရပ်သို့ ပြန်သွား ကြလေ၏။ 13ပညာရှိများ ပြန်သွားပြီးလျှင် ယောသပ်၏ အိပ်မက်ထဲတွင် ဘုရားရှင်၏ နတ်မင်းကြီးတစ်ပါးက “ထတော့၊ သားအမိတွေကိုခေါ်ပြီး အီဂျစ်ပြည် ကို ထွက်ပြေးတော့၊ ငါရဲ့အမိန့်ရမှာသာ ပြန်လာပါ၊ ဘာကြောင့်လဲဆိုတော့ ဟေရုဒ်ဘုရင်ဟာ ကလေးကိုသတ်ဖို့ ရှာဖွေနေတယ်”ဟု အိပ်မက်ပေးလေသည်။ 14.ထိုညမှာပင် ယောသပ်သည် သူ၏ဇနီးနှင့်ကလေးကို ခေါ်ဆောင်ကာ အီဂျစ်ပြည်သို့ ထွက်ခွာသွားပြီးလျှင် 15.ဟေရုဒ်ဘုရင် ကွယ်လွန်သွားသည့် တိုင်အောင် ထိုပြည်တွင်နေထိုင်ကြလေသည်။ ထို့ကြောင့် ဤဖြစ်ရပ်များသည် ဘုရားရှင်၏ ဗျာဒိတ်တော်အား အကြားအမြင်ရပညာရှိ(ပရောဖက်)၏ ကျမ်းမှတစ်ဆင့် “ငါ၏ သားတော်ကို အီဂျစ်ပြည်မှ ခေါ်ဆောင်ခဲ့၏” ဟူသော အဓိပ္ပါယ်အတိုင်း အမှန်ဖြစ်ပေါ်လာခဲ့လေသည်။ 16ဟေရုဒ်ဘုရင်သည် အရှေ့တိုင်းပညာရှိများက သူ့အား လှည့်စားသွားကြောင်း သိရှိသွားသောအခါ အလွန်ဒေါသ ထွက်ပြီး ဗက်လင်မြို့အနီးအနားတွင်ရှိသော ကျေးရွာများမှ အသက်နှစ်နှစ်အရွယ်နှင့် နှစ်နှစ်အောက်ယောင်္ကျားကလေးများအားလုံးကို အသေသတ်ပစ်ရန် သူ့လူများအား အမိန့်ပေးလိုက်လေသည်။ ဤအသက်အရွယ်အချိန်ကိုရည်ညွှန်းအမိန့်ပေးရခြင်းမှာကိုယ်တော်ယေရှု ၏အသက် အရွယ်ကို ပညာရှိများထံမှ လေ့လာသိရှိခဲ့၍ဖြစ်သည်။ 17ထို့ကြောင့် ဘုရားရှင်၏ ဗျာဒိတ်တော်အတိုင်းအကြားအမြင်ရပညာရှိ(ပရောဖက်) ယေရမိမိန့်ဆိုသောကျမ်းတွင် 18.“ရာမအရပ်ဒေသတွင် ဝမ်းနည်းကြေကွဲ ငိုရှိုက်သံတို့ကို ကျယ်လောင်စွာကြားရ၏။ ရာခေလသည် သူမ၏ကလေးများအတွက် ငိုကြွေးနေ၏။ ကလေးအားလုံးသေဆုံးသွားပြီဖြစ်၍ ဖြေမဆည်နိုင်ဖြစ်နေလေသည်” ဟုဖော်ပြချက်မှာ အပြည့်အဝမှန်ကန်နေလေသည်။ 19ယောသပ် အီဂျစ်ပြည်တွင် နေထိုင်စဉ်အတွင်း ဘုရင်ဟေရုဒ် နတ်ရွာစံသွားလေသည်။ ဘုရားရှင်စေလွှတ်လိုက်သော နတ်စေတမန်တစ်ပါးသည် အိပ်မက်ထဲတွင် ပေါ်လာပြီး 20.“ထပါ၊ ကလေးနဲ့ သူ့အမေကို အစ္စရေးသို့ ပြန်ခေါ်သွားပါ။ ကလေးကို သတ်မယ့်သူတွေကွယ်လွန်သွားကြပြီ” ဟုအိပ်မက် ပေးလေသည်။ 21.ယောသပ်သည် အိပ်ယာမှနိုးသောအခါ သားနှင့်အမိကိုခေါ်၍ အစ္စရေး(ဣသရေလ)သို့ ပြန်သွား လေသည်။ 22သို့ရာတွင် ဘုရင်ဟေရုဒ်၏သား အာခေလ သည် ဖခင်၏ထီးနန်းအမွေကို ဆက်ခံစိုးစံလျက်ရှိနေ၏။ ထိုအကြောင်းကိုကြားလျှင် ယောသပ်သည် ထိုပြည်သို့ သွားရန်ကြောက်ရွံ့နေခဲ့လေသည်။ ထို့နောက်သူသည် အိပ်မက်အတိုင်း ဂါလိလဲဒေသသို့သွား၍ 23.နာဇရက်မြို့တွင် အခြေချနေထိုင်လေသည်။ ထို့ကြောင့်ဘုရားရှင်၏ ဗျာဒိတ်တော်အရ အကြားအမြင်ရပညာရှိ(ပရောဖက်)၏ ဟောကြားချက်မှာ “ခရစ်တော်အား နာဇရပ်မြို့သားဟု ခေါ်တွင်ကြလိမ့်မည်"ဟူသောကျမ်းချက်မှာ ပြည့်စုံမှန်ကန်လေတော့သည်။
Currently Selected:
Matthew 2: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
