1 Timóti 4
4
Misá taalim-doya ókkol
1Pak-Ruh ye hárasira góri hoó de ki, ahéri zobanat kessú manúc iman ottu lorizaybói, aar dúkabaz ruh ókkol or uzu edde bút or taalim ókkol or uzu mon dibo. 2Héndilla taalim ókkol aiyé de misákur ókkol or munaféki ttu, zetarár hélom ore gorom bóoñr lói marhá maridiya giyéh. 3Ítara biyá-cádi no goittó edde hodún-hodún hána baz rakíto maná goré, ze hána gún ore Alla ye foida goijjé de kiyólla hoilé, imandár ókkole edde sóiyi re zanoya ókkole zen híin cúkuriya gorí háa. 4Allar foida goijjá hárr kessú gom, ekkán ore yó háram ṭáaribar nái zodi Alla re cúkuriya gorí háa, 5kiyólla-hoilé híin toh Allar kalame edde duaye pak-sáf óizagoi.
Mosih Isár bála háadem
6Tui zodi e hotá gún imandár báiboináin dore buzái dós, tóoile tui Mosih Isár éggwa nekkar háadem óibi, tui toh iman or hotá ókkol or baabute edde nize mani soloór de bála taalim or baabute torbiyot faat asós. 7Duniyaibi kissá ókkol ottu duré tákic, ziín ore burá mayafuain dor banaouti kaháni hoilé yo fare. Yárbodol nizor dil ore dindári zindigi haṛai bolla bana. 8Kiyólla-hoilé gaa re banailé siríf kessú fáida asé deh, lekin dil ore dindári lla banailé hárr mikká ttu fáida asé, kiyólla-hoilé dindárit e zindigir edde ahérot or zindigir waada asé. 9Híyan toh hók hotá aar furafuri kobul or laayek. 10Hétolla éna añára meénnot edde duk gorír, kiyólla-hoilé añárar acá zinda Allar uore raikkí, zibá manúc beggún or Nejatdoya, háasgori uitarár zetará níki Íbar uore iman ané.
11Tui ítara re iín or hókum edde taalim dic. 12Tui juwan bouli honókiye hékarot no goróuk, bólke tui hotábattaraye, solasole, muhábbote, imane, edde pak tákaye imandár ókkol olla nomuna bon. 13Añí nú aiyí foijjonto pak-kalam telawot gorát, nosíyot gorát, edde taalim diyat birana ták. 14Tor bútore ze niyamot asé híyan ore éckara no goríc, ziyán zomát or buzurgó ókkole tor uore át díye rár agun hotár duara faiyós. 15Hoiyí de híin or uzu furafuri díyan déh; híin lói fori ták, zeéne tor ruúhanir torki beggúne deké. 16Nizor uzu edde taalim diyar uzu díyan rak. Híin ot lagi ták, kiyólla-hoilé héndilla goillé tui nizoré yó edde tor boiyan fúne de ítara re yó nejat fa bay faribí.
Currently Selected:
1 Timóti 4: RST
Highlight
Share
Compare
Copy
Want to have your highlights saved across all your devices? Sign up or sign in
The copyright is jointly and equally held by:
Copyright © 2024 The Word for the World International
Copyright © 2024 Rohingya East Asia Translation