Hibraniól 3
3
Muúsar túaro Isá ḍoóñr
1Hétolla, ó pak báiboináin ókkol, zetará asmani ḍak ot córik asó, Isár uzu soó, zibá Allar Rosúl edde Boro Imam bouli añára cíkar gorí. 2Íba toh Ubár hañse biccácdar accíl zibá ye Íba re zimma diíl, zendilla Muúsa yó Allar foribar guñṛat biccácdar accíl. 3Íba re toh Muúsar túaro bicí izzot or laayek gona giyéh, zendilla gór banoya ttu gór or túaro bicí izzot asé. 4Ze honó gór toh ezzon nó ezzone banaiyé de asé, montor hárr kessúr banoya óilde Alla. 5Becók, Muúsa Allar foribar guñṛat biccácdar accíl de óilde gulam ísafe, zeéne fore boiyan óibo de híin or gobá déh; 6montor Mosih toh Allar foribar or uore biccácdar accíl de óilde Fua ísafe. Zodi añára añárar hímmot edde acár borái mozbut gori dóri rakí, tóoile toh Íbar hé foribar añára éna.
Allar bonda lla ekkán aram or zaga
7Hétolla, Pak-Ruh ye zendilla hoiyé,
“Aijja zodi tuáñra Íbar abas fúno,
8tuáñrar dil doró no goijjó,
zendilla Añré guccá tulí díyl de októt
moidan zagat entán goijjíl de hé din goijjíl.
9Héṛe tuáñrar bafdada ókkole Añré entán goijjíl edde zasai goijjíl,
aar salic bosór foijjonto ítara Añr ham deikkíl.
10Hétolla Añí hé nosól lói guccá óilam,
aar hoóilam de, ‘Ítarar dil hámica gollot ot zaat táke,
ítara Añr rasta nó siné.’
11Tói Añí Añr guccáye hosóm háiyi de,
‘Ítara Añr aram or zagat bilkúl góli no faribó.’ ”#3:11 Zobur 95:7-11
12Ó báiboináin ókkol, hóboroddar, tuáñra honókiyo ttu zen endilla bura edde nabiccác ola dil no táke, ziyán zinda Alla ttu duré óizagoi. 13Bólke ezzon ore ezzone fottí din nosíyot goró zetódin “aijja” bouli howá zah, zeéne tuáñra honókiyor dil gunár dúkaye doró ói no zagói. 14Kiyólla-hoilé ze bóraca añára ttu cúrut accíl, híyan ore zodi ahéri foijjonto mozbut gori dóri táki, tóoile toh añára Mosihr bútore córik óigiyigoi. 15Howá gíyeh de héndilla,
“Aijja zodi tuáñra Íbar abas fúno,
tuáñrar dil doró no goijjó,
zendilla Añré guccá tulí díyl de októt goijjíl.”#3:15 Zobur 95:7,8
16Abas fúni Íba re guccá tulí díyl de híin hontará? Híin kí uitará beggún no zetará re Muúsa ye Ijíp ottu neelai ainníl? 17Aar salic bosór foijjonto Íba hontará llói guccá accíl dé? Uitará llói no né zetará guná goijjíl, zetarár lac moidan zagat fori accíl? 18Íba ye hontará lla e hosóm háiye de, “ítara Añr aram or zagat bilkúl góli no faribó” zodi nafórmani goijjíl de ítara lla no óile? 19Hé súrote añára dekí de, ítara nabiccác or zoriya beh góli nó fare.
Currently Selected:
Hibraniól 3: RST
Highlight
Copy
Compare
Share
Want to have your highlights saved across all your devices? Sign up or sign in
The copyright is jointly and equally held by:
Copyright © 2024 The Word for the World International
Copyright © 2024 Rohingya East Asia Translation