Titus 3
3
Dindári solasol
1Ítara re yaad goráide de ki, dec or hókumot-goróyar edde adikari ókkol or niyom or bútore tákito, ítarar hotá manitó, fottí gom ham gorí bolla toiyar tákito, 2honókiyor bodnam no goittó, hoijja-fózzat no goittó, edde cídar sáañte manúc beggún or hañse noromdari daháito. 3Kiyólla-hoilé ek hale añára yó toh obuz, nafórman, edde gollot ot accílam, aar ḍoilla-boḍoilla mon or edde ayacir gulamit accílam. Añára ducconi edde hásorote beh zindigi haṛaitám; héñtte añára re yó nafórot gorá zayto aar añára yó nafórot goittám. 4Montor zeñtté añárar Nejatdoya Allar meérbani edde muhábbot insán-zati lla zahér óiye, 5héñtte Íba ye añára re basaifélaiye. Híyan añára nize goijjí de honó forhésgarir zoriya no, bólke Íbar meérbani mozin beh añára re Pak-Ruhr duara basaiyé deh, ze Ruh ye añára re dúifelai noya zormo diyé edde noya zindigi diiyé, 6zibá re níki añárar Nejatdoya Isá Mosihr duara Alla ye añárar uore furafuri ḍálidiye, 7zeéne añára Íbar rahámote forhésgar ṭóori yore ofúrani zindigir mirasdár boni fari, ziyán or añára ttu acá asé. 8Híin hók hotá. Añí saái de ki, tui hotá híin hímmot or sáañte boiyan gor, zeéne zetará Allar uore iman ainné ítara gom ham ot lagi tákibar uzu díyan deh. Héndilla gom ham gorón toh manúc beggún olla bála aar fáidar ham.
9Montor behar torkatorki, háandan or baabute matamati, aar Córiyot or baabute barábari edde hoijja-fózzat diya ttu duré tákic, kiyólla-hoilé híin ot honó fáida nái, híin behar. 10Faáṭa-faáṭi foida goré de ítare ekbar duibar úñciyari dic, yárbaade goillé ítar llói ar taalukat no rakíc, 11kiyólla-hoilé tui toh zanos, héndilla manúc ókkol sóiyi ttu lorigiyói, aar guná gorí-gorí nizoré hosúrbon ṭóora.
Ahéri hotá edde sólam
12Zeñtté añí tor héṛe Artimas ore arnóile Tukikus ore difeṛáiyum, héñtte añr héṛe Nikópolis cóor ot zeéne faros héene ai bolla kucíc goríc, kiyólla-hoilé añí cítkhal héṛe haṛaibár fáisela goijjí. 13Ukil Zenás ore edde Apólos ore ítarar sofór ot zai bolla zeddúr faros héddur modot goríc, zeéne ítara ttu honó homi no táke. 14Añárar maincór ttu gom ham gorát lagi táka cíkon zorur, háasgori zeṛé goríbar bicí zorur óiye, arnóile ítarar zindigi cár nó óibo.
15Añr fúañti asé de ítara beggúne toré sólam zanar. Imandár ókkol ore añárar sólam dic, zetará añára re muhábbot goré.
Allar rahámot tuáñra beggún or uore zari tákouk.
Currently Selected:
Titus 3: RST
Highlight
Copy
Compare
Share
Want to have your highlights saved across all your devices? Sign up or sign in
The copyright is jointly and equally held by:
Copyright © 2024 The Word for the World International
Copyright © 2024 Rohingya East Asia Translation