LUKA 20

Jesuʼ Aana Neihna Kidong

(Mat 21:23-27; Mrk 11:27-33)

1Ni khat, Jesu in biakinn tual sungah mite kiangah thu hilhin, Lungdamna Thu genin a om laitakin, siampi liante, Thukham hilh siate le upate hong pai khawm uh a, 2Jesu kiangah, “Kuaʼ thu tawh hih bangin gamta a, kua in thu hong pia ahi hiam, hong gen dih in,” ci-in a dot uh ciangin 3Jesu in, “Kei zong thu khat ka hong dong ding hi. Hong gen dih un. 4Johanʼ tuiphumna pen Pasianʼ tung panin thu ngah ahi hiam, ahih kei leh mihing tung panin thu ngah ahi hiam?” ci-in a dawng hi. 5Tua ciangin amaute khatlekhat kikum uh a, “Pasianʼ tung panin thu ngah hi,” ci lehang, “Bang hangin ama thu um lo na hi uh hiam?” hong ci dinga, 6“Mihing tung panin a ngah hi,” ci leuleu lehang, Johan pen kamsang taktak hi, ci-in mi khempeuh in um uh ahih manin suang tawh hong deng lum ding uh hi, a kici uh hi. 7Tua ahih manin Johanʼ tuiphumna pen kua thu tawh hiam, cih thei kei ung, ci-in a dawng uh hi. 8Tua ciangin Jesu in amaute kiangah, “Hih bangin ka nasepnate kuaʼ thu tawh ka sep hiam cih kei zong kong gen kei ding hi,” a ci hi.

Leenggah Lo le A Khote Thu gentehna

(Mat 21:33-46; Mrk 12:1-12)

9Tua ciangin Jesu in mite kiangah thu gentehna khat gen a, “Mi khat in lo zuanin leenggui suan a, lo khawhlawhte khawhlawh sakin, amah gam dangah pai-in sau veipi a tam hi.#Isa 5:1 10Leenggah min hun a tun ciangin ama ngah zah tang ding a va la dingin lo khawhlawhte kiangah a nasemte khat a sawl hi. Ahi zongin lo khawhlawhte in amah na sat gawp uh a, khut hawmguakin a ciahsak uh hi. 11Tua ciangin nasem dang khat sawl leuleu a, lo khawhlawhte in tua pa zong na sat gawpin maizumsak gawp uh a, khut hawmguak mahin a ciahsak uh hi. 12Tua ciangin a thum veina dongin a nasem dang khat mah sawl leuleu a, lo khawhlawhte in amah zong na liamsak gawpin na sawn khia uh hi. 13Tua ciangin leenggah lo nei pa in, ‘Bang cih ding ka hi hiam? Ka it mahmah ka tapa ka sawl ding hi. Amaute in amah na zahtak bawl kha ding uh hi,’ a ci hi. 14Ahi zongin lo khawhlawhte in a tapa a muh uh ciangin khatlekhat in, ‘Hih pa, a gamhluah ding pa ahi hi. Ama gamhluah ding teng i ngah theih nadingin amah that ni,’ a ci uh hi. 15Tua ahih manin amaute in lo nawl ah amah sawn khia-in a that uh hi.

“Tua ahihleh lo nei pa in hih lo khawhlawhte bang cih ding ahi hiam? 16Amah hong pai-in hih lo khawhlawhte that dinga, midangte khawhlawhsak ding hi,” a ci hi.

Amaute in hih thu a zak uh ciangin, “Hih bangin piang kei tapeuh hen,” a ci uh hi. 17Tua ciangin Jesu in amaute enin,

“‘Innlamte in a nilkhiat suang pen

innkiu suang bulpi suak khinta hi,’

ci-in Lai Siangtho in a gen pen bang a cihnopna ahi hiam?#La 118:22 18Tua suang tungah a kia mi khempeuh kizan gawp dinga, mi khatpeuh tungah tua suang a kiat leh zong deng vui gawp ding hi,” a ci hi.

Sisarʼ tungah Siah Piakna

(Mat 22:15-22; Mrk 12:13-17)

19Jesu in hih thu gentehna a gen pen amaute a cihnopna hi, ci-in Thukham hilh siate le siampi liante in thei uh ahih manin Jesu man pah nuam uh hi; ahi zongin mihonte kihta uh ahih manin man pah ngam lo uh hi. 20Tua ahih manin a hunhoih ngakin vil gige uh a, ukna aana a neiteʼ khut sungah Jesu a ap theih nadingun ama kampau tawh a mat nopna-un, lungsim takpi tawh thu dong a va kineihkhem dingin mi pawl khat thukan dingin a cial uh hi. 21Hih thukante in Jesu kiangah, “Sia aw, na thuhilhnate le na thugente man mahmah hi. Nang in mi liante zahtak bawl tuan loin, Pasianʼ thu a mantakin na hilhna ka thei uh hi. 22Rom Kumpipa Sisarʼ tungah siah i piak ding a kilawm mah ahi hiam, kilawm lo ahi hiam?” ci-in a dong uh hi.

23Ahi zongin Jesu in amauʼ ngianbawlna thei ahih manin, 24“Sum peek khat hong lak dih un. Hih sum tunga om lim le min kua-aʼ ahi hiam?” a cih ciangin, “Kumpipaʼ lim le min hi,” ci-in a dawng uh hi. 25Tua ciangin Jesu in, “Tua ahihleh, Kumpipa aʼ teng Kumpipa tungah na pia unla, Pasian aʼ teng Pasianʼ tungah na pia un,” a ci hi. 26Ama kampauna tawh mihon lak panin a mat nadingun thu om thei lo ahih manin ama thudawnna hangin lamdang sa-in a om khikhe uh hi.

Thawhkikna Thudotna

(Mat 22:23-33; Mrk 12:18-27)

27Tua ciangin, “Thawhkikna om lo hi,” a ci mi pawl khat Jesu kiangah hong pai uh a,#Sawl 23:8 28“Sia aw, Moses in eite adingin ngeina khat hong koihsak a, ‘Mi khat in ta nei loin a zi a sihsan leh, tua a sipaʼ khang a kizop theih nadingin a naupa in tua meigongnu teenpih tahen,’ ci hi.#Thkna 25:5 29Khat vei, unau pasal sagih om hi. A u pen in zi nei a, ta nei loin a si hi. 30Tua ciangin a naupa in teenpih a, 31tua banah a nau sawn in teenpih leuleu hi. Tua bangin a unau sagih dongin teenpih uh a, ta nei lo vive-in a si khin uh hi. 32A tawpna ah numei zong hong si hi. 33A unau sagih mahin hih nu teenpih ciat khin uh ahih manin thawhkik ni ciangin hih numei pen a kua penʼ zi hi ding ahi hiam?” ci-in a dong uh hi.

34Tua ciangin Jesu in, “Tu hun a hih leitung mite in numei le pasal kiteenna nei uh hi. 35Ahi zongin sihna panin thokikin a hong tung ding hunah a nungta dingin a kilawm mite in kiteenna cihte nei lo uh hi. 36Amaute pen vantungmi tawh kibang uh a, si thei nawn lo uh hi. Sihna panin a thokik khinte ahih manin amaute pen Pasianʼ tate ahi uh hi. 37Tua tham loin Moses in zong misite a thawhkikna thu teltakin hong lak hi. Sawlpang kuang thu a genna munah Topa pen, ‘Abraham Pasian, Isaac Pasian, Jakob Pasian,’ ci-in a na gen hi.#Pai 3:6 38Amaute khempeuh hing uh ahih manin, Pasian pen mihingteʼ Pasian hi a, misiteʼ Pasian hi lo hi, a cihnopna ahi hi,” ci-in a dawng hi. 39Tua ciangin Thukham hilh siate pawl khat in, “Sia aw, na dawnna hoih mahmah hi,” a ci uh hi. 40Tua ahih manin Saddusi mite in thu a dong ngam nawn kei uh hi.

Davidʼ Suan tawh kisai Thudotna

(Mat 22:41-46; Mrk 12:35-37)

41Ahi zongin Jesu in amaute kiangah, “Bang hangin Thukham hilh siate in Khris pen Davidʼ suan hi, ci zenzen ahi uh hiam? 42-43Bang hang hiam cih leh David mahmah in La Bu sungah,

‘Topa in keima Topa tungah thu gen a:

Na galte, na khe nuai ah

ka koih matengin ka tak lamah tu in,’

ci hi.#La 110:1 44David in Khris pen, ‘Topa,’ ci ahih manin bang hangin Khris pen Davidʼ suan hi thei ding ahi hiam?” a ci hi.

Jesu in Thukham hilh siate Mawhsak

(Mat 23:1-36; Mrk 12:38-40; Luk 11:37-54)

45Tua ciangin Jesu in mi khempeuh zakin a nungzuite kiangah, 46“Thukham hilh siate na bat khak loh nadingun kidawm un. Amaute in puan tualpi silh nuam uh a, mihon lakah a kizahtak hopih ding deihin, kikhopna inn sung le pawi lakah a om uh ciangin ulianteʼ tutna mun hoihte bekah tu nuam uh hi. 47Meigong numeite tungah nuamtak sa-in, khemin a neihsa teng uh laksak uh a, mite in mihoih a sak nading uh a deihna-un thu sau pipi a ngen uh hi. Amauʼ kineihkhemna tawh kizui-in a gimthuak ding uh lian zaw ding hi,” a ci hi.

Currently Selected:

LUKA 20: TBR17

Highlight

Copy