متّانین رئوایت 10
10
اون‌ائکی شاگئردئن گؤندَ‌رئلمه‌سی
1عئسا اون‌ائکی شاگئردئنی اؤز یانینا چاغیریب، اولارا قودرت وردی کی، خبئث روحلاری قووسونلار و هر جور ناخوشلوق و مرضه شفا ورسئنلر. 2اون‌ائکی حوارئنئن آدلاری بولاردیر: بئرئنجئسی پطروس چاغیریلان شمعون، و اونون قارداشی آندریاس. زِبِدِیئن اوغلی یعقوب و قارداشی یوحنّا. 3فئلئپوس و بارتولمای. توما، و باج ییغان متّا. آلفاعوس اوغلی یعقوب و تادای. 4وطنپرست شمعون و عئسایا خیانت اله‌ین یهودا ائسکاریوت.
5عئسا بو اون‌‌ائکی‌لری گؤندَ‌ردی و اولارا امر اله‌یئب ددی: «قیرییهودئلره گدن یولا گتمه‌یئن و سامئره‌لی‌لرئن شهرلرئندن هچ بئرئنه گئرمه‌یئن. 6بونون یرئنه ائسرایئل خالقینین ائتمئش قویونلارینین یانینا گدئن. 7و گده-گده اعلان اله‌یئب دیئن کی، گؤیلرئن پادشاهلیغی یاخیندیر. 8ناخوشلارا شفا ورئن، اؤلولری دئرئلدئن، جوذاملی‌لاری شفا ورئن، ائبلئس روحلاری ائنسانلاردان قووون. موفته آلیبسیز، موفته ورئن. 9قاییشلاریزدا قیزیل، گوموش، یا دا مئس پول گؤتورمه‌یئن. 10سفر اوچون نه توربا گؤتورون، نه آرتیق کؤینک، نه باشماق، نه ده اَل آغاجی. چونکی ائشچی اؤز روزئسئنه لایئقدئر. 11هانسی شهره، یا دا کنده گئره‌سئز، دَیَرلی بئرئنی آختارین و او یِردن چیخاناجاق اوردا قالین. 12اِوه گئرنده، اِوده‌‌کئلری سالاملایین. 13اگر او اِوده‌کئلر بونا لایئق اولسالار، سالامیزین برکتی اولارین اوستونده قالار. لایئق اولماسالار، سالامیزین برکتی اؤزوزه قاییدار. 14کئم سئزی قبول اله‌مه‌سه و سؤزلرئزه قولاق آسماسا، او اِودن و یا شهردن چیخان واخت، آیاقلاریزداکی توزی چیرپین. 15دوغروسونی سئزه دیئرم؛ قئیامت گونی، سودوم و گومورا شهرئنئن حالی، او شهرئن حالیندان لاپ آسان اولاجاق.»
16باخین، من سئزی قوردلار آراسینا قویونلار کئمی گؤندَ‌رئرم؛ اونا گؤره ده، ائلان کئمی عاغیلّی، گؤیَرچئن کئمی ده ساده اولون. 17آمّا اؤزوزی خالقدان گؤزله‌یئن؛ چونکی اولار سئزی محکمه‌لره تسلئم الئیه‌جکلر و عئبادتگاهلاریندا سئزه شالّاق ووراجاقلار. 18مندن اؤتری سئزی والئلرئن و پادشاهلارین حوضورونا آپاراجاقلار کی، اولارا و قیرییهودئلره شهادت اولسون. 19سئزلری تسلئم اله‌ین زامان، نجه و یا نه دئیه‌جه یئزئن فئکرئنه قالمایین؛ چونکی نه دئیه‌جه‌یئز او واخت سئزه ورئله‌جک. 20دوغرودان دا کی، دانیشان سئز دیئلسئز، بلکی آتازین روحودور کی سئزئن دئلئز ائنن دانشیر. 21قارداش قارداشی و آتا اؤولادینی اؤلومه تسلئم اِلئیهجک. اؤولادلار آتا-آنالارینین ضئدّئنه قالخاجاقلار و اولاری اؤلدورده‌جکلر. 22منئم آدیما گؤره هامی سئزدن نئفرت اِلئیهجک، آمّا آخیرا کئمی دایانان نئجات تاپاجاق. 23بئر شهرده سئزی قوودوقلاری زامان، او بئرئسئنه قاچین. چونکی دوغروسونی سئزه دیئرم، سئز، ائسرایئل شهرلرئنی دولانیب قورتارمامیش، ائنسان اوغلی گله‌جک.
24شاگئرد اؤز موعلّئمئندن بؤیوک دیئل؛ قول دا اؤز آغاسیندان بؤیوک دیئل. 25شاگئردئن اؤز موعلّئمی کئمی اولماسی، قولون دا اؤز آغاسی کئمی اولماسی اولارا کئفایتدئر. اگر اِو صاحئبئنه بعل-زبول دسه‌لر، اونون اِو اهلئنه نه قدر آرتیق دئیه‌جکلر.
26اونا گؤره، اولاردان قورخمایین؛ هچ اؤرتولی بئر شی یوخدور کی، آشکارا چیخماسین، یا دا هچ گئزلئن بئر شی یوخدور کی، بئلئنمه‌سئن. 27سئزه قارانلیقدا نه دیئرم، اونی ائشیقدا دیئن؛ قولاغیزا پیچیلدانانی دا داملاردان اعلان اله‌یئن. 28اولاردان قورخمایین کی، بدنی اؤلدوروب، روحی اؤلدوره بئلمئرلر. اوندان قورخون کی، هم روحی، هم ده بدنی جهنّمده هلاک اله‌مه‌یه قادئردئر. 29مگر ائکی سرچه بئر قارا پولا ساتیلمیر؟ آمّا آتازین حؤکمی اولمادان، بولاردان حتّا بئری ده یره دوشمز. 30حتّا سئزئن باشیزداکی توکلرئن ده هامیسی بله ساییلیب. 31قورخمایین؛ سئزئن ارزئشئز، بئر چوخلی سرچه‌دن آرتیقدیر.
32هر کئم ائنسانلارین حوضوروندا، مَنئمکی اولدوغونی دئله گتئرسه، من ده اونی گؤیلرده اولان آتامین حوضوروندا دئله گتئره‌جه‌یم. 33آمّا هر کئم ائنسانلارین حوضوروندا منی ائنکار اله‌سه، من ده اونی گؤیلرده اولان آتامین حوضوروندا ائنکار الئیه‌جه‌یم.
34گومان اله مه‌یئن کی، یِر اوستونه صولح گتئرمه‌یه گلمئشم؛ صولح یوخ، قیلینج گتئرمه‌یه گلمئشم. 35چونکی من گلمئشم کی،
«”اوغولی آتادان،
قیزی آنادان،
و گلئنی قاینانادان آییرام.
36آدامین دوشمنلری، اؤز اِوئنئن اهلی اولاجاق.“
37«کئم آتاسینی یا دا آناسینی مندن آرتیق سِوه، منه لایئق دیئل؛ و کئم اوغلونی یا دا قیزینی مندن آرتیق سِوه منه لایئق دیئل. 38هر کئم اؤز چارمیخینی گؤتورمه‌یئب، دالیمجا گلمه‌سه، منه لایئق دیئل. 39هر کس اَللَشسه کی اؤز جانینی ساخلایا، اونی الدن وره‌جک؛ آمّا هر کس منئم اوچون اؤز جانیندان کِچسه، اونی ساخلایاجاق.
40«هر کئم سئزی قبول اله‌سه، منی قبول اله‌مئش؛ و هر کئم منی قبول اله‌سه، منی گؤندَ‌رَنی قبول اله‌مئش. 41هر کس کی بئر پیغمبری پیغمبر اولدوغونا گؤره قبول اِلئیه، بئر پیغمبر اجرئنی آلاجاق و هر کس کی بئر صالح آدامی صالح اولدوغونا گؤره قبول اِلئیه، بئر صالح آدامین اجرئنی آلاجاق. 42کئم بو کئچئکلردن بئرئنه، شاگئردئم اولدوغی اوچون، بئر کاسا سویوق سو ائچئرتسه، دوغروسونی سئزه دیئرم کی، اجرسئز قالمایاجاق.
Currently Selected:
متّانین رئوایت 10: CAB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
