لوقای انجیل 23

محاکمه پیلاتُس و هیرودیس ورجه

1هوزمون همته شورا کسون، ویریسَئن و عیسی پیلاتُس ورجه بَبوردَن 2و اوناجی شکایت بودن و بوتَن: «اَمه ایی مَردکه مجریم بیاتیم. او امه قومَ گُمراهَ کأدره و اَمره نوگزانه امپراطور رومِ مالیات هدیم و ادعا کوئنه که مسیح موعود ایسّه یعنی یکته پادشاه.» 3پیلاتُس عیسای بپورسه: «تو یهود پادشاه ایسّی؟» عیسی جواب بده: «تو ایطو بوتی!» 4بازین پیلاتُس کاهینون سرؤن و جماعت بوته: «هیچ جرمی ایی مَردکه محکوم گودَن به نیاتم.» 5امّا اوشون اصرار امره بوتَن: «او تموم یهودیه مِیئن جلیلای بیته حتی تا اِرَه، هرجا که شنه خو آموتن أمره مردم کوک کوئنه.»

6هیطوکه پیلاتُس اینه بشتؤسه، خواسی بودونی او جلیل شی ایسّه. 7و چونکه بفهمسه که هیرودیس حکمرؤنی منطقه شِه، عیسی، اونه ورجه سرا دا، چونکه هیرودیس او زمون اورشلیم میئن ایسَه بو. 8هیرودیس هیطوکه عیسی بدِه، خیلی شاد بوُ، چونکه خیلی وخت بو اونه خواس بینی. پَس بنا به اوچیزیکه که درباره عیسی بشتؤسه بو، ناجه داشت یکته نیشؤنه اوناجی بَینی. 9پَس عیساجی خیلی سؤال بوده، امّا عیسی اونه جواب ندَه. 10کاهینون سرؤن و تورات معلمون که اوره ایسّه بُن، اونه خیلی بهتون زِئن. 11هیرودیس و اونه سربازؤن هم عیسی بی حرمتی گودَن و اونه رَوخشنَ گیتن. بازین یکته شاهؤنه ردا اونه بپوشونِئن و پیلاتُس ورجه وگاردوئنِئن. 12او روز میئن، هیرودیس و پیلاتُس همدیگره أمره ریفقَ بوئن، چونکه قبلا دُشمن بوئن.

13هوموقع پیلاتُس کاهینون سرؤن و قوم پیله ترؤن و مَردم دوخونده 14و اوشونه بوته: «شمه، ایی مَرداکاکه می ورجه بأردین و بوتین که مردوم گمراه کأدره. مو شیمه ورجه اونه بپورس دپورس بودم و او جرمؤنی که شمه اونه ضد گونین هیچی نیاتّم. 15هیرودیس هم هیچی نیاته، چونکه اونه امه ورجه وگردوئنه. هیطو که اینین، کاری نُوده که مستحق موردَن ببی. 16پَس اونه شَلاق زِئنم و سرا دِئنم.» 17هر عید میئن، پیلاتُس باید یکته زندونیِ اوشونه به سرا دائبی.

18امّا اوشون یکجایی فریاد بزئن: «اونه سربه نیستَ کون و بارْاباسَ اَمه به سرادی!» 19بارْاَبّاس بخاطر شورشی که شهر میئن اتفاق دکته بو، و هم قتل واسه، زندونِ میئن ایسابو. 20پیلاتُس که خواسی عیسی سرا دای، یبار ده اوشون أمره گب بزِه. 21امّا ایشون هیطو فریاد زِئن که: «اونه صلیب سر بَبَر! اونه صلیب سر بَبرَ!» 22پیلاتس سُوم بار اوشونه بوته: «چرِه؟ چی بدی بوده؟ مو هیچ جرمی اونای نیاتّم که مستحق موردن ببی. پَس اونه شَلاق زِئنم و سرا دئنم.» 23امّا اوشون فریاد أمره اصرار بودَن که صلیب سر بشی. سرآخر اوشونه صدای بلند حریفَ بو 24و پیلاتُس او حُکمی که خواسّن، هَدَه. 25او مَرداکی که شورش و قتل واسه زندؤن میئن ایسابو و جماعت اونه آزادیِ خواستن ویلَه گوده و عیسی ایشونه هَدَه تا خوشونِ دیل بخواه اونه امره رفتار بکونَن.

عیسی صلیب سر بوردَن

26وختیکه عیسی بوردبؤن یکته مَردکای به ایسم شَمعون، که قیرَوانِ مردم جی بو و زمیناجی، شهر میئن امئدبو، بیتَن و صلیبِ اونه دوش سر بنَئن، و اونه مجبورَ گودن عیسی دومبالسر ببری. 27خیلی از مَردم، و زناکؤنی أم که خوشونِ سینه سر کوتّن و ونگ زئن، اونه دومبالسر راه دکتن. 28عیسی خو روئه وگردؤنه و اوشونه بُوته: «اَی اورشلیم لاکوکؤن، می واسه ونگ نزنین؛ خودتؤن به و شیمه زاکون به ونگ بزنین. 29چونکه او زمونی هنه که شمه گونین: ”خوشا به حال زناکونی که ایشونِ به زأک نبنه، خوشا به حال او شوکومؤنی که هَرگی شوکومانَیتن و سینه‌ئانی که هَرگی شیر ندائن!“ 30هو زمون، کوهؤنِ گونن: که ”امه سر فگردین!“ و پوشته أن که: ”امره بپوشؤنین!“ 31چونکه اَگه تَر چوب امره ایطو بوُدَن، خشک چوب امره چه کوئنَن؟»

32دو ته دیگه مَرداکاکم که هر دو جنایتکار بوئن، بوردبؤن تا عیسی أمره بکوشَن. 33وختی او جیگا که جمجمه ایسم داشت برسه ئن، اوره عیسی صلیب سر ببوردن و او دوته جنایتکار هم صلیب سر ببوردن، یکته اونه راست ور و اوته اونه چپ ور. 34عیسی بوته: «پئر، ایشونِ بَبَخش، چونکه نودُئنَن چی کأدرن.» هوموقع اوشون قرعه تؤدَن تا اونه رختؤنِ خوشونِ میئن سهم بکونن. 35مَردم نیگاه کائدبون و قوم پیله ترؤن هم روخشنَ گیتن گوتَن: «بقیه مردومِ نجات بَدَه! اَگه مسیح موعود ایسّه و خُدا انتخاب بوبوُ، بدار خوشِ نجات بدای.» 36سربازؤن هم اونه رُخشنَ گیتَن. ایشون عیسی ورجه بومئن، ترشَ بوُ شراب اونه هَدَن 37و گوتَن: «اَگه یهود پادشایی، تَه نجات بدی.» 38یکته بنویشته هم اونه سر جور بچسبونِئبون که ’ایی ایّسه یهودی أن پادشاه.‘

39یکته از او دوته جنایتکار که صلیب سر ببرده بوئن، بی احترؤمی أمره عیسی گوت: «مگر تو مسیح موعود نی یی؟ پَس اَمَره و خودته نجات بَدی!» 40امّا او یکته اونه تشر بزه و بوته: «خُدا جی نترسنی؟ تو هم هو حُکم دَئنی! 41امه مجازات به حق ایسّه، چونکه سزای أمه اعمالِ. امّا ایی مَرداک هیچ خطایی نُوده.» 42بازین بوته: «ای عیسی، وختیکه تی پادشاهیِ برسی، منم به‌یاد بأر.» 43عیسی جواب بَدَه: «راست راستِ، تَه گونَم، ایمرو می أمره بهشت میئن هنی.»

عیسی موردَن

44ساعت دور وَر دوازده ظهر بو که تاریکی سراسر او ولایت بیته و تا ساعت سه بعدظهر ادامه داشت، 45چونکه آفتاؤ ده فُنتوس. هی موقع بو که، محرابگاه پرده از وسط دوپاره بوبوُ. 46بازین عیسی ژگله أمره بوته: «پئر، می روحِ تی دَستؤن میئن نِئنَم.» اینه بوته و خوشِ آخرین نفسِ بَکشِه. 47سربازؤن فرمانده، ایی اتفاق دِئنِ أمره، خُدا ستایش بوده و بوته: «راست راستِ که ایی مَرداک بی‌گنُاه بو.» 48مَردمی هم که تماشا گودنِ به جومَه بؤبُن، هیطو اوچیزی که اتفاق دکته بو بدِئن، درحالی که خوشونه سینه سر کوتّن، وگرسن خوشونِ خونه. 49امّا همۀ اونه آشنایؤن، او زناکؤنی هم که جلیلای اونه دومبالسر بوما بُن، دور ایسابوئن، ایی چیزؤنِ نیگاه کادبون.

عیسی دفنَ گودن

50اوره یکته مردکای به ایسم یوسف ایسَه بو، یهودیه رامه شهرا جی. او شورا عضو بو، یوسف مَرداکی بو خُوروم و صالح، 51و شورا تصمیم أمره موافق نبو. او خُدا پادشاهی ریفا ایسابو. 52ایی مردکای پیلاتُس ورجه بُشو و عیسی جنازه بخواسّه. 53پَس عیسی جنازه جیر بأرده، کتؤن میئن فیبیته و یکته مقبره که سنگ میئن بتاشته بوبؤ بو بَنا که تا الؤن هیشکی اونه میئن بنا نوبُو بو. 54او روز، ’آماده بوئنِ روز‘، عیدِ به بو و هیچّی نوموُنسه بو تا مقدس شنبه روز شروع ببی. 55زناکؤنی که جلیلای عیسی دومبالسر بومه بُن، یوسف دُومبال بُشوئن و مزار جا و اینه که چوطو جنازه اوره بنائنّ بدِئن. 56بازین وگرسن خونه، حنوط و عطری جات چا گودَن و شَنبه روز میئن عین شریعت حکم استراحت بودن.

Currently Selected:

لوقای انجیل 23: EGB

Highlight

Copy