انجیلِ یوحنا 9
9
شَفِی کور مادرزا
1عیسی مِنِه رَیی که ایرَت، کورِ مادرزایی نَه دی. 2شاگردَلِش وَش پُرسییِن: «استاد، نتیجۀ گِنِی کیَه که ای مِرد کور وَ دنیا اومَیِه؟ گِنِی خِشِه یا دِیبُوش؟» 3عیسی جواب دا: «نَه وَ خُوش، وِ نَه وَ دِیبُوش؛ بلکم ایطو وابی تا کارَلِ خدا مِنِه وِّ دیار وابو. 4تا روزِه، بایِس کارَلِ کسی نَه که مِنَه بِسی کِردِه اَنجوم بییُم؛ شُو نِزِنگ ایابو، که مِنِه وِه کسی نیتَرِه کار کِنِه. 5تا زمونی که مِنِه جَهانُم، نورِ جَهانُم.» 6یِنَه گُت وِ اُو دِهونِشَه وِردا وَ زمین، شُل دِرُس کِه وُ وِه نَه مالی وَ تییَلِ او مِرد 7وِ وَش گُت: «بِرَه وِ خِتَه مِنِه حوضِ سیلوحا بِشور. (هَمو حوضی که وَش ایگُن "بِسی وابییَه")» پَ او مِرد رَت وُچه وِ تییَلشَه شُس، وَ وُچه بِی تییَل بُر وَرگشت.
8هُمسایَل وِ کَسَلی که نَهاتَر وِّ نَه وَ حالِ گِدِیی دییَه بییِن، پُرسییِن: «مَه یِه هَموِه نی که اینِشَس وِ گِدِیی ایکِه؟» 9یِهپارهای گُتِن: «هَموِّنِه.» یِهپارهای دَ گُتِن: «وَ شکلِ وِّ نِه.» امّا وِّ خِش ایگُت: «مِ هَموِّنُم.» 10پَ، وَش پُرسییِن: «چطو تییَلِت واز وابی؟» 11جواب دا: «مِردی وَ نومِ عیسی، شِلی دِرُس کِه وِ مالی وَ تییَلُم وِ گُت "بِرَه وَ حوض سیلوحا وِ بِشورِش." پَ رَتُم، شُسِمِش وِ تییَلُم بِر وابی.» 12وَش پُرسییِن: «وِّ کوچِنِه؟» جواب دا: «نُونُم.»
13اوسِه او مِردَ که نَهاتَر کور بی، آوُردِن طِی عالِمَلِ فرقه فَریسی. 14او روز که عیسی شُل دِرُس کِردَه بی وِ تییَلِ وِّ نَه واز کِردَه بی، شَبّات بی. 15اوسِه فَریسییَل هَم وَ او مِرد پرسِبِجو کِردِن که چطو تییَلِش بِر وابییِه. جواب دا: «وَ تییَلُم شُل مالی وِ شُسِمِش وِ ایسِه ایبینُم.» 16پَ یِهپارهای وَ فَریسییَل گُتِن: «او مِرد وَ طرف خدا نی، سییِکِه شَبّاتَه نِگَه نیکِنِه.» امّا یِهپارهای دَ گُتِن: «چطو آیَمی گِناکار ایتَرِه ایطو نشونَه وِ معجزهیَلی نشون بییِه؟» وِ مابِینِشون دِ دَسَهای اُفتا. 17پَ یِه دَفدَه وَ او کور پُرسییِن: «وَ وُچه که وِّ تییَلِ تِنَه واز کِردِه تِ خُوت درموردِش چه ایگِی؟» او مِرد جواب دا: «پیغمبری یَه.»
18امّا گَپویَلِ یَهودییَل هَنی باوَر نَیاشتِن که وِّ کور بییِه وِ تییَلِش بِر وابییِه، تا یِکِه دِیبُوشَه خواسِن 19وُ وَشون پُرسییِن: «مَه یِه کِرِ ایشانِه، هَموِه که ایگِیت کور وَ دنیا اومَیِه؟ پَ چطو ایسِه ایتَرِه بِوینِه؟» 20اونگَل جواب دان: «دونیم که کِرِ ایمانِه، وِ هَم دونیم کور وَ دنیا اومَیِه. 21امّا یِنَه نُونیم که چطو تییَلِش بِر وابییِه، وِ یا کی تییَلِشَه واز کِردِه. وَ خُوش بِپُرسیت. وِّ بالِغِه وِ خُوش درموردِ خُوش گَپ ایزَنِه.» 22اونگَل سی یِه ایطو گُتِن که وَ یَهودییَل زَلَشون ایرَت. سییِکِه یَهودییَل نَهاتَر حَرفِشونَه یکی کِردَه بییِن که هرکه اعتراف کِنِه عیسی هَمو مسیح یَه، وِّ نَه وَ کَنیسَه وِربییِن وَدَر. 23سی هَمیِه بی که دِیبُوش گُتِن، «وِّ بالِغِه؛ وَ خُوش بِپُرسیت.»
24پَ سی دَفِۀ دِوُم او مِردَ که نَهاتَر کور بی، صیا کِردِن، وَش گُتِن: «خدا نَه ستایش کُ! ایما دونیم که وِّ مِردِ گِناکاری یَه.» 25جواب دا: «گِناکار بییَن یا گِناکار نَبییَنِشَه نُونُم. امّا تِنا یِه چی دونُم، وِ یِکِه کور بییُم، وِ ایسِه تییَلُم بِر وابییِه.» 26پُرسییِن: «بِی تِ چه کِه؟ چطو تییَلِتَه واز که؟» 27جواب دا: «مِ که وَ ایشا گُتُم، امّا ایشا گوش نیکِنیت؛ سیچِه ایخِیت اُمبِلا بِشنِفیت؟ مَه ایشا هم ایخِیت شاگردِش وابِیت؟» 28اونگَل دِشمونَش دان، گُتِن: «تِ خُوت شاگردِ وِّنی! ایما شاگردِ موسی یِیم. 29ایما دونیم خدا بِی موسی گَپ زَیِه. امّا ای آیَم، نونیم وَ کوچِنِه.» 30او مِرد مِنِه جوابِشون گُت: «عجیبه! بِی یِکِه تییَلِ مِنَه واز کِردِه، نُونیت وَ کوچِنِه. 31ایما دونیم که خدا دِعِی گناکارَلَه نیشنِفِه، امّا اَر کسی خداترس بو وِ خواسِ وِّ نَه وَجا بیارِه، خدا دِعاشَه ایشنِفِه. 32وَ شروع دنیا تا ایسِه اِشنُفتَه نَوابییِه که کسی تییَلِ کورِ مادرزایی نَه واز کِردَه بو. 33اَر ای مِرد وَ طرفِ خدا نَبی، کاری وَ دَسِش نییومَه.» 34اونگَل مِنِه جوابِش گُتِن: «تِ سرتاپا مِنِه گِنا زادَه وابییِی. ایسِه، وَ ایما هَم درس ایئی؟» پَ وِّ نَه وِردان وَدَر.
35وختی عیسی اِشنُفت که او مِردَ وِردانِه وَدَر، وِّ نَه جُس وِ وَش پُرسی: «مَه وَ کِرِ انسان ایمون داری؟» 36او مِرد جواب دا: «ای آقا، بِگِ کیَه تا وَش ایمون بیارُم.» 37عیسی وَش گُت: «تِ وِّ نَه دییِی! هَموِّنِه که ایسِه بات گَپ ایزَنِه.» 38گُت: «ای آقا، ایمون دارُم.» وِ در برابرِش ری وَ زمین نَها.
39عیسی گُت: «مِ سی داوری وَ ای دنیا اومَمِه، تا تییِی کورَل بِر وابو وِ کَسَلی که تییَلِشون بِرِه کور وابون.» 40یِهپارهای وَ فَریسییَل که باش بییِن، وختی یِنَه اِشنُفتِن، پُرسییِن: «مَه ایما هم کوریم؟» 41عیسی وَشون گُت: «اَر کور بیئیت گِنایی نَیاشتیت؛ امّا ایسِه که اِدعا ایکِنیت ایبینیت، بارِ گِناتون وَ نِی خِتونِه.
Currently Selected:
انجیلِ یوحنا 9: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
