نامَه وَ کِلیسِی روم 9
9
قومِ انتخاب وابییِۀ خدا
1مو مِنِه مسیح راس ایگُم، نَه دِرو، وُجدانُم وَ واسطۀ روحالقدس گَواهِ مِنِه 2که مِنِه دِلُم دردِ گِرونی دارُم وِ هَمیشَه غَم وَبارُم. 3سییِکِه اُرزو داشتُم مِ خُوم مِنِه رَه کَکایَلُم که وَ لَحاظِ جسم خیشَلِمِن، مَلعون وُ وَ مسیح جیا ایابییُم. 4اونگَل اسرائیلی یَن وِ فرزندخُوندِهای، جلال وِ عهدَل این اونگَلِه، شریعت دایَه وابییِه وَ اونگَل، پرستش وِ وعدِهیَل این اونگَلِه؛ 5بویَلِ قوم این اونگَله، وِ مسیح وَ لَحاظِ جسم وَ نسلِ اونگَلِه، خدایی که بالایِ هَمَه یَه، مبارکِه تا وَ ابد. آمین.
6امّا منظورُم نَه یِنِه که کلامِ خدا اَنجوم نَوابییِه، سییِکِه تَمومِ کَسَلی که وَ قومِ اسرائیلِن، وَراسی نَه اسرائیلی یَن؛ 7وِ تَمومِ کَسَلی که وَ نسلِ ابراهیمِن، اولادَلِش وَ حساب نیان. بلکم مِنِه تورات گُتَه وابییِه: «نسلِ تِ وَ اِسحاق وَ حساب ایا.» 8یعنی اولادَلی که وَ طریقِ جسم وَ دنیا اومَنِه نَه اولادَلِ خدایَن، بلکم اولادَلِ وعدَه، نسلِ ابراهیم وَ حساب ایان. 9سییِکِه اوچیئی که وعدَه گُت یِه بی: «سالِ دَ هَمی موقَع اییَرگَردُم وِ سارا صاحابِ کِری ایابو.»
10وِ نَه تِنا یو، بلکم وَختی که رِبکا هَم وَ یِه مِرد، یعنی وَ جَدِ ایما اِسحاق، جِمِلو حامِلَه وابی، 11هرچَن اونگَل هَنی وَ دنیا نَیومَیَه بییِن، وِ هیچ کارِ خوب یا بَدی نَکِردَه بییِن- سییِکِه قَصتِ خدا مِنِه انتخابِش پاوَرجا ایوِیسِه، نَه وَ خاطرِ کارَلی که ایکِنِن، بلکم وَ خاطرِ وِّ که ایخونِه - 12وَ رِبکا گُتَه وابی که «گَپوتَر کِچِلوتَرَه خذمت ایکِنِه.» 13هَموطو که مِنِه کتابِ مَلاکیِ پیغمبر نوشتَه وابییِه: «یعقوبَ دوس داشتُم، امّا وَ عیسو نفرت داشتُم.»
14پَ ایما بِگیم چه؟ مَه خدا بی انصافِه؟ وَتَه نَه ایطورِه! 15سییِکِه وَ موسی ایگُ:
«رحم ایکِنُم وَ کسی که وَش رحم دارُم؛
وِ دلسوزی ایکِنُم وَ کسی که دلُم سیش ایسوزِه.»
16پَ، یِه وَ خواس یا تلاشِ آیَم ربطی نَیارِه، بلکم وَ خِدِیی ربط دارِه که رحم ایکِنِه. 17سییِکِه مِنِه تورات، خدا وَ فرعون ایگُ: «تِنَه سی هَمیِه وَ ری قدرت نَهام تا قدرتِ خِمَه مِنِه تِ ظاهر کِنُم، وِ تا نومُم مِنِه سرتاسرِ زمین اعلام وابو.» 18پَ خدا وَ هَرکه بِخوا رحم ایکِنِه وِ هرکه نَه بِخوا سنگدل ایکِنِه.
19اوسِه وَم ایگِی: «پَ دَ سیچِه ایما نَه مَزِمَت ایکِنِه؟ سییِکِه کیَه که بِتَرِه در برابرِ ارادۀ خدا وِیسِه؟» 20امّا ای آیَم، تِ کییِی که بِی خدا جَرِبحث کِنی؟ «مَه مَخلوق ایتَرِه وَ خالِقِ خُوش بِگُ سیچِه مِنَه ایطو ساختی؟» 21مَه کوزهگر حق نَیارِه که وَ یِه مشتی شُل، ظرفی سی کارَلِ مهم وِ ظرفی دَ سی کارَلِ دَمِ دَسی بِسازه؟
22چه ایابو اَر خدا بِی یِکِه ایخوا غضبِ خِشَه نشون بییِه وِ قدرتِ خِشَه دیار کِنِه، ظرفَلِ غضبَه که سی نابودی آمایَه وابییِنِه بِی طاقتِ زیاد تحمل کِنِه؟ 23تا جلالِ بیحَدِحسابِ خِشَه وَ ظرفَلِ رحمتِش آشکار کِنِه، ظرفَلی که اونگَلَه وَ نَهاتَر سی جلال آمایَه کِردِه، 24حتی ایما هَم که وَ طرفِ وِّ خُوندَه وابیئیمِه، جُزِشونیم، نَه تِنا وَ یَهودییَل، بلکم وَ غیرِیَهودییَل هَم. 25هَموطو که هوشَعِ پِیغمبر ایگُ:
«اونگَلَه که قومِ مِ نَبییِن، "قومِ خِم" ایخونُم،
وُ وِّ نَه که عزیزِ مِ نَبی، "عزیزِ خِم" ایخونُم.»
26وِ هَم:
«مِنِه هَمو جِیئی که وَشون گُتَه وابی:
" ایشا، نَه قومِ مِنیت"،
مِنِه هَمو جا "اولادَلِ خِدِی زندَه" خُوندَه ایابون.»
27وِ اِشعیای پیغمبر درموردِ قومِ اسرائیل ایگِ که: «هرچَن عِدۀ قومِ اسرائیل مِی ریگَلِ دریا بو، تِنا یِچِی وَشون نجات ایجورِن، 28سییِکِه خداوند کلامِ خِشَه، کامل وِ بی معطلی وَ ری زمین اَنجوم اییِه.» 29وِ هَموطو که اِشعیای پیغمبر پیشگویی کِه:
«اَر خداوندِ لَشکَرَل نسلی سیمون وَجا نیلِشت،
مِی شهرِ سُدوم وِ مِی شهرِ عَمورَه ایابیئیم.»
بیایمونیِ قوم اسرائیل
30پَ ایما بِگیم چه؟ غیرِیَهودییَلی که وَ دینِ صالحی نَبییِن، وِه نَه وَ دَس آوُردِن، یعنی او صالحی نَه که وَ رَه ایمون وَ دَس ایا؛ 31امّا قومِ اسرائیل که وَ دینِ شریعتی بییِن که اونگَلَه وَ صالحی بِرَسونِه، وِه نَه وَ دَس ناوُردِن. 32سیچِه؟ سییِکِه نَه وَ رَه ایمون، بلکم وَ طریقِ کارَل وَ دینِ وِه بییِن. او «بَردی که باعثِ وَ گِل خَردَنِشونِه» زَشون وَ گُل. 33هَموطو که مِنِه کتابِ اشعیایِ پیغمبر نوشتَه وابییِه:
«ایسو مِنِه کُو صَهیون بَردی اینُم که باعثِ وَ گِل خَردَن ایابو،
وِ تَختَهبَردی که باعثِ اُفتایَن ایابو؛
وِ هرکه وَش ایمون بیارِه،
سراَفکَندَه نیابو.»
Currently Selected:
نامَه وَ کِلیسِی روم 9: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
