اِنجیلِ مَتّی 7
7
قِضاوَت نَکُنین
1«قِضاوَت نَکُنین تا شِمِره قِضاوَت نَکُنن. 2هَمونجورکه شُما دیگَران رِه قِضاوَت کانید، شِمِره هَم قِضاوَت کانَن. هر کیلِه یِه هَمرَه هَدین، همون کیلِه یِه هَمرَه عَوَض گیرِنید. 3چِرا کَمل ذَرِّه رِه تی اَداش چِشِ دِلِه دینی، وَلی چویی ره که تیِ چِشِ دِلِه داری رِه نِینی؟ 4یا چِطور تانی تیِ اَداشِ باگویی: ”اِجازه هَدِه کَمل ذَرِّه رِه تی چِشِ جی دِرگا بیارِم،“ اَسِه خودِت ایتا چو تی چِشِ دِلِه داری؟ 5اِی دُرو، اوَّل اون چو رِه تیِ چِشِ جی دِرگا بیار؛ ایما بِهتَر دینی تا کَمل ذَرِّه رِه تیِ اَداشِ چِشِ جی دِرگا بیاری.
6اونچه که مُقَدَّسِ رِه سَگِشانِ نَدین و شیمی مُرواری رِه خوشانه پیش تُونِوادین. نَکُنِه اوشانِه لَگَدِ دَموج هَکُنَن و وَگِردِن شِمِره پاره هَکونَن.
بِخواین که شِمِره هَدَه بونه
7«بِخواین که شِمِره هَدَه بونه. واموجین، که پیدا کانید. دَر بَزِنین، که دَر شِیمی رو واز بونه. 8چون هر کی بِخواد، به دست هارنه و هر کی واموجه، پیداکانه و هر کی دَر بَزِنِه، دَر اونه رَه واز بونه. 9شیمی میَن کسی دَرِه وَختی اونه ریکا اونه جی نان بِخواد، اونه سَنگ هَدِه؟ 10وَ یا وَختی ماهی بِخواد اونه مار هَدِه؟ 11پَس اَگِه شُما که آنقَدَر بَدین، دانید که بایِسّی شیمی وَچِه شان رِه خُجیرِ چیز هَدین، پس چَنّی بیشتر شیمی آسِمانی پیَر خُجیرِ چیزانِ هَر کَسِ که اونه جی بِخواد دَنه. 12دیگَران هَمرَه هَمونجور رَفتار هَکُنید که خَنید شیمی هَمرَه رَفتار هَکُنَن. اینِ، تمام تورات و پیغَمبَرانِ بَنویشتِه.
تَنگِ دَرِ جی دِلِه بیشیِن
13«تَنگِ دَر جی دِلِه بیشین، چونکه دَری که پَهنِ و راهی که گُشادِ به مَرگ خَتم بونه و اوشانیکه این راهِ جی شونِن خیلییَن. 14چون اون دَر تَنگِ و راهی که به زندگی خَتم بونه سَختِه و اوشانیکه اونِه پیدا کانن کَمِن.
دار و اونه میوه
15«دُروئی پیغَمبَرانِ جی دوری هَکُنید که گوسِند لِواسِ دِلِه شِیمی ورجه هَنِن، وَلی خودِشانِه باطِنِ دِلِه دَرَندِه وِرکِن 16اوشان رِه اوشانه میوِه یه جی اِشناسِنید. مَگه بونه لَمبَسِ جی اَنگور و زِراعِ جی اَنجیل بَچیئَن؟ 17هَمینجور، سالِمِ دار خُجیرِ میوه به بار هارنه و آفَت بَزِه دار بَدِ میوه. 18سالِمِ دار نَتَّنِه بَدِ میوه به بار بیارِه و آفت بَزِه دار نَتَّنِه خُجیرِ میوه بیارِه. 19داری که خُجیرِ میوه نیارِه، بَبییِه بونه و تَشِ دِلِه توُواده بونه. 20پَس شُما اوشان رِه اوشانه میوه یه جی اِشِناسِنید.
شِمِره نِشناسِنَم
21«نه هَر کی که مَرِه ’خُداوند، خُداوند‘ باگو آسِمانِ پادشاهی یه دِلِه شونِه، بلکه فقط اونی شونِه که می پیَره خواسِّه رِه که آسِمانِ دِلِه دَرِه رِه به اَنجام بَرِسانِه. 22داوَری روز خِیلیان مَرِه گونَن: ”خُداوندا، خُداوندا، مَگِه اَما تی اِسمِ هَمرَه نَبوَّت نَکُردیم؟ مَگِه تی اِسمِ هَمرَه آلِشانهِ دِرگا نَکُردیم؟ مَگِه تی اِسمِ هَمرَه خیلی مُعجِزات نَکُردیم؟“ 23ایما اوشانه گونَم: ”مَن اَصلاً شِمِره نِشناسِنَم. می جی دور هَبین، اِی بَدکاران.“
دُتا سِرِه
24«پَس هَر کی می گَبِ اِشنَوِنه و اونِه عَمل کانه، ایتا عاقِلِ مَردای رِه ماندِنِه که خودشه سِرِه رِه سَنگِ سَر بِساتِه. 25وارِش بِبارِسِّه، لاهِ رادَکِتِه وا وَرِسَه و اونِ سِرِه رِه زور بیاردِه، وَلی اون سِرِه فور نوماَ چون اونه بُنوار سَنگِ سَر دَبا. 26«وَلی هر کی می گَبِ بِشنوئِه و اونِه عمل نَکُنِه، ایتا بی عَقلِ مَردای رِه ماندِنِه که خودشه سِرِه رِه وازیکِ سَر بِساته. 27وارِش بِبارِسِّه، لاهِ رادَکِتِه و وا وَرِسَه و اون سِرِه رِه زور بیاردِه، اون سِرِه فور بوماَ و اونه خَرابی گَته با!»
28وَختی عیسی خودشه گَبِ تَمام هَکُردِه، مَردُم اونه تعلیم هَدَئنِ جی بُهت هَکُردَن، 29چون اون اوشانه توراتِ مُعَلِّمینِ مِثان تعلیم نَدَنه با، بلکِه یِنَفَرِ مِثان تعلیم دَنه با که صاحابِ قُدرَت هیسِه.
Currently Selected:
اِنجیلِ مَتّی 7: GMB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
