مَتّی 8
8
جُذاملی‌نینگ شفاسی
1عیسا داغدان آشاغی گلَنده، بیر بویوک جماعت اؤنونگ آردی سورا گئتدیلَر. 2ائله بو موقعده بیر جُذاملی آدام، اؤنونگ یانینا گلدی، اؤنونگ قیچینه دؤشدو و دئدی: «آقا، اگر سئیَنگ، منی بو مَرضدَن شفا وئره بیلَرَینگ.» 3عیسا اؤز اَلینی اوزاتدی، اَلینی اؤنونگ اوستونه قؤیدو و دئدی: «سئیرَم، شفا توت!» ائله او آن کیشی، او مَرضدن شفا توتدو. 4عیسا اؤنا دئدی: «گؤزله کی هئچ‌کَسه هئچ‌نه دئمیه‌‌ینگ، آما گئد و اؤزونگو کاهِنا کی مَعبدینگ عالِمی دیر، گؤرسَد و موسا فرمان وئردیگی قُربانلوقی تقدیم ائد، تا اوللارا، بیر گواهلیگ اولا.»
بیر روملی اَفسرینگ ایمانی
5عیسا کَفَرناحوم شَهرینه گلَنده، بیر روملی اَفسر اؤنا ساری گلدی و یالوارا-یالوارا عیسایا دئدی: 6«آقا، منیم نوکریم فَلج، ائوه دؤشموش و چوخ زَجر چَکیر.» 7عیسا اؤنا دئدی: «من گلَرَم و اؤنو شفا وئره‌رَم.» 8آما او اَفسر جواب وئردی: «آقا، من لایق ده‌ییلَم کی سَن مَنیم ائویم سَقفی آلتینا قیچ قؤیانگ. سَن فقط بیر کلام دئ، نوکریم خوب اولور. 9بونونگ ایچی کی مَنیم اؤزوم مأمورام و بیر پارا سرباز دا اؤز اَمریمده واریم و بیرینه دئییرم ”گئد“، گئدیر و اوبیرسینه دئییرم ”گَل“، گلیر و نوکریمه دئییرم فلان ایشی گؤر، او دا یئرینه ائتیشتیریر.» 10عیسا بونو ائشیدَنده حیران قالدی و اوللارا کی قولونجوندان گلیرلَردی دئدی: «گرچَکینی سیزه دئییرم، من بیر بئله ایمانی، تارئ خَلخی آراسیندا ده گؤرمه‌میشَم. 11سیزه دئییرم کی، چوخ آداملار، شَرقدن و غَربدن، گلَرلَر و گؤی پادشاه‌لیگیندا، ابراهیم پیغمبر، اِسحاق پیغمبر و یَعقوب پیغمبر اینان بیر سُفره قیراقینا اوتورارلار، 12آما گؤی پادشاه‌لیگی‌نینگ اولادلاری، یازّی قَرَنگی‌‌لیگینه آتیلارلار. اؤرایا کی آغلاماگ و دیش قیرچمَک اولور.» 13و عیسا او روملی اَفسره دئدی: «گئد، ایناندیگینگه گؤره، سَنینگ ایچی اولونسون.» ائله او آن، او نوکر شفا توتدو.
مَریض‌لَرینگ شفاسی
14اوندان سورا عیسا پِطرُس ائوینه گئتدی، پِطرُس آروادی‌نینگ آناسینی گؤردو کی ایسیتمَه واریدی و مَریض دؤشموشدو. 15عیسا اؤز اَلینی، آروادینگ اَلی اوستونه قؤیدو، آروادینگ ایسیتمه‌سی کَسیلدی و توردو آیاقی و عیسا‌دان پذیرالیگ ائدی. 16آغشام چاغی، چوخ آداملاری کی شیطانلی روح‌لارا گرفتار ایدیلار عیسا یانینا گتیردیلَر و عیسا دا بیر کلام اینَن، او شیطانلی روح‌لاری یازّیا چاخارتدی و مَریض‌لَرینگ واریسینی شفا وئردی. 17بو زادلار اولوندو تا او سؤز کی اِشعَیای پیغمبر طَریقیندن دئییلمیش ایدی، یئرینه ائتیشه کی:
«او بیزیم ناخوشلیگ‌لاریمیزی گؤتوردو
و مَریضلیگ‌لَریمیزی دالینا چَکدی.»
مَسیح یولونو گئدمَکینگ بَهاسی
18عیسا گؤردو کی بیر بویوک جمعیت دئییرینه ییغیلمیشلَر، پس فرمان وئردی و دئدی: «دریاچه‌نینگ او تئیینه گئدَک.» 19بو موقعده بیر تورات معلّمی گلدی و عیسایا دئدی: «اُستاد، هر یئره کی گئدَینگ، من سَنینگ آردینگ سورا گلَرم.» 20عیسا اؤنا دئدی: «تیلکی‌لَر ایچی دَلیگ وار و گؤیینگ قوش‌لاری ایچی ده یووآ وار، آما من کی انسان اوغلویام، هئچ باش دایاماک یئری ده یوخوم.» 21بیر آیری شاگرد اؤنا دئدی: «آقا، قؤی تا اَوّل گئدَم، بووآم اؤلنده اؤنو تورپاقا تاپشیرام دا اوندان سورا گلَرَم.» 22عیسا اؤنا دئدی: «مَنیم آردیم سورا گَل و قؤی تا اؤلولَر، اؤز اؤلولَرینی تاپشیرالار.»
عیسا دریاچه‌نینگ طیفانینی یاتیردیر
23اوندا عیسا قایقا میندی، شاگردلَری ده اؤنونگ قولونجوندان گئدیلَر. 24بیردَن دریاچه‌ده بیر سَخت طیفان دؤشدو، ائله کی آز قالمیشدی موج‌لار قایقی سویا باتیرالّار؛ آما عیسا اوخودا ایدی. 25شاگردلَر گئدیلَر عیسایی اویاردیلار و دئدیلَر: «آقا، بیزی نجات وئر، آز قالمیش آرادان گئدَک.» 26عیسا اوللارا دئدی: «ای ایمانی آزلار، نه ایچی قورخیراینز؟» اوندان سورا توردو آیاقی، یئل‌لَره و دریاچه‌یه تَشَر ائدی و بیر بویوک آراملوق دؤشدو. 27شاگردلَر مات قالمیشلاردی و دئییرلَردی: «بو نه‌یین آدام دیر کی حتّی یئل و سو ده اوندان فرمان آپاریرلار؟»
عیسا ایکّی کیشی‌یی کی شیطانلی روحا گرفتار ایدیلار شفا وئریر
28اوندا کی عیسا دریاچه‌نینگ او تئیینه، جَدَریان دیارینا گلدی، ایکّی کیشی کی شیطانلی روحا گرفتار ایدیلار، مَزار صانلوقدان یازّیا چیخیرلَردی تا اؤنا ساری گلَلَّر. اوللار ائله درّنده ایدیلَر کی هئچ‌کَس او یولدان گچه بیلمه‌ییردی. 29او ایکّی آدام بَغیردیلَر و دئدیلَر: «ای تارئ اوغلو، بیزده نه ایشینگ وار؟ بورا گلمیشَینگ تا وَختیندَن ایلَری بیزه عَذاب وئرَینگ؟» 30اؤردان بیر آز آرالی‌تَر، بیر بویوک دونقوز سؤروسو یاییلیرلاردی. 31شیطانلی روح‌لار عیسایا یالواردیلار و دئدیلَر: «اگر بیزی یازّیا چاخارتیرانگ، بیزی دونقوزلار سؤروسو ایچینه یوللا.» 32عیسا اوللارا دئدی: «گئدینز.» اوللار دا او آداملاردان یازّیا چیخدیلَر و دونقوزلار ایچینه گیردیلَر. بیردن او سؤرو‌نینگ واریسی، یالدان اوزوقولاندیلار، دریاچه ایچینه تؤکولدولار و سودا بوغولدولار. 33دونقوزلار چوبان‌لاری قاچدیلار و شَهره گئتدیلَر. اوللار واری زادی دئدیلَر، علی‌الخصوص او تَفاق‌لاری کی شیطانلی روح‌لارا گرفتار اولان آداملار ایچی دؤشموشدو. 34پس بوتون شَهرینگ آداملاری عیسایی گؤرمَک ایچی یازّیا گلدیلَر و عیسایی گؤرَنده، اؤنا یالواردیلار کی اوللارینگ دیاریندان گئده.
Currently Selected:
مَتّی 8: QII
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
