انجیلِ مرقس 8
8
عیسی چهار هزار نفره غذا داین
1اَ روزون هنی پِر جماعتی عیسی دویر جمع آبِنده. وختی که هیچیشون نِدَ بخرنده، عیسی اِشتن شاگردونِش وُنگ بکه و اَجونِش بِوات: 2«چِمن دل اَم جماعته را سوجه چون سه روزِ چمن خَمنانده و چیزی خوردنه را نِدارنده. 3اگم اجون وشیر بخرسم بیشینده اِشتن کییه، راه دَ ضعف کرنده. بعضی از اَوه دوره راه دَ اومِنده.» 4شاگرده بواتشون: «چه طره کسی تونه اَم دور افتاده یقا دَ اَم مردمه سیر کردنه را نان بایره؟» 5عیسی آپرسس: «چند نان دارو؟» بواتشون: «هف نان.» 6اُخُری عیسی جماعتش دستور آدا تا زمین سر بِنِشِنده. چو پَش هفت نانش اُگَت و شکر کردنه پش، اَجونش پارَه بکه، اِشتن شاگردونش آدا تا مردم پیش بِنیندِه؛ شاگرده نانشون جماعت پیش اونا. 7چند ماییشونَنی دَ. پس عیسی اَ ماهییونِش برَکت بدا، و بِواتشه اجون بنینده مردمه پیش. 8همَّه بُخردنده و سیر آبنده و شاگرده هفت سَبَد مَشت اَ غذا مَنتِشون جمع آکه. 9بِر، تقریبا چهار هزار نفر بِنده. اُخُری عیسی جماعتش بخرسا که بِشینده. 10و البحل اِشتن شاگردونییَم قایقه سار آبِنده و بِشنده منطقهی دَلمانوتَه.
فریسیون ای آسمانیه نشانه گونده
11فَریسی فرقه علما بومِندِ عیسی وَر و چونییَم بحثشون بکه. اَوُن عیسی امتحان کردنه را، چو کودَ ای آسمونیه نشونهای بِگَوِسِنده. 12عیسی، آهیش بِکَشِس و بِوات: «چرا اَم نسل نشونه پَش گردنده؟ حقیقتا، شَمارا وام، هیچ نشونهای ام نسلِ ندینده.» 13اُخُری اَجونِش ترک بکه و هنی قایقی سار آبه، بِشه دریاچه اَ دیم.
فریسیان و هیرودیسه خمیر مایه
14شاگرده ویرشون شیه به که اِشتن خمنا نان اوگورنده و قایقَ دَ فقط ای نانیشون دَ. 15عیسی اجونش هشدار بدا و بِوات: «ویراجون ببا و فَریسیان و هیرودیسه خمیرمایه دَ دوری بِکَراه.» 16شاگرده هندیگرییَم درباره اَم که نان نِدارنده بحثشون کردَی. 17عیسی که اَمش زونسَی اَجونِش بِوات: «چرا دربارَه ام که نان نِدارا همدیگرییَم بحث کَرا؟ مگم هنوز نزونو و درک نکرا؟ مگم شَما دل سِگِ؟ 18چَشم دارا و نیوینا؟ گوش دارا و نشنوا؟ ویررون نییِه؟ 19وختی اَ پنج نانم، پنج هزار نفره را پارِم بکه، چند سَبد مَشت اَ نانه خوردعونرون جمع بکه؟» اَون بواتند: «دونزده سَبد.» 20«و وختی اَ هفت نانم چهار هزار نفره را پارم بکه، چند سَبد مَشت اَ نانه خوردعونِرون جمع بکه؟» اَوُن بواتند: «هفت سَبد.» 21عیسی اجون بِوات: «هنوز درک نکرا؟»
عیسی، بیت صیدا دَ ای کوره مردکه شفا دی
22وختی آرسسنده بِیتصِیْدا شهر، چند نفر ای کورَه مردکیشون بایرد عیسی ور، عیسی شون مندت بکه چُو سر دس اونیه. 23عیسی اَ کوره مردکه دسش بِگَت و اوِش دِهَ دَ بیرون ببه. اُخُری چو چَشمون سر لش آوِش ایکه و اِشتن دسِش چو سر اونا و آپرسسشه: «چیزی وینی؟» 24اَ مردک اِشتن سرش راست آکه و بِوات: «مردمه دارون شارین وینم که حرکت کرنده.» 25هنی عیسی اِشتن دسِش چو چَشمون سر اونا. و مردکه چَشمه آبنده، چو چشمه سو آگردس، و همه چیش واضح بوینت. 26عیسی اَوش بخرسا چو کییه و بِوات: «دِه دله مَشه.»
پِطرُسه اعتراف دربارَه عیسی
27عیسی اِشتن شاگردون ییَم بِشه قیصریه فیلیپی اطرافه دِهون، راه دَ اِشتن شاگردون کود آپرسِسِشِه: «مردم وانده از کیم؟» 28جواو شون بدا: «بعضیه وانده یحیای تعمیددهندَیش، بعضیه وانده ته ایلیای پیغمبریش و بعضیه نی وانده ای نفر از اَ پیغَمبرونیش.» 29عیسی آپرسسشه: «شَما وایو از کیم؟» پِطرُس جواو بدا: «ته مسیح موعودیش.» 30عیسی اَجونِش قدغن بِکَه که دربارَه چو کسی را چیزی موانده.
عیسی پیشگویی درباره اِشتن مردن و زنده آبین
31اَ موقَع عیسی تعلیم دایَنِش شروش بِکَه که انسان زا گَوَن پِر عذاب بکَشِه و شیخون و سرون کاهنان و تورات معلمین طرفه آورییه، کُشته بیبی و سه روزِ پَش زندَه بیبی. 32عیسی اَمش واضح بوات. پِطرُس، عیسیش بِبَه کنارگوشَه ای و چو راش غَیض بِکَه. 33امّا عیسی آگردس، اِشتن شاگردونِش دِدِشت و پِطرُسه را غَیضِش بِکَه و بِوات: «چَمَنَ دور آبِه ای شیطان! چون اِشته فکره انسانینده، نه خدایی.»
34اُخُری عیسی مردم و اِشتن شاگردونِش وُنگ بکه اِشتن وَر و اجونش بِوات: «اگم کسی بِگَوه چِمِن پیرو بیبی، گَوَن اِشتنَ دَ دس اوگوره، اِشتن عذاب و مرگه صلیبه اوگوره و چِمن پَش با. 35چون هر که بِگَوه اِشتن جانه نجات بِدییه، اَجو از دس دی، امّا هر که چمن خونین و انجیل خونین اِشتن جان فدا بکره، اَجو نجات دییه. 36چون انسان را چِه فایدَه داره که تموم دِنیا بداره، امّا اِشتن جان از دست بیدی؟ 37انسان اِشتن جانه عوض چه تونه بیدییه؟ 38چون هر که ام زناکار و گناهکاره نسله میون، اَمِن و چِمن لاوعون عار بداره، انسان زا نی هه لحظَه که آسمانییه پِه شکوه جلال، مقدس فرشته عون خمنا آ، اجو عار داره.»
Currently Selected:
انجیلِ مرقس 8: KTT
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
