رسولانِ اعمال 2
2
روح القدّس آیه
1وقتی کی پنتیکاستِ عید فارسه، همتان یکدیل ایتا جا جمَ بوسته بید 2کی ناخبر ایتا اُخان، تُندِ باد مانستن آسمانِ جا بامو و تمان اُ خانه ئیَ کی اون درون نیشته بیدَ، پُرَ کود. 3هه موقع، ایچی بیده ئید، هُطو آتش وَل مانستن کی تقسیمَ بوست و هرتا جه اوشانِ سر قرار بیگیفت. 4بازین همتان روح القدّس جا پُرَ بوستید و بنا بُکودید دیگر زوانان اَمرا گب زئن، دُرُست اوجور کی خُدا روح اَشانَ قوّت دَئی کی گب بزنید.
5اُ روجان درون، دین دارِ یهودیان، جه تمان مملکتانی کی آسمان جیر نئه بو، اورشلیم شار درون ایسابید. 6وقتی کی اَ صدا بُلندَ بوست، خلق جما بوستید و همتان حَیرانَ بوسته بید چونکی هر تا جه اَشان ایشتاوستی کی اوشان، اونِ زوان اَمرا گب زئن درِه. 7پس مات و حَيران، بگفتیدی: «مگه همه ی اَشانی کی گب زئن دَرید جلیل شین نیئید؟ 8پس چُطویه کی هرتا جه اَمان ایشتاویم کی اَمی ماری زوان مانستن گب زئن دَریدی؟ 9پارت ئان و مادئان و عیلامیان، بین النهرینِ مردوم و یهودیه، کاپادوکیه و پونتوس، آسیا 10و فْیريجيه، پامفيليه و مصر و لیبی سامانسر کی قيرَوان شین بو، و رومی زَواران 11چی يهودی و چی اوشانی کی یهودِ دینَ قُبیل بُکودید؛ و هُطو كْرت مردومان و عربستان- همتان ایشتاویم كی اَشان، اَمی زوان مرا خُدا پُر قدرت کاران جا گب زنیدی.» 12پس همه حیران و سرگردان همدیگرَ گفتیدی: «اَ ایتفاق معنی چیسه؟» 13ولی بعضیان رخشن اَمرا گفتیدی: «اَشان تازه شراب مرا مستَ بوستید!»
پطرُسِ پیغام پنطیکاس درون
14هو موقع پِطرُس اُ یازده رسول اَمرا ویریشت و خو صدایَ بُجور ببرد، و اوشانَ بگفت: «اَی یهودیان و اَی تمان شُمان کی اورشلیم درون زیندگی کونیدی، اَنه بَفهمید و اونچیَ کی گَم حیّسابی، گوش بُکونید! 15اَ مرداکان، عکسِ اونچی کی شُمان خیال کونیدی مست نیئید، چونکی هنو ساعت نُه صوبه! 16بلکی اَن هونیه کی یوئیل پیغمبر اونِ باره اَطو پیشگویی بُکوده بو کی:
17«”خُدا گه: آخرتا روجان درون
می روحِ جا تمانِ مردومان سر خوائم فُکودن.
شیمی پسران و کُران نبوّت کونیدی،
شیمی جوانان رویائان خوائید دئن،
و شیمی مُسِندِ آدمان خوابان دینیدی.
18اُ روجان درون،
می روحِ جا،
حتی غُلامان و کولفتانِ سَرم فوکونم
و اوشان نبوّت خوائید کودن.
19بُجور، آسمانان درون، عجایب چیان،
و بجیر، زمین سر، نیشانه ئان ظاهیرَ کونم،
خون و آتش و دود جا.
20پیش جه اَنکی خُداوندِ روج فارسه، اُ باشکوه و پیلهِ روج،
آفتاو تارکَ بِه و ماهِ رنگ
خون مانستن خوائه بوستن.
21و اَطو به کی هرکس خُداوند نامَ دوخوانه، نیجات خوائه گیفتن.“
22«اَی یهود مردوم، اَ گبانَ بیشتاوید: هُطوکی خودتان دانیدی عیسیِ ناصری ایتا مردای بو، کی خُدا، مُعجزات و عجایب چیان و نیشانه ئان اَمرا کی اونِ دس مرا شیمی میان آشکارَ کود، گُوائی بدَه کی اون حئیقتِ. 23هه عیسی، بنا به خُدا اراده و نقشه، شیمی دس تسلیم بُبوسته، و شُمان، شرور آدمانِ دَسان مرا اونَ مصلوب بُکودید و بُکوشتید. 24خُدا اونَ مرگِ عذابانِ جا نیجات بدَه و اونَ زنده بُکود، چون محال بو کی مرگ بتانه اونَ خو چنگ درون بدَره. 25هُطوکی داوود پادشاه، عیسی باره گه:
«”خُداوندَ همیشک می جُلُو بیده دَرم،
چونکی اون می راست دس ور ایسأ تا نَپَرکَم.
26جه اَ رو می دیل شادی کونه و می زوان خوشحاله؛
می تَنَم اُمید درون خوائه مانستن.
27چونکی می جانَ مُرده ئانِ دُنیا درون وِلا نُکونی،
و وَئنلانی کی تی انتخاب بُبوسته تن بُپوخوسه.
28تو زیندگی رائانَ مرا باموختی،
تو تی حضور اَمرا مرا شادی جا پُرَ کونی.“
29«اَی براران، اطمینانِ مرا تانَم شمرأ بگم کی اَمی جدّ داوود هم بَمرد و هَم دفنَ بوست و اونِ مقبره تا به ایمرو اَمی ورجه بمانسته. 30داوود ایتا پیغمبر بو و دانستی کی خُدا اونِ ره قسم بُخورده، کی اونِ نسل جا اینفرَ اونِ سلطنت تخت سر نیشانه. 31داوود کی پیشتر آینده یَ بیده بو، مسیحِ زنده بوستن باره بگفت کی اونِ جان مُرده ئان دُنیا میان نَمانه و اونِ تنَم نُپوخوسه. 32خُدا هه عیسیَ زنده کود و اَمان همتان اَنه واسی شاهدیم. 33عیسی، خُدا راست دس ور بُجور ببرده بُبوست و اون آسمانی پئرِ جا، روح القدّسِ موعودَ فیگیفت و اَمی سر فکود، هَنه کی الان دینیدی و ایشتاویدی. 34چونکی داوود خودش به آسمانان، بُجور نُشو، ولی خودش بگفت:
«”خُداوندْ، می خُداوندَ بگفت:
’می راستِ دَس وَر بینیش
35تا هو موقع کی تی دُشمندانَ تی لنگ جیر تَوَدَم.“‘
36«پس، ای تمانِ یهود مردوم، حتم بدَرید و بدانید کی خُدا، اَ عیسیَ کی شُمان اونَ مصلوب بُکودید، هم خُداوند و هم مسیحِ موعود بُکوده.»
37وقتی اوشان اَنه بیشتاوستید، اَنه مانستی کی اَشان دیل درون خَنجر فوقاسته بید، و پِطرُس و بقیه رسولانَ بگفتید: «اَی براران، هسّا چی بُکونیم؟»
38پِطرُس اَشانَ بگفت: «توبه بُكونيد و هرتا جه شُمان شیمی گُنائانِ ببخشه بوستن ره عیسی مسیح نام مرا غُسل تعمید بیگیرید و روح القدّسِ عطا یَ خوائید فیگیفتن. 39چونکی اَ واده شُمان و شیمی زاکان شین و تمان اوشانِ ره ئَم ایسه کی دورید، یعنی هرکس کی اَمی خُداوندْ خُدا، اونَ خو ورجه دوخوانه.»
40پِطرُس خَیلی گبانِ دیگرِ اَمرا گُوائی بدَه و اوشانَ تشویق بُکود و بگفت: «شمرأ اَ نسل جا کی کجِ راهِ درون شئون دَرید نیجات بدید!» 41پس اوشانی کی پِطرُس پيغامَ قُبیل بُكوديد، غُسل تعميد بيگيفتيد. هو روج درون دورور سه هزار نفر اَشان جم درون ایضافه بُبوستید.
ایمانداران زیندگی
42اوشان خوشانَ، وقف اَن بُکودید کی رسولان جا تعلیم بیگیرید، و هَم وقف مشارکت دیگر ایمانداران اَمرا و نانَ پلکَ کودن و دُعا، بُکودید. 43همتان مات و حَیران بُبوسته بید چونکی خَیلی عجایب چیان و نیشانه ئان رسولانِ دس مرا انجام بوستی. 44تمان ایمانداران همدیگر اَمرا یکدیل بید و همه چیِ درون شریک بید. 45خوشانِ مال و منالَ فُروختید و اونِ پولَ هر کسِ احتیاج اَندر، همه کَس میان سام کودید. 46اوشان هر روج معبد درون همدیگر اَمرا جَم بوستید و خوشانِ خانه ئان دُرونم نانَ پلکَ کودیدی و دس و دلبازی و خوشی مرا غذا خوردیدی، 47و خُدایَ ستایش کودید. تمان خلق اَشانَ احترام نائیدی؛ و خُداوند هر روج اوشانیَ کی نیجات گیفتید اَشانِ جم درون اضافه کودی.
Currently Selected:
رسولانِ اعمال 2: GIL
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
