یوحنایِ انجیل 2
2
عروسی قانا آبادی درون
1سیوم روج درون، جلیل ولایت میان قانای آبادی درون عروسی بو و عیسی مارم اویا ایسا بو. 2عیسی و اونِ شاگردانم عروسیَ دعوت بُبوسته بید. 3وقتی کی شراو تمانَ بو، عیسی مار اون بگفت: «اوشان دِه شراو نارید!» 4عیسی اون بگفت: «اَی زن، اَ کار به من چه ربطی دَره؟ می وقت هنو فأنرسه.»
5اون مار خیدمتکاران بگفت: «هرچی شمرأ گه، بُکونید.» 6اویا شیش تا سنگی خُم نئَه بو کی یهودیان مذهب درون جه اُ آب، نجست چیانِ پاک کودن ره ایستفاده بوستی، و هر ایتا خُم صَد و بیست لیترِ اَندر جا دَشتی. 7عیسی خیدمتکارانَ بگفت: «اَ خُم ئانَ آبِ مرا پُرَ کونید.» پس اوشان خُم ئانَ لب به لب پُرَ کودید. 8بازون عیسی اَشان بگفت: «حَلا ایپیچه اونِ جا اوسانید و جشن رئیس ورجه ببَرید.» و اوشان ببَردید. 9بازین جشن رئیس آبی کی شراو بُبوسته بو یَ بیچیشت. اون نانستی کی شراوَ جه کویا باوردید، ولی خیدمتکارانی کی آبَ اوسادِه بید، دَنستیدی. جشن رئیس دولیدَ دوخواد 10و اون بگفت: «همه اول خُب شراو مرا پذیرایی کونید و هَطوکی مِیمانان مستَ بوستید، بدِ شراو اَوریدی؛ ولی تو خُب شراو تا هسّا بدَشتی!»
11اَطو بو کی عیسی خو اوّلتا نیشانه و مُعجزه یَ قانای جلیل درون به انجام فارسانه و خو جلالَ آشکارَ کود و اون شاگردان اونَ ایمان باوردید.
12بازون خو مار و براران و خو شاگردان مرا کَفَرناحوم شار بُشو، و چن روج اویا بأسائید.
عیسی معبد درون
13یهودیانِ پِسَخ عید نزدیک بو و عیسی اورشلیم بُشو. 14معبد صحن میان، اوشانیَ بیده کی گاب و گوسفند و کوتر فُروختن دَرید، و صرّافانم کسب و کار ره نیشته ئید. 15پس عیسی لافند جا ایتا شلاق چاکوده و تمان اوشانَ، گوسفندان و گابان مرا، معبد جا بیرون تَوَدَه. و صرّافانِ سکه ئانَ زمین سر فُکود و اوشان تختانَ فُگوردانه، 16و کوتر فروشان بگفت: «اَشانَ جه اَیا بیرون ببَرید، و می پئر خانه یَ کسب و کارِ جیگا چانکونید!» 17اونِ شاگردان به یاد باوردید کی زبور کتاب درون بینیویشته بُبوسته: «غیرتی کی تی خانه واسی دَرم مَرا سوجانه.» 18پس یهود پیله تران عیسی اَ کار واسی اونَ بگفتید: «چی آسمانی نیشانه امرا اَوری تا بدانیم کی اَ کارانِ اجازه یَ دَری؟» 19عیسی اوشانَ جواب بدَه: «اَ معبدَ فگوردانید کی من سه روج میان اونَ ایوارده خوائم چاکودن.» 20یهودیان اونَ بگفتید: «اَ معبدِ ساختن چِل و شش سال به دازا فاکشه، و هسّا تو خوائی سه روج میان اونَ چاکونی؟» 21ولی معبدی کی عیسی اونِ جا گب زئی خودِش تن بو. 22پس وقتی کی مُردئان جا زنده بُبوست، اونِ شاگردان اُ گبَ به یاد باوردید و مُقدّس کتابان و گبانی کی عیسی بگفته بو یَ ایمان باوردید.
23اُ زماتی کی عیسی، پِسَخ عید ره اورشلیم درون ایسا بو، خیلیان اونِ نیشانه ئان و مُعجزه ئان دئِن اَمرا کی انجام دئی، به اونِ نام ایمان باوردید. 24ولی عیسی اوشان ایمان سر حیساب نُکود، چونکی همتانَ ایشناختی 25و لازم نُبو هیکّس آدمی باره هیچّی اونَ بگه، چونکی خودِش دانستی آدمی دیل درون چی گُذره.
Currently Selected:
یوحنایِ انجیل 2: GIL
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
