یوحنایِ انجیل 9
9
عیسی ایتا کور مادرزادَ شفا دئه
1عیسی راه میان کی شئون دوبو، ایتا کور مادرزادَ بیده. 2شاگردان اونِ جا واورسه ئید: «اوستاد، کی گُناه بُکوده کی اَ مرداک کور بدُنیا بامو؟ خودِش گُناه بُکوده یا اونِ پئر و مار؟» 3عیسی جواب بدَه: «نه اَ مردای گُناه بُکوده، و نه اونِ پئر و مار؛ بلکی اَطو بُبوست تا خُدا کاران اونِ درون آشکار ببه. 4تا روزه بایسی اونی کی مَرا اوسِه بُکوده کارانَ انجام بدیم؛ شب فارسئن دَره کی اونِ درون هیکّس نتانه کار بُکونه. 5تا زماتی کی دُنیا درون ایسام، دُنیا نورَم.» 6اَنه بگفت و فیلّی زمین سر تَوَدَه، گیل چاکود و اونَ اُ مرداک چومان سر بمالست 7و اُ مرداکَ بگفت: «بوشو و سْیلوآم حوض درون بُشور، سْیلوآم یعنی ’اوسِه بُکوده‘.» پس اُ کور مردای بُشو و بُشوست، و جه اویا بینا وگردَست.
8هَمسادان و اوشانی کی پیشتر اونَ، گدایی موقع بیده بید، واورسه ئید: «مگه اَن اُ مردای نیه کی نیشتی و گدایی کودی؟» 9بعضیان بگفتید: «هونه.» بعضیان دیگر، بگفتید: «نه، هونه مانه.» ولی خودِش همش گفتی: «من هو مرداکم.» 10پس، اونِ جا واورسه ئید: «چُطو تی چومان وازا بو؟» 11اون جواب بدَه: «ایتا مردای عیسی نام، ایپچه گیل چاکود و می چومانِ سر بمالاست و بگفت ”سْیلوآم حوض بوشو و بُشور.“ پس من بُشوم و بُشوستم و وینا بُبوم.» 12اوشان اُ مرداکِ جا واورسه ئید: «اون کویا ایسا؟» جواب بدَه: «نانم.»
13پس اُ مردای کی پیشتر کور بویَ، فَریسی فرقه عالمان ورجه باوردید. 14اُ روج کی عیسی گیل چاکوده بو و اونِ چومانَ وازا کوده بو، مُقدّسِ شنبه بو. 15پس فَریسیان ایواردِه اونِ جا واورسئید کی چُطو وینا بُبوسته. جواب بدَه: «می چومانِ سر گیل بمالاست و بُشوستم و الان دینَم.» 16بعضی فَریسیان بگفتید: «اُ مردای جه خُدا طرف نیه، چونکی مُقدّسِ شنبه قانونَ بجا ناوره.» ولی بقیه بگفتید: «چُطو ایتا گُناه کار آدم تانه اَجور نیشانه ئان و مُعجزه ئانی انجام بده؟» و اوشان میان اختلاف دکفت. 17پس ایوار دِه اوشان اُ کور مرداکِ جا واورسه ئید: «تو اونِ باره چی گی؟ چونکی اون تی چومانَ وازا کود.» اُ مرداک جواب بَده: «اون ایتا پیغمبره.»
18یهودیانِ سران واوَر نُکودید کی اون کور بو و وینا بُبوسته، تا اَنکی اُ مرداکِ پئر و مارَ، دوخوادید 19و اوشانِ جا واورسه ئید: «اَن شیمی رکِه، هون کی گیدی کور بدُنیا بامو؟ پس چُطو الان تانه بیدینه؟» 20اُ مرداک پئر و مار جواب بدَئید: «دانیم کی اَمی پسره، و اَنم دانیم کی کور بدُنیا بامو دَره. 21نانیم الان چُطو دینه، و نَانیم کی، اونِ چومانَ وازا کوده. خودِشِ جا واوَرسید. اون ده پیله بوسته و خودِش تانه خو باره گب بزنه.» 22اُ مرداکِ پئر و مار، اَنه واسی اَطو بگفتید کی یهودیانِ جا ترسه ئید. چونکی یهودیان پیشتر توافق بُکودید کی هر کی اعتراف بُکونه عیسی هو مسیح موعوده، اونَ عبادتگا جا بیرونَ کونید. 23هنِ واسی بو کی اونِ پئر و مار بگفتید، «اون ده پیله بوسته؛ خودشِ جا واوَرسید.»
24پس ایوار دِه اُ مردای کی پیشتر کور بو یَ، دوخوادید و اونَ بگفتید: «جلالَ بِه خُدا فَدَن! اَمان دانیم کی اون ایتا گُناه کار مرداکه.» 25اُ مردای جواب بدَه: «اَنکی اون گُناه کاره یا نه من ننَم . فقط ایچی دانم، اَنکی کور بوم، و هسّا دینَم.» 26فَریسیان اُ مرداکِ جا واورسه ئید: «تی مَرا چی بُکود؟ چُطو تی چومان وازا کود؟» 27اُ مردای جواب بدَه: «من کی شمرأ بگفتم، ولی شُمان گوش نُکونیدی؛ چره خوائید ایوارده بیشتاوید؟ مگه شُمانم خوائید اونِ شاگرد بیبید؟» 28اوشان اونَ فاش بدَئید و بگفتید: «تو اونِ شاگردی! اَمان موسی پیغمبر شاگردیم. 29اَمان دانیم خُدا موسی مرا گب بزِه. ولی، نانیم اَ مردای جه کویا بامو.» 30اُ مردای اَشان جواب بدَه: «عجب! شُمان نانید اون جه کویا بامو دَره؟ با اَنکی اون می چومانَ وازا کود. 31اَمان دانیم کی خُدا گُناکاران دُعای نیشتاوه، ولی اَگه کَسی خُداترس ببه و اونِ خواسته یَ انجام بده، خُدا اونِ دُعای ایشتاوه. 32جه دُنیا بنا تا الان کسی نیشتاوسته کی هیکّس بتانه کور مادرزادِ چومانَ وازا کونه. 33اَگه اَ مردای جه خُدا طرف نُبو، نتانستی کاری بُکونه.» 34اوشان اونَ جواب بدَئید: «تو کی سر تا پا گُناه درون بزا بُبوستی. هسّا، امرا ئم درس دئن دری؟» پس اونَ بیرون تَوَدَئید.
35وقتی کی عیسی بیشتاوست کی اُ مرداکَ بیرون تَوَدَئید، اونَ پیدا بُکود و اون جا واورسه: «انسان پسرَ ایمان دَری؟» 36اون جواب بدَه:«آقا، بُگو کیه تا اونَ ایمان باورم.» 37عیسی اونَ بگفت: «تو اونَ بیده ئی! اون هونیه کی الان تی مرا گب زَئن دَره.» 38بگفت: «آقا، ایمان دَرم.» و اونِ جُلُو زانو بزه و سُجده بُکود.
39بازون عیسی بگفت: «من اَ دُنیا درون باموم، تا داوری بُکونم، کی کوران وینا بیبید و وینایان کور بیبید.» 40بعضی جه فَریسیان کی اون ورجه ایسابید، هَطو کی اَن بیشتاوستید، واورسه ئید: «امانم کوریم؟» 41عیسی اَشانَ بگفت: «اَگه کور بید تخصیری ناشتیدی؛ ولی هسّا کی گیدی دینیدی، تخصیرکار باقی مانید.»
Currently Selected:
یوحنایِ انجیل 9: GIL
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
