انجیل یوحنا 7

عیسی شی به عید خِیمه‌ آن

1چِمه اَور، عیسی ای مدت جلیل منطقک گردسه، چون نِگَوسشه یهودیَک بیبی، چون یهودیان رایشان به اَوه بوکوشنده. 2یهودیان عید خیمَه، نزدیک به، 3پس عیسی بِراره اَونه باتشانه: «اِنگاردنه بشه یهودیه تا اِشته پیرو بیننده چه کارانی کری، 4چون هر کسی که بگَشه آزانسه بیبی، نوینکی کار نکره. ته که اِم کاران کردری، اِشتن دنیا آمان.» 5چون حتی چَوه براران نی اَوشان ایمان ناورده به. 6پس عیسی اَواننه باتشه: «هلا چِمن وقت آرسه نی، امّا شاما را هر وختی مناسبه. 7دنیا مردم نِتاننده شاماک متنفر بیبینده امّا منک متنفرنده، چون از شهادتی دَیِم که چوان کاره بدنده. 8شاما اِشتن عید را بِشا، از [اِسا] اِم عید را نایم، چون چِمن وقت حلا آرسه نی.» 9عیسی اِمش باته و جلیل منطقک بِندَرِس.

10امّا بعد از اِم که چَوه براره عیده را بشنده اورشلیم، اِشتن نی بشه، امّا نه آشکارا بلکم نوینکی. 11پس یهودیان، عید را چَوه پشه گرسردِنده، آپرسردشانه: «اَ مردک کاریه؟» 12و چَوه درباره مردمه دلک بحث پِر بِه. بعضی واتردشان: «چاکه مردکی اِسه.» امّا بعضی واتردشانه: «نه! بلکم مردمه گمراه کره.» 13امّا چون یهودیانک تَرسَردنده، هیچکس چَوه درباره آشکارا لاوش نکرده.

14عید هفته نصف اِورده به، عیسی بامه یهودیان معبد حیاط دله و شروعش بکه تعلیم دین. 15یهودیان تعجبشان بکه، و آپرسردشانه: «اِم مرد که هرگز دینش تعلیم وینده نی، چُنجوره تانه اِنجوره دانشی بداره؟» 16پس عیسی چوان جواوک باته: «چِمن تعلیمه منک نینده، بلکم اَ کسیه که منش خرسانسِم. 17اگم کسی راس راسینه بِگشه خدا خواسته انجام بدیه، زانه که اِم تعلیم خداکه یا از اِشتنک واترم. 18اَ کسی که اِشتنک واجه، اِشتن شکوه و جلاله پشدنیه، امّا اَ کسی که رایشه اِشتن خرساناره جلال بدیه، راست واجه و اَوک هیچ دوری نی. 19مگم موسی پیغمبر شریعتش شاما آدییه نیه؟ امّا هلا نی شاما هیچ کامین اَوان انجام ندیا. چیه را رایرانه من بوکوشا؟» 20مردمه جواو آدا: «ته دیوزده‌اش! کی رایشه ته بوکوشه؟» 21عیسی چوان جواوک باتشه: «از ایگله کارم بکه و شاما همبلنه اَوک تعجبران بکه‌. 22موسی ختنه حکمش شاما آدا - البته اِم موسی ک نبه بلکم قوم اجدادک به - و چِمه واسنه، یهودیان مقدس شنبه روجک شاما زاران ختنه کرا. 23اگم شنبه روجک زا ختنه کرا تا موسی شریعت مَشکنجانا، پس چیه را عصبانیران که شنبه روجک ایگله انسانیمی سلامتی کامل آدییه؟ 24‌ظاهر نه داوری مکرا، بلکم حقِنه داوری بِکَراه.»

مگم بی اَ مسیح بیبی

25بعضی از اورشلیم مردم باتشانه: «مگم اِم ه کسی نییه که رایشانه اَوه بوکوشنده؟ 26دیسا چُنجوره آشکارا لاوَه کردر و اَونه هیچی نواترنده! ممکنه قومه پیله تره واقعا زانسشان بیبی که اَ، هَ مسیح موعوده؟ 27آما زانسرام اِم مردک کاردنه آمییه، امّا وقتی مسیح موعود ظهور بکره، کسی نزانه کاردنه آمیه.» 28پس عیسی وقتی معبدک تعلیم دییرده، بلند صصنه باتشه که: «من آزانا و زانسرا کاردنه آمیم. امّا از چِمن طرفنه آمییه نیم. اَ کسی که منش خرسانسم، حقه؛ و شاما اَوه آنزانا. 29امّا از اَوه آزانم، چون از چوه طرفنه آمیم و اَو منش خرسانسه.» 30پس اَوان رایشان به عیسی دستگیر بکرنده، امّا هیچکس چوه را دسش دراز آنکه، چون هلا چه وقت آرسِسَه نبه. 31با اِم حال، پر کسه اَ جماعت دلک اَوشان ایمان بوعرده. اَوان واترده: «وختی مسیح موعود ظهور بکره، اِم مردکک پرتر معجزه کَره؟»

32فَریسیان فرقه علما گوش آرَسس که مردم دلک عیسی درباره اِنجوره لاوَه لاوَه اِسنده. پس سران کاهنان و فَریسیان، معبد نگهبانانشان بخرسانسنده تا عیسی دستگیر بکرنده. 33اَدمی عیسی باته: «کَملی ای نی شاما نه اِسِم، و چاوش شیم چِمن خرساناره ور. 34چِمن پَشه گردا، امّا من نیوینا؛ و اَگا که از اِسِم، شاما نتانا بایا.» 35یهودیان هندیگرنه واتردشانه: «اِم مردک رایشه کا بیشی که آما نتانام اَوه پیدا بکرام؟ رایشه بیشی یهودیانی ور که یونانیان دلک پخش و پلانده و یوناینیان تعلیم بدیه؟ 36چوه منظور چه به که باتشه، ”چِمن پَشه گردا، امّا من نیوینا؛ و اَگا که از اِسم، شاما نتانا بایا“؟»

رِباری که زندگی اُو بَخشه

37عید هفته آخرین روجک که عیده پیله روج بیا، عیسی بِندَرس و بلند صصنه باتشه: «هر‌ کسی که تشیرشه، چِمن ور بایه و آخره. 38هر کسی که من ایمان بوعره، اَجوره زه که مقدسه نیوشته واجنده، چَوه دِلِه دلک زندگی بخشه اُو خانی شوار را دگننده.» 39اِم لاوشه خدا مقدس روح درباره باتا، کسانی که اَوه ایمان بوعرنده، اَوه دریافت کرنده؛ چون خدا مقدس روح حلا عطا بییه نبه، چون حلا عیسی جلالش کته نبه.

40بعضی از جماعت، اِم لاوان اَشنوسننه باتشانه: «واقعا که اِم مردک هَ پیغمبر اِسه که واتش به آیه.» 41و بعضی واتردشان: «مسیح موعود اِسه.» امّا علوده گروهی آپرسرده: «مگم مسیح موعود جلیله منطقنه آیه؟ 42مگم مقدس نیوشته هان واته نی که مسیح موعود داوود پادشاه نسلک بی و بیت لحم نه ظهور کره، هَ ده ای که داوود پادشا اَوک زندگیش کرده؟» 43پس مردم دلَک عیسی درباره اختلاف دگس. 44‌بعضیان رایشان به اَوه دستگیر بکرنده، امّا هیچکس چَوه را دسش دراز آنکه.

45چاوش معبد نگهبانه آگردسنده سران کاهنان و فَریسیان ور. اَوان اِمانک آپرسس: «چیه را عیسی ران ناورده؟» 46نگهبانان جواو آدا: «تا‌ اِسا، کسی اِم مردکه شوار لاوش کرده نی!» 47فَریسیان باتشانه: «مگم شاما نی وازیران خَرده؟ 48مَگم قومه پیله ترانک و فریسیانک کسی اِسه که اَوش ایمان آورده بیبی؟ 49امّا اِم جماعتک که چی ای شریعتک نزاننده، لَعیننده.»

50نیقودیموس، که پرانتر عیسی ور شیه به و ایگله فریسیانک به، باتشه: 51«مگم چاما شریعت کسی محکوم کره بی اِم که اوّل چَه لاوان بشنوه و بزانه چِش کرده؟» 52اَوان جواو آدا: «مگم ته نی جلیلیش؟ دیَس و بینه که هیچ پیغمبری جلیل نه آمییه نی.» 53چاوش هر کسی بشه اِشتن کیه.

Currently Selected:

انجیل یوحنا 7: TIT

Highlight

Copy