SAHRUOTHUNA 9
9
Khazing Hne Noah Biekuona
1 #
Sah 1.28
Khazing ta Noah hne a sacapaa zaw kha thluechiy pi yi te, “Saata a hluvsa sa ung la, pungzaa ung la alyi lie hing bi tie ung. 2Alyi cung saruopa phangting, pavaa phangting, alyi lie a valepa saruopa phangting, hne riyliy lie ngaa bangkhuo ta aca ciy'a yi; iema ca niema kuv luona pi pata ama cuo. 3Hring te aa tle thepa bangkhuo ca uohnaasiyyhnaa ica pipa yi haa hing tana nama ning riypata ica pi yi. 4#Tbr 7.26,27; 17.10-14; 19.26; Pbp 12.16,23; 15.23 Cuorasala saa kha a chunglie thiy a aw pata ce'a va ung ciy, thiy ca hringna tana a cuo. 5Tahematapakieca niema hringna thiyse khana ica hie'a yi: cawsaa hne saruopa'a taa zaw ta ica hie'a yi. Pakha cyicuo kha ama uvnu hringna thiyse kha i hie'a yi.
6 #
Pya 20.13; Sah 1.26 Cawsaa thiyse a palangpa ahunghmuo,
cawsaa kuv ta a thiyse palangpa a cuo ra aa;
Tahematapakieca Khazing ta cawsaa ca
ama hmingsuo a lu pata a sapa tana a cuo.
7 #
Sah 1.28
Niema ca saata a hluvsa sa ung la pungzaa ung la alyi lie hing bi tie ung,” a ta yi.
8Cakhutaata Khazing ta Noah hne a sacapaa zaw kha ku yi te, 9“Niema hne niema hnangluo ta nama ciypathla tie hne cuose, 10niema hneta a awpa a hringpa sapa bangkhuo, pavaa zaw, sahring zaw, niema hne a awpa saruopa bangkhuo, tiypalaw taata a kya pyapa bangkhuo hneta biekuona i tue. 11Niema hne biekuona i tue, khatiy ning hmuo a hringpa saruopa bangkhuo hing tiypa-aa ta para'a va tli, khatiy ning hmuo tiypa-aa ta alyi hing para'a va tli,” a ta. 12Khazing ta, “Kama hne, niema hne niema'a lie a awpa a hringpa saruopa bangkhuo hne hmieluo a vya aw riypa tie bangkhuo alalalieta biekuo pacusana ta i tuepa pahmungsana ca: 13I buvtuvruoriy ca amyi cunglie khiy chi'a angte, capa ca kama hne alyi alalalieta i tuepa biekuo pahmungsana ta a cuo aa. 14Alyi cunglie hing amyi pazu sa'a angte amyi cunglie buvtuvruoriy aa luo tiyta, 15Kama hne niema hne a hringpa sapa hmang bangkhuo alalalieta tuepa, tiypa-aa ta a hringpa bangkhuo hing khatiy tahmuo para pakhaa'a va tli tapa i biekuo kha i thyi aa. 16Amyi cunglie buvtuvruoriy aa luo tiyta, khapa kha hmung'a angte, Khazing hne alyi lieta a awpa a hringpa sapa hmang bangkhuo alalalieta tuepa chuozaa aa hmangpa biekuo kha i thyi aa,” a ta. 17Khazing ta Noah kha, “Hingpa hingna kama hne alyi lie a awpa a hringpa bangkhuo alalalieta i tuepa biekuo pahmungsana ta a cuo,” a ta.
Noah Hne A Sacapaa Zaw
18Tiypalaw taata a pyapa Noah sacapaa zaw ca Shem, Ham hne Jafeth ta ama cuo. Ham ca Kanaan paa ta a cuo. 19Hingpa pathung hing Noah sacapaa zaw ta cuo yi te, iema hing alyi cung cawsaa bangkhuo ciypathlatuv ta ama cuo.
20Noah ca lu a thlupa ta cuo te mingsuv diedung a tue taapa ta a cuo. 21Mingsuvtiy kha dang te a pariy nakawta thluodaa chunglie kha a sasepa ta a laa. 22Kanaan paa Ham ca ta a paa a sasepa ta a awpa kha a hmung tiyta ale lie a awpa a uvnu zaw pahning kha a chang yi. 23Shem hne Jafeth ta pang zung kha la yi te, ama letung lie kha pake yi te ama hnangluo taata a sawsue yi te a sasepa ta a awpa ama paa kha ama pabuv. 24Noah ca mingsuvtiy a pariyna taa cata kya sing te a sacapaa a syipa ta a cunglie a tuepa kha a pachang tiyta,
25“Kanaan ca chiesapa cuo se;
a uvta zaw sii hrawlie aa ne cepa ta cuo se,” a ta.
26A ri kaliepa ca,
Abyipa i Khazing thluechiy ca Shem cunglie aw sala;
Kanaan ca a sii ta cuo mang sue.
27Khazing ta Jafeth hing a ruoriy paku sala,
a samingsahlaa zaw ca Shem samingsahlaa zaw hne khysa pakhaw yi sala,
Kanaan ca Jafeth sii ta cuo mang sue,” a ta.
28Noah ca tiypa-aa tlung khutaata kung zathung sawngaa hring te, 29a kung zacaky sawngaa a ta pata a thiy.
Currently Selected:
SAHRUOTHUNA 9: LNT
Highlight
Share
Copy
Want to have your highlights saved across all your devices? Sign up or sign in
Lutuv Holy Bible © Bible Society of Myanmar, 2023.
