JOHAN 2

Kaanaa Khy Lie Achiyhiena Pyi

1Ning thungna lie kha Galilee pe Kaanaa khy lie ta achiyhiena pyi aw te Zingsuv nung kha capa lie ca a aw. 2Zingsuv hne ziytuv tie zaw kha achiyhiena pyi luo ca ama ku ra. 3Ama mingsuvtiy a chuo tiyta a nung ta Zingsuv kha, “Mingsuvtiy hnyi va tli yi,” a ta. 4Zingsuv ta, “Cawsaanung, capa ca nama'a na kama hneta khaapama aa se? I cuo pha valie,” a ta. 5Zingsuv nung ta changtaapa tie kha, “Ama ta aca changpa yi bangkhuo kha tue mya ung,” a ta yi. 6Judah ming ta ama phung haata a pathena riypata capa lie ca ruocuo suocaruv chi yi te, ruocuo suokha ta tiy gaalaan#2.6 Gaalaan suokha ca paling suocaruv tluv aa tlaw suokiy taata sawthung te aa tlaw. 7Zingsuv ta changtaapa tie kha, “Ruocuo hing tiy pabi diy tie ung,” a ta yi. A lepalana te ta ama pabi. 8Iema kyihuo khata, “Tiy kha siy ung la saduona pyi tluotlatuv kha va pi tie ung,” ta yi te, ama va pi. 9Mingsuvtiy ta a lipa tiy ca tluotlatuv ca ta a pacuo te, hingpa mingsuvtiy hing khaapa taata ma aa vaw tapa kha a pachang li nakawta (Tiy a thepa changtaapa tie ta ca ama pachang thluo), nungchiytuv satlie ca ku te, 10“Malie ca mingsuvtiy pahuo cepa kha thu taa yi te muo aa de pata ama dang khutaata mingsuvtiy cakhawpa kha ama pi ta. Cuorasala nama ca a pahuo cepa kha ata tepa ta na thu kalie,” a ta. 11Zingsuv ta hingpa kharuehaa hmang suokhana hing Galilee pe Kaanaa khy lieta a tue; capa lie ca a rungnaana kha paluo sa te, a ziytuv tie ta ama kha ama zang.

12 # Mat 4.13 Cakhutaata Zingsuv hne a nung, a nuta zaw, hne ziytuv tie ca Kapernaum khy luo kha zuv yi te ning cawta chung ama va aw.

Zingsuv Ta Biena-ing A Pathe

(Mat 21.12-13; Mar 11.15-17; Luk 19.45-46)

13 # Pya 12.1-27 Lawsena Pyi aa ngiesa tli nakawta Zingsuv ca Jerusalem luo kha a khaw. 14Biena-ing chunglie kha cue hne tuv hne valale a zaapa tie hne tuokaa a thlepa tie zaw ama cabya lie amaa tupa kha a hmung yi. 15Khuhriy kha china riypata a camaa te tuv hne cue zaw bangkhuo kha Biena-ing taata aa cade diy. Tuokaa thletuv tie tuokaa diyta zaw kha hipatlaa diy te ama cabya zaw kha a pali diy. 16Valale a zaapa tie zaw kha, “Hingpa hmang zaw hing pyakhyi diy ung! I paa ing ca chadaw zaana ta hmuo khah tie ung!” ta pata naw a pi yi. 17#Slm 69.9 Ziytuv tie ca Caapathe ta, “Vya Khazing, na ing cuota i khingpasana ta myi haata ina kuo aa,” a tapa kha ama nang a kya vuo. 18Cakhutaata Judah ming ta, “Hingpa hmang na tuena kawlie hingta khaapa pamangsana ma malie na pahmung sa aa?” ama ta. 19#Mat 26.61; 27.40; Mar 14.58; 15.29 Zingsuv ta, “Hingpa biena-ing hing para ung la ning thung chunglie i sa pakhaa aa,” a ta. 20Judah ming ta, “Ning thung chung tama na sa pakhaa aa? Hingpa Biena-ing sana lie hing kung sawliy kung caruv tli hing ama za ru,” ama ta. 21Cuorasala Zingsuv ta biena-ing a tapa ca ama pangpa kha tana a cuo. 22Thiyna taata pathupa a cuo khutaata, ziytuv tie ca hingpa hing muo a za ripa khata a cuo ta tapa kha ama nang vuo te Caapathe hne Zingsuv ripa bie kha ama zang.

23Zingsuv ca Lawsena pyi chung Jerusalem lie a aw ning kha cawsaa hluvpuv ta kharuehaa hmang a tuepa zaw kha hmung yi te ama zang. 24Cuorasala Zingsuv ta ca a pathiypalung yalya ta zang diy va yi, tahematapakieca cawsaa bangkhuo kha a pachang diy yi. 25Cawsaa kaw kha a hrangpa pakhakha ta changpasie a hu vyi; tahematapakieca ama palung chunglie khaapama a aw tapa kha a pachang diy.

Currently Selected:

JOHAN 2: LNT

Highlight

Copy