يوحنا 6

1وبعد فترة كان يسوع في منطقة طبريا وبحر الجليل 2ولِحْقوه ملان ناس لأنهن شافو آياته اللي عملها لما شفى الـمُرَضَى. 3فَطِلع يسوع وراح قعد مع تلاميذه ع الجبل 4وقرّب عيد البسح وهو عيد الفصح اليهودي 5واطَّلع يسوع وشاف ملان ناس عم تيجي لعندو فسأل فيلبس: من وين نجيب أكل عشان نطعمي كل هدول الناس؟ 6كان يسوع مقرر إيش بدو يعمل بس كان السؤال امتحان لفيلبس. 7رد فيلبس وقلّو: مش رَح يكفي معاش 200 يوم شغل عشان نشتريلهن بس خبز وعشان الواحد فيهن يوكلُه شقفة خبز. 8وأندراوس أخو سمعان بطرس وهو واحد من التلاميذ، رد ع يسوع وقال: 9"في هون ولد معه 5 خبزات شعير وسمكتين. بس شو بدها تكفي تتكفي لكل هدول الناس؟". 10فقال يسوع: خلو الزلام تقعد وكان المحل ملان ديشه. وقعدوا الزلام وكان عددهن تقريبا 5000 زلمة. 11وأخذ يسوع الخبزات وصلى صلاة الشكر وبعدين وزع ع الناس القاعدين وعمل نفس الإشي مع السمكتين. وأعطى الناس يوكلو أديش بدهن. 12لـما شبعت الناس قال يسوع لتلاميذو لـِمو الشُقف اللي ضلّت عشان مَينكبش إشي. 13لـمُّو شُقف الخبز اللي ضلت وعبو 12 سلة خبز من خمس خبزات الشعير. 14وبعد ما شافت الناس الآية اللي عملها يسوع قالو: هذا هو عنجد النبي اللي انكتب عنه أنو رَح يجي ع العالم. 15وعرف يسوع إنهن بدهن ييجو ويجبروه يصير ملك فانسحب وراح ع الجبل لحاله.

16ولما غابت الشمس نزلوا تلاميذ يسوع ع البحيرة 17وركبوا القارب عشان بدهن يروحوا عكفرناحوم، اللي في الجهة الثانية من البحر. وكانت الدنيا عتمة ويسوع بعدو ما رجعش. 18وهاج البحر وكان الهوا يخبط خبط 19وبعد ما جدفوا القارب 5 أو 6 كيلومتر شافو واحد ماشي ع المي وعم بقرب عليهن فخافوا. 20فقلهن يسوع: أنا هو. مَتخافوش. 21صاروا بدهن إياه يفوت ع القارب. وبلحظة وصل القارب ع البلد اللي كانوا رايحين عليها.

22وتاني يوم، فاقت الناس اللي كانت واقفة عند البحر وفهموا إنو مكنش في غير قارب واحد. وهو القارب اللي ركبوه التلاميذ ومكنش يسوع معهن. 23بس ملان قوارب وصلت من طبرية وُوقفت في محل قريب من المحل إللي قدّم فيه الرب الشكر واللي أكلوا فيه الخبز. 24ولما شافوا إنو يسوع وتلاميذو مش هناك ركبوا القوارب وراحو عكفرناحوم يدورو ع يسوع. 25وبعد ما لقوه في الشقة التانية من البحيرة سألوه: يا معلم، وينتى أجيت لهون؟ 26جاوبهن يسوع وقلهن: عنجد بقولكو بدكو إياني عشان أكلتو خبز وشبعتو مش عشان الآيات اللي شفتوها. 27وبدال ما تنشغلو بالأكل اللي بِخْلَصْ اشتغلوا عشان الأكل اللي بضل للحياة الأبدية. الله الآب بإيّد ابن الإنسان اللي بعطيكو هذا الأكل. 28فسألوه: شو لازم نعمل عشان نعمل الأعمال اللي بدو إياها الله؟ 29رد عليهن يسوع وقلهن: العمل اللي الله بُطلبو هو إنكو تآمنو إنو هو بعتني. 30فقالولو: طيب شو الآية اللي بدك تعملها عشان نشوف ونآمن فيك؟ شو بدك تعمل؟ 31أجدادنا أكلوا المن في البرية ومكتوب إنو: هو اعطاهن خبز من السما عشان يوكلو. 32فقلهن يسوع: عنجد بقُلكو مش موسى اللي اعطاكو الخبز من السما أبوي هو اللي عم يعطيكو الخبز الحقيقي من السما. 33لأنو خبز الله هو الخبز اللي بِنزل من السماء وبيحي العالم. 34قالولو: يا سيّد، ضلك اعطينا من هادا الخبز. 35فقلهن يسوع: أنا هو الخبز اللي بيحي. واللي بيجي لعندي مش رَح يجوع واللي بآمن فيِّ مش رَح يعطش للأبد. 36بس بقلكو مع إنكو شفتوني مش عم بتآمنو. 37كل شخص بعطيني إياه الآب بيجي لعندي واللي بيجي لعندي مش ممكن أطرده بره 38لأني منزلتش من السما أعمل مشيئتي نزلت اعمل مشيئة اللي بعتني. 39ومشيئة اللي بعتني أنو أحمي كل اللي اعطاني إياهن من الهلاك وأقومهن في اليوم الأخير. 40مشيئة الآب إنو كل واحد مؤمن بالابن وعينيه عليه بتكون إلو حياة أبدية وأنا رَح أقومه في اليوم الأخير.

41وصاروا اليهود يتذمروا عليه عشانو قال: "أنا هو الخبز اللي نزل من السما" 42وقالو: طب مش هادا هو يسوع ابن يوسف اللي احنا عارفين أبوه وإمو؟ كيف إسه عم بقول إنو نزلت من السما؟ 43جاوبهن يسوع وقال: تتذمروش بينات بعض. 44مش ممكن حدا يقدر يجي لعندي إلا إذا جابو الآب اللي بعتني. وأنا رَح أقومه في اليوم الأخير. 45مكتوب في كتب الأنبيا: "رَح الله يعلّم الجميع". كل واحد بسمع للآب وبتعلّم منه بيجي لعندي. 46الوحيد اللي شاف الآب هو الكائن من الآب. هو اللي شاف الآب. 47عنجد بقلكو: اللي بكون مؤمن فيِّ بتكون الحياة الأبدية إلو. 48أنا هو الخبز اللي بيحي. 49أجدادكو ماتوا مع إنهن أكلوا المن في البرية 50بس هذا الخبز النازل من السما إذا بوكلو حدا مش رَح يموت. 51أنا هو الخبز الحي اللي نزل من السما وإذا حدا بوكل من هادا الخبز رَح يعيش للأبد والخبز تبعي هو جسدي اللي رَح أضحي فيه عشان العالم يعيش.

52فولعت مع اليهود وصاروا يقولو لبعض: كيف بدو هذا الزلمة يعطينا جسده عشان نوكل؟ 53جاوبهن يسوع وقلهن: عنجد بقلكو إذا بتوكلوش لحم ودم ابن الإنسان مش رَح تعيشو. 54اللي بوكل جسدي وبشرب دمّي رَح يكون عنده حياة أبدية ورَح أقومه في اليوم الأخير. 55لأنو جسدي هو الأكل الحقيقي ودمي هو الشراب الحقيقي. 56اللي بوكل جسدي وبشرب دمّي بِتِّحِدْ معي وأنا بعيش فيه. 57زي ما أنا حي بالآب الحي اللي بعتني هيك بِحيا اللي بوكلني. 58هادا هو الخبز النازل من السما، مش زي ما أكلوا الأجداد وماتوا لأنو اللي بوكل من هادا الخبز رَح يعيش للأبد. 59حكى يسوع هادا الحكي لما كان يعلم في كنيس كفرناحوم.

60كثار من تلاميذ يسوع سمعوه وقالو: صعب نقبل هادا الكلام، ومين بقدر يسمع هيك إشي؟ 61حس يسوع إنهن عم بتذمروا من كلامُه فسألهن: كلامي حجر عثرة لإلكو؟ 62طيب وشو إذا شفتو ابن الإنسان طالع لوين كان من قبل؟ 63الجسد بنفعش إشي لأنُه الروح هو اللي بيحي. الكلام اللي حكيتلكو إياه هو روح وحياة. 64بس في منكو ناس مش مآمنين وكان يسوع عارف من الأول مين مش مآمنين ومين اللي راح يخونه. 65وقال يسوع: عشان هيك قلتلكو فش حدا بقدر ييجي لعندي بدون نعمة الآب.

66ومن هداك الوقت ملان ناس من أتباع يسوع تراجعوا وبطلو بدهن يكونو من جماعته. 67فقال يسوع لتلاميذه ال 12: بدكو إنتو كمان تتركوني؟ 68جاوبه بطرس وقلّو: يا رب، لوين نروح؟ إنت اللي عندك كلام الحياة الأبدية 69وإحنا آمنا إنك إنت قدوس الله. 70جاوبهن يسوع وقال: مش أنا اللي اخترتكو إنتو ال 12؟ مع هيك في واحد منكو شيطان. 71كان يحكي عن يهوذا ابن سمعان الإسخريوطي. هو الشخص اللي رَح يخون يسوع، وهو واحد من ال 12.

Currently Selected:

يوحنا 6: CGB

Highlight

Copy