لوقا 18

1وقلّهن متَل عن إنو لازم نصلي دايماً بدون مَ نيأس. 2قال: كان، في وحده من المدن، قاضي بِخَفش الله وبعملش حساب لحدا. 3‏-4وكان، في هديك المدينة، مرة أرملة كانت تيجي لعندو وتقلُّو: أحكملي بالعدل قدام عدوي. وقعد فتـرة يرفض طلبها. وبعد فتـرة فكّر وقال: مع إني بَخَفش الله وبعملش حساب لحدا 5بس لأنو هاي الأرملة تعبتني رح أحكملها بالعدل عشان مَ تضلش تيجي كل الوقت وتوجع راسي. 6وقال الرب: اسمعوا شو القاضي الظالم عم بقول. 7فكيف الله بدُش يحكم بالعدل للناس اللي اختارهن واللي عم بطلبوه بأعلى أصواتهن بالنهار وبالليل؟ معقول يتأخر عليهن؟ 8بقلّكو إنو بدعمهن بالحكم العادل وبسرعة. بس فكركو رَح يلاقي ابن الإنسان الإيمان عَ الأرض لما برجع؟

9وفي كمان مَتَل قالو يسوع لناس شايفين حالهن ومقتنعين إنو الحق معاهن وهنّي بستخفوا بباقي الناس. 10قال، كان في 2 زلام طلعوا ع الهيكل عشان يصلو، واحد فريسي متدين والتاني شغيل ضرايب. 11وقف الفريسي وصلى ع السكت وقال: يا الله، أشكرك لأني مش مِتِل باقي الناس المحتالين المجرمين الزناة أو متِل شغيل الضرايب هادا. 12أنا بصوم مرتين كل أسبوع وبدفع عُشر دخلي لألله. 13بس شغيل الضرايب وقف بعيد وهو مش مسترجي يرفع عينيه ع السما وكان يضرب ع صدرو ويقول: يا الله، ارحمنـي أنا الخاطي. 14بقلّكو روّح شغيل الضرايب ع بيتو وصلاتو مسموعة بعكس الفريسي. لأنو اللي بِرفع بنفسو رَح ينـزل واللي بتواضع رَح يرتفع.

15وكانوا يجيبولو الولاد الِ زغار عشان يُحط إيديه عليهن. ولما شافوهن التلاميذ صيّحو عليهن. 16فناداهن يسوع وقلّهن: اتركوا الأولاد وخلوهِن ييجوا لعندي، تمنعوهِنّش لأنو الناس اللي مِتِلهن إلهن مملكة الله. 17عنجد بقلّكو اللي مَ بستقبلش مملكة الله مثل ولد زغيـر مستحيل يكون في المملكة.

18وفي واحد من رُؤسا اليهود سأل يسوع وقلّو: يا معلم يا منيح، شو أعمل عشان أورت الحياة الأبدية؟ 19رد عليه يسوع وسألو: ليش بتقولي "يا منيح"؟ فش حدا منيح إلا واحد وهو الله. 20إنت عارف الوصايا: تزنيش، تقتلش، تسرقش، تشهدش ع حدا بالكذب، واِكرم أبوك وإمك. 21فقلو: يا معلم، من مزغري وأنا بطيع كل هاي الوصايا. 22بعد مَ سمع يسوع جوابو قلّو: ناقصك إشي واحد روح وبيع كل اللي عندك وُوزعو ع الفُقرا ورَح يكونلك كنـز في السما وبعدين تعال وُصير من تلاميذي. 23اِنغّم الزلمة من جواب يسوع لأنو كان غني كتيـر.

24بعد م شاف يسوع إنو الزلمة اِنغّم من جوابو قال: اللي عندهن مصاري كتيـر م أصعب إنهن يفوتوا ع مملكة الله. 25أسهل للجمل إنو يفوت من خزق الإبرة من إنو غنـي يفوت ع مملكة الله. 26لما سمعوه قالو: ول، مين بقدر يحصل على الخلاص؟ 27رد يسوع وقال: اللي مش مقدور عليه عند الناس مقدور عليه عند الله. 28فقال بطرس: هيانا إحنا تركنا اللي عِنا ومشينا وراك. 29فقلّهن يسوع: بأكدلكو إنو فش حدا ترك بيت أو مرة أو قرايب أو أبوه وأمو أو ولادو عشان مملكة الله 30إلا ورَح يوخذ أضعاف في هاي الدنيا ويوخذ الحياة الأبدية في العالم اللي عم بيجي.

31واخذ يسوع لـ 12 تلميذ ع جنب وقلّهن: هيانا طالعين ع أورشليم ورَح يتحقق كل اللي كتبوه الأنبيا عن ابن الإنسان. 32ورَح يوقع ابن الإنسان بإيدين الشعوب اللي بتعرفش الله ويتمسخرو عليه وينهان وينبـزق عليه 33وبعد مَ يجلدوه ويقتلوه رَح يقوم في اليوم التالت. 34بس هنـي مستوعبوش ولا إشي وكان كلامو بالنسبة إلهن غامض ومش مفهوم.

35ولما قرّب يسوع ع أريحا كان في واحد أعمى قاعد عم بشحد بالطريق. 36وسمع الأعمـى صوت كتيـر ناس عم تمرء فسأل: شو في؟ 37قلولو: يسوع النصراوي ماشي في الطريق. 38فصار يصيح ويقول: يا يسوع ابن داود ارحمنـي. 39وصاروا الناس الماشيين جنبه يعزرو عليه عشان يسكت بس هو صار يصيح بأعلى صوته: يا ابن داود ارحمني. 40فوقف يسوع وقلّهن جيبوه لعندي. ولـما قرّب سألو: 41شو بدك منـي؟ قلّو: يا رب، بدي أشوف. 42فقال يسوع: شوف! إيمانك شفاك. 43وصار طوالي يشوف ومشي ورا يسوع وهو يمجّد الله. والناس اللي شافوا ها الشوفة صاروا يحمدوا الله.

Currently Selected:

لوقا 18: CGB

Highlight

Copy