اعمالِ رسُولا 9
9
فصلِ نُهم
تغِییرِ زِندگی شائول
1دَمزُو غَیت شائول هنوز پَیرَوای مَولا عیسیٰ ره تهدِید مُوکد که اُونا ره مُوکُشه. اُو دَ دِیرِ پیشوای بُزُرگ رفته 2ازُو دَ سرِ تمامِ عِبادت خانه های شارِ دَمِشق خط طلب کد تا پَیرَوای راهِ مَولا عیسیٰ ره که دَ اُونجی پَیدا مُوشُد، چی مَرد، چی خاتُو، دِستگِیر کده دَ اورُشَلیم بیره. 3دَ حالِیکه شائول مورَفت و دَ دَمِشق نزدِیک مُوشُد، اولغَتله یگ نُور از آسمو دَ گِرد شی بَلَقده کد. 4اُو دَ زمی اُفتَد و یگ آواز ره شِنِید که دَزُو گُفت: ”شائول، شائول، چرا مَره آزار-و-اَذیَت مُوکُنی؟“ 5اُو پُرسان کد: ”صاحِب، تُو کِی اَستی؟“ جواب اَمَد: ”ما عیسیٰ اَستُم، امُو که تُو اُو ره آزار-و-اَذیَت مُوکُنی. 6آلی باله شُو و دَ شار بورُو. دَ اُونجی دَز تُو گُفته مُوشه که چی باید بُکُنی.“
7همسَفرای شائول مَو شُده حَیرو مَندُد، چراکه اُونا آواز ره مِیشِنِید، مگم هیچ کس ره نَمِیدِید. 8وختِیکه شائول از زمی باله شُد، اُو چِیمای خُو ره واز کد، مگم هیچ چِیز ره نَمِیدِید. پس همسَفرای شی از دِستِ ازُو گِرِفت و اُو ره کوتَل کده دَ دَمِشق بُرد. 9بَلدِه سِه روز چِیمای ازُو دِید نَدَشت و اُو نَه چِیزی خورد و نَه ام وُچی کد. 10دَ دَمِشق یگ پَیرَوِ عیسیٰ دَ نامِ حنانیا زِندگی مُوکد. مَولا عیسیٰ دَ خاو دَزشی ظاهِر شُده گُفت: ”اَی حنانیا.“ حنانیا دَ جواب شی گُفت: ”اَمر کُو، یا مَولا.“ 11و مَولا دَزُو گُفت: ”باله شُو، دَ کُوچِه بورُو که نام شی «سِیده» اَسته و دَ خانِه یهُودا کسی ره دَ نامِ شائول از شارِ طَرسُوس پُرسان کُو. امی آلی اُو مَشغُولِ دُعا اَسته 12و اُو دَ خاو خُو دِیده که یگ نفر دَ نامِ حنانیا مییه و دِست خُو ره دَ بَلِه ازُو میله تا اُو دُوباره بِینا شُنه.“ 13حنانیا گُفت: ”یا مَولا، ما از غَدر کسا شِنِیدیم که اِی آدم دَ سرِ مُقَدَّسِینِ#۹:۱۳ «مُقَدَّسِین» یعنی پَیرَوای عیسیٰ مسیح. ازتُو دَ اورُشَلیم کَلو ظُلم کده. 14و آلی از طرفِ پیشوایونِ عالی مقام اِختیار پَیدا کده دَ اِینجی اَمَده تا تمامِ کسای که نام تُو ره بِگِیره، اُونا ره دِستگِیر کُنه.“ 15مگم مَولا دَزُو تاکِید کده گُفت: ”بورُو، چراکه ما اُو ره اِنتِخاب کدیم تا یگ وسِیله جور شُنه و پَیغام مَره دَ مردُمِ غَیرِ یهُود و دَ پادشایو و ام دَ بَنی اِسرائیل بِرسَنه. 16ما دَزُو نِشو مِیدیُم که بَلدِه نام مه چِیقس باید رَنج-و-زَحمت بِکشه.“
17اوخته حنانیا رفته دَ خانِه یهُودا داخِل شُد و دِست خُو ره دَ بَلِه شائول ایشته گُفت: ”شائول بِرار، وختِیکه تُو اِیسُو میمَدی مَولا عیسیٰ دَ بَینِ راه دَز تُو ظاهِر شُد. اُو مَره رَیی کده تاکه تُو دُوباره بِینا شُنی و از روح اُلقُدس پُر شُنی.“ 18دَ امزُو لَحظه یَگو چِیز رقمِ پرده اَلّی از چِیمای شائول تاه پَرِید و اُو دُوباره بِینا شُد. اوخته اُو باله شُده غُسلِ تعمِید گِرِفت. 19بعد ازُو اُو نان خورده قُوَت گِرِفت و بَلدِه چند روز قد پَیرَوای عیسیٰ مسیح دَ دَمِشق مَند. 20اُو فَوراً دَ عِبادت خانه های یهُودیا رفت و وَعظ کد که عیسیٰ واقِعاً باچِه خُدا اَسته. 21کسای که تورای ازُو ره مِیشِنِید مَو شُده حَیرو مُومَند و مُوگُفت: ”آیا اِی امُو کسی نِییه که دَ اورُشَلیم کسای ره که نامِ عیسیٰ ره مِیگِرِفت، تباه مُوکد؟ و آلی ام دَ اِینجی نَمَده تا اُونا ره دِستگِیر کده دَ پیشِ پیشوایونِ عالی مقام بُبره؟“ 22مگم شائول قُدرتِ بیان شی روز دَ روز کَلو مُوشُد و قد دلِیلای زیاد یهُودیای دَمِشق ره بَند اَندخته ثبُوت مُوکد که عیسیٰ امُو مسیحِ وعده شُده اَسته. 23بعد از چند وخت یهُودیا نقشه کشِید که اُو ره بُکُشه. 24ولے شائول از نقشِه ازوا خبر شُد. اُونا دَ درگه های شار شاو و روز پَیره مُوکد تاکه اُو ره گِرِفته از بَین بُبره. 25لیکِن یارای شی اُو ره شاو دَ مَنِه یگ سَبَد ایشته از دیوالِ شار تاه کد. 26وختِیکه شائول دَ اورُشَلیم رسِید، اُو میخاست که قد دِیگه یارا یگجای شُنه، مگم پگِ ازوا ازُو ترس خورد، چُون باوَر نَمُوکد که اُو واقعاً پَیرَوِ عیسیٰ شُده بَشه. 27لیکِن بَرنابا اُو ره گِرِفته دَ پیشِ رسُولا بُرد و بَلدِه ازوا نقل کد که چِطور اُو دَ راهِ دَمِشق مَولا عیسیٰ ره دِیده و مَولا چِطور قد ازُو توره گُفته و اُو دَ چی دلیری دَ نامِ عیسیٰ توره گُفته. 28اوخته شائول قد ازوا یگجای شُد و دَ اورُشَلیم رفت و اَمَد دَشت و دَ دِلاوَری دَ نامِ مَولا عیسیٰ وَعظ مُوکد. 29اُو قد یهُودیای یونانی زِبو بَحث و گُفتُگوی مُوکد، مگم اُونا دَ تلاشِ کُشتون شی بُود. 30وختِیکه ایماندارا خبر شُد، اُونا اُو ره دَ شارِ قَیصَریه بُرد و از اُونجی دَ شارِ طَرسُوس رَیی کد.
31پس جماعتِ ایماندارا دَ سرتاسرِ یهُودیه، جلِیلیه و سامِره صُلح-و-آرامِش پَیدا کد. اُونا دَ ایمان خُو قَوی شُده دَ خُداتَرسی زِندگی مُوکد و دَ کومَکِ روح اُلقُدس تِعدادِ ازوا کَلو شُده مورَفت.
سَفرِ پِترُس
32پِترُس دَ تمامِ منطقه ها سَفر مُوکد و اُو دَ پیشِ مُقَدَّسِینی که دَ شارِ لِدّه زِندگی مُوکد ام اَمَد. 33دَ اُونجی اُو یگ آدم ره دَ نامِ اَینیاس دِید که اُو مُدَتِ هشت سال فَلج و دَ جاگه اُفتَده بُود. 34پِترُس دَزُو گُفت: ”اَینیاس، عیسیٰ مسیح تُو ره شفا مِیدیه. باله شُو، جاگِه خُو ره جَم کُو.“ و اُو دِستی از جاگِه خُو باله شُد. 35از دِیدونِ اَینیاس تمامِ مردُمای شارِ لِدّه و منطقِه شارون سُونِ مَولا عیسیٰ رُوی اَوُرد.
36دَ شارِ یافا یگ خاتُونِ ایماندار دَ نامِ طَبِیتا بُود که دَ زِبونِ یونانی اُو ره دورکاس یعنی ”آهُو“ مُوگُفت. اُو خاتُو غَدر نیکُوکار بُود و هر غَیت خَیرات مِیدَد. 37دَ امزُو روزا طَبِیتا ناجور شُده مُرد و جَسَد شی ره غُسل دَده دَ یگ بالهخانه ایشت. 38ازی که شارِ لِدّه دَ نزدِیکِ شارِ یافا بُود، پَیرَوای عیسیٰ دَ یافا شِنِید که پِترُس دَ شارِ لِدّه اَسته. پس اُونا دُو نفر ره رَیی کد تا ازُو خاهِش کُنه و بُگه که هر چی زُودتَر دَ پیشِ ازمو بییه. 39اوخته پِترُس باله شُده قد ازوا رَیی شُد. وختِیکه دَ اُونجی رسِید اُو ره دَمزُو بالهخانه بُرد. دَ اُونجی تمامِ خاتُونوی بیوه چخرا کده دَ گِردِ پِترُس جَم شُد و پیرونا و دِیگه کالای ره که دورکاس دَ دَورونی که قد ازوا بُود دوختُد، دَزُو نِشو مِیدَد. 40مگم پِترُس پگِ ازوا ره از اُتاق بُر کد و زانُو زَده دُعا کد و رُوی خُو ره سُون جِنازه کده گُفت: ”طَبِیتا، باله شُو.“ اوخته اُو چِیمای خُو ره واز کد و امی که پِترُس ره دِید، رُست شُده شِشت. 41پِترُس از دِست شی گِرِفته اُو ره دَ سرِ پای شی ایسته کد و بعد ازُو مُقَدَّسِین و خاتُونوی بیوه ره کُوی کده اُو ره زِنده دَزوا تسلِیم کد. 42اِی خبر دَ سراسرِ یافا تِیت شُد و غَدر نفرا دَ مَولا عیسیٰ ایمان اَوُرد. 43دَ حینِ زمان پِترُس بَلدِه روزای کَلو دَ یافا قد شِمعونِ چَرمگر مَند.
Currently Selected:
اعمالِ رسُولا 9: HAZ
Highlight
Copy
Compare
Share
Want to have your highlights saved across all your devices? Sign up or sign in
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 United Bible Societies Association and Pamir Ministries. Used by permission. All rights reserved.
