Kejadian 1
1
Alatala yasanadi awan ke tana ke sarea isi
1Pang waya ade mula, Alatala sanadi awan ke tana. 2Dunia nopoda rupa ke nopoda isi. Ungkap batangkap yatutup sasir aiʼ, ke Ruh Alatala#1:2 Pang dalam Kitab Suci yasajelas luk Alatala ada Ruh, dadi Ruh Alatala nan yanansi Alatala diri, siong ruh ade lin atawa ruh ade yautus ling Alatala. Ruh Alatala nan balong apaling Alatala balong. melayang-layang pang bao aiʼ. 3Ke bafirman mo Alatala, "Dadi mo mengas." Ke dadi mo mengas nan. 4Yagita ling Alatala luk mengas nan balong, karing yaseka mo antara mengas ke ungkap. 5Ke Alatala yasasingin mengas nan "tengari," ke ungkap nan "petang". Ano nan kamo liwat ke ano nan ano ade mula.
6Bafirman mo Alatala, "Dadi mo sopo ruang ade dadi panyeka aiʼ ke aiʼ." 7Dadi yasanadi mo ling Alatala ruang nan ke yaseka mo ling Diri aiʼ ade ada pang bawa ruang nan ke aiʼ ade ada pang bao. Ke dadi mo nan luk. 8Karing Alatala yasasingin ruang nan "awan". Ano nan kamo liwat ke ano nan ano ade kadua.
9Bafirman mo Alatala, "Beang mo sarea aiʼ ade ada pang bawa awan baremin pang sopo katokal, mabau tangkela katokal ade toar." Ke dadi mo nan luk. 10Karing Alatala yasasingin katokal ade toar nan "darat", ke aiʼ ade baremin nan yasasingin "lit". Alatala yagita sarea luk nan balong.
11Bafirman mo Alatala, "Balong mo tana satumung sarea ade tumung yanansi sarea rupa ade ramodeng ke sarea rupa puin ade rabua ke bauʼ badadi." Ke dadi mo nan luk. 12Tana nan satumung sarea ade tumung yanansi sarea rupa ade ramodeng ke sarea rupa puin ade rabua ke badadi. Alatala yagita sarea luk nan balong. 13Ano nan kamo liwat ke ano nan ano ade katelu.
14Bafirman mo Alatala, "Dadi mo benda-benda ade basamengas pang bao awan tawa seka tengari ke petang. Beang mo benda-benda ade basamengas nan dadi tanda luk sarea musim, ano, ke tin-tin. 15Ke beang mo benda-benda nan dadi ade basamengas pang bao awan umin samengas dunia." Ke dadi mo nan luk. 16Dadi Alatala yasanadi sadua benda rea ade basamengas. Ade lebe rea yanansi mata ano ade bakawasa lako tengari, ke ade ode yanansi bulan, ade bakawasa lako petang. Ke yasanadi ampo bintang-bintang. 17Alatala yaolo sarea benda nan pang bao awan umin samengas dunia, 18mabau bakawasa lako tengari ke petang, mabau seka mengas ke ungkap. Alatala yagita sarea luk nan balong. 19Ano nan kamo liwat ke ano nan ano ade kaempat.
20Bafirman mo Alatala, "Beang mo pang dalam aiʼ lempo ke ade telas, ke beang mo sarea pio ngibar pang bao dunia, yaroso awan." 21Dadi Alatala yasanadi sarea rupa binatang lit ade rea ke sarea rupa ade ngaluit ngaloa pang dalam aiʼ, ke sarea rupa pio ade bakaletek. Alatala yagita sarea luk nan balong. 22Karing Alatala yabeang berka lako sarea binatang mabau baranak badadi. Bafirman mo Diri, "Baranak badadi mo ke sanarang peno ke salempo lit, ke balong mo pio-pio sanarang peno pang bao dunia." 23Ano nan kamo liwat ke ano nan ano ade kalima.
24Bafirman mo Alatala, "Balong mo pang bao dunia ada sarea rupa binatang ade telas mara binatang ade yapatik, binatang ngoran ke binatang gamang." Ke dadi mo nan luk. 25Alatala yasanadi sarea rupa binatang ade telas mara binatang gamang, binatang ade yapatik ke sarea rupa binatang ade ngoran pang bao dunia. Alatala yagita sarea luk nan balong.
26Bafirman mo Alatala, "Ya Kusanadi manusia mara Aku,#1:26 Dalam basa Ibrani kata ade yakenang umin Alatala siong kata 'Aku' konang kata 'Kami/Kita'. ke taunan bakawasa pang sasir dunia, ke lako jangan-jangan pang lit, pio-pio pang bao awan, binatang ade yapatik ke binatang-binatang ngoran ke sarea binatang lin ade ada pang bao dunia ta." 27Dadi Alatala yasanadi mo manusia mara Diri, mara Alatala yasanadi mo manusia nan. Sawai salaki taunan yasanadi ling Alatala. 28Alatala yabeang mo berka lako sadua manusia nan, ke bafirman mo Alatala lako taunan, "Baranak badadi mo. Salempo mo dunia ta ke bakawasa mo lako dunia ta. Bakawasa mo lako jangan-jangan pang lit, pio-pio pang bao awan ke sarea binatang ade ngaloa pang bao dunia ta. 29Gita mo! Sarea ade tumung ade ramodeng pang bao tana sasir dunia ta ke sarea puin ade ada bua ade ramodeng, Kubeang lako nene umin dadi me aiʼ nene. 30Ke lako sarea ade bariak, yanansi sarea binatang pang bao dunia, sarea pio pang bao awan, ke sarea binatang ade ngaloa pang bao dunia, Kubeang sarea ade tumung mabau dadi pakakan." Ke dadi mo nan luk. 31Alatala yagita sarea ade ka yasanadi ling Diri nan, tutu-tutu balong benar. Ano nan kamo liwat ke ano nan ano kaenam.
Currently Selected:
Kejadian 1: SMW
Highlight
Share
Copy
Want to have your highlights saved across all your devices? Sign up or sign in
©️2025 The Seed Company
