ଜଅନ୍ 11
11
ଗୁଇ'କୁନୁଂବକ୍ ଆଲାଜାର୍ଲା ଜିସୁଲା ବ'ରଡେନ୍
1 #
ଲୁକ 10:38,39 ଲାଜାର୍ ଡ'ସେକ୍ ମୁଇନ୍ଡା ରେମ ବେତନିଆ ଉଂଗମ୍ବକ୍ ଅବୁଦି ସିକ୍ସେକ୍ ଡୁକୁ । ମାଇବୁରଂ ମରିୟମା ମାରି ମାଇନା ବୁଲୁଁ ମାର୍ତାଲାସା ଆତା ଡୁକୁ । 2#ଜଅନ୍ 12:3କେନ୍ ମରିୟମାଉ ପ୍ରବୁନା ତିକ୍ସୁଂବକ୍ ଅବୁଦି ବାସ୍ନାବାଇ'ନା ସୁ'ଉ କିବ'ସେକ୍ ନିଜର୍ନା ଉକ୍ବକ୍ବୁରଂ ଆଜିସୁନା ତିକ୍ସୁଂ ସୁସୁଡ' ବୁଂଅଁ' । ମାଇନା ବ'ରେ ଲାଜାର୍ଲାଉ ସିକ୍ସେକ୍ ଡୁକୁ । 3ସା' ଗୁତୁନ୍ ଇମ୍ବାୟ ବୁନ୍ଲୁ, “ଅ ପ୍ରବୁ, ନ ଆଜା ଅବୁଦି ଆଲାତ୍ ଡେମ'ତୁନ ମାଇ ଅବୁଦି ସିକ୍ସେକ୍ ଡୁତା” ଡ'ସେକ୍ ସୁଁ ୟା ଡ' ଜିସୁନ୍ବକ୍ କବର୍ ସୁଁସୁପୁଲେଇ ଆମୁଇନ୍ଡା ରେମ ବେନ୍ଟାୟ' ।
4ମାତର୍ ଜିସୁଲା ଗୁତୁନ୍ ତୁମ' ଅଂଅଁ'ସେକ୍ ସୁନ' “ଆଲାଜାର୍ଲା କେନ୍ ସି ବାଂକୁନୁଂ ଆମାଇ ଅଗୁଇ'ପୁଲେଇ ଆରାକ୍ ମାତର୍ ମାପ୍ରୁନା ବପୁ#11:4 ମଇମା; ମାପ୍ରୁ ଅବୁଦି ମୁନା'ରେମ୍ ଡ'ସେକ୍ ଗୁଲାଇର ମାଗ୍ମାକ୍ପୁଲେଇ; ମାପ୍ରୁନା ଇମି ଅ'ନାଉପୁଲେଇ । ଗୁଲାଇର ମାଗ୍ମାକ୍ପୁଲେଇ ଡୁ'ତୁନ୍ ଡେଂଗୁତା । ଡୁ'ତୁନ୍ ଡେଂନା ନିଂ ମାପ୍ରୁନା ଉଁ'ଉଁ ଡ'ସେକ୍ ଗୁଲାଇ କୁନ୍ଡା ଉନୁଂତା#11:4 ଗୁଲାଇ କୁନ୍ଡା ଉନୁଂତା ମଇମା ବାମ୍ତା” ଡ'ସେକ୍ ସୁନ' । 5ଜିସୁଲା ଆମାର୍ତାପା ବୁନ୍ଲୁ ମାରି ଆଲାଜାର୍ଲା ଅବୁଦି ଆଲାତ୍ ଡେମ'କୁ । 6ଆଲାତ୍ ଡେମ'କୁସା'ଏସା ଲାଜାର୍ଲା ସିତା ଡ' ଅଂଅଁ'ସେକ୍ ଜିସୁଲା ଆମ୍ବ' ଡୁକୁ ଆତାଉ ମାର୍ ଦୁଇଦିନ୍ ଡୁକୁକ୍ ଉଇଗା' ।
7ତିର୍ଗି' ଜିସୁଲା ଆମାଇନା ସିସ୍ୟଲେ ସୁନ', “ଡ ନେଇ' ଜିଉଦା ଦେସ୍ବକ୍ ମାର୍ ମୁସ ଉୟାନେଇ' ” ଡ'ସେକ୍ ସୁନ' ।
8ମାତର୍ ସିସ୍ୟଲେ ଆମାଇ ସୁନ' “ଅ ଗୁରୁ, ଜିଉଦିରେମଲେ ଆନ ଆ'ନାଉ ବୁରେ ତିତିପୁଲେଇ ଏତ୍କୁ, ମାରି ମିଞାଂ ନ ଆତା ମାର୍ ମୁସ ଉୟାନେଇ' ଡ'ତୁନଲେଇ?” ଡ'ସେକ୍ ସୁନ' ।
9ସା' ଜିସୁଲା ସୁନ' “ମୁସିଂ ସିମି'ଇ ବାର ଗନ୍ଟା ତାରା' ଆଡୁତାସା' ଇ? ଜାଏସା ମୁଇନ୍ଡା ରେମ ସିମି'ଇ ଉରିଂତ ଡ'ନା ମାଇ ଦେସ୍ଦୁନିଆନା ତାରା' ଜୁଜୁ ଗଂତାସା' କୁରୁଂବକ୍ ଆ'ତିପ୍ରପ୍ତା। 10ମାତର୍ ଜାଏସା ମୁଇନ୍ଡା ତୁମୁଂଗ ଉରିଂତ ଡ'ନା ମାଇ ଜୁଜୁପୁଲେଇ ତାରା' ଆଡୁତାସା' ଅତିପ୍ରପ୍ତା” ଡ'ସେକ୍ ସୁନ' ।
11ଜିସୁଲା କେନ୍ ଗୁଲାଇ ତୁମ' ସୁଁସୁ ଅଡମ'ସେ'ଗା ଆମା'ଏ ମାର୍ ମୁସ ସୁନ' “ନେଇ'ନା ବାଇଲକ୍ ଲାଜାର୍ଲା ଆ'ନା ଲେମ'ଗୁତା । ସା' ମାଇନ୍ବକ୍ ଉଇସେକ୍ ଆମାଇ ନିଂ ଅମୁରାକ୍ତିଂ” ଡ'ସେକ୍ ସୁନ' ।
12ସା' ସିସ୍ୟଲେ, ପ୍ରବୁ ସତଇସା ମାଇ ଲେମ'ଗୁତା ଡ'ନା ମାଇ ବାନି ଡେନ୍ତା ଡ'ସେକ୍ ଆମାଇ ସୁନ' । 13ଜିସୁଲା ଡ'ନା ଲାଜାର୍ଲା ଗୁଇ'କୁନୁଂ ବିସୟଉ ଲେମ'ଗୁତା ଡ'ସେକ୍ ସୁନ'କୁ ମାତର୍ ମାଇନା ସିସ୍ୟଲେ ଲାଜାର୍ଲା ସରଉ ଲେମ'ଗୁତା ଡ'ସେକ୍ ସୁନ'ତା ଡ' ଏତ୍ଗା' ।
14ସା' ଆଇ'ତୁନ୍ବେଲା ଜିସୁଲା ଆମା'ଏ ସୁନ' “ଲାଜାର୍ଲା ସତଇସା ଗୁଇ'ଗୁତା । 15ମାଇ ଗୁଗୁଇ'ବେଲା ନିଂ ଆତା ଆଡୁତିଂସା' ନିଂ ଆପେ ଏତ୍ସେକ୍ ସାର୍ଦା ଡେଂଗୁତିଂ । ମାସା'ଡ'ନା ଆ'ନା ପେ ନିଂବକ୍ ବିସ୍ବାସ୍ ଡେମ୍ତୁପେ ଡ'ସେକ୍ ମାଗ'ତିଂ । ସା' ଡ', ନେଇ' ମାଇନ୍ବକ୍ ଉୟାନେଇ' ” ଡ'ସେକ୍ ସୁନ' ।
16ସା' ଦିଦୁମ ଡ'ସେକ୍ ଇମି ଡୁକୁନୁଂ ତମାଲା ଆବାଇଲକ୍ଡେଇଁଏ ସୁନ' “ଡ ନେଇ'ସା ଉଇସେକ୍ ଜିସୁଲାବୁରଂ ଗୁଇ'ୟାନେଇ'” ଡ'ସେକ୍ ସୁନ' ।
17ସା' ଜିସୁଲା ବେତନିଆ ଉଂଗମ୍ବକ୍ ଡେଲ'ସା' ଆଲାଜାର୍ଲା ରାଇ'ସାଂବକ୍ ରିଂଅଁ'ସେକ୍ ସାର୍ଦିନ୍ ଡେଂଉଇଗା' ଡ'ସେକ୍ ଅଂଅଁ' । 18ବେତନିଆ ଉଂଗମ୍ ଜିରୁସାଲମ୍ ମୁନା'ଉଂଗମ୍କୁରୁଂ ତିନ୍ କିଲିମିଟର୍ସୁଗ ସୁଲୁଂ ଡୁକୁ । 19ସା' ଲାଜାର୍ଲା ଗୁଇଗା'ସା' ଆମାର୍ତାଲା ମାରି ଆମରିୟମା ଅ'ସାର୍ଦାପୁଲେଇ ଅବୁଦି ଜିଉଦିରେମଲେ ମାଇପାନ୍ବକ୍ ସା'କୁ । 20ସା' ଜିସୁଲା ସୁସାପ୍ଡେନ୍ତା ଡ'ସେକ୍ ମାର୍ତାଲା ଅଂଅଁ'ସା' ମାଇ ଆଜିସୁଲା ୱାଇ ଉଇଗା' । ମାତର୍ ମରିୟମା ଡିଂଅଁବକ୍ଉ ଲେଇ'କୁ ।
21ସା' ମାର୍ତାଲା ଆଜିସୁଲା ସୁନ' “ଅ ପ୍ରବୁ, ନ ଆକେ ଡୁକୁନାଏ ନିଂନା ବ'ରେ ଆଗୁଇ'ୟାନା । 22ମାତର୍ ଆ'ନାସା ନ ଆମାପ୍ରୁ ମା ଲୁଡ'ନାଏସା ମାପ୍ରୁ ଆନ ବେ'ତ ଡ'ସେକ୍ ନିଂ ମାଗ'ତିଂ” ଡ'ସେକ୍ ସୁନ' ।
23ସା' ଜିସୁଲା ଆମାଇ “ନନା ବ'ରେ ମାରି ବୁରତା” ଡ'ସେକ୍ ସୁନ' ।
24ସା' ମାର୍ତାଲା ଆମାଇ ସୁନ', “ତିର୍ଗି'ସୁମଂ ଗୁଇ'କୁନୁଂ ରେମଲେ ମୁରାକ୍ବେଲା ମାଇ ମୁରାକ୍ତା ଡ' ନିଂ ମାଗ'ତିଂ” ଡ'ସେକ୍ ସୁନ' ।
25ସା' ଜିସୁଲା ଆମାଇ ସୁନ', “ନିଂଉ ଗୁଇ'କୁନୁଂରେମ୍ବକ୍ ବ'ରରେମ୍ ମାରି ମଡୁନମ୍ ଜିବନ୍ ବିବେ'ରେମ୍ । ଜା ଆନିଂ ବିସ୍ବାସ୍ ଡେମ୍ତ ମାଇ ଗୁଇ'ନାସା ମାରି ବୁରତା । 26ଜାଏସା ମୁଇନ୍ଡା ଆନିଂ ବିସ୍ବାସ୍ ଡେମ'ସେକ୍ ବୁରଗୁତା ଡ'ନା ମାଇ ଇନ୍ଡଇ'ଏସା ଆଗୁଇ'ତା ଡ'ସେକ୍ ନ ବିସ୍ବାସ୍ ଡେମ'ତୁନ ଇ?” ଡ'ସେକ୍ ସୁନ' ।
27ସା' ମାର୍ତାଲା ଆମାଇ ସୁନ' “ଅ'ଅଁ ପ୍ରବୁ, ଦେସ୍ଦୁନିଆବକ୍ ଜା ସୁସାପ୍ନା ଡୁକୁ ନଉ ଗୁତୁନ୍ ମାପ୍ରୁନା ଉଁ'ଉଁ କିରିସ୍ଟଲା ଡ'ସେକ୍ ନିଂ ବିସ୍ବାସ୍ ଡେମ'ତିଂ” ଡ'ସେକ୍ ସୁନ' ।
ଜିସୁଲା ଉକ୍ଡେନ୍
28ଡି'କେନ୍ ସୁନ'ସେକ୍ ମାଇ ଉଇସେକ୍ ଆମାଇନା ବୁଲୁଁ ଆମରିୟମା କଲେ ୱାୟ'ସେକ୍ ସୁନ' “ଗୁରୁଲା ଆକେ ସୁସାପ୍ଡେନ୍, ଆନ ମାଇ ତୁର'ତା” ଡ'ସେକ୍ ସୁନ' । 29ସା' ମରିୟମା କେନା ଅଂଅଁ'ସେକ୍ ସେଟ୍ଟ' ଜିସୁନ୍ବକ୍ ଉଇଗା' । 30ଆଇ'ତୁନ୍ବେଲା ଜିସୁଲା ଉଂଗମ୍ ବିତ୍ରେ ଗୁଗାଇ ଅରଇ' ଡେଂକୁ । ମାତର୍ ମାର୍ତାଲା ଆମ୍ବ' ଆମାଇ ଜୁଲ'ବୁଂଅଁ' ଆତାଉ ମାଇ ଡୁକୁ । 31ଆମରିୟମା ଅ'ସାର୍ଦାଲ'ସେକ୍ ମାଇବୁରଂ ଡିଂଅଁବକ୍ ଲେଇ'କୁନୁଂ ଜିଉଦିରେମଲେ ମରିୟମା ସେଟ୍ଟ' ତଗ୍ଡାଗ୍ସେକ୍ ବାଇରି ତୁତୁର୍ଡେଂକୁନୁଂ ଜୁଲ'ସେକ୍ ମାଇ ରାଇ'ସାଂବକ୍ବକ୍ ଉକ୍ସେ' ଉଇଡେନ୍ତା ଡେ ମାଡେ ଡ' ଏତ୍ସେକ୍ ମା'ଏ ଆମାଇ ତେଂଗି' ତୁର୍ଗା' ।
32ସା' ଜିସୁଲା ଆମ୍ବ' ଡୁକୁ ଆତା ମରିୟମା ଉଇସେକ୍ ଆଜିସୁଲା ଜୁଲ'ସେକ୍ ଆମାଇନା ତିକ୍ସୁଂ ସୁନ୍ଡ୍ରକ୍ସେକ୍, “ଅ ପ୍ରବୁ, ନ ଆକେ ଡୁକୁନାଏ ନିଂନା ବ'ରେ ଆଗୁଇ'ୟାନା” ଡ'ସେକ୍ ସୁନ' ।
33ମରିୟମା ଉ'କୁନୁଂ ମାରି ମାଇବୁରଂ ସା'କୁନୁଂ ଜିଉଦିରେମଲେସା ଉ'କୁନୁଂ ଜୁଲ'ସା' ଜିସୁନା ଜିବନ୍ବକ୍ ଅବୁଦି କସ୍ଟ ସା'ଗା' । 34ସା' “ଆମାଇ ଆମ୍ବ' ଆତିଲ'ତୁପେ?” ଡ'ସେକ୍ ଅ'ଗଁସ୍ଲା'ଗା' । ସା',
“ପ୍ରବୁ, ଲ ସାକ୍ସେକ୍ ଜୁ” ଡ'ସେକ୍ ମା'ଏ ସୁନ' ।
35ଜିସୁଲା ଉ'ଗା' ।
36ସା' ଜିଉଦିରେମଲେ ଗୁତୁନ୍ ଜୁଲ'ସେକ୍, “ଜୁ, ମାଇ ଆଲାଜାର୍ଲା ଆ'ଇ ଆଲାତ୍ ଡେମ'କୁ” ଡ'ସେକ୍ ସୁନ' ।
37ମାତର୍ ମା'ଏନ୍ ବିତ୍ରେ ଏନ୍ତୁକ୍ର ସୁନ' “କେନ୍ ଜିସୁଲା କାନାରେମ୍ନା ମ' ବାନି ଡେମ'ବୁଂଅଁ' ଡ'ନା ମାର୍ ମାଇ ଆଲାଜାର୍ଲା ଗୁଗୁଇ'ବେଲା ମାସା' ବଲ୍ ଆଡେମ୍ତଲେଇ” ଡ'ସେକ୍ ସୁନ' ।
ଆଲାଜ୍ର୍ଲା ଗୁଇ'କୁନୁଂକୁରୁଂ ବ'ରଡେନ୍
38ଜିସୁନା ଜିବନ୍ବକ୍ ମାରି ବିର୍ବିରାଡେଂସେକ୍ ମାଇ ଆଲାଜାର୍ଲା ଆମ୍ବ' ଆତିଲ'ବୁଂଅଁ' ଆତା ସା'ଗା' । ଆଲାଜାର୍ଲା ମୁଇ ଲାଗ୍ଲାଗ୍ ବିତ୍ରେ ବୁଂଅଁ'ସେକ୍ ତୁମ'ଲାଗ୍ଲାଗ୍ବକ୍ ତୁକୁଂବେର୍ବୁରଂ ଅନ୍ତୁଡ' ବୁଂଅଁ'କୁ । 39ସା' “କେନ୍ ବୁରେ ଅ'କୁର'ସୁଂ” ଡ'ସେକ୍ ଜିସୁଲା ସୁନ'ସା'
ଗୁଇ'କୁନୁଂନା ତୁନା ମାର୍ତାଲା ଆମାଇ ସୁନ', “ଅ ପ୍ରବୁ, ଆମାଇ ଆତା ବୁଂଅଁ'ସେକ୍ ସାର୍ଦିନ୍ ଡେଂଗା'ସା' ଆ'ନା ଅବୁଦି ଡୁଗ'ତାବେ” ଡ'ସେକ୍ ସୁନ' ।
40ସା' ଜିସୁଲା ଆମାଇ, “ନ ବିସ୍ବାସ୍ ଡେମ'ନା ଡ'ନା ମାପ୍ରୁନା ମଇମା ଜୁଜୁ ଗଂତୁନ ଡ'ସେକ୍ ନିଂ ଆନ ସୁନ' ଆବୁଂତିଂ ଇ?” ଡ'ସେକ୍ ସୁନ' ।
41ସା' ମା'ଏ ବୁରେ ଅ'କୁର'ସୁଂଅଁ' । ମାରି ଜିସୁଲା ବାଗ୍ବକ୍ ତାଂଡାୟ'ସେକ୍ ସୁନ' “ଅ ବା, ନ ନିଂନା ପାର୍ତନା ଅଂଅଁ'ନସା' ଆନ ସୁନ୍ଡ୍ରତିଂ । 42ମାରି ନ ଇସାଉ ନିଂନା ପାର୍ତନା ଅଂଅଁ'ତୁନ ଡ'ସେକ୍ ନିଂ ମାଗ'ତିଂ । ମାତର୍ ନ ଆନିଂ ବେନ୍ଟାୟ'ତୁନ ଡ'ସେକ୍ ଆକେ ତଂକୁନୁଂ ରେମଲେ ବିସ୍ବାସ୍ ଡେମେଇ' ଡ'ସେକ୍ ମା'ଏପୁଲେଇସା' ନିଂ କେନା ଆନ ସୁନ'ତିଂ” ଡ'ସେକ୍ ସୁନ' ।
43ଡି'କେନ୍ ସୁନ'ସେକ୍ ମାଇ “ଅ ଲାଜାର୍, ନ ବାରେ ତୁରା ଲ” ଡ' ଡକ୍ତି'ତା ୱାୟ'ସେକ୍ ସୁନ' । 44ସା' ଗୁଇ'କୁନୁଂଆଁ ବାରେ ତୁର୍ଗା' । ମାଇନା ତିତି ତିକ୍ସୁଂବକ୍ ରାଇ'ସାଂ ଇନ୍ଡ୍ରିଂନା ଇମ୍ପ'ବୁରଂ ଅର'କୁନୁଂ ମାରି ମାଇନା ସାର୍ମ'ବକ୍ ଜାଗଲିସା ତୁଲ'କୁନୁଂବାଇ'ଉ ତୁର୍ଗା' ।
ସା' ଜିସୁଲା, “ଆମାଇ ଅର'କୁନୁଂ ଇମ୍ପ' ଗୁଲାଇ ତଗ'ସୁଂ, ମାଇ ଉରିଂଏଇ'” ଡ'ସେକ୍ ସୁନ' ।
ମୁନା'ରେମେ ଆଜିସୁଲା ଅଗୁଇ'ନେଇ' ଡ'ସେକ୍ ଅଇଁଡେନ୍
(ମାତିଉ 26:1–5; ମାର୍କ 14:1–2; ଲୁକ 22:1–2)
45ସା' ଆତା ମରିୟମ୍ବକ୍ ସା'କୁନୁଂ ଜିଉଦିରେମଲେନ୍ ବିତ୍ରେ ଅବୁଦିର ଜିସୁନା କାମ୍ ଗୁଲାଇ ଜୁଲ'ସେକ୍ ଆଜିସୁଲା ବିସ୍ବାସ୍ ଡେମ' । 46ମାତର୍ ମା'ଏନ୍ ବିତ୍ରେ ଏନ୍ତୁକ୍ର ପାରୁସିଦଲ୍ନା ରେମଲେନ୍ବକ୍ ଉଇସେକ୍ ଜିସୁଲା ମାମା ଡେମ'ବୁଂଅଁ' ଗୁତୁନ୍ ଗୁଲାଇ ଆମା'ଏ ସୁନ' । 47ସା' ମୁନା'ପୁଜାରିଲେ ମାରି ପାରୁସିଦଲ୍ନା ରେମଲେ ଅଇଁନେଇ' ଡ'ସେକ୍ ମୁନ୍ଡକ୍ବକ୍ ରୁନ୍ଗା' ।
ରୁନ୍ସେକ୍ “କେନ୍ ରେମ ଅବୁଦି କାବାକାବା ଡିନ୍ଡେମ୍ବାଇ' କାମ୍ ଗୁଲାଇ ଡେମ'ତା, ସା' ନେଇ' ମା ଡେମ'ନା ଡେନ୍ତା? 48ମାରି ଆକୁନ୍ ଡି'କେନାଉ ଅନ୍ତୁର' ବେ'ତୁନେଇ' ଡ'ନା ଗୁଲାଇ ରେମଲେ ମାଇନ୍ବକ୍ଉ ବିସ୍ବାସ୍ ଡେମ୍ତ । ମାରି ରମିୟ ରେମଲେ ସାକ୍ସେକ୍ ନେଇ'ନା କେନ୍ ମନ୍ଦିର୍ ମାରି ଆନେଇ'ନା ରେମଲେସା ନାସାୟ'ସୁଂତ” ଡ'ସେକ୍ ଅଇଁୟ' ।
49ମାତର୍ କୟାପାଲା ଡ'ସେକ୍ ମୁଇନ୍ଡା ମା'ଏନ୍ ବିତ୍ରେ ଡୁକୁ । ମାଇ ଗୁତୁନ୍ ବରସ୍ନା ଗୁଲାଇ ମୁନା'ପୁଜାରିଲେନ୍ ବାଗ୍ବକ୍ ଡୁକୁନୁଂ ମୁନା'ପୁଜାରି ଏଗ୍ସେକ୍ ଡୁକୁ । ମାଇ ଆମା'ଏ, ସୁନ' “ପେ ମା ସାମ୍ ଅଇଁୟ'ତୁପେ ୟାଂ, ପେ ଇ'କିସା ଆମାକ୍ତୁପେ ଇ! 50ନେଇ'ନା ଜାତିନା ଗୁଲାଇ ରେମଲେ ଗୁଗୁଇ' ବାଦୁଲ୍ ଗୁଲାଇରପୁଲେଇ ମୁଇନ୍ଡା ଗୁଇ'ନା ପେପୁଲେଇ ବଲ୍ ଡ'ସେକ୍ ପେ ଇ'କିସା ଆଏତ୍ତୁପେ ଇ?” ଡ'ସେକ୍ ସୁନ' ।
51କୟାପାଲା କେନା ନିଜର୍ନା ଜିବନ୍କୁରୁଂ ସୁନ' ଆଡୁତା, ମାତର୍ ମାପ୍ରୁ ସୁନ'କୁନୁଂ ଅଂଅଁ'ସେକ୍ ଆମା'ଏ ସୁନ'କୁ । ମାଇ ଗୁତୁନ୍ ବରସ୍ନା ଗୁଲାଇ ମୁନା'ପୁଜାରିଲେନ୍ ବାଗ୍ବକ୍ ଡୁକୁନୁଂ ମୁନା'ପୁଜାରି ଡେଂସେକ୍ ଡୁକୁସା' ଜିସୁଲା ତିର୍ଗି' ଜିଉଦିରେମଲେପୁଲେଇ ମି ଗୁଇ'ତା, 52ମାରି ଜିଉଦିରେମଲେପୁଲେଇଉ ଡ'ସେକ୍ସା ଆରାକ୍ ମାତର୍ ମାପ୍ରୁନା ରେମଲେ ବିବି'ଲୁଲାଇଁସେକ୍ ଆମ୍ବ' ଆମ୍ବ' ଡୁତା ଆମା'ଏ ଆଗୁଲାଇର ମୁନ୍ଡକ୍ ରୁନ୍ଡାଇବାର୍ପୁଲେଇସା ମାଇ ଗୁଇ'ତା ଡ'ସେ'ଗାଉ ସୁନ' । 53ସା' ଉନ୍ତ୍ବାଂସା' ଜିଉଦିରେମଲେ ଆଜିସୁଲା ଅଗୁଇ'ପୁଲେଇ ଅଇଁୟ' ।
54ଗୁତୁନ୍ସା' ଜିସୁଲା ଜିଉଦିରେମଲେନ୍ ବିତ୍ରେ ମାର୍ ଅସୁଇ'ଅସୁଇ'ସେକ୍ ଆବୁଲ୍ ଆସାଲ୍ତ । ମାତର୍ ମାଇ ଉନ୍ତ୍କୁରୁଂ ଡୁଂସେକ୍ ଟାଂରାବାଟାପାଦା ଉନ୍ତୁ' ଡୁକୁନୁଂ ଏପ୍ରୟିମ୍ ଡ'ସେକ୍ ମୁଇ ଉଂଗମ୍ବକ୍ ଉଇଗା' । ଆତା ମାଇ ମାଇନା ସିସ୍ୟଲେବୁରଂ ବାସାକ୍ସେକ୍ ଡୁକୁ ।
55ମାରି ଜିଉଦିରେମଲେନା ନିସ୍ତାର୍ ପରବ୍ନା ବେଲା ଉନ୍ତୁ' ସା'ଗା' । ସା' ପରବ୍ନା ଆ'ଇଦିନ୍ ସିଁସେଇଁ ପାଲ୍ପାଲ୍ ଉଂଗମ୍କୁରୁଂ ଅବୁଦି ରେମଲେ ଜିରୁସାଲମ୍ ମୁନା'ଉଂଗମ୍ବକ୍ ଉଇଆର୍ଗା' । ମାସା'ଡ'ନା ମା'ଏନ୍ ନିୟମ୍ବକ୍ ଡୁକୁନୁଂସୁଗ ନିଜେନିଜେ ପବିତ୍ର ଡିନ୍ଡେମ୍ପୁଲେଇ ଡ'ସେକ୍ ଆ'ଇଦିନ୍ ସିଁସେଇଁ ମା'ଏ ଉଇଗା' । 56ଆତା ଜିଉଦିରେମଲେ ଆଜିସୁଲା ତୁର'ତୁର'ସେକ୍ ମନ୍ଦିର୍ବକ୍ ତଂକୁ । ତଂସେକ୍ ପେ ମା ଏତ୍ଗୁତୁପେ ମାଇ ପରବ୍ବକ୍ ସାପ୍ତା କି ଆରାକ୍? ଡ'ସେକ୍ ମା'ଏ ମା'ଏନ୍ ବିତ୍ରେ ଅଇଁୟ' । 57ମାତର୍ ମୁନା'ପୁଜାରିଲେ ମାରି ପାରୁସିଦଲ୍ନା ରେମଲେ ଆଜିସୁଲା ସପ୍ନେଇ' ଡ'ସେକ୍ ମାଇ ଆମ୍ବ' ଡୁତା ଡ'ସେକ୍ ଜାଏସା ମାଗ'ନା ଆନେଇ ସୁଁ ଡ'ସେକ୍ ଆଗୁଲାଇର ସୁନ'ବୁଂଅଁ' ।
Currently Selected:
ଜଅନ୍ 11: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
