ଲୁକ 23
23
ଆଜିସୁଲା ପିଲାତନ୍ବକ୍ ଇନ୍ଡ୍ରିଂଡେନ୍
(ମାତିଉ 27:1–2,11–14; ମାର୍କ 15:1–5; ଜଅନ୍ 18:28–38)
1ତିର୍ଗି' ଆତା ଲେଇ'କୁନୁଂ ରେମଲେ ଗୁଲାଇର ତକ୍ଡାକ୍ସେକ୍ ଆଜିସୁଲା ପିଲାତନ୍ବକ୍ ରିଂଅଁ' ଉଇଗା' । 2ମାରି ମା'ଏ ଜିସୁନା ବିସୟରେ ନିନ୍ଦାଲ'ସେକ୍ ସୁଁସୁ ମୁଲାୟ' । ମା'ଏ ସୁନ', “ନିଂଉ #23:2 ମାପ୍ରୁ ସିରେଲ'ସେକ୍ ବେନ୍ଟାୟ'କୁନୁଂ ମୁଇନ୍ଡାକିରିସ୍ଟ ଡ'କୁନୁଂ ରାଜା ଡ'ସେକ୍ କୁନା ସୁନ'ତା । ମାରି ଆନେ'ନ୍ ରେମଲେ ଅଲିରାକ୍ବାଇ' ଅମାକ୍ଡେଂକୁନୁଂ ମାରି ଆମୁନା' ରାଜା ଆକାଇସର୍ଲା ସିସ୍ତୁ ଆବେଡ' ଡ'ସେକ୍ ଅମାଗ'କୁନୁଂ ନେଇ ଅଂଅଁ'ନେଇ” ଡ'ସେକ୍ ସୁନ' ।
3ସା' ପିଲାତଲା ଆମାଇ “ନ ଜିଉଦିରେମଲେନା ରାଜା ଇ?” ଡ'ସେକ୍ ଅ'ଗଁସ୍ଲା'ଗା'ସା'
ଜିସୁଲା ସୁନ' “ଅଁ'ଅଁ, ନ ସୁନ'କୁନୁଂସୁଗଉ” ଡ'ସେକ୍ ସୁନ' ।
4ସା' ପିଲାତଲା ଆମୁନା'ପୁଜାରିଲେ ମାରି ଆରେମଲେ ସୁନ' “କେନ୍ ରେମ ମାସା ବୁଲ୍କାମ୍ ଡେମ'କୁନୁଂ ନିଂ ଆଜୁତିଂ” ଡ'ସେକ୍ ସୁନ' ।
5ମାତର୍ ମା'ଏ ବିତ୍ବିତା ସୁନ' “ମାଇ ଜିଉଦା ଦେସ୍ ଗୁଲାଇ କୁନ୍ଡା ବୁଲ୍ଲ'ସେକ୍ ରେମଲେ ଇନ୍ଡ୍ରିମ୍ନା ବୁଦି ଅମାଗ'ତା । ମାଇ ଡି'କେନା ଗାଲିଲି ଜିଲାକୁରୁଂ ମୁଲାୟ'ସେକ୍ ଆ'ନା ଆଇ'କେନ୍ପନ୍ତେକ୍ସା ସା'ଗୁତା” ଡ'ସେକ୍ ସୁନ' ।
ପିଲାତଲା ଆଜିସୁଲା ଏରଦ୍ ରାଜାନ୍ବକ୍ ବେନ୍ଟାଇବାର୍ଡେନ୍
6ଗୁତୁନ୍ ଅଂଅଁ'ସେ'ଗା କୁନ୍ ଗାଲିଲିନା ରେମ କି ଡ'ସେକ୍ ପିଲାତଲା ଅ'ଗଁସ୍ଲା'ଗା' । 7ସା' ଜିସୁଲା ଏରଦ୍ ରାଜାନା ଅଦିକାର୍ବକ୍ ଡୁକୁନୁଂ ରେମ ଡ'ସେକ୍ ପିଲାତଲା ମାଗ'ସେକ୍ ଆଜିସୁଲା ଏରଦ୍ ରାଜାନ୍ବକ୍ ବେନ୍ଟାୟ'ବେଡ' । ଆଇ'ତୁନ୍ବେଲା ଏରଦ୍ ରାଜା ଜିରୁସାଲମ୍ ମୁନା'ଉଂଗମ୍ବକ୍ ସାକ୍ସେକ୍ ଡୁକୁ ।
8ଆଜିସୁଲା ଜୁଲ'ସେକ୍ ଏରଦ୍ଲା ଅବୁଦି ସାର୍ଦାକୁସି ଡେଂଗା' ମାସା'ଡ'ନା ମାଇ ଜିସୁନା ବିସୟ ଇନ୍ଡଇ'ବାଂସା' ଅଂଅଁ' ଉନ୍ତ୍ବାଂସା' ଆମାଇ ଜୁଜୁପୁଲେଇ ଅବୁଦି ମୁନ୍ ଡେଂସେକ୍ ଡୁକୁ ମାରି ମାଇ କାବାକାବା ଡିନ୍ଡେମ୍ବାଇ' ମାମା ସିନ ଅସୁୟ'ନା ଜୁତିଂ ଡ'ସେକ୍ ଆସ୍ସେକ୍ ଡୁକୁ । 9ମାଇ ଆଜିସୁଲା ଅବୁଦି ଅ'ଗଁସ୍ଲା'ଗା' ମାତର୍ ଜିସୁଲା ଆମାଇ ମା ଡ'ସେକ୍ସା ଆସୁନ୍ତ । 10ମୁନା'ପୁଜାରିଲେ ମାରି ମସାଲା ବେଡ'କୁନୁଂ ନିୟମ୍ ଅମାକ୍ରେମ୍ ଆତା ଅବୁଦି ଡକ୍ତି'ତା ଆଜିସୁଲା ଅବୁଦି ନିନ୍ଦାଲ'ସେକ୍ ତଂକୁଗା' । 11ମାରି ଏରଦ୍ଲା ମାରି ମାଇନା ସଇନିକଲେ ଆଜିସୁଲା ଅବୁଦି ଗୁମୁୟ' ଅ'କିୟାଲିକ୍ସେ'ଗା ରାଜାଲେ ଅଲୁକ୍ନା ମଇନାବାଇ' ଜଲଂଗି ସକା ଅ'ଲୁଗ'ସେକ୍ ପିଲାତନ୍ବକ୍ ମାରି ବେନ୍ଟାୟ' ବେଡ' । 12ଏରଦ୍ଲା ମାରି ପିଲାତଲା ମୁଲ୍ ଅବୁଦି ଦାଇ ଡେଂସେକ୍ ଡୁକୁ ମାତର୍ ଉନ୍ତ୍ବାଂସା' ମାଇପା ଇମ୍ବାୟ ମଇତର୍ ଅ'ତୁଗା' ।
ଆଜିସୁଲା ଅଗୁଇ' ଡ'ସେକ୍ ପିଲାତଲା ସୁଁସୁଡେନ୍
(ମାତିଉ 27:15–26; ମାର୍କ 15:6–15; ଜଅନ୍ 18:39—19:16)
13ଉନ୍ତ୍କୁରୁଂ ପିଲାତଲା ଆମୁନା'ପୁଜାରିଲେ ଆଜିଉଦିରେମଲେନା ମୁନା'ରେମେ ମାରି ଆଗୁଲାଇ ରେମଲେ ମୁନ୍ଡକ୍ବକ୍ ୱାୟ' । 14ୱାୟ'ସେ'ଗା ଆମା'ଏ ସୁନ' “ମାଇ ସର୍କାର୍ ରେମଲେବୁରଂ ଇନ୍ଡ୍ରିମ୍ପୁଲେଇ ଆରେମଲେ ଅମାଗ'ତା ଡ'ସେକ୍ ଆଜିସୁଲା ପେ ନିଂବକ୍ ୱାୟ' ରିଂଅଁ'ତୁପେ । ମାତର୍ ପେ ଗୁଲାଇର ଡୁକୁନୁଂବକ୍ ନିଂ ଆମାଇ ଅ'ଗଁସ୍ଲାଗ୍ନିଂସା' ପେ ନିନ୍ଦାଲ'ସେକ୍ ସୁନ'କୁନୁଂସୁଗ ମାଏସା ବୁଲ୍କାମ୍ ମାଇ ଡେମ' ଆଡୁତା ଡ'ସେକ୍ ନିଂ ମାଗ'ତିଂ । 15ମାରି ଏରଦ୍ଲାସା ଜିସୁଲା ବୁଲ୍କାମ୍ ଡେମ' ଆଡୁତା ଡ'ସେକ୍ ମାଗ'ସା'ଉ ଆକୁନା ନେ'ନ୍ବକ୍ ମାରି ବେନ୍ଟାୟ'ତା । ଜୁ, ଆମାଇ ଅଗୁଇ'ସୁଗବାଇ' ମାଇ ମାଏସା ବୁଲ୍କାମ୍ ଡେମ' ଆଡୁତା । 16ସା' ଆମାଇ ନିଂ ଅବୁଗ'ଅତିଲ'ସେ'ଗା ଅନ୍ତୁର'ବେ'ତିଂ ।” 17#23:17 (ଇସାଉ ଗୁତୁନ୍ ନିସ୍ତାର୍ ପରବ୍ବକ୍ ଆବନ୍ଦିରେମ୍ ଆମୁଇନ୍ଡା ଅ'ତୁର୍ନା ନିୟମ୍ ବୁଂଅଁ'କୁ ) । କେନ୍ ପଦ ଏନ୍ତୁକ୍ ଉଲାକ୍ବକ୍ ଆଡୁତା ।
18ସା' ମା'ଏ ଗୁଲାଇର ମିସ୍ସେକ୍ “ଆକୁନା ଅଗୁୟ'ସୁଂ! ନେଇପୁଲେଇ ଆବାରବ୍ବାଲା ଅ'ତୁର' ବେ'” ଡ'ସେକ୍ କିରକ୍ସେ'ଗା ସୁନ' । 19(ବାରବ୍ବାଲା ଡ'ନା ମୁନା'ଉଂଗମ୍ବକ୍ ସର୍କାର୍ ରେମଲେବୁରଂ ରିମ'ସେକ୍ ଆରେମଲେ ଅଡାବ'ବୁଂଅଁ'ସା' ଆମାଇ ବନ୍ଦିବକ୍ ସୁରୁଂଅଁ' ବୁଂଅଁ' ) ।
20ଆଜିସୁଲା ଅ'ତୁର୍ପୁଲେଇ ପିଲାତଲା ମୁନ୍ ଡେଂସେକ୍ ରେମଲେବୁରଂ ମାରି ଅଇଁୟ' । 21ମାତର୍ ମା'ଏ “ଆମାଇ #23:21 ମୁଇ ରାଂଡିଗ'କୁନୁଂ କନ୍ଡ୍ଲାସଂବକ୍ ଉର'ନ'ସେ'ଗା ତିତି ତିକ୍ସୁଂ ଟାନ୍ଲ'ସେ'ଗା ଲୁଆବୁରଂ ତାଂଅଁ'ସେ'ଗା ଅଗୁଇ', ଆମାଇ ମୁଇ ରାଂଡିଗ'କୁନୁଂ କନ୍ଡ୍ଲାସଂବକ୍ ଉର'ନ'ସେ'ଗା ତିତି ତିକ୍ସୁଂ ଟାନ୍ଲ'ସେ'ଗା ଲୁଆବୁରଂ ତାଂଅଁ'ସେ'ଗା ଅଗୁଇ'କୁର୍ସବକ୍ ଅଡାୟ' ଅଗୁଇ'! ଆମାଇ କୁର୍ସବକ୍ ଅଡାୟ' ଅଗୁଇ'!” ଡ'ସେକ୍ ଗୁଲାଇର ଡକ୍ତି'ତା କିରକ୍ସେ'ଗା ମାର୍ମାର୍ ସୁନ' ।
22ମାରି ମାଇ ଆମା'ଏ ତିନ୍ତର୍ବକ୍ ସୁନ' “ମାସା', ମାଇ ମା ବୁଲ୍ ଡେମ'ତାସା' ଇ? ଆମାଇ ଅଗୁଇ'ସୁଗବାଇ' ଡନ୍ଡ୍ ବିବେ'ପୁଲେଇ ମାଇ ମାଏସା ବୁଲ୍ ଡେମ'କୁନୁଂ ନିଂ ମାଇନ୍ବକ୍ ଜୁଲ' ଆଡୁତିଂ । ସା' ନିଂ ଆମାଇ ସରଉ ଅବୁଗ'ସେ'ଗା ଅନ୍ତୁର'ବେ'ତିଂ” ଡ'ସେକ୍ ସୁନ' ।
23ମାତର୍ ମା'ଏ ମାରି ଅବୁଦି ଡକ୍ତି'ତା କିରକ୍ସେ'ଗା ଆମାଇ କୁର୍ସବକ୍ ଅଗୁଇ' ଡୁତା ଡ'ସେକ୍ ଅବୁଦି ଜବର୍ଦସ୍ ଡେମ' । ସା' ମା'ଏଉ ଜିନ୍ଗର୍ ଜିନ୍ଗା' । 24ସା' ରେମଲେ ସୁନ'କୁନୁଂସୁଗଉ ଡେମେଇ' ଡ'ସେକ୍ ଆଜିସୁଲା ଅଗୁଇ'ପୁଲେଇ ପିଲାତଲା ରାଜି ଡେଂଗା' । 25ମାତର୍ ବାରବ୍ବାଲା ଡ'କୁନୁଂ ମୁଇନ୍ଡା ରିମ'ସେକ୍ ଆରେମଲେ ଅଡାବ'ସେକ୍ ବନ୍ଦିବକ୍ ଉଇକୁ । ଆମାଇ ଅ'ତୁର' ବେ' ଡ'ସେକ୍ ରେମଲେ ବିତ୍ବିତା ସୁନ'ସା' ମା'ଏନ୍ ମୁନ୍ସୁଗ ପିଲାତଲା ଆମାଇ ଅ'ତୁର'ବେଡ' ମାରି ଆଜିସୁଲା ମା'ଏନ୍ ମୁନ୍ସୁଗ ଡିନ୍ଡେମ୍ପୁଲେଇ ମା'ଏନ୍ ତିତିବକ୍ ବେଡ' ।
ଆଜିସୁଲା କୁର୍ସବକ୍ ଅଗୁଇ'ଡେନ୍
(ମାତିଉ 27:32–44; ମାର୍କ 15:21–32; ଜଅନ୍ 19:17–27)
26ସଇନିକଲେ ଆମାଇ ଅଗୁଇ'ପୁଲେଇ ରିଂଅଁ' ଉଇଡେଂକୁନୁଂବେଲା କୁରିନିୟ ଉଂଗମ୍ନା ସିମନ୍ ଡ'ସେକ୍ ମୁଇନ୍ଡା ରେମ ବାଇରିକୁରୁଂ ସୁସାପ୍ଡେଂକୁନୁଂ ମା'ଏ ଜୁଲ' । ଜୁଲ'ସେକ୍ ଆମାଇ ସବ'ସେକ୍ ଆଜିସୁଲା ଅଗୁଇ'ପୁଲେଇ ରିଂଅଁ' ଉଇଡେଂକୁନୁଂ କୁର୍ସ ଆମାଇ ଜବର୍ଦସ୍ ଡେମ' ଅ'ଡୁନ'ସେକ୍ ଆଜିସୁଲା ତେଂଗି'ତେଂଗି' ଉଇପୁଲେଇ ବେନ୍ଟାୟ' । 27ଆଜିସୁଲା ରିଂଅଁ' ଉଇବେଲା ଅବୁଦି ରେମଲେ ଆମାଇ ତେଂଗି'ତେଂଗି' ଉଇଗା' । ମାରି ଏନ୍ତୁକ୍ ସେଲାନେସା ଜିସୁଲାପୁଲେଇ ଅବୁଦି ସିନ୍ତାଲ'ରୁନ୍ତାଲ'ସେକ୍ ଉକ୍ସେ' ୱାଇସେକ୍ସେକ୍ ଆମାଇ ତେଂଗି' ଉଇଡେଂକୁ । 28ମାତର୍ ଜିସୁଲା ମା'ଏନ୍କୁରୁଂ ଆନ୍ଡେଇଁକିକ୍ସେକ୍ ସୁନ' “ଅ ଜିରୁସାଲମ୍ ଉଂଗମ୍ନା ସେଲାନେ, ନିଂପୁଲେଇ ପେ ଆଉଗା', ପେ ନିଜର୍ ନିଜର୍ପୁଲେଇ ମାରି ନିଜର୍ ନିଜର୍ନା ଉଁ'ଉଁନେପୁଲେଇ ଉ'ଗା' । 29ମାସା'ଡ'ନା ‘ଇମ୍ବ'ନୁଂଏଁ ବାନ୍ଜି ମାରି ଇମ୍ବ'ନୁଂଏଁ ଇନ୍ଡଇ'ଏସା ଅଗ' ଆଡୁତା କି ଅବୁସେବ'ସା ଆଡୁତା ଡୁ'ତୁନ୍ବାଇ' ରେମଲେବକ୍ ମା'ଏ କପାଲ୍ବାଇ' ରେମ’ ଡ'ସେକ୍ ରେମଲେ ସୁଁସୁନା ବେଲା ସୁସାପ୍ଡେନ୍ତା । 30#ଅସୁୟ'କୁନୁଂ 6:16ଆଇ'ତୁନ୍ବେଲା,
ରେମଲେ ଆମୁନା' କୁନ୍ଡାଲେ, ‘ନେନ୍ ବାଗ୍ବକ୍ ଲକ୍ବେ'’
ମାରି ଡାଉଡାଉବାଇ' କୁନ୍ଡାଲେବକ୍ ‘ନେନ୍ ବାଗ୍ବକ୍ ଡାଲୁକ୍ବେ'’ ଡ'ସେକ୍ ସୁନ୍ତ ।
31ମାସା'ଡ'ନା ବୁରବାଇ' ସୁଲପ୍ବକ୍ ମା'ଏ ଆଇ'କେନ୍ କସ୍ଟ ବେଡ'ତା ଡ'ନା ଗୁଇ'କୁନୁଂ ସୁଲପ୍ବକ୍ ମା'ଏ ଅବୁଦି କସ୍ଟ ଆବେ'ତ ଇ?” ଡ'ସେକ୍ ସୁନ' ।
32ଜିସୁଲାବୁରଂ ଅଗୁଇ'ପୁଲେଇ ଆଇମ୍ବାୟ ଅଲିରାକ୍ବାଇ' କାମ୍ ଡେମ'କୁନୁଂ ରେମ୍ବକ୍ସା ରିଂଅଁ' ଉଇଗା' । 33ସା' ମା'ଏ କୁରେଇଁକୁଇଁବ'ବ୍ ଡ'ସେକ୍ ମୁଇ ଜାଗାବକ୍ ଡେଲ'ସେକ୍ ଆତା ଆଜିସୁଲା ମାରି ଆତୁନ୍ ଇମ୍ବାୟ ଅଲିରାକ୍ବାଇ' କାମ୍ ଡେମ'କୁନୁଂ ରେମ୍ବକ୍ସା ଜିସୁନା ସୁସୁମ୍ତିକୁରୁଂ ଆମୁଇନ୍ଡା ମାରି ବାସାକ୍ତିକୁରୁଂ ଆମୁଇନ୍ଡା କୁର୍ସବକ୍ ଅ'ତନ । 34ଜିସୁଲା ଆଇ'ତୁନ୍ବେଲା ସୁନ' “ଅ ବା, ମା'ଏ ମା ଡିନ୍ଡେମ୍ ଡେନ୍ତା ଡ'ସେକ୍ ଆମାକ୍ତସା' ଆମା'ଏ କେମା ଡେମ୍” ଡ'ସେକ୍ ସୁନ' । ମାରି ମା'ଏ ଜିସୁନା ସକା ଜା ରିଂତା ଡ'ସେକ୍ ପାନ୍ଜି ବୁଂଅଁ' ଜୁଲ' ।
35ରେମଲେ ତଂସେକ୍ ଜୁଲ'କୁ ମାତର୍ ମୁନା'ରେମେ ଆମାଇ ପାସାର'ସେକ୍ ସୁନ' “ମାଇ ଆପାଲ୍ ରେମଲେ ରକ୍ୟା ଡେମ'କୁ କି ଆରାକ୍? ସା' ମାଇ ମାପ୍ରୁ ସିରେଲ'ସେକ୍ ବେନ୍ଟାୟ'ସା' ସା'କୁନୁଂ କିରିସ୍ଟ ଡ'ନା ଆ'ନା ମାଇ ନିଜେ ରକ୍ୟା ଡେମ୍ବରେଇ'” ଡ'ସେକ୍ ସୁନ' ।
36ମାରି ସଇନିକଲେସା ମାଇନ୍ବକ୍ ସାକ୍ସେକ୍ ପୁସୁଇ'ବାଇ' ଅଂଗୁର୍ଡାଗ୍ ବେଡ'ସେକ୍ ଆମାଇ ପାସାର'ସେକ୍ ସୁନ', 37“ନ ଜିଉଦିରେମଲେନା ରାଜା ଡ'ନାଏ ନିଜେ ରକ୍ୟା ଡେମ୍ବରା” ଡ'ସେକ୍ ସୁନ' ।
38ମାରି ମାଇନା ବ'ବ୍କନ୍ଡେକ୍ “କୁନା ଜିଉଦିରେମଲେନା ରାଜା” ଡ' ଲେକ୍ଲ'ସେକ୍ ତାଂଅଁ'ବୁଅଁ' ।
39ମାରି ଗୁତୁନ୍ କୁର୍ସବକ୍ ଅଡାୟ'କୁନୁଂ ଗୁତୁନ୍ ଅଲିରାକ୍ବାଇ'କାମ୍ ଡେମ'କୁନୁଂଆଁ ମୁଇନ୍ଡା ଆଜିସୁଲା “ନ କିରିସ୍ଟ ଆରାକ୍ ଇ? ନ ନିଜେ ମାରି ଆନାଂସା ରକ୍ୟା ଡେମ୍” ଡ' ନିନ୍ଦାଲ'ସେକ୍ ସୁନ' ।
40ମାତର୍ ମାର୍ ମୁଇନ୍ଡା ଆମାଇ ତର୍ଞେକ୍ସେକ୍ ସୁନ', “ଆନସା ସମାନ୍ ଡନ୍ଡ୍ ବାଂଗୁତାକି ଆରାକ୍, ମା ନ ଆମାପ୍ରୁସା ଆବୁତୁଂତୁନ ଇ? 41ମାରି ନାଂ ଇମ୍ବାୟ ଡନ୍ଡ୍ ବୁମ୍ବାମ୍ପୁଲେଇ ନିୟମ୍ ଡୁକୁନୁଂସୁଗ ବାଂଗୁତୁନାଂ ମାସା'ଡ'ନା ନାଂ ଅବୁଦି ଅଲିରାକ୍ବାଇ' କାମ୍ ଡେମ'ତୁନାଂ । ମାତର୍ କେନ୍ ରେମତ ମାସା ବୁଲ୍ ମଡିନେମ୍ ଡନ୍ଡ୍ ବୁମ୍ବାମ୍ ଡେନ୍ତା” ଡ'ସେକ୍ ଆମାଇ ସୁନ' ।
42ମାରି ମାଇ ଆଜିସୁଲା ସୁନ' “ଅ ଜିସୁ, ନ ରାଜା ଏଗ୍ସେକ୍ ସାସନ୍ ଡିନ୍ଡେମ୍ପୁଲେଇ ସୁସାପ୍ବେଲା ଆନିଂସା ଏତ୍ଲାଲେଇ” ଡ'ସେକ୍ ସୁନ' ।
43ସା' ଜିସୁଲା ଆମାଇ ସୁନ' “ନିଂ ଆନ ସତ୍ ସୁନ'ତିଂ, ନିଂବୁରଂ ଆ'ନା ନ #23:43 ଆଜିସୁଲା ବିସ୍ବାସ୍ ଡେମ'ସେକ୍ ଗୁଇ'କୁନୁଂ ରେମଲେ ଡୁକୁନୁଂ ଜାଗାପାରାଦିସ୍ବକ୍ ଡୁତୁନ” ଡ'ସେକ୍ ସୁନ' ।
ଜିସୁଲା ଗୁଗୁଇ'ଡେନ୍
(ମାତିଉ 27:45–56; ମାର୍କ 15:33–41; ଜଅନ୍ 19:28–30)
44-45ଆଇ'ତୁନ୍ବେଲା ବାରଗନ୍ଟାସୁଗ ଡେଂକୁନୁଂବକ୍ ଞା' ଲକ୍ଲିବ' ଉଇଗା'ସା' ତିନ୍ ଗନ୍ଟାପନ୍ତେକ୍ ଗୁଲାଇ ଦେସ୍ ଞୁର୍ ଉଇଗା' । ମାରି ମାପ୍ରୁନା ମନ୍ଦିର୍ବକ୍ ଅ'ଡିପୁଲେଇ ତୁଲ'କୁନୁଂ ମୁନା' ଇମ୍ପ' ମନ୍ଜାମିନ୍ଜି ସିଂପୁଲାଂ ଗାର୍ଉଇଗା' । 46ମାରି ଜିସୁଲା ଡକ୍ତି'ତା ସୁନ' “ଅ ବା, ନିଂ ନିଜର୍ନା ଜିବନ୍ ନନା ତିତିବକ୍ ବେଡ'ତିଂ ।” ଆଇ'କେନା ସୁନ'ସେକ୍ ମାଇ ଗୁଇ'ଉଇଗା' ।
47ସଇନିକ୍ ରେମଲେନା ମୁନା'ରେମ୍ କେନ୍ ଗୁଲାଇ ଡେଂକୁନୁଂ ଜୁଲ'ସେକ୍ କେନ୍ ରେମ ସତଇସା ଦରମ୍ବାଇ' ରେମ ଡ'ସେକ୍ ଆମାପ୍ରୁ ସୁନ୍ଡ୍ରଗା' । 48ଗୁତୁନ୍ ଜୁଜୁପୁଲେଇ ସା'କୁନୁଂ ଗୁଲାଇ ରେମଲେ ଆତା ଡେଂକୁନୁଂ ଗୁଲାଇ ଜୁଲ'ସେକ୍ ମା'ଏ ଅବୁଦି ଦୁକ ଡେଂସେ'ଗା ଆଗିରେ ବୁଗ୍ବର୍ତିବର୍ସେ'ଗା ଡିଂଅଁବକ୍ ଇ'ଗା' । 49#ଲୁକ 8:2,3ମାତର୍ ଜିସୁନା ସୁନମ'ରେମ୍ ମାରି ଗାଲିଲି ଜିଲାକୁରୁଂ ଆମାଇ ତେଂଗି' ସା'କୁନୁଂ ସେଲାନେସା ସୁଲୁଂକୁରୁଂ ତଂସେକ୍ କେନ୍ ଗୁଲାଇ ଜୁଲ'କୁ ।
ଜିସୁନା ମଟ୍ ଲାଗ୍ଲାଗ୍ବକ୍ ବୁଂବୁଂଡେନ୍
(ମାତିଉ 27:57–61; ମାର୍କ 15:42–47; ଜଅନ୍ 19:38–42)
50ଆତା ଜିଉଦିରେମଲେନା ମୁନା'ରେମେନ୍ ବିତ୍ରେ ଜସେପ୍ ଡ'ସେକ୍ ମୁଇନ୍ଡା ମୁନା'ରେମ୍ ଡୁକୁ । ମାଇ ଅବୁଦି ବଲ୍ରେମ୍ ମାରି ଦରମ୍ରେମ୍ ଡୁକୁ । 51ମାଇ ଜିଉଦା ଦେସ୍ନା ଆରାମାତିୟା ଡ'ସେକ୍ ମୁଇ ଉଂଗମ୍ନା ରେମ । ମାରି ମାପ୍ରୁନା ରାଜି ଇନ୍ଡ'ୟା ସାପ୍ତା ଡ'ସେକ୍ ମାଇ ଜାଗ୍ଲ' ଡୁକୁ । ଆଜିସୁଲା ଅଗୁଇ'ପୁଲେଇ ଜିଉଦିରେମଲେନା ମୁନା'ରେମେ ଅଇଁୟ'କୁନୁଂବକ୍ସା କି ଡିନ୍ଡେମ୍ବକ୍ସା ମାଇ ରାଜି ଆଡେନ୍ତା ଡେଂକୁ । 52ସା' ମାଇ ପିଲାତନ୍ବକ୍ ଉଇସେକ୍ ଜିସୁନା ମଟ୍ ଲୁଡ' । 53ମାରି ଗୁତୁନ୍ ମଟ୍ ଅ'ଜର'ସେକ୍ ଦାମ୍ବାଇ'ନା ମୁଇ ଇମ୍ପ'ବୁରଂ ଗବ'ସେକ୍ ତମ୍ଲେଇଁବେର୍ବକ୍ ଅ'ରଇଁୟ'କୁନୁଂ ରାଇ'ସାଂବକ୍ନା ଲାଗ୍ଲାଗ୍ ବିତ୍ରେ ରିଂସେକ୍ ବୁଂଅଁ' । ଗୁତୁନ୍ ଲାଗ୍ଲାଗ୍ବକ୍ ଆଜାଏସା ଇନ୍ଡଇ'ସା ବୁଂଅଁ' ଆଡୁତା । 54ଉନ୍ତା ବିସ୍ରାମ୍ଦିନ୍ବକ୍ପୁଲେଇ ଗୁଲାଇ ତର୍ମୁଲୁଇ' ଡିନ୍ଡେମ୍ନା ଦିନ୍ ମୁନ୍ଡିପ୍ଗା' ମାରି ବିସ୍ରାମ୍ଦିନ୍ ମୁଲାଇବାର୍ନା ବେଲା ଇନ୍ତୁ ସା'କୁ ।
55ଗାଲିଲି ଜିଲାକୁରୁଂ ଆଜିସୁଲା ତେଂଗି' ସା'କୁନୁଂ ସେଲାନେ ଆତୁନ୍ ଜସେପ୍ଲା ତେଂଗି'ତେଂଗି' ଉଇସେକ୍ ଲାଗ୍ଲାଗ୍ ମିବାଇ' ମାରି ଜିସୁନା ମଟ୍ସା ମି ବୁଂଅଁ'ତା ଡ'ସେକ୍ ଜୁଲ' । 56ଜୁଲ'ସେକ୍ ମା'ଏ ଇକ୍ସେ'ଗା ଆମଟ୍ ସୁସୁପୁଲେଇ ଅବୁଦି ବଲ୍ଟା ଡୁକ୍ଡୁକ୍ବାଇ' ଗୁଲାଇ ମାରି ଲାଡାକ୍ବାଇ' ବାସ୍ନାବାଇ'ନା ସୁ'ଉସା ଅ'ରଇଁୟ' । ମାରି ବିସ୍ରାମ୍ଦିନ୍ବକ୍ ମା'ଏନା ନିୟମ୍ସୁଗ ମା'ଏ ଲେଇ'ଗା' ।
Currently Selected:
ଲୁକ 23: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
