ମାର୍କ 1
1
ବାପ୍ତିଜକ ଜଅନ୍ଲା ଜିସୁଲା ସୁସାପ୍ପୁଲେଇ କୁରୁଂ ବଲ୍ ଡିନ୍ଡେମ୍ଡେନ୍
(ମାତିଉ 3:1–12; ଲୁକ 3:1–18; ଜଅନ୍ 1:19–28)
1ମାପ୍ରୁନା ଉଁ'ଉଁ ଜିସୁ କିରିସ୍ଟନା ବଲ୍କବର୍ ଡି'କେନ୍ ମୁଲାୟ' । ମି ଡ'ନା,
2 # 1:2 ମାପ୍ରୁନା ତୁମ' ଅଂଅଁ'ସେକ୍ ଆରେମଲେ ସୁଁସୁରେମ୍ବକ୍ ବାବବାଦି ଆରା'ଗେ ବବିସତ୍ବକ୍ତା ଡ'ସେକ୍ ଅଡିଆ ସାମ୍ବକ୍ ସୁନ୍ତ । ଜିସାୟଲା ମୁଇନ୍ଡା ବାବବାଦି ଡୁକୁ । ଇନ୍ତେକନ୍ଡେ'କା ଜିସାୟଲା ଡ'ସେକ୍ ମୁଇନ୍ଡା ବାବବାଦିଲା ମାପ୍ରୁ ସୁନ'କୁନୁଂ ଅଂଅଁ'ସେକ୍ ଉଲାକ୍ବକ୍ ଡି'କେନା ଲେକ୍ଲ'ବୁଂଅଁ',
ମା ଡ'ନା:
“ଜୁ, ନ ସୁସାପ୍ ସିଁସେଇଁନୁକ୍ କବର୍ ସୁଁସୁପୁଲେଇ ନିଂ ଆନିଂନା ରେମ ଆମୁଇନ୍ଡା ବେନ୍ଟାଇତିଂ ।
ନ ସୁସାପ୍ପୁଲେଇ ମାଇ କୁରୁଂ ବଲ୍ ଡେମ୍ତ ।”
3“ମୁଇନ୍ଡା ରେମ ଟାଂରାବାଟା ପାଦାବକ୍ ତଂସେକ୍ ଡକ୍ତି'ତା ସୁଁସୁଡେନ୍ ।
ମାଇ ମା ଡ' ସୁନ'ତା ଡ'ନା ‘ପ୍ରବୁ ସୁସାପ୍ପୁଲେଇ କୁରୁଂ ଅ'ରଇଁ,
ମାଇପୁଲେଇ କୁରୁଂ ଅସୁସାଡ' ବୁଂ’ ଡ'ସେକ୍ ଆରେମଲେ ସୁନ'ତା” ଡ'ସେକ୍ ସୁନ'କୁ ।
4ଜିସାୟଲା ସୁନ'କୁନୁଂ ଗୁତୁନ୍ ତୁତରାପ୍ନା ଇମି ଜଅନ୍, ମାଇ ଆରେମଲେ ବାପ୍ତିସ୍ମା ବିବେ'ଡା । ଜିସୁଲା ସୁସାପ୍ ସିଁସେଇଁଉ ମାଇ ସାକ୍ସେକ୍ ଟାଂରାବାଟା ପାଦାବକ୍ ଡୁକୁକ୍ସେକ୍ ଆରେମଲେ ସୁନ' “ପେନା ଗୁଲାଇ ପାପ୍କାମ୍ ଅଲିରାକ୍କାମ୍ ଅଡକ୍ସୁଂଅଁ'ସେକ୍ ମାପ୍ରୁନ୍ବକ୍ ଆନ୍ଡେଇଁଗା' ଡ'ନା ନିଂ ଆପେ ବାପ୍ତିସ୍ମା ବେ'ତିଂ । ଡୁ'ତୁନ୍ ଡେମ'ନା ପେନ୍ ପାପ୍କାମ୍ ଅଲିରାକ୍କାମ୍ ଗୁଲାଇ ମାପ୍ରୁ କେମା ଡେମ୍ତ” ଡ'ସେକ୍ ସୁନ' । 5ଜିଉଦା ଜିଲାନା ରେମଲେ ଗୁଲାଇର ମାରି ଜିରୁସାଲମ୍ ମୁନା'ଉଂଗମ୍ବକ୍ ଡୁକୁନୁଂ ଗୁଲାଇର ଆଜଅନ୍ଲା ଜୁଜୁପୁଲେଇ ମାରି ଜଅନ୍ନା ତୁମ' ଅଂପୁଲେଇ ମାଇନ୍ବକ୍ ଉଇଗା' । ଉଇସେକ୍ ମୁଇନ୍ଡା ମୁଇନ୍ଡା ମା'ଏ ପାପ୍କାମ୍ ଡେମ'କୁନୁଂ ଗୁଲାଇ ଆମାପ୍ରୁ ସୁନ' । ସୁନ'ସା' ଜଅନ୍ଲା ଆମା'ଏ ଜର୍ଦନ୍ କିନ୍ଡାକ୍ବକ୍ ବାପ୍ତିସ୍ମା ବେଡ' । 6ଜଅନ୍ଲା ଉନ୍ଟ୍ନା ଲୁଇବୁରଂ ଅ'ରଇଁୟ'କୁନୁଂ ସକାବାନ୍ଦା ଅଲୁ'କୁ ମାରି ଇସାବୁରଂ ଅ'ରଇଁୟ'କୁନୁଂ ବେଲ୍ଟୁ ଇନ୍ସାପ୍ବକ୍ ତୁକୁ । ଗୁର୍ତାଂଗୁଲାଇ'ସୁଗବାଇ' ଡୁକୁନୁଂ ମାରି ବୁର୍ଲୁକ୍ନା ଞୁଡାକ୍ ମାଇ ସୁମ'ସେକ୍ ଡୁକୁ । 7ଜଅନ୍ଲା ଆଗୁଲାଇର ସୁନ', “ଆନିଂ ତେଂଗି' ମୁଇନ୍ଡା ମୁନା'ରେମ୍ ସୁରୁଇ' ସୁସାପ୍ଡେନ୍ତା । ମାଇ ଅବୁଦି ଦରମ୍ବାଇ' ରେମସା' ନିଂ ମାଇନା ମୁଇନ୍ଡା ଗତିରେମ୍ସୁଗ ଅ'ଲାଂସେ'ଗା ମାଇନା ପନ୍ଡଇଁବକ୍ ତୁଲ'କୁନୁଂ ସୁତା ତକ୍ତକ୍ ଆଗଂତିଂ । 8ନିଂ ସେନା ଆପେ ଡାଗ୍ବୁରଂ ବାପ୍ତିସ୍ମା ବିବେ'ଡେନ୍ତିଂ ମାତର୍ ମାଇ ଆପେ ପବିତ୍ର ଆତ୍ମାବୁରଂ ବାପ୍ତିସ୍ମା ବେ'ତ ” ଡ'ସେକ୍ ସୁନ' ।
ଜଅନ୍ଲା ଆଜିସୁଲା ଡାଗ୍ବକ୍ ବାପ୍ତିସ୍ମା ବିବେ'ଡେନ୍
(ମାତିଉ 3:13–17; ଲୁକ 3:21–22)
9ଆଇ'ତୁନ୍ବେଲା ଜିସୁଲା ଗାଲିଲି ଜିଲାନା ନାଜରିତ୍ ଉଂଗମ୍କୁରୁଂ ଜଅନ୍ବକ୍ ସା'ଗା' । ସା'ଗା'ସା' ଜଅନ୍ଲା ଆଜିସୁଲା ଜର୍ଦନ୍ କିନ୍ଡାକ୍ବକ୍ ବାପ୍ତିସ୍ମା ବେଡ' । 10ବାପ୍ତିସ୍ମା ବେଡ'ସା' ଜିସୁଲା ଡାଗ୍କୁରୁଂ ତୁତୁର୍ରେମ୍ କି'ତୁଂ ରୁଗ୍କୁନୁଂ ଜୁଲ' । ମାରି ପବିତ୍ର ଆତ୍ମା ମୁଇ ପାରାସୁଗ କି'ତୁଂକୁରୁଂ ୱାକ୍ସେକ୍ ମାଇନ୍ବକ୍ ଜୁଜର୍ବେଲା ଜିସୁଲା ଜୁଲ' । 11#ମାତିଉ 3:17; 12:18; ମାର୍କ 9:7; ଲୁକ 3:22ମାରି “ନ ନିଂନା ଉଁ'ଉଁ, ଆନ ନିଂ ଅବୁଦି ଲବ୍ଗୁତିଂ, ଆନ ଜୁଲ'ସେକ୍ ନିଂ ଅବୁଦି ସାର୍ଦା ଡେଂଗୁତିଂ” ଡ'ସେକ୍ ସରଗ୍କୁରୁଂ ମାପ୍ରୁ ଆମାଇ ସୁନ'କୁନୁଂସା ଅଂଅଁ' ।
ସଇତାନ୍ ଆଜିସୁଲା ପରିକା ଡିନ୍ଡେମ୍ଡେନ୍
(ମାତିଉ 4:1–11; ଲୁକ 4:1–13)
12ତିର୍ଗି' ପବିତ୍ର ଆତ୍ମା ଆଜିସୁଲା ଟାଂରାବାଟା ପାଦାବକ୍ ସେଟ୍ଟ' ୱାୟ' ଉଇଗା' । 13ସା' ମାଇ ଆତା ଉଇସେକ୍ ସାଲିସ୍ଦିନ୍ ଡୁକୁଗା' । ମାରି ଆତା ଡୁକୁନୁଂବେଲା ସଇତାନ୍ ଆମାଇ ପରିକା ଡେମ' । ମାରି ଆତା ଅବୁଦି ଗିବେସଗୁସୁଡାକ୍ସା ଡୁକୁଗା' । ମାରି ମାପ୍ରୁନା ଦୁତଲେ ଆତା ସାକ୍ସେକ୍ ଆଜିସୁଲା ସାନ୍ଡୁଂଅଁ' ।
ଜିସୁଲା ଆସିସ୍ୟଲେ ସିରେଡେନ୍
(ମାତିଉ 4:12–22; ଲୁକ 4:14–15—5:1–11)
14ଆଜଅନ୍ଲା ସବ'ସେକ୍ ବନ୍ଦି ସୁରୁଂଅଁ'କୁନୁଂ ତିର୍ଗି' ଜିସୁଲା ଗାଲିଲି ଉଂଗମ୍ବକ୍ ସାକ୍ସେକ୍ ଆତା ମାପ୍ରୁନା ବଲ୍କବର୍ ଆଗୁଲାଇର ସୁଁସୁ ମୁଲାୟ' । 15#ମାତିଉ 3:2ମାଇ ଆଗୁଲାଇର ସୁନ', “ମାପ୍ରୁ ସୁନ'କୁନୁଂବେଲା ଆ'ନା ଡେଂଗା' । ମାପ୍ରୁ ରାଜି ଅ'ରଇଁୟ'ସେକ୍ ଆରେମଲେ ଜୁଜୁନା ବେଲା ସା'ଗୁତା । ପାପ୍କାମ୍ ଡେମ'କୁନୁଂ ଗୁଲାଇ ତର୍ମୁଲୁଇ' ଅନ୍ତୁର'ସେକ୍ ପେ ମାପ୍ରୁନ୍ବକ୍ ଆନ୍ଡେଇଁସେକ୍ ମାଇନା ବାନିକବର୍ ବିସ୍ବାସ୍ ଡେମ୍ ” ଡ'ସେକ୍ ମାଇ ସୁନ' ।
ଆମ୍ବାୟ ସିସ୍ୟପା ଜିସୁଲା ମୁଲ୍ ସିରେଡେନ୍
(ମାତିଉ 8:14–17; ଲୁକ 4:38–41)
16ମୁସିଂ ଜିସୁଲା ଗାଲିଲି ସମ୍ଦର୍କିନ୍ଡାକ୍ ପାଲି ଉଇଡେଂକୁନୁଂବେଲା ସିମନ୍ ଡ'ସେକ୍ ମୁଇନ୍ଡା ମାଇନା ବୁୟାଂ ଆନ୍ଦ୍ରିୟଲାବୁରଂ ଜୁକ୍ଜାଲ୍ ଡେଂକୁନୁଂ ଜୁଲ' । ମାଇପା ଇମ୍ବାୟ ବୁନୁୟାଂ ଇସାଉ ଆ'ଡଂ ସୁଂଅଁ'ସେ'ଗା ସୁମ'ବୁରକୁ । 17ଜିସୁଲା ଆମାଇପା ସୁନ' “ପା ଲ, ନିଂବୁରଂ ସା'ବା । ପା ଆ'ନ୍ପନ୍ତେକ୍ ଆ'ଡଂ ସବ'ପା ମାତର୍ ଆ'ନାବାଂସା' ଆରେମଲେ ନିଂବକ୍ ୱାୟ' ଇନ୍ଡ୍ରିଂପୁଲେଇ ଅମାକ୍ତିଂ” ଡ'ସେକ୍ ସୁନ' । 18ସା' ମାଇପା ଆ'ଇକୁ ଜାଲ୍ ଅଡକ୍ସୁଂଅଁ'ସେକ୍ ଆମାଇ ତେଂଗି' ଉଇଗା' ।
19ମାରି ଜିସୁଲା ଇ'କି ଡଗ୍ରିତ୍ ଉଇଗା'ସା' ଆଜେବଦିନା ଉଁ'ଉଁପା ଆଜାକୁବ୍ଲା ମାରି ଆଜଅନ୍ଲା ଇମ୍ବାୟ ବୁନୁୟାଂବକ୍ ଜୁଲ' । ମାଇପା ଇମ୍ବାୟ ବୁନୁୟାଂ ମୁଇ ଡଂଗାବକ୍ ଲେଇ'ସେକ୍ ଆ'ଡଂ ସୁସବ୍ପୁଲେଇ ଜାଲ୍ ସର୍କେଲ' ଜୁଲ'ସେକ୍ ସ'କୁଡେଂକୁଗା' । 20ଗୁତୁନ୍ ଡଂଗାବକ୍ ଜାକୁବ୍ଲା, ଜଅନ୍ଲା, ମାଇପାନା ବା ଜେବଦିଲା ମାରି ମା'ଏନ୍ବକ୍ କାମ୍ ଡେମ'କୁନୁଂ ରେମଲେସା ଡୁକୁଗା' । ଜିସୁଲା ଆଜାକୁବ୍ପା ବୁନୁୟାଂ ଜୁଲ'ସେକ୍ ପା ନିଂବୁରଂ ସା'ବା ଡ'ସେକ୍ ୱାୟ' । ୱାୟ'ସା' ମାଇପା ବୁନୁୟାଂ ଆବାଡେଇଁ ମାରି ଆକାମ୍ରେମ୍ ଆଇ'କୁ ଅଡକ୍ସୁଂଅଁ'ସେକ୍ ମାଇନା ତେଂଗି' ଉଇଗା' ।
ଆମୁଇନ୍ଡା ବୁତ୍ ସବ'କୁନୁଂ ରେମବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ଲୁକ 4:31–37)
21ଜିସୁଲା ମାରି ମାଇବୁରଂ ତିରେ ଡୁକୁନୁଂ ରେମଲେସା କପର୍ନାଉମ୍ ଡ'ସେକ୍ ମୁଇ ମୁନା'ଉଂଗମ୍ବକ୍ ଉଇଗା' । ଉଇସେ'ଗା ବିସ୍ରାମ୍ଦିନ୍ବକ୍ ଜିସୁଲା ପାର୍ତନା ଡିଂଅଁବକ୍ ଗାଇସେକ୍ ଆତା ଆରେମଲେ ମାପ୍ରୁନା ତୁମ' ଅମାଗ' । 22#ମାତିଉ 7:28,29ମାଇ ଆମା'ଏ ମସାଲା ବେଡ'କୁନୁଂ ନିୟମ୍ ଅମାକ୍ରେମ୍ ଅମାଗ'କୁନୁଂସୁଗ ଆରାକ୍ ମାତର୍ ଅଦିକାର୍ ଡୁକୁନୁଂ ମୁଇନ୍ଡା ମୁନା'ରେମ୍ ସୁନ'କୁନୁଂସୁଗ ଅମାଗ' । ସା' ଜିସୁଲା ଅମାଗ'କୁନୁଂ ରେମଲେ ଅଂଅଁ'ସେକ୍ କାବାକାବା ଡେଂଉଇଆର୍ଗା' । 23ମାଇ ଅମାକ୍ ଡେଂକୁନୁଂବେଲା ଗୁତୁନ୍ ପାର୍ତନା ଡିଂଅଁବକ୍ ଅଲିରାକ୍ବାଇ' ବୁତ୍ ସବ'କୁନୁଂ ମୁଇନ୍ଡା ରେମ ଡୁକୁ । ମାଇ ଆ'ଇକୁ ଡକ୍ତି'ତା କିରକ୍ସେକ୍ ସୁନ', 24“ଅ ନାଜରିତ୍ ଉଂଗମ୍ନା ଜିସୁ, ନବୁରଂ ନେଇନା ମା କାମ୍ ଡୁତା? ନ ଆନେଇ ଅଗୁଇ'ପୁଲେଇ ସା'ଗୁତୁନକି ମା? ନ ଜା ଡ'ସେକ୍ ନିଂ ମାଗ'ତିଂ । ନ ମାପ୍ରୁନା ମୁଇନ୍ଡା ପବିତ୍ରବାଇ' ରେମ” ଡ'ସେକ୍ ସୁନ' ।
25ସୁନ'ସା' ଜିସୁଲା ଆତୁନ୍ ବୁତ୍ ତର୍ଞେକ୍ସେକ୍ ସୁନ' “ଜୁକ୍ଲା, ମାଇନା ଞେରିକୁରୁଂ ତୁର୍ସେକ୍ ଡୁଂଆଁ” ଡ'ସେକ୍ ସୁନ' । 26ସୁନ'ସା' ଗୁତୁନ୍ ଅଲିରାକ୍ବାଇ' ବୁତ୍ ଆତୁନ୍ ରେମ ଅବୁଦି ଅ'ଜୁର' ଅଜାଗ'ସେକ୍ ଅବୁଦି କିରକ୍ସେ'ଗା ମାଇନା ଞେରିକୁରୁଂ ତୁର୍ଡୁଂଗା' ।
27ଆତା ଡୁକୁନୁଂ ରେମଲେ ଗୁତୁନ୍ ଡେଂକୁନୁଂ ଗୁଲାଇ ଜୁଲ'ସେ'ଗା କାବାକାବା ଡେଂଉଇଆର୍ଗା' । ସା' ମା'ଏ ମା'ଏନ୍ ବିତ୍ରେ ଅଇଁୟ' “ଜୁ, ଆକେ ମି ମି ଡେଂଗୁତା । କେନ୍ ରେମ ତିମେତିମେବାଇ' ଆନେଇ' ଅମାକ୍ଡେନ୍ତା । ମାଇ ଅଦିକାର୍ ଡୁକୁନୁଂ ମୁଇନ୍ଡା ମୁନା'ରେମ୍ସୁଗ ଅମାକ୍ଡେନ୍ତା । ମାଇ ସୁନ'ନା ଅଲିରାକ୍ବାଇ' ବୁତ୍ଲେସା ଅଂଅଁ'ତା” ଡ'ସେକ୍ ରେମଲେ କଲେକଲେ ଅଇଁୟ'କୁ । 28ଡୁ'ତୁନ୍ସା' ଜିସୁନା ଇମି ଗାଲିଲି ଜିଲାବକ୍ ଗୁଲାଇ କୁନ୍ଡା ପରେକ୍ଉ ଉନୁଂଉଇଗା' ।
ଅବୁଦି ସିରେମ୍ବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାତିଉ 8:14–17; ଲୁକ 4:38–41)
29ତିର୍ଗି' ଜିସୁଲେ ପାର୍ତନା ଡିଂଅଁକୁରୁଂ ତୁର୍ସେକ୍ ଜାକୁବ୍ଲା ମାରି ଜଅନ୍ଲାବୁରଂ ସିମନ୍ଲା ମାରି ଆନ୍ଦ୍ରିୟଲା ଡୁକୁନୁଂ ଡିଂଅଁବକ୍ ସିଦା ଉଇଗା' । 30ଆତା ସିମନ୍ନା କିୟାଁର୍ ଅବୁଦି ସିବାଂସେକ୍ ଡିରି'କୁଗା' । ସା' ମାଇ ସି ବାଂସେକ୍ ଡୁକୁନୁଂ ବିସୟ ରେମଲେ ଆଜିସୁଲା ଆଇ'କୁ ସୁନ' । 31ସୁନ'ସା' ଜିସୁଲା ସିମନ୍ନା କିୟାଁର୍ ଡିରି'କୁନୁଂବକ୍ ଉଇସେକ୍ ଆମାଇନା ତିତି ସବ'ସେକ୍ ମୁରାକ୍ପୁଲେଇ ସାନ୍ଡୁଂଅଁ' । 'ସା' ମାଇନା ସି ବଲ୍ ଡେଂଗା' । ବଲ୍ ଡେଂସେ'ଗା ମାଇ ଆଗୁଲାଇର କିୟାଂମା' ରାଂଅଁ' ବିବ' ବେଡ' ।
32ଉନ୍ତ୍ ମୁନ୍ଡିପ୍ ଲିଲେଇ'ପାର୍କି'ନ୍ବେଲା ବୁତ୍ ସବ'କୁନୁଂ ରେମଲେବକ୍ ସିକୁନୁଂରେମଲେବକ୍ ଜିସୁନ୍ବକ୍ ୱାୟ' ରିଂଅଁ' । 33ସା' ଗୁତୁନ୍ କପର୍ନାଉମ୍ ମୁନା'ଉଂଗମ୍ନା ଗୁଲାଇ ରେମଲେ ସାକ୍ସେକ୍ ଗୁତୁନ୍ ଡିଂଅଁନା ଡାନ୍ଡର୍ବକ୍ ରୁନ୍ଗା' । 34ଆରେମଲେ ପାଲ୍ପାଲ୍ ସିକୁନୁଂସା ଜିସୁଲା ବଲ୍ ଡେମ' । ମାରି ବୁତ୍ ସବ'କୁନୁଂ ରେମଲେନା ଞେରିକୁରୁଂ ତୁର୍ସେକ୍ ଡୁଂଆଁ ଡ'ସେକ୍ ଆବୁତ୍ଲେସା ମାଇ ସୁନ' । ମାପ୍ରୁ ଆଜିସୁଲା ବେନ୍ଟାୟ'ତା ଡ'ସେ'ଗା ବୁତ୍ଲେ ମାଗ'କୁସା' ଜିସୁଲା ଆବୁତ୍ଲେ ସୁରୁଇ' ଞନ' ଅ'ତୁର' ।
ସିମ୍ରାଗୁମ୍ରାକୁନୁଂ ଜାଗାବକ୍ ଉଇସେକ୍ ଜିସୁଲା ଆମାପ୍ରୁ ପାର୍ତନା ଡିନ୍ଡେମ୍ଡେନ୍
(ଲୁକ 4:42–44)
35ବେରା ଇନ୍ଜୁର୍ ପୁରୁଂପୁରୁଂ ଜିସୁଲା ମୁରାକ୍ସେକ୍ ରେମଲେ ଜାଏସା ମଡୁକୁବାଇ' ତାନ୍ବକ୍ ଉଇସେ'ଗା ଆମାପ୍ରୁ ପାର୍ତନା ଡେମ' । 36ତିର୍ଗି' ସିମନ୍ଲା ବାଇଲକ୍ଡେଇଁଏଁବୁରଂ ଆଜିସୁଲା ତୁତୁର୍ ଉଇଗା' । 37ତୁତୁର୍ ଉଇଗା'ସା' ଆଜିସୁଲା ସୁସପ୍ବାଂସେକ୍ “ଆନ ରେମଲେ ତୁର'ତା” ଡ'ସେକ୍ ସୁନ' ।
ଗାଲିଲି ଉଂଗମ୍ବକ୍ ଉଇସେକ୍ ଜିସୁଲା ମାପ୍ରୁନା ବାନିକବର୍ ସୁଁସୁଡେନ୍
38ଗୁତୁନ୍ ଅଂଅଁ'ସେକ୍ ଜିସୁଲା ଆମା'ଏ ସୁନ', “ଡ, ନେଇ' ଗୁଲାଇର ଆକେ ଉନ୍ତୁ'ତ'ନାଂ ଡୁକୁନୁଂ ଗୁଲାଇ ଉଂଗମ୍ବକ୍ସା ଉୟାନେଇ' । ମାସା'ଡ'ନା ଆତାସା ଆମା'ଏ ମାପ୍ରୁନା ତୁମ' ସୁଁସୁ ଗଂତିଂ । ନିଂ ଗୁତୁନ୍ପୁଲେଇ ସା'ଗୁତିଂ” ଡ'ସେକ୍ ସୁନ' । 39#ମାତିଉ 4:23; 9:35ମାରି ଜିସୁଲେ ଜିଉଦିରେମଲେନା ପାର୍ତନା ଡିଂଅଁବକ୍ ଲେଇ'ସେକ୍ ମାପ୍ରୁନା ତୁମ' ସୁନ' ମାରି ବୁତ୍ ସବ'କୁନୁଂ ରେମଲେବକ୍ସା ବଲ୍ ଡେମ'ସେକ୍ ଗାଲିଲି ଜିଲାବକ୍ ଗୁଲାଇ କୁନ୍ଡା ବୁଲ୍ଲ'କୁ ।
କୁକୁମ୍ବାଇ' ରେମବକ୍ ଜିସୁଲା ବଲ୍ ଡିନ୍ଡେମ୍ଡେନ୍
(ମାତିଉ 8:1–4; ଲୁକ 5:12–16)
40ମୁଇନ୍ଡା କୁକୁମ୍ବାଇ' ରେମ ଜିସୁନ୍ବକ୍ ସା'ଗା' । ସାକ୍ସେକ୍ ଜିସୁନା ସାର୍ମ'କୁରୁଂ ଏନ୍ଡିକ୍ସେକ୍ ମାଇ ଉକ୍ସେକ୍ ସୁନ' “ଜିସୁ, ନନା ମୁନ୍ ଡୁକୁନା ଆନିଂ ବଲ୍ ଡିନ୍ଡେମ୍ ଗଂତୁନ” ଡ'ସେକ୍ ସୁନ' ।
41ସା' ଜିସୁଲା କୁକୁମ୍ବାଇ' ରେମବକ୍ ଅବୁଦି ଲିବିସୁପ୍ସେକ୍ ତିତିବୁରଂ ତୁରାମ'ସେକ୍ ସୁନ' “ଆନ ବାନି ଡିନ୍ଡେମ୍ପୁଲେଇ ନିଂ ମୁନ୍ ଡେଂଗୁତିଂ, ନ ବଲ୍ ଡେମା” ଡ'ସେକ୍ ସୁନ' । 42ସା' ଆ'ଇକୁ ମାଇନା କୁକୁମ୍ସି ବଲ୍ ଡେଂଗା' ।
43ଜିସୁଲା ଆତୁନ୍ ରେମ ସୁନ' “ଜୁ, ଆ'ନା ନ ଉୟା । 44ନିଂ ଆନ ମା ଡେମ'ନିଂ ଗୁତୁନ୍ ଆଜାଏସା ଆସୁନ' । ନ ଉଇସେ'ଗା ନିଂ ବଲ୍ ଡେଂନିଂ ଡ' ଆପୁଜାରି ଅସୁ'ୟା । ମାରି ମୁଇନ୍ଡା କୁକୁମ୍ବାଇ' ରେମ ବାନି ଡେଂନା ମା ଡିନ୍ଡେମ୍ ଡୁତା ଡ'ସେକ୍ ମସାଲା ସୁନ'ତା ଗୁତୁନ୍ ଗିଗେ ଅ'ଗେଲା । ଡୁ'ତୁନ୍ ଡେମ'ନା ନ ବାନି ଡେଂନ ଡ'ସେକ୍ ଆଗୁଲାଇ ରେମଲେ ସାକି ଅସୁଇ'ଗଂତୁନ” ଡ'ସେକ୍ ସୁନ' । 45ମାତର୍ ମାଇ ଉନ୍ତ୍କୁରୁଂ ଉଇସେକ୍ ଜିସୁଲା ଆନିଂ ବାନି ଡେମ' ଡ'ସେକ୍ ଆଗୁଲାଇର ସୁଁସୁ ମୁଲାୟ' । ସା' ଜିସୁଲା ଇମ୍ବ'ନ୍ ଉଂଗମ୍ବକ୍ସା ଆଗୁଲାଇର ଅସୁଇ'ସେ'ଗା ଉଇ ଆଗଂତା । ଆମ୍ବ' ରେମଲେ ଆଡୁତା ଆତା ଜିସୁଲା ଡୁକୁଗା' । ଜିସୁଲା ଆମ୍ବ' ରେମଲେ ଆଡୁତା ଆତା ଡୁତିଂ ଡ'ସେକ୍ ଏତ୍ନାସା ରେମଲେ ଆଜିସୁଲା ତୁର' ତୁର'ସେ'ଗା ମାଇ ଆମ୍ବ' ଡୁତା ଆତା ସା'ଗା' ।
Currently Selected:
ମାର୍କ 1: BFW
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
