ଜହନ 8

ଦାରିଗାଟି ଆଚାଲୁ

1ମତ୍ର ଜିସୁ ଜିତ ହରୁଇନ୍ଦା ହାଚ୍ଚେଞ୍ଜି । 2ତା ୱେଃଇତ୍ ଡାଃଏସି ଏୱାଞ୍ଜି ରିହିକ୍ ମନ୍ଦିରଇନ୍ଦା ୱାତେଞ୍ଜି, ଆଟେ ହାବେ ଦାଲ୍ଲା ତା ଟାକ୍କେ ୱାଅନେଃଏ, ଏୱାଞ୍ଜି କକ୍‌ଚ୍ଚାନାହି ଏୱାରିକି ଗ୍ରାପନ୍ ମ୍ରାସ୍ତେଞ୍ଜି । 3ଏମ୍ୱାଟି ସାସ୍ତ୍ରିଙ୍ଗ୍ ଅଟେ ପାରୁସିଙ୍ଗ୍ ଦାରିକାମା କିଚ୍ଚି ତୁକାତାୱା ଆହ୍‌ପନ୍ ପାଁଣ୍ଡାଚ୍ଚି ରଣ୍ଡା ଆଚାଲୁନିକି ତାଚ୍ଚାନାହି ତାଙ୍ଗେ ମାଦ୍ଦେ ଡିଡ୍ଡି କିଆନ୍ ଜିସୁନିକି ୱେସ୍ତେରି । 4“ଏ ଗ୍ରାପାଗାଟାତି, ଇ ଆଚାଲୁନିକି ଦାରିକାମା କିଚ୍ଚି ତୁକାତାୱା ଆହାନ୍ନାମୁ । 5ଇହିଙ୍ଗିସି ଦାରିକାମା କିନ୍ନି ଦାଲ୍ଲାନିକି ୱାଲ୍ଲିଙ୍ଗ୍ ଜିଆନ୍ ପାଗନ୍ ବାଗା ମସା ମାଙ୍ଗେ ହାଜୁତାୱା ଆଦେସ୍ ହିଆଞ୍ଜାନେଞ୍ଜି; ଏହେଙ୍ଗ୍ ଆତେସି ନିନୁ ଇନ୍ନା ଇଞ୍ଜିଞ୍ଜି ?” 6ଏୱାରି ଇନିସ୍‌କି ତା ବିରୁଦ୍‌ଟି ଦୁସ ଆହ୍‌ପନ୍ ମୁନେରି, ଇଦାବାଗା ଏୱାରି ତାଙ୍ଗେ ପରିକ୍ୟା କିଆନ୍ ୱେଚ୍ଚେରି । ମତ୍ର ଜିସୁ ନେତେ ହିକ୍କାନ୍ ୱାଞ୍ଜୁ ଡ଼ାହି ୱିର୍ରାତାୱା ୱ୍ରିଗନ୍ ମ୍ରାସ୍ତେଞ୍ଜି ।

7ମତ୍ର ଏୱାରି ତାଙ୍ଗେ ଲାଗ୍ଗେ ଲାଗ୍ଗେ ୱେଞ୍ଜିଚ୍ଚେରି, ଏଦାକି ଏୱାଞ୍ଜି ତ୍ଲାଉ ଡେସାନ୍ ଏୱାରିକି ୱେସ୍ତେଞ୍ଜି, “ମି ତାୱାଟି ଏମ୍ୱେନାଞ୍ଜି ଇନ୍ନି ପାପ କିଆ ହେଃଲ୍ଲେଞ୍ଜି, ଏୱାଞ୍ଜି କାହେ ତାଙ୍ଗେ ୱାଲ୍ଲି ଜିପାକାଞ୍ଜି ।” 8ରିହିକ୍ ଏୱାଞ୍ଜି ନେତେ ହିକ୍କାନ୍ ୱିର୍ରାତାୱା ୱ୍ରିଗନ୍ ମ୍ରାସ୍ତେଞ୍ଜି । 9ଏଦା ୱେଞ୍ଜାନ୍ ଏୱାରି ବେର୍ରାନାରି ଟିଆଟି ହିତାନାରି ଟିକ୍‌ନା ଏଦିମ୍ୱା ରଃଅ ରଃଅଞ୍ଜି ଆନାହି ହାବେତାରି ହଚାନ୍ ହାଚ୍ଚେରି, ଆଟେ ଏଦିମ୍ୱା ୱାର୍ରି ଜିସୁ ଅଟେ ଏ ଆଚାଲୁ ବାସାଆତେରି । 10ଆଟେ ଜିସୁ ତ୍ଲାଉ ଡେସାନ୍ ତାଙ୍ଗେ ୱେଚ୍ଚେଞ୍ଜି, “ଏ ଆଚାଲୁ, ଏୱାରି ଇମ୍ୱି ହାଚ୍ଚେରି ? ଇନ୍ନା ଏମ୍ୱେ ନିଙ୍ଗେ ଦୁସି ଇଞ୍ଜାନ୍ ବିଚାର କିଆଦାଃଆତେରି ?”

11ଏଦି ୱେସ୍ତେ, “ଦାର୍ମୁ, ଏମ୍ବେନାରି ହେଃଲ୍ଲେରି ।” ଏମ୍ବାଟି ଜିସୁ ୱେସ୍ତେଞ୍ଜି, “ନାନୁ ୱାଡ଼େ ନିଙ୍ଗେ ଦୁସି ଇଞ୍ଜାନ୍ ବିଚାର କିହେଲ୍ଲାଦାଃଏନୁ, ହାଲ୍‌ମୁ, ନିଞ୍ଜୁତାୱାଟି ଆଟେ ପାପ କିଃଆ ।”

ଜିସୁ ପୁର୍ତିତି ଅଲା

12 # ମାତି ୫:୧୪; ଜହ ୯:୫ ଜିସୁ ରିହିକ୍ ଦାଲ୍ଲାନିକି ଗ୍ରାପ୍‌ଚାନ୍ ୱେସ୍ତେଞ୍ଜି, “ନାନୁ ପୁର୍ତିତି ଅଲା, ଏମ୍ୱେନାଞ୍ଜି ନା ବେତଟ୍ ୱାଇନ୍ନେଞ୍ଜି, ଏୱାଞ୍ଜି ଏଚ୍ଚେକ୍‌ୱାଡ଼େ ଆନ୍ଦେରିଃଆ ତ୍ରେଃଏଞ୍ଜି, ମତ୍ର ପରନ୍‌ତି ଅଲା ପାଁନେଞ୍ଜି ।”

13 # ଜହ ୫:୩୧ ଏମ୍ବାଟି ପାରୁସିଙ୍ଗ୍ ତାଙ୍ଗେ ୱେସ୍ତେରି, “ନିନୁ ନି କୁଲାଟି ସାକ୍ୟ ହିଞ୍ଜାଦି, ନି ସାକ୍ୟ ନିଜ୍ଜା ଆଃଏ ।” 14ଜିସୁ ତାଙ୍ଗେ ୱ୍ଡେପ୍‌ଚ୍ଚି ୱେସ୍ତେଞ୍ଜି, “ନାନୁ ଜଦି ନା କୁଲାଟି ସାକ୍ୟ ହିଞ୍ଜା ଆତେସ୍‌ୱାଡ଼େ ନା ସାକ୍ୟ ନିଜ୍ଜା, ଇନାକି ନାନୁ ପୁଞ୍ଜାମାଃଇ ନାନୁ ଇମ୍ୱିନ୍ ଗର୍ରିତାୱାଟି ୱାମାଃଇ ଅଟେ ଇମ୍ୱିନ୍ ଗର୍ରିଇନ୍ଦା ହାଃଇ, ମତ୍ର ମିରୁ ଏଦା ପୁଃନ୍ନେରି । 15ମିରୁ କୁଇଙ୍ଗ୍ ଲାକ୍କାଟି ବିଚାର କିଞ୍ଜେରି, ନାନୁ ଇନ୍ଦାର୍‌ତି ବିଚାର କିହେଃଲ୍ଲାନୁ । 16ମତ୍ର ନାନୁ ଜଦି ବିଚାର କିଃଇ, ଆତେସ୍‌ୱାଡ଼େ ନା ବିଚାର ନିଜ୍ଜା; ଇନାକି ନାନୁ ରଃଅନେଃଏ ଆଃଏ, ନାଙ୍ଗେ ପାଣ୍ଡାଞ୍ଜାନ୍ନି ଆବା ନା ଡ଼ାହି ମାନ୍ନେଞ୍ଜି । 17ମି ହାଜୁତାୱା ୱାଡ଼େ ଇଦା ୱ୍ରିଗାଆନ୍ନେ, ରିଃଆର୍‌ତି ସାକି ସମାନ୍ ଆତେସି, ଏୱାର୍‌ତି ସାକି ନିଜ୍ଜା । 18ନାନୁ ନିଜେ ନା ସାକି ହିମାଃଇ, ଆଟେ ନାଙ୍ଗେ ପାଣ୍ଡାଞ୍ଜାନ୍ନି ଆବା ୱାଡ଼େ ନା କୁଲାଟି ସାକି ହିନ୍ନେଞ୍ଜି ।”

19ଏମ୍ବାଟି ଏୱାରି ତାଙ୍ଗେ ୱେଚ୍ଚେରି, “ନି ଆବା ଇମ୍ୱିନାୱା ମାନ୍ନେଞ୍ଜି ?”

ଜିସୁ ୱ୍ଡେପ୍‌ଚ୍ଚି ୱେସ୍ତେଞ୍ଜି, “ମିରୁ ନାଙ୍ଗେ ପୁଞ୍ଜାହେଲ୍ଲାଦାଃଏରି କି ନା ଆବାନିକି ୱାଡ଼େ ପୁଞ୍ଜାହେଃଲ୍ଲେରି; ଜଦି ନାଙ୍ଗେ ପୁଞ୍ଜାଞ୍ଜାତେସି ନା ଆବାନିକି ୱାଡ଼େ ପୁଞ୍ଜାଞ୍ଜେରିମା ।” 20ଏୱାଞ୍ଜି ମନ୍ଦିର ଲାଃଇ ଗ୍ରାପେଚ୍ଚି ତୁକାତାୱା ଟାକ୍କାଙ୍ଗ୍ ଉହି କିଅନ୍‌ତି ହାକୁସ୍ କିଟ୍ଟନ୍‌ତି ବାକ୍ରାତାୱା ଜିସୁ ଇ ହାବେତ୍ କାତା ଗ୍ରାପେଚ୍ଚେଞ୍ଜି, ମତ୍ର ତା ତୁକା ଏଚ୍ଚାହେଃଲ୍ଲାତ୍ ବାଗା ତାଙ୍ଗେ ଏମ୍ବେନାରି ଆହ୍‌ପନ୍ ମୁଃଆତେରି ।

ନାନୁ ଇମ୍ୱିନ୍‌ଇନ୍ଦା ହାଜ୍ଜିମାଃଇ ଏନ୍ନେ ମିରୁ ହାଲ୍‌ବନ୍ ମୁଃଏରି

21ଏମ୍ବାଟି ଜିସୁ ରିହିକ୍ ଏୱାରିକି ୱେସ୍ତେଞ୍ଜି, “ନାନୁ ହାଜ୍ଜିମାଃଇ, ଆଟେ ମିରୁ ନାଙ୍ଗେ ଦାହ୍‌ତାଦେରି, ମତ୍ର ମିରୁ ମି ପାପତାୱା ହାଦେରି, ନାନୁ ଇମ୍ୱିନ୍‌ଇନ୍ଦା ହାଜ୍ଜିମାଃଇ ଏନ୍ନେ ମିରୁ ହାଲ୍‌ବନ୍ ମୁଃଏରି ।” 22ଏଦାବାଗା ଜିହୁଦିଙ୍ଗ୍ ତାରୁ ତାରୁ ୱେସ୍‌ପିଆତେରି, ଇୱାଞ୍ଜି ଇନ୍ନା ତାନୁ ତା ଗାଣ୍ଡି ପାଗନ୍ ବାଗା, “ନାନୁ ଇମ୍ୱିନ୍‌ଇନ୍ଦା ହାଜ୍ଜିମାଃଇ ଏନ୍ନେ ମିରୁ ହାଲ୍‌ବନ୍ ମୁଃଏରି” ଇଞ୍ଜାନ୍ ୱେସ୍‌ପିନ୍ନେଞ୍ଜିମା ? 23ଏମ୍ବାଟି ଏୱାଞ୍ଜି ଏୱାରିକି ୱେସ୍ତେଞ୍ଜି, “ମିରୁ ଇ ପୁର୍ତିତାୱାଟି ପ୍ଲିଆଞ୍ଜେରି, ମତ୍ର ନାନୁ ସର୍ଗତାୱାଟି ୱାମାଃଇ, ମିରୁ ଇ ପୁର୍ତିତି କୁଇଙ୍ଗ୍‌ନାତେରି, ମତ୍ର ନାନୁ ଇ ପୁର୍ତିତି କୁଏଞ୍ଜ୍‌ତାନୁ ଆଃଏ । 24ଏଦାବାଗା ମିରୁ ମି ପାପତାୱା ହାଦେରି, ନାନୁ ମିଙ୍ଗେ ଇଦା ୱେସ୍ତାତେଃଏ; ଇନାକି ନାନୁ ଜେ ଏ କୁଏଞ୍ଜ୍‌ତାନୁ, ଇଦା ମିରୁ ମାଞ୍ଜାଡ଼ି କିଃଆତେସି ମିରୁ ମି ପାପତାୱା ହାଦେରି ।”

25ଏମ୍ବାଟି ଏୱାରି ତାଙ୍ଗେ ୱେଚ୍ଚେରି, “ନିନୁ ଏମ୍ବେନାତି ?” ଜିସୁ ତାଙ୍ଗେ ୱ୍ଡେପ୍‌ଚ୍ଚି ୱେସ୍ତେଞ୍ଜି, “ନାନୁ ନା କୁଲାଟି କାହେଟେଃଏ ଇନ୍ନା ୱେସାମାଃଇ, ନାନୁ ଏୱାଞ୍ଜ୍‌ତାନୁ । 26ମି ଡ଼ଃଆନ୍ କୁଲାଟି ବିଚାର କିଅନ୍ ବାଗା ନା ରେଃଏସ୍ ଗାପ୍‌ଚି ପରମାନ ମାନ୍ନେ; ମତ୍ର ନାଙ୍ଗେ ପାଣ୍ଡାଞ୍ଜାନାଞ୍ଜି ନିଜ୍ଜା, ଆଟେ ନାନୁ ତା ତାୱାଟି ଇନ୍ନା ଇନ୍ନା ୱେଞ୍ଜାମାଃଇ, ୱାର୍ରି ଏୱା ହାବେ ପୁର୍ତିତିଦି ୱେସ୍‌ପିମାଃଇ ।”

27ଏୱାଞ୍ଜି ଆବାତି କୁଲାଟି ଏୱାରିକି ଇନ୍ନା ୱେସ୍‌ପିଚ୍ଚେଞ୍ଜି, ଇଦା ଏୱାରି ବୁଜ୍ଜି ଆଃଆତେରି । 28ଏଦାବାଗା ଜିସୁ ୱେସ୍ତେଞ୍ଜି, ଏଚ୍ଚିକିଃଆ ମିରୁ କୁଏଞ୍ଜି ମ୍ରିଃଏଞ୍ଜିକି କ୍ରୁସ ୱାନ୍ଦା ନିପ୍‌କନ୍ ଆନେ, ଏଚିତୁକାତାୱା ନାନୁ ଜେ ଏୱାଞ୍ଜ୍‌ତାନୁ ଅଟେ ନାନୁ ନା ତାୱାଟି ଇନ୍ନା କିଆହେଃଲ୍ଲାନୁ, ମତ୍ର ଆବା ନାଙ୍ଗେ ଇନିମିଡି ଗ୍ରାପ୍‌ତାତେଞ୍ଜି, ଏଚିଡେହେଙ୍ଗ୍ ଇ ହାବେତ୍ କାତା ୱେସ୍‌ପିଞ୍ଜା, ଇଦା ମିରୁ ପୁଞ୍ଜେରି । 29ନାଙ୍ଗେ ପାଣ୍ଡାଞ୍ଜାନାଞ୍ଜି ନା ଡ଼ାହି ମାନ୍ନେଞ୍ଜି; ଏୱାଞ୍ଜି ରଃଅତ୍ ନାଙ୍ଗେ ପିହାହେଲ୍ଲାଦାଃଏଞ୍ଜି, ଇନାକି ନାନୁ ଦିନାଙ୍ଗେଃଏ ତାନୁ ରାହାଙ୍ଗ୍ ଆଅନ୍‌ତି କାମା କିମାଃଇ । 30ଏୱାଞ୍ଜି ଇ ହାବେତ୍ କାତା ୱେସ୍‌ପନେଃଏ, ଏଗେଲ୍ ଦାଲ୍ଲା ତାଙ୍ଗେ ମାଞ୍ଜାଡ଼ି କିତେରି ।

ଉଦ୍ଦାଗାଟାଞ୍ଜି ଅଟେ କାମ୍ବାରେଏଞ୍ଜି

31ଏମ୍ବାଟି ଜିସୁ ତାଙ୍ଗେ ମାଞ୍ଜାଡ଼ି କିନ୍ନି ଜିହୁଦିଙ୍ଗ୍‌ନିକି ୱେସ୍ତେଞ୍ଜି, “ଜଦି ମିରୁ ନା ବାକ୍ୟ ଡ଼ାହି ରଞ୍ଜାନ୍ ବାସାଆଦେରି, ଇଚ୍ଚେସି ମିରୁ ନିଜ୍ଜାନେଃଏ ନା ଗ୍ରାମ୍ୱାଗାଟାତାତେରି । 32ଆଟେ ମିରୁ ନିଜ୍ଜାତିଦି ପୁଞ୍ଜେରି ଅଟେ ଏ ନିଜ୍ଜା ମିଙ୍ଗେ କୁଲ୍‌ତାନେ ।” 33#ମାତି ୩:୯; ଲୁକ ୩:୮ଏୱାରି ତାଙ୍ଗେ ୱ୍ଡେପ୍‌ଚ୍ଚି ୱେସ୍ତେରି, “ମାମୁ ଅବ୍ରାହାମତି ପୁଣ୍ଡି ଆଟେ ଏଚ୍ଚେକ୍‌ୱାଡ଼େ ଇନ୍ଦାର୍ କାମ୍ୱାରାଙ୍ଗା ଆହେଃଲ୍ଲାମୁ, ଏହେଙ୍ଗ୍ ଆତେସି ମାଙ୍ଗେ କୁଲ୍‌ପା ପାଁଣ୍ଡେର୍ ଇଞ୍ଜାନ୍ ନିନୁ ଇନିସ୍ ୱେସ୍‌ପିଞ୍ଜାଦି ?”

34ଜିସୁ ଏୱାରିକି ୱ୍ଡେପ୍‌ଚ୍ଚି ୱେସ୍ତେଞ୍ଜି, “ନାନୁ ମିଙ୍ଗେ ନିଜ୍ଜାନେଃଏ ୱେସ୍‌ପିଞ୍ଜା, ଏମ୍ୱେନାଞ୍ଜି ପାପ କିନ୍ନେଞ୍ଜି ଏୱାଞ୍ଜି ପାପତି କାମ୍ବାରେଏଞ୍ଜି । 35କାମ୍ବାରେଏଞ୍ଜି କାଲେଙ୍ଗ୍‌କାଲା ବାଗା ଇଜ୍ଜା ବାସାଆଃଏଞ୍ଜି, ମତ୍ର ମ୍ରିଃଏଞ୍ଜି କାଲେଙ୍ଗ୍‌କାଲା ବାସାଆନେଞ୍ଜି । 36ଜଦି ମ୍ରିଃଏଞ୍ଜି ମିଙ୍ଗେ କୁଲ୍‌ତାନେଞ୍ଜି, ଏହେଙ୍ଗ୍ ଆତେସି ମିରୁ ନିଜ୍ଜାନେଃଏ କୁଲ୍‌ପା ପାଁଣ୍ଡେରି । 37ମିରୁ ଜେ ଅବ୍ରାହାମତି ପୁଣ୍ଡି ଏଦା ନାନୁ ପୁଞ୍ଜାମାଃଇ; ମତ୍ର ନା ବାକ୍ୟ ମି ହଡାଙ୍ଗିଃଆ ଗ୍ରହନ କିଃଏଟେଃଏ, ମିରୁ ନାଙ୍ଗେ ପାଗନ୍ ବାଗା ସେସ୍ଟା କିଞ୍ଜାଦେରି । 38ନାନୁ ନା ଆବାତାୱାଟି ଇନ୍ନା ଇନ୍ନା ହୁଡ଼ାମାଃଇ, ଏୱା ହାବେ ୱେସ୍‌ପିଞ୍ଜା, ମତ୍ର ମିରୁ ମି ଆବାତାୱାଟି ଇନ୍ନା ଇନ୍ନା ୱେଞ୍ଜାଞ୍ଜେରି, ଏୱା ହାବେ କିଞ୍ଜେରି ।”

39ଏୱାରି ତାଙ୍ଗେ ୱ୍ଡେପ୍‌ଚ୍ଚି ୱେସ୍ତେରି, “ଅବ୍ରାହାମ ମା ଆବା ।” ଜିସୁ ଏୱାରିକି ୱେସ୍ତେଞ୍ଜି, “ଜଦି ମିରୁ ଅବ୍ରାହାମତି ମ୍ରିକା, ଇଚ୍ଚେସି ଅବ୍ରାହାମତି କାମା କିଦେର୍‌ମା, 40ମତ୍ର ଏମ୍ୱେନାଞ୍ଜି ମିଙ୍ଗେ ମୁଲାପେନୁତାୱାଟି ୱେଞ୍ଜାନ୍ନି ନିଜ୍ଜା ୱେସ୍‌ପିଞ୍ଜାନେଞ୍ଜି, ଇହିଙ୍ଗ୍‌ତି କୁଏଞ୍ଜି ଜେ ନାନୁ, ନାଙ୍ଗେ ହାଦାଡ଼ି ପାଗନ୍ ବାଗା ସେସ୍ଟା କିଞ୍ଜାଦେରି; ଅବ୍ରାହାମ ଇହିଙ୍ଗ୍‌ତି କାମା କିଃଆତେଞ୍ଜି । 41ମିରୁ ମି ଆବାତି କାମା ହାବେ କିଞ୍ଜେରି ।” ଏୱାରି ତାଙ୍ଗେ ୱେସ୍ତେରି, “ମାମୁ ଦାରିକାମାତାୱାଟି ପ୍ଲିଆହେଃଲ୍ଲାମୁ; ରଃଅଞ୍ଜେଃଏ ମା ଆବା, ଏୱାଞ୍ଜି ଆଇନ୍ନେଞ୍ଜି ମୁଲାପେନୁ ।”

42ଜିସୁ ଏୱାରିକି ୱେସ୍ତେଞ୍ଜି, ମୁଲାପେନୁ ଜଦି ମି ଆବା ଆନ୍ନେଞ୍ଜିମା ଇଚ୍ଚେସି, ମିରୁ ନାଙ୍ଗେ ଜେଡା କିଆଦେରିମା; ଇନାକି ନାନୁ ମୁଲାପେନୁତାୱାଟି ୱାମାଃଇ; ଆଟେ ଇଦିମ୍ୱା ନା ଇଚ୍ଚାଟି ୱାହେଃଲ୍ଲାନୁ, ମତ୍ର ଏୱାଞ୍ଜି ନାଙ୍ଗେ ପାଣ୍ଡାଞ୍ଜାନେଞ୍ଜି । 43ମିରୁ ଇନ୍ନା କିଅନ୍ ନା କାତା ବୁଜ୍ଜି ଆଏହେଃଲ୍ଲେରି ? ମିରୁ ତ ନା ବାକ୍ୟ ୱେନ୍‌ବନ୍ ମୁପେହେଃଲ୍ଲେରି । 44ମିରୁ ହାବେତାତେରି ସଇତାନତି ମ୍ରିକା ଆଟେ ମି ଆବା ଆଇନ୍ନେଞ୍ଜି ସଇତାନ, ଆଟେ ମି ଆବାତି ଇଚ୍ଚା ସପଲ କିଅନ୍ ମି ଇଚ୍ଚା । ଏୱାଞ୍ଜି କାହେଟେଃଏ କୁଇଙ୍ଗ୍ ପାଗନ୍‌ତାଞ୍ଜି, ଆଟେ ତାନୁ ନିଜ୍ଜାଟି ବାସାଆଃଏଞ୍ଜି, ଇନାକି ତା ଟାକ୍କେ ନିଜ୍ଜା ହେଃଲ୍ଲେ । ତା ତାୱା କଲ ୱେସ୍‌ପନ୍‌ତି ୱାହୁ ମାନ୍ନି ବାଗା, ଏୱାଞ୍ଜି ଏଚ୍ଚିକିଃଆ କଲ ୱେସ୍‌ପିନ୍ନେଞ୍ଜି ଏଚିତୁକାତାୱା ଏୱାଞ୍ଜି ତା ତାୱାଟି ୱେସ୍‌ପିନ୍ନେଞ୍ଜି; ଇନାକି ତାନୁ କଲଗାଟାଞ୍ଜି ଅଟେ କଲଗାଟାଞ୍ଜିତି ଆବା । 45ମତ୍ର ନାନୁ ନିଜ୍ଜା ୱେସ୍‌ପିନ୍ନି ବାଗା ମିରୁ ନାଙ୍ଗେ ମାଞ୍ଜାଡ଼ି କିହେଲ୍ଲାଦାଃଏରି । 46ନା ପାଟ୍ଟି ପାପ ମାନ୍ନେ ଇଞ୍ଜାନ୍ ମି ତାୱାଟି ଏମ୍ୱେନାଞ୍ଜି ୱେସ୍‌ପନ୍ ମୁନେଞ୍ଜି ? ନାନୁ ଜଦି ନିଜ୍ଜା ୱେସ୍‌ପିଞ୍ଜା, ଇଚ୍ଚେସି ମିରୁ ଇନ୍ନା କିଅନ୍ ମାଞ୍ଜାଡ଼ି କିହେଃଲ୍ଲେରି ? 47ଏମ୍ୱେନାଞ୍ଜି ମୁଲାପେନୁତାୱାଟି ପ୍ଲିଆନ୍ନେଞ୍ଜି, ଏୱାଞ୍ଜି ମୁଲାପେନୁତି ବାକ୍ୟ ୱେନେଞ୍ଜି; ଇଦାବାଗା ମିରୁ ୱେଞ୍ଜେହେଃଲ୍ଲେରି, ଇନାକି ମିରୁ ମୁଲାପେନୁତାୱାଟି ପ୍ଲିଆହେଃଲ୍ଲେରି ।

ଜିସୁ ଅଟେ ଅବ୍ରାହାମ

48ଜିହୁଦିଙ୍ଗ୍ ତାଙ୍ଗେ ୱ୍ଡେପ୍‌ଚ୍ଚି ୱେସ୍ତେରି, “ନିନୁ ଆଇଞ୍ଜି ରଃଅଞ୍ଜି ସମିରନ କୁଏଞ୍ଜାତି ଅଟେ ନିଙ୍ଗେ ବୁତ ଆହାଞ୍ଜାନେ, ଇଦା ଇନ୍ନା ମାମୁ ନିଜ୍ଜା ୱେସ୍‌ପେ ହେଲ୍ଲାଦାଃଆମୁ ?”

49ଜିସୁ ଏୱାରିକି ୱ୍ଡେପ୍‌ଚ୍ଚି ୱେସ୍ତେଞ୍ଜି, “ନାଙ୍ଗେ ବୁତ ଆହାହେଲ୍ଲାଦାଃଏ, ମତ୍ର ନାନୁ ନା ଆବାନିକି ସନ୍‌ମାନ୍ ହିମାଃଇ, ଆଟେ ମିରୁ ନାଙ୍ଗେ ସନ୍‌ମାନ୍ କିହେଲ୍ଲାଦାଃଏରି । 50ନାନୁ ଗଉରବ ପାଁନ୍‌ବନ୍ ବାଗା ଇଚ୍ଚା କିହେଃଲ୍ଲାନୁ, ମତ୍ର ଏମ୍ୱେନାଞ୍ଜି ନା ବାଗା ଗଉରବ ଦାହ୍‌ପିନ୍ନେଞ୍ଜି, ଏହେଙ୍ଗ୍‌ତାଞ୍ଜି ରଃଅଞ୍ଜି ମାନ୍ନେଞ୍ଜି ଅଟେ ଏୱାଞ୍ଜି ନିଜ୍ଜା ବିଚାର କିନ୍ନେଞ୍ଜି । 51ନାନୁ ମିଙ୍ଗେ ନିଜ୍ଜା ୱେସ୍‌ପିଞ୍ଜା, ଜଦି ଏମ୍ୱେନାଞ୍ଜି ନା ବାକ୍ୟ ପାଲ୍‌ନି ଆନେଞ୍ଜି, ଏୱାଞ୍ଜି ଏଚ୍ଚେକ୍‌ୱାଡ଼େ ହାଃଏଞ୍ଜି ।”

52ଜିହୁଦିଙ୍ଗ୍ ତାଙ୍ଗେ ୱେସ୍ତେରି, “ହାଦାଡ଼ି ମାମୁ ପୁଚ୍ଚାମ୍ ଜେ, ନିଙ୍ଗେ ବୁତ ଆହାଞ୍ଜାନେ, ଅବ୍ରାହାମ ଅଟେ ବାବବାଦିଙ୍ଗ୍ ହାନ୍ନେରି, ଆଟେ ନିନୁ ୱେସ୍‌ପିଞ୍ଜି, ଜଦି ଏମ୍ୱେନାଞ୍ଜି ନା ବାକ୍ୟ ପାଲ୍‌ନି ଆନେଞ୍ଜି, ଇଚ୍ଚେସି ଏଚ୍ଚେକ୍‌ୱାଡ଼େ ଏୱାଞ୍ଜି ହାଃଏଞ୍ଜି । 53ନିନୁ ଇନ୍ନା ମା ଆବା ଅବ୍ରାହାମତାୱାଟି ଗାମିନାତି ? ଏୱାଞ୍ଜି ହାନ୍ନେଞ୍ଜି, ଅଟେ ବାବବାଦିଙ୍ଗ୍ ୱାଡ଼େ ହାନ୍ନେରି, ନିନୁ ନି ଗାଣ୍ଡି ଏମ୍ବେନାତି ଇଞ୍ଜାନ୍ ଏଲୁ କିଞ୍ଜି ?”

54ଜିସୁ ୱ୍ଡେପ୍‌ଚ୍ଚି ୱେସ୍ତେଞ୍ଜି, “ଜଦି ନାନୁ ନା ଗାଣ୍ଡି ଜୁଙ୍ଗେମାଃଇ ଇଚ୍ଚେସି ନା ବାଗା ଏ ଜୁଙ୍ଗନ୍ ଇନ୍ନାଦି ଆଃଏ; ନା ଇମ୍ୱିନ୍ ଆବାନିକି ମିରୁ ମି ମୁଲାପେନୁ ଇଞ୍ଜାନ୍ ମାନି ଆଇଞ୍ଜେରି, ଏୱାଞ୍ଜି ନାଙ୍ଗେ ଜୁଙ୍ଗେଞ୍ଜାନେଞ୍ଜି; 55ଆଟେ ମିରୁ ତାଙ୍ଗେ ପୁଞ୍ଜାହେଃଲ୍ଲେରି, ମତ୍ର ନାନୁ ତାଙ୍ଗେ ପୁଞ୍ଜାମାଃଇ । ଆଟେ ନାନୁ ତାଙ୍ଗେ ପୁଞ୍ଜାହେଃଲ୍ଲାନୁ ଇଞ୍ଜାନ୍ ୱେସିଃଇ, ଇଚ୍ଚେସି ନାନୁ ମି ଲାକ୍କାଟି କଲଗାଟାନୁ ଆଃଇ, ମତ୍ର ନାନୁ ପୁଞ୍ଜାମାଃଇ ଅଟେ ତା ବାକ୍ୟ ପାଲ୍‌ନି ଆଇମାଃଇ । 56ମି ଆବା ଅବ୍ରାହାମ ନା ଦିନା ହୁଡ଼ନ୍ ବାଗା ଆସା କିଆନ୍ ରାହାଙ୍ଗ୍ ଆତେଞ୍ଜି, ଆଟେ ଏୱାଞ୍ଜି ଏଦା ହୁଡ଼ାନ୍ ରାହାଙ୍ଗ୍ ଆତେଞ୍ଜି ।”

57ଜିହୁଦିଙ୍ଗ୍ ତାଙ୍ଗେ ୱେସ୍ତେରି, “ନିଙ୍ଗେ ତ ହାଦାଡ଼ି ଟିକ୍‌ନା ରି କୁଡ଼ି ଦାସା ଅଁଣ୍ଡୁ ଆହେଃଲ୍ଲେଏ, ନିନୁ ଇନ୍ନା ଅବ୍ରାହାମନିକି ହୁଡ଼ାଞ୍ଜି ?” 58ଜିସୁ ଏୱାରିକି ୱ୍ଡେପ୍‌ଚ୍ଚି ୱେସ୍ତେଞ୍ଜି, “ନାନୁ ମିଙ୍ଗେ ନିଜ୍ଜାନେଃଏ ୱେସ୍‌ପିଞ୍ଜା, ନାନୁ ଅବ୍ରାହାମ ପ୍ଲିଃଏଟେଃଏ ମାଃଇ ।” 59ଏମ୍ବାଟି ଏୱାରି ତାଙ୍ଗେ ଜିଅନ୍ ବାଗା ୱାଲ୍ଲିଙ୍ଗ୍ ପେଗ୍‌ଦେରି, ମତ୍ର ଜିସୁ ମ୍ରାଗାନାହି ମନ୍ଦିରତାୱାଟି ହଚାନ୍ ହାଚ୍ଚେଞ୍ଜି ।

Currently Selected:

ଜହନ 8: DWK

Highlight

Copy

Compare