Ma-thi-ơ 2

Bơl yau gưt jhai jru u Hê-rôt

1Tơt Brah Jê-sus ja đôh laa a poh Bêt-lê-hem kwaal Ju-đê, klap snđach Hê-rôt kan bôôk, geh pal yau gưt jhai jru#2:1 yau gưt jhai jru: Klap khal hư, bơl yau gưt jhai jru au pal smanh n'hai baak ntur bu ri hơơi wơng troong rơih rpach. a mak kơơt nar tơt poh Jê-ru-sa-lem ôp laah: 2“Snđach raih Jo-thai mhei lgơơch a êch? Đươm bơl hei ja sau smanh Pang mak kơơt nar mơ lôh jah tư wơơl Pang.” 3Ttang baak nei, snđach Hê-rôt pôl leq poh Jê-ru-sa-lem kot rhơq rpơq. 4Snđach pơrgum bơl yau thwaai ndap ttơơm u bơl yau gưt jhai jru knông raih jah ôp bu: “Yaang Krist kươt lgơơch a êch?” 5Bu ơh: “Tu poh Bêt-lê-hem kwaal Ju-đê; đươm geh baak grnưt noor ja 'bian laah:

6‘Ơi Bêt-lê-hem, klung Ju-đê!

Ay 'bưn dêq ơơn huôih pal poh daak bôôk knông teh Ju-đê,

Đươm a ay a kươi lôh sot mbu kan bôôk,

Bu a kươi tiêp gwaal raih I-sra-ên Hei ri.’”

7Hê-rôt pileng khuôl bơl yau gưt jhai jru lôh jah wơng gưt srlah teq u nar khay smanh ja lôh sot. 8Ja nei snđach maanh bu han tơt poh Bêt-lê-hem u pn'ak: “Phrui han ôp ngan srlah teq u koon ksei nei; tơt wơng a mơp hôm, phrui aan hei gưt jah hei kot lôh tư wơơl Pang.” 9Iat snđach tơmbơh luôih, bu han drơh. Tôw, smanh bu ja sau mak kơơt nar han noor bu aan tơt ktôk koon ksei gôq mơ srung. 10Tơt sau smanh, bu broh s'bai đat. 11Mưt tơt nhi, bu sau koon ksei u Ma-ri, mei Pang, nei kơl tuq smbah Pang. Ja nei bu pơơk pơr op maih diên, piyơ aan Pang ntil griêng laa maih, jral chhơm u kơrya tang. 12Kơi nei, knông mbơơi, bu kươt Brah Ưn tơmbơh aan gưt khơơm plơq kơơi ktôk snđach Hê-rôt, mơ bu han troong êêng baah siq nggoor nơơm.

Het kup u Ai-kap

13Tơt bơl yau gưt jhai jru ja han, mbu lênh Brah ri lôh tơt n'hai Jô-sep knông mbơơi u tơmbơh laah: “Phrui kah bêch, liêu koon ksei u mei Pang het kup u Ai-kap! Khang gôq ktôk tôw aan tơt jơl hei tơmbơh maanh, đươm snđach Hê-rôt êch wơng koon ksei nei jah lưm.” 14Plah mang, Jô-sep kah bêch, liêu koon ksei u mei Pang het kup u Ai-kap, 15ja nei khang gôq ktôk tôw aan tơt jơl snđach Hê-rôt chhưt. Kaar au lôh tơt jah baak Brah lah rlach bơl grnưt noor kươt dip plak: “Hei ja khuôl Koon Hei sot rlach Ai-kap.”

16Tơt gưt bơl yau gưt jhai jru lhiat nơơm, snđach Hê-rôt hao nuih đat, maanh lưm leq sêch koon ksei klau a baar snam u kươi tal poh Bêt-lê-hem u pal kwaal dơơh, tênh dip nar khay baah bơl yau gưt jhai jru ja aan snđach gưt. 17Bei nei, baak yau grnưt noor Jê-rê-mi ri ja mor kươt dip plak:

18“Bnih bu ttang tu Ra-ma

Baak chhong rmlơng, nhim ngliêng ji kôr;

Nei laa Ra-chên nhim bơl koon nơơm,

Pa 'bưn dol nđum nđiêng,

Đươm bơl bu 'bưn nh'hơơm hôm.”

19Di kươi snđach Hê-rôt chhưt, mbu lênh Brah ri lôh tơt n'hai Jô-sep knông mbơơi tu Ai-kap, u tơmbơh laah: 20“Phrui kah bêch liêu koon ksei u mei Pang plơq siq teh I-sra-ên, đươm pal bnih wơng lưm koon ksei nei ja chhưt hơơi.” 21Jô-sep kah bêch, liêu koon ksei u mei Pang plơq siq I-sra-ên. 22Đươm tơt ttang A-chê-la-u tơrbuôt grei bươp laa snđach Hê-rôt kan bôôk kwaal Ju-đê nei Jô-sep n'hông, 'bưn baanh siq ktôk au. Huôih nha, kươt tơrsau knông mbơơi mơ bu tơt kwaal Ga-li-lê, 23gôq knông poh chôôl laa Na-sa-ret. Bei nei, baak bơl grnưt noor ja mor kươt dip plak: “Pang a kươi kươt chôôl laa bnih Na-sa-ret.”#Mak 1:24; Lu 2:39; Ja 1:45.

Currently Selected:

Ma-thi-ơ 2: SBL2024

Highlight

Copy