Luk 23

Enang Yisu bêng heva Pailat mandaluk

(Mat 27:11-14; Mak 15:1-5; Jon 18:28-38)

1Me ŋa takatu iviyô me iwa Yisu be ê vo Pailat. 2Yôv me îmbî ambô hethak yêni nena, “Yoô tung ôpiti henang ethak yoô ning avîlanô vo ende dômîm lîlîng êndêng gakmang. Yêni hêndô yoôŋgêv takis êndêng Sisa lêk henang nena yêni me Mesaya, king te.”

3Me Pailat henang ik Yisu ling nena, “Ong me ŋa Juda ning king mesa?”

Me Yisu henang nena, “Hîtôm ditu ong da honang.”

4Yôv me Pailat henang ethak ŋa bêŋbêng îmbôk da lêk avîlanô nômbêng atu nena, “Mî ya hatung yêni ya kambom te amî.”

5Metom enang lêklokwang nena, “Yêni hîndông avîlanô be helela ining auk heveng Judia sapêng. Muŋdaluk hêk Galili me hêlêm hele be hêyô long iti.”

6Pailat helaŋô ambô êng me henang ik loho ling nena, “Ôpêng me anô Galili te e?” 7#Luk 3:1Pailat helaŋô nena Yisu hêlêm nang Galili, êng me hêv yêni be hê vo Helot vômbê nena yêni heyaŋging long êng. Wak êng me Helot hîmô Jelusalem hiving.

8Me Helot hêyê Yisu be la mavî anông vômbê nena bôk helaŋô kôkôthing hethak Yisu be la hiving ninjê yêni, metom mî hele be lêk hêyê yêni be ditu la hiving nembong nôm thamtham te vo ninjê. 9Be ditu Helot henang ik Yisu ling bêng anông metom yêni bonong yom. 10Me ŋa bêŋbêng îmbôk da lêk kîdôŋga ambô balambung takatu be eva long êng enang ambô lêklokwang be îmbî yêni hethak ambô lomaloma. 11Êng me Helot lêk ya ŋa vovak iwa kwêv dêim te hîtôm king ining kwêv be ik hîlôk Yisu me enang ambôma be emalîk ethak yêni. Yôvêm me Helot hêv yêni be hê vo Pailat hethak loŋbô. 12Sêmbôk me Helot lo Pailat êyê i hîtôm ŋakyo, metom lêk me thêi ivutak ŋa môlôô.

Pailat henang be ik Yisu hethak alovalasing

(Mat 27:15-26; Mak 15:6-15; Jon 18:38-19:16)

13Yôv me Pailat helam ŋa bêŋbêng îmbôk da lêk ŋa Juda ning avaka lêk avîlanô doho be êlêm ethak tom. 14Me henang nena, “Môlô wa anô ti hêlêm hêndêng ya me môlô nang nena anô ti henang ambô yôhîng be hêvôv avîlanô vo êndô gakmang. Be lêk ya hanang ik yêni ling heva môlô malemim hethak nôm takêng, metom mî ya hatung ôpiti ya kambom takatu be môlô nang yêni bêng ethak amî. 15Me Helot ya auk me bêng yom, be ditu hêv ôpiti hêlêm vo aô hethak loŋbô. Ondaŋô. Ôpiti mî hevong kambom te be tem ya nang vo iŋgik yêni vônô amî. 16-17Be ditu tem yambali yêni yôvêm me ya tak inda bini.”#23:16-17 Kapua ambô Glik doho me Luk mî hekavu amî metom yôv keme anô doho ekavu heveng yam bêŋiti: Sondakbêng nômbêng iti ya Waklavông Hêv Lîlîng me thak êv anô kalaondong te vê be hê hêndêng loho.

18Metom avîlanô sapêng elam lêklala nena, “Uŋgik ôpitu vônô me otak Balabas be nêlêm êndêng yoô.” 19(Balabas me ôpatu be hik vovak hiving Lom ining gakmang hîmô Jelusalem kapô be hik anô vônô, be ditu etak yêni hîlôk kalaondong.)

20Yôv me Pailat hevong vo netak Yisu bini, be ditu helam hêndêng avîlanô hethak loŋbô. 21Metom loho lam lômbôlông nena, “Uŋgik vônô ethak alovalasing! Uŋgik vônô ethak alovalasing!”

22Yôv me Pailat henang bôlô ali lô hêndêng loho nena, “Hethak ômbê? Yêni hevong ômbê kambom? Ondong te mî hîmô vo yaŋgik yêni vônô amî. Be ditu tem yambali inda me ya tak yêni bini.”

23Metom loho lêklokwang kambom be elam kaêk lêkwaê nena iŋgik Yisu ethak alovalasing. Loho ning kaêk êng me hîvô hethak be Pailat helaŋô. 24Be ditu Pailat la hêv nena yêni sopa loho ning ambô 25be hetak ôpatu be hîmô kalaondong hê êndêng loho hîtôm enang ik ling, me hêv Yisu hîlôk ŋa vovak baheŋing hîtôm avîlanô ning leŋing iving.

Ik Yisu hethak alovalasing

(Mat 27:32-44; Mak 15:21-32; Jon 19:17-27)

26Loho iwa Yisu be ê me êpôm Saimon nang Sailini hîlôk loŋdaŋlê be hê vini Jelusalem. Me ŋa vovak evalong yêni be êv Yisu ya alovalasing be hiwa be heveng Yisu yam.

27Me avîlanô bêng anông esopa yêni lêk avî takatu be eleng athêng malêng ethak yêni me loho sapêng iving be ê. 28Metom Yisu hik i lîlîng me henang ethak loho nena, “Môlô avî Jelusalem, dô ondeng ethak ya andô. Me ondeng vo amda lêk nalumi. 29#Luk 21:23Ondaŋô. Wakma te tem nêyô be malêing bêng tem nêpôm avîlanô be tem enang nena, ‘Mavî vo avî yamu takatu be sêik mî be mî êv sum êndêng sêik amî.’ 30#Hos 10:8; ALK 6:16Wak êng me avîlanô tem enang êndêng dumlôlê sapêng nena, ‘Ôŋgêv yak êyônjêk yoô be uthivung yoô thing.’ ”

31“Lêk evong kambom hêndêng alokwang lêkmala, be ditu tem embong ômbête êndêng alokwang kapôk?#23:31 Ambô ti ya ondong nena alokwang lêkmuk me anô ya kambom mî me alokwang kapôk me ŋa evong kambom bêng anông.”

32Me loho iwa anô vanî yi hiving vo iŋgik vônô imbing Yisu. 33Loho ê êyô long atu be elam nena Kwandôk Lokwang. Me loho êthôkêng Yisu lêk anô vanî yi atu hethak alovalasing. Êthôkêng yang heva Yisu bang viyôhôk me yang heva bang vikeng. 34#Sng 22:18; Ais 53:12Me Yisu henang nena, “Wakamik, nôŋgêv loho ning kambom vê vômbê nena loho thông paling be evong.” Yôvêm me ŋa vovak îmbî valu vo injê nena opalête tem nimbua ya thôp.

35 # Sng 22:7-8 Avîlanô eva be êyê me ŋa bêŋbêng îmbî yêni lîlîng be enang ambôma nena, “Bôk yêni hêv avîlanô vi livung yôv be nêŋgêv yêni da livung imbing, vômbê nena yêni me Mesaya, ôpatu be Wapômbêng bôk hîtôk yôv.”

36 # Sng 69:21 Me ŋa vovak êyô hiving be enang ambôma me êv waing maning hêndêng yêni. 37Me enang nena, “Ong ŋa Juda ning king e? Yôv be nôŋgêv ong da livung.” 38Me ekavu ambô te heva Yisu viling bêŋiti,

ÔPITI ME ŊA JUDA NING KING.

39Anô vanî yi atu be êthôkêng hiving Yisu yang henang ambôma hêndêng yêni nena, “Ong Mesaya e? Yôv be nôŋgêv ong da livung me yêi imbing.”

40Metom yang helaŋô ambô êng me hethang yang êng be henang nena, “Tem noma bêng yom me hevong bisê be mî hôkô Wapômbêng amî? 41Ai vong kombom kambom bêng anông be ditu thêthôp vo êv vovang hêndêng ai, metom ôpiti me mî hevong kambom te amî.” 42Yôv me henang nena, “Yisu, wakma huvutak hîtôm king hîmô yong lêkliŋyak bêng kapô me lem êŋgêv ya.”

43Me Yisu henang nena, “Ya hanang avanông bing ethak ong nena, yaô tiêng yom me tem nômô imbing ya îmô long lêkmaŋging#23:43 Long lêkmaŋging ya ondong ethak ambô Glik me kukapô. Ŋa Juda leŋing êv nena long lêkmaŋging atu me hîtôm Kukapô Iden hêndêng wakma Adam lo Iv mî evong kambom denang amî. Long lêkmaŋging me hîmô melak leng be avîlanô thêthôp ê îmô long êng êndêng wakma ema. kapô.”

Yisu hema

(Mat 27:45-56; Mak 15:33-41; Jon 19:28-30)

44-45 # Hib 6:19-20; 10:19-20 Bidong oyang waklîvông bing me momaŋaning bêng hêyô pîk sapêng vôv be hêk hele be hêyô wakma lô. Me kwak bêng atu be êthôkêng heva melak matheng kapô hipupkê hê luvi. 46Me Yisu helam kaêk lêklokwang nena, “Wakamik, ya hatak ya dôhôlông hîlôk bahem.” Henang bêng yôv me auk hivutak be hê me hema.

47Me vovak lêik ining anômbêng hêyê nôm êng me yêni hêv Wapômbêng ya athêng ling be henang nena, “Avanông bing, ôpiti me kambom mî.” 48Me avîlanô takatu be ethak tom be eva vo injê, loho yê nôm êng be kapôlôŋing malêing bêng be ê. 49Metom Yisu ya ŋa môlôô lêk avî takatu be esopa yêni hêk Galili be êlêm, loho va dêim doke me êyê nôm takatu be hivutak.

Elav Yisu

(Mat 27:57-61; Mak 15:42-47; Jon 19:38-42)

50-51Me anô Alimatia te nang Judia hîmô be ya athêng nena Josep. Yêni heyambing waklavông atu be Wapômbêng ya lêkliŋyak bêng te nêlêm pîk. Yêni me anô mavî lêk anô thêthôp be yêni me ŋa Juda ning ŋa elaŋô ambô te. Be mî hîlôk hethak loho ning auk atu be ik Yisu vônô amî. 52Be ditu hê hêndêng Pailat me henang ik ling vo nimbua Yisu ya kôpik. 53Êng me hiwa Yisu liŋkôpik hîlôk hivup me hivuliv thing hethak kwak me hiwa be hê hêndô hêk kalang lêkmuk atu be ekolop valu be ambuang vo etak ŋa ema injêk. Kalang êng me mî bôk êndô ŋama te hêk amî denang.

54Sabat lêk bidong oyang be avîlanô epesang i vo injê waklavông êng. 55Be ditu avî takatu be esopa Yisu hêk Galili be êlêm me esopa Josep be ê êyê kalang atu be êndô Yisu liŋkôpik hêk vo injê nena etak inda hêk bisê. 56#Etak Ijip 20:10; Lo 5:14Yôv me avî takêng ê ining melak me epesang nôm uv mavî lêk wel. Me Sabat hêyô me iwa lovak hîtôm balambung henang.

Currently Selected:

Luk 23: YMP

Highlight

Compare

Copy