Luk 10
10
Jisute bahattorṭeʹ cela kolkeʹkoe
1Niâ tayom Probhu Jisute arho bahattorṭeʹ cela Issoraʹ katha procar kâmire kolkolaʹte bachongekeʹkoe. Âni aiʹ akako ṭola ar akako jagare caʹlaʹ ṭhiklede anako sanam jaga caʹ lahare celako barya baryaketeʹ kolkeʹkoe. 2Ar Jisute angko metakeʹkoe, "Fosol aimagiâ, kheʹ kâmi âdmido thoṛagiâko. Analaʹte fosolren mâlikṭheʹ koijongpe jate Ânite nijeyaʹ fosol getlaʹte âdmiko kolkoe.#Mothi 9:37-38
3Apedo caʹpe! Ghenga târup talare bhiṛi hoponko laka ingte ape kolpekâning. 4Ṭhepnaʹ beg, jhola se bâṛti jutâ saote alo engeyape, ar ḍaharre ekeho alo subheccha makoape.
5Ape je oraʹre caʹpehaʹ palhere menpehaʹ, 'Niâ oraʹre sânti hoʹman.' 6Ar aṛe judi sântiren âdmi tahene tahale sânti âni cetanre tahenhaʹ, bangkheʹ apeṭheʹ âcur hijuʹhaʹ. 7Ana oraʹrigi tahenape, ar angkote jahanaʹgi mapekohaʹ inâgi jom nuiape, karon eke kâmie ânido beton namiʹ joggokane. Miṭiʹ oraʹ bâgiketeʹ ar miṭiʹ oraʹre alo caʹape.
8Paseʹ jaha ṭolare caʹape ar aṛenkhoiʹ âdmikote ape atangpeyako, tahale ape jagi jomlaʹ mapeyako inâgi jomape. 9Ana ṭolaren ruâ âdmi manjakope ar angko metakope, 'Issoraʹ Rajjo apeṭheʹ hiʹkana.'#Mothi 10:7-8
10Kheʹ paseʹkore jaha ṭolare caʹape ar aṛenkhoiʹ âdmite ape bang atangpeyako tahale ana ṭolanaʹ ḍahar ḍaharte caketeʹ niâ katha menpe, 11'Apeyaʹ ṭolare akaṭaʹ dhurâ aleyaʹ Jangare lagatʹkana, anaho apeyaʹ biruddhe koṭa giṛikedale. Taoho ape baṛe dohepe je, Issoraʹ Rajjo hiʹngekana.' 12Ingte ape metapekâning, bicârnaʹ dinre ana ṭola khoiʹ borong Sodom sohornaʹ obostha aima saho laka hoʹhaʹ."
Binpâtyuniʹ âdmiko laʹte Jisuoaʹ sabdhan katha
13"Botor Korasin, botor Boithsoida, jeko asarjo kâmi ape talare rikâ hokana ana judi Sor ar Sidon sohorre rikâhoʹahoteʹ, tahale aima din laharigi angko coṭ soroʹketeʹ ar angkoaʹ nijeoaʹ cetanre toreʹ chiṭuketeʹ duruʹlenako, uduʹkolaʹ je angkoaʹdo pap khoiʹ mon âcurngekantakoa. 14Sârigi, bicârnaʹ dinre Sor ar Sidonnaʹ obostha borong ape khoiʹ aima sahe laka hoʹhaʹ. 15He Kofornâhum! Am bole sorgo dhâbiʹ usuloʹmahaʹ? Amdo patal dhâbiʹ agrongenmahaʹ!"#Mothi 11:21-23
16Jisute arho aiʹren celako metakeʹkoe, "Ekeko apeyaʹ Katha atenako angkodo Ingâʹgi katha atenako. Ar ekete ape bang atangpeyako angkotedo Inggi bang atangingâko. Ekete Ing bang atangingâko, Ing ekete kolkâdinge angkote Ânigi bang atangiâko."
Celakodo akoaʹ obikgota Jisu baṛesokidiâko
17Angko bahattorṭeʹ cela hub salaʹ âcur hiʹketeʹ menkedako, "Probhu, Amaʹ nutumketeʹ menkheʹ kharap attako dhâbiʹ ale manoleyako!"
18Jisute angko metakeʹkoe, "Ingte Sorgo khoiʹ Soitan bijli camkoʹ lakaketeʹ ujugoʹte lelkâdiying. 19Lelpe, Ingte ape bing ar kidingkaṭkom cetantora daraketeʹ caʹaʹ khomota makaʹpeing ar aperen dusmân Soitanaʹ sanam suktinaʹ cetanreho khomota makaʹpeing. Jahegi apeyaʹ oho khutiako. 20Kheʹ kharap atta apeyaʹ katha atenako mente alo huboʹape borong sorgore apeyaʹ nutum ol hokana mente huboʹape."
Issor hoʹkane Sorgo ar dhârtiren Probhu
(Mothi 11:25-27)
21Tâkhni Jisu Pobitro attaoaʹ ma hubte pereʹketeʹ menkede, "He Baba, Amdo sorgo ar dhârtiren Probhukanam. Ingdo Amaʹ gourobing, karon Amdo niâko bisoi geni ar buddhimankoṭheʹ khoiʹ baiketeʹ dohokadam kheʹ gidrâ laka âdmiṭheʹ sodorkadam. He Baba, niâdo Amaʹ metʹre manjagi tahalena. 22Ingren Babate sanamgi Ing tire makâdinge, Bot bâgiketeʹ ar ekeho bang baṛeyako Hopontetʹdo ekekane, arho Hopontetʹ bâgiketeʹ ekeho bang baṛeyako Botdo ekekane. Niâ bâgiketeʹ Hopontetʹte ekeṭheʹ Bot sodorilaʹ icchie kebol ânigi baṛeye."
Issor Aiaʹ gen sodorkaʹtene
23Niâtayom Âni celako hate âcurketeʹ angko goponte metakeʹkoe, "Ape jeko lelnamdape, anako eke lelnamako angkodo dhonnogiâko! 24Karon Ingte ape metapekâning, ape ja ja lelnamdape, aima nâbi ar raja lellaʹ namketeʹho bang lelnamkadako, ar ape ja ja atendape, ana atenlaʹ namketeʹho bang aten namkadako."
Doyalu Somoriâaʹ cetʹaʹ lopor
25Miʹ jhikâ miṭiʹ dhormo masṭar Jisuṭheʹ hiʹne. Jisu purikkhailaʹte âni masṭarte metakidie, "Guru, itâʹ cikilekheʹ ing ononto jiui nam dareinghâ?"
26Jisute âni metakidie, "Mosiaʹ ânre itâʹ ol menaʹa? Aṛe itâʹ paṛhokanam?"
27Ar âni dhormo masṭar uttorre menkede, "Am amaʹ goṭa ontor, goṭa atta, goṭa mon ar goṭa suktite amren Issor Probhu dulârim,#Dosarbiboron 6:5; Mothi 22:37; Mark 12:30 ar 'Amren sorkoren âdmiko nije laka dulârkom.'"#Lebiopustok 19:18
28Ânite âni metakidie, "Ṭhik uttor makadam, inâgi rikim, inâtigi jiui nammahaʹ."
29Kheʹ âni nijegi ṭhik udugoʹ laʹte Jisu metakidie, "Bhalo, ingren sorren âdmido ekekane?"
30Uttorre Jisu menkede, "Miṭiʹ âdmi Jirusalem khoiʹ Jiriho sohorre caʹ somai, ḍakataʹ tire paṛone. Angkote âni âdmiaʹ lugri boiʹketeʹ engngekeʹtaiako. Ar âni dalketeʹ admoraketeʹ dohoṭhoketeʹ cagenako.
31"Tayomte miṭiʹ purohit ana ḍaharte caʹsane ânite âni âdmi lelketeʹ panjortora cagene. 32Ṭhik engkagi miʹhor Lebio#10:32 Lebio Lebiokodo tahalenako Lebi bongsoren angkotedo Jihudi purohitko mundirre kâmi laʹte gorokosanako. ana jagare hiʹne ar âni lelnamketeʹ ânioaʹ panjortora cagene.
33"Inâtayom Somoriâ#10:33 Somoriâ Somoriâdo tahalenako Jihudiren bongsodhor. Angkotedo bidesiko baploleʹkoako. Angkodo Jihudiko lakado Jirusalemre Issor bang upâsonakâdiako. Jihudikotedo Somoriâko ghinâkosanako ar bang pâtyukosanako je, Somoriâkodo Issorren âdmikanako. prodisâmren miṭiʹ âdmiho ana ḍaharte caʹte caʹte âni âdmioaʹ sorre hiʹne, âni âdmi lelketeʹ ânioaʹ maia hontaia. 34Âni âdmioaʹ sorre caketeʹ ânite ânioaʹ haso cetanre sunum ar ânggurnaʹ pâurâ duloʹtaie ar tolgirikeʹtaie. Inâtayom aiʹren gadha cetanre âni deʹketeʹ miṭiʹ ḍeraoraʹre idiketeʹ âni seoya jotnokidie. 35Ar dosar din âni Somoriâte barya dinâr#10:35 Dinâr Miʹ dinâr mane hoʹkana miṭiʹ âdmi miʹ dinre je ṭhep kâmiketeʹ name. oṛoʹketeʹ ḍeraoraʹren mâlik maʹkidie ar metakidie, 'Nâi âdmi jotonimahaʹ. Judi na khoiʹ ḍher khorocoʹtama, tahale ing âcur hiʹketeʹ amaʹ ana sodtamhuʹ.'"
36Cabare Jisu menkede, "Nitoʹ amaʹ itâʹ mone hoʹkantama? Neko pehor talare ekekane angko ḍakataʹ tire paṛouniʹ âdmiren panjorren âdmi?"
37Ânite dhormo masṭar menkede, "Je âdmite âni mayakâdie."
Tâkhni Jisute âni metakidie, "Caʹme amho caketeʹ engkem."
Martha ar Moriom
38Niâ tayom Jisu ar aiʹren celako ḍaharte caʹte caʹte jaha miṭiʹ ṭolare bolonako. Aṛe Martha nutumte miṭiʹ rejate khusiketeʹ aiaʹ oraʹre Jisu atangkidie. 39Moriom nutumte Martharen miṭiʹ mesra tahalene. Âni Probhuoaʹ jangaṭheʹ duruʹketeʹ Ânioaʹ katha atensane. 40Kheʹ Martha jomaʹ teyar laʹte besto tahelene. Anate ânite hiʹketeʹ menkede, "Probhu, Amte ki bang lel namengkanam, ingren mesra sanam kâmi ing cetanre giṛigirikade? Amte âni metai jate ânite ing gorogne."
41Tâkhni Probhu menkede, "Martha, Martha am melai bisoite cintâre menaʹmiâ ar bestogiâm. 42Kheʹ miṭiʹgi dorkari bisoi menaʹa ar Moriom ana manja bisoigi bachongekade, ana âniṭheʹ khoiʹ tisho enge banghoʹa."
Currently Selected:
Luk 10: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
