Luk 17
17
Pap ar pâtyunaʹ bisoite cedaʹ
(Mothi 18:6-7; 21-22; Mark 9:42)
1Jisute Aiʹren celako metakeʹkoe, "Papnaʹ ḍaharre idipe laʹte sanam somaigi lobh hijuʹhaʹ, kheʹ botoripe âni âdmi, ekeoaʹ talate ana lobh hijuʹa. 2Neko kâṭiʹko tala khoiʹ judi miʹhor jahete papnaʹ ḍaharte idie, tahale âniaʹ hoṭoʹre marang jatnaʹ diri tolketeʹ ânido marang gangare giṛido borong âni laʹte manjaoa. 3Ape sabdhanoʹpe, "Judi amren boiha amaʹ biruddhe pape tahale dhamkoi.
Judi âni ana pap khoiʹ mon âcurtene tahale âni mapgiriyi. 4Judi dinre satjhikâ amaʹ biruddhe âni onnaie ar satjhikâgi hiʹketeʹ metamie, 'Ing niâ onnai khoiʹ mon âcurkaʹtining tahale amte âni mapgiriyi."
Pâtyuonaʹ sukti
5Ar preritkote Probhu metakidiako, "Aleyaʹ pâtyu ḍhergiritalem."
6Probhu menkede, "Miṭiʹ kâṭiʹ goṭa jang laka pâtyu judi apeyaʹ tahentapeya, tahale ape jarsuddhâ totʹketeʹ caketeʹ nije marang gangare topagenapehoteʹ, niâ katha tut dare metailekheʹho niâ palonheʹ.
Manja das hoʹme
7Monepe, aperen miʹhorren das nahel side se bhiṛi âtingeʹkoe. Jâkhni âni kâmi âdmi maṭ khoiʹ hijuʹheʹ tâkhni ki âniren mâlikte âni metaiheʹ, 'saṭlaka caketeʹ jomlaʹ durub'? 8Bang anado oho metaye, borong metaiheʹ, ing laʹte jomaʹ teyar, ar ing tinkhâniʹ jom nuing inkhâniʹ ḍaṛa keṭeʹketeʹ seoa jotoning. Anatayom am jommahaʹ.' 9Âni kâmi âdmi âniaʹ hukum laka kâmikede anate ki ânite âni dhonnobad maiheʹ? 10Ana lakagi Issoraʹ sanam hukum laka sanam kâmi rikâ tayom ape menpe, 'Aledo opodartho daskanale. Aleyaʹ ja rikiaʹ ucit aledo kebol inâgi rikâkadale.'"
Dosṭeʹ kusṭho rugi manja
11Jisu Jirusalem caʹ somai Âni Somoriâ ar Gâlilnaʹ talate cane. 12Tâkhni jaha miṭiʹ ṭolare bolonkane, niâ somai dosṭeʹ kusṭo rugi Ânioaʹ samne paṛonako, angkodo sâhingre tengonako, 13ar garjoketeʹ menlaʹ lagonako "Jisu, guru, ale mayaolem!"
14Angko lelketeʹ Jisu menkede, "Caʹpe, purohitkoṭheʹ caketeʹ nije udugoʹpe."
Caʹte caʹte angko sucinako. 15Tâkhni angkoren miʹhor nije manjoʹte lelketeʹ garjoketeʹ Issoraʹ gourobhore âcur hiʹne, 16Ar Jisu jangare ḍoboʹodie ar Ânioaʹ dhonnobadlaʹ lagone. Ânido tahalene Somoriâ. 17Jisu uttorre menkede, "Dosṭeʹ ki bang manjakanako? Tahale ar noiṭeʹ âdmido akare? 18Issoraʹ prosongsa laʹte nâi bidesi âdmi bâgiketeʹ ar ekeho ki bang âcur hiʹlenako?" 19Tayomte Jisute âni metakidie, "Beretʹ, ar cagen, amaʹ pâtyutigi am manjakanam."
Issoraʹ rajjo hijuʹ bisoite cedaʹ
(Mothi 24:23-28, 37-41)
20Koekṭeʹ Forisite Jisu kulikidiako, "Issoraʹ rajjo tisoʹ hijuʹhaʹ?"
Jisu uttorketeʹ angko metakeʹkoe, "Issoraʹ rajjo hijuʹ somai aka cinhâgi bang Lel namoa. 21Ar âdmiko oho menako, lelpe, niâ jagare! Hana jagare! Karon lelpe, Issoraʹ rajjo ape bhitârrigi menaʹa."
22Ar Ânite celako metakeʹkoe, "Emon somai hijuʹhaʹ, jâkhni ape Âdmi Hoponaʹ somainaʹ miṭiʹ din ape lellaʹ nampehaʹ, kheʹ anado oho lelnamape. 23Tâkhni âdmikote ape metapekohaʹ, 'Lelpe, hana jagare! Niâ jagare! Alo caʹape, angkoaʹ tayom tayom alo caʹape.
Jisu arho hijuʹheʹ
24"Karon bijli alka serma latarre miʹhate camkoʹkheʹ, serma latarre eṭaʹhate dhâbiʹ marsaloʹa, Âdmi Hopon nijeoaʹ dinre engkoʹheʹ. 25Kheʹ palhere Âni aima dukkho kosṭo namlaʹ hoʹtaihaʹ. Ana bâgiketeʹ niâ kalren âdmikote Âni bang atangiâko.
26"Nohoaʹ somaire akalaka holena, Âdmi Hopon somairehoʹ engkagi hoʹhaʹ. 27Âdmiko jom nuisanako, baploʹsanako, ar bapla maʹsantakoako, tin dhâbiʹ bang Noho Jahajre bolone, ar ban hiʹketeʹ sanamkhoiʹ dhongsonako. 28"Engkagi Loṭaʹ somaire alka holiniʹ, âdmiko jom nuisanako, kiring âkringsanako, dare rohesanako ar oraʹ banesanako. 29Kheʹ jehiluʹ Loṭ Sodom bâgiketeʹ hiʹne inâhiluʹ sorgo khoiʹ sengel ar gondhok daʹ ṭipiʹ laka ujuʹketeʹ âdmiko sanam goiʹnako. 30Jehiluʹ Âdmi Hopon sodoroʹheʹ inâhiluʹho engkagi hoʹhaʹ.
31Ana hiluʹ jahegi chad cetanre tahenheʹ, ar ânioaʹ jinisko oraʹre tahentaihaʹ, ânido anako engelaʹte jate latarre bang hijuʹe. Ar engkagi jahe khetre tahenheʹ, ânido jate tayom hate bang âcur hijuʹe. 32Loṭren girthântetaʹ katha disim.
33"Jahegi aiaʹ jiui baceyaʹ kurumuṭie, ânido ana adheʹ, ar jahegi jiui ade, ânido ana baceheʹ. 34Ingte ape metapekâning, ana nindâre bar hor miṭiʹ bichnâre gitiʹ tahenkinhâʹ, ângkin bhitâr khoiʹ miʹhor enge jutuʹhaʹ, ar miʹ hordo bâgiṭho hoʹhaʹ. 35Barya reja miʹ saote jatare ridkinhâʹ. Ângkin bhitâr khoiʹ miʹ hor enge jutuʹheʹ, ar eṭaʹuniʹdo bâgiṭho hoʹhaʹ." 36#17:36 Aima mare boire niâ poddo bânuʹa.
37Celako menkedako, "Probhu, akare?" Jisute angko metakeʹkoe, "Akare goiʹ hormo tahena aṛegi gidido hiʹketeʹ jaoroʹkohaʹ."
Currently Selected:
Luk 17: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
