Luk 19

Sokorioaʹ mon badlo

1Tayomte Jisu Jirihore boloketeʹ sohornaʹ talate caʹsane. 2Ar lelpe, Sokorio nutumte miṭiʹ âdmi. Ânido miṭiʹ khajna âdâionkhoiʹren maranguniʹ tahelene ar ânido dhunigi tahelene. 3Ar Jisu ekekane, Âni leleiaʹ kurumuṭisane, kheʹ bhiṛ tahen laʹte bang lelnam darelidie, karon ânido khaṭogi tahelene. 4Anate ânido dâr caketeʹ Âni lelei laʹte miṭiʹ loa darere deʹne, karon Jisu ana ḍahartigi caʹsane. 5Tayomte Jisu jâkhni ana jagare hiʹne, tâkhni cetan hate koyoʹketeʹ âni metakidie, Sokorio, saṭlaka agro hijup, karon amaʹ oraʹre Ing tahenlaʹ hoʹtinghâʹ."

6Anate âni saṭlaka agro hiʹne ar hubte Âni pânhâkidie. 7Niâ lelketeʹ lâiberelaʹ lagonako, "Nâido miṭiʹ pâpioaʹ oraʹre nindâ kaṭelaʹ cane."

8Tâkhni Sokorio tengoketeʹ Probhu metakidie, "Probhu, lelme, ingâʹ sompottinaʹ ordhek ingte danokokâning, Ar judi onnaiketeʹ jaheoaʹ jahanaʹ engeketeʹ tahening, ananaʹ pongun âcurketeʹ makoinghâʹ."

9Tâkhni Jisute âni metakidie, "Tihin niâ oraʹre pap khoiʹ baco hiʹna, Cekelaʹ bang nâi âdmiho Abrahamren bongsodhorkane. 10Karon eke adngelene, âni sendra ar bacoi laʹte Âdmi Hopon hiʹkane."

Raja ar âniren dosṭeʹ kâmi âdmi

(Mothi 25:14-30)

11Jâkhni angko nako katha atensanako, tâkhni Âni miṭiʹ cetʹaʹ lopor menkede, karon Ânido Jirusalemṭheʹ hiʹlene. Ar angko monesanako je, Issoraʹ rajjo inrigi sodoroʹhaʹ. 12Anate Jisu menkede, "Miṭiʹ marang bongsoren âdmi rajjo âcur âgi laʹte sâhing disâm calone. 13Caloʹ lahare ânite aiʹren dosṭeʹ kâmi âdmi ṭâhukeʹkoe ar sanamkhoiʹ miʹso dinâr#19:13 Miʹ dinâr mane hoʹkana miṭiʹ âdmi miʹso dinre je ṭhep kâmiketeʹ name. maketeʹ metakeʹkoe, 'Ing bang âcur hiʹ dhâbiʹ niâtigi bebsape.' 14Kheʹ âniren Projakote âni ghinâisanako, anate ânioaʹ tayomte âdmi kolkeʹkoako, metakeʹkoako, 'Aleyaʹ icchâ bânuʹa je, nâi âdmi ale cetanre rajottemane.

15"Tayomte âni rajaketeʹ âcurhiʹne ar je dosṭeʹ das dinâr maleʹkoe angko ṭâhukolaʹ hukum makeʹkoe. Ânido baṛelaʹ namkede je eke tiniʹ bebsaketeʹ labh darekadako. 16Palheniʹ hiʹketeʹ menkede, "Probhu, amaʹ dinârte ing dos gun labkâding.' 17Rajate âni metakidie, bhalokadam. Am miṭiʹ manja kâmi âdmikanam. Am thoṛa bisoire pâtyuiʹ tahalenam anate ingte am dosṭeʹ sohornaʹ khomota mamkâning.'

18"Dosar kâmi âdmi hiʹketeʹ menkede, 'Probhu, amaʹ dinârte ing more gun labhkâding.' 19Ânite âni kâmiâdmiho metakidie, 'Amho moreṭeʹ ṭolanaʹ bhar nammahaʹ.'

20"Niâ tayom eṭaʹ ar miṭiʹ kâmi âdmi hiʹketeʹ menkede, 'Probhu, ingte amaʹ dinârdo rumâlre tolketeʹ doholeʹtâming. 21Ingte am botoromisâning, karon amdo aima koṛa âdmikanam. Amdo akare bang jaoraketeʹ dohokadam aṛe khoiʹ engeyam, ar akako bang merkadam anako gedam.' 22"Tâkhni raja menkede, âi dusṭu kâmi âdmi, 'Amaʹ mocanaʹ kathatigi ingte amaʹ bicârtâminghâʹ, Am to baṛesanam je, ingdo koṛa âdmikâning, Akako bang jaorakâding anako engeing, ar akako bang merkâding anako geding. 23Tahale ingâʹ ṭhep am cekelaʹ bang mahajonṭheʹ doholedam? Tahale to ing hiʹketeʹ ṭhepho naminghoteʹ ar ana saote thoṛa sudho naminghoteʹ.' 24Ekeko rajaṭheʹ tengo tahelenako rajate angko metakeʹkoe, 'Âniṭheʹ khoiʹ ana miṭiʹ dinâr engepe ar ekeyaʹ dosṭeʹ dinâr menaʹa âni maipe.'

25"Tâkhni angko âdmikote raja metakidiako, 'Probhu, âniaʹto dosṭi dinâr menaʹa!'

26"Raja menkede, 'Ing ape metapekâning, ekeyaʹ menaʹa âni arho mai hoʹhaʹ, kheʹ ekeyaʹ bânuʹa âniaʹdo aka thoṛa menaʹa anaho âniṭheʹ khoiʹ enge hoʹhaʹ. 27Kheʹ ingren dusmânko ekeko bang koikadako je ing angko cetanre raja hoʹing angko naṛe agukope ar ing samnere goi girikope.'"

Jisu Jirusalemte bolone

(Mothi 21:1-11; Mark 11:1-11; Johon 12:12-19)

28Na sanam katha mentayom Jisu angko laha lahate Jirusalemnaʹ cetan hate rakapne. 29Jâkhni Âni Joitun bururiaʹ citanre Boitfogi o Boithoniâ ṭola sorre hiʹne tâkhni Ânireʹ barya cela na menketeʹ kolkeʹkine, 30"Aban samnenaʹ hana ṭola caʹban. Aṛe bolon somai lelnameyaban miṭiʹʹ gadhareʹ hopon tol miniâ. Âni cetanre ekeho tisho bang deʹkanako. Âni laraketeʹ naṛe aguiban. 31Judi jahete kulibanako, itâʹla laradiâban? Aban menbanhaʹ, "Probhuoaʹ dorkar menaʹa.'"

32Ânite je cela kolleʹkine ângkin caketeʹ Jisuoaʹ katha lakagi sanam lelnamkedakin. 33Ângkin jâkhni âni gadha hopon laraisanakin tâkhni mâlikte ângkin kulikeʹkine, "Aban gadha hopon laradiâban itâʹlaʹ?"

34Ângkin menkedakin, "Probhuoaʹ niaʹ dorkar menaʹtaya." 35Niâtayom celate gadha hopon Jisuṭheʹ agukidiâkin ar âniaʹ deya cetanre ângkinaʹ lugri aṭetketeʹ Jisu durupkidiâkin. 36Âni jâkhni caʹsane tâkhni âdmiko nijeyaʹ hormonaʹ lugri ḍaharre aṭetlaʹ lagonako.

37Niâlaka Jisu Jirusalemṭheʹ hiʹketeʹ aka ḍahar Joitun buru khoiʹ agro cana ana ḍaharre hiʹne. Jisu saote Ânireʹ aima cela tahalenako. Anko celako Âniaʹ jeko sanam asarjo kâmi lelledako analaʹte kusite cilluketeʹ Issoraʹ gourobketeʹ menlaʹ lagonako,

38"Probhuoaʹ nutumte eke raja hijuʹkane Âniaʹ dhonno hoʹma!#Siringko 118:26

Sorgorigi sânti ar sermarigi mohima hoʹma!"

39Bhiṛ talakhoiʹ koekṭeʹ Forisite Jisu metakidiako, "Guru, amren celako dhamkokom."

40Jisute angko metakeʹkoe, "Ingte ape metapekâning, nako judi thirketeʹ tahenko tahale diriko cilluketeʹ rakaboʹhaʹ."

Jisu Jirusalem laʹte raʹkede

41Angko jâkhni Jirusalemnaʹ sorre hiʹnako tâkhni Jisu sohor lelketeʹ raʹkede. 42Âni menkede, "Hai Jirusalem, tiniʹ botornaʹ bisoi je tihingnaʹ dinre apeyaʹ sânti itâʹte hijuʹhaʹ anado bang baṛeyape, kheʹ nitoʹ ana amaʹ metʹnaʹ danangre tahena. 43Emon somai amaʹ hijuʹa jâkhni dusmânko amaʹ biruddhe badhanaʹ daola rakapkohaʹ ar am ghero dohomiâkohaʹ ar sanam hate khoiʹ am capo dharomkohaʹ. 44Angkote am ar amren gidrâko dhongsokokohaʹ. Amaʹ talare miṭiʹ diri cetanre ar miṭiʹ diri bang tahana, karon Issor je somai am bacomilaʹ hiʹlene ana somaido am bang bujhuledam."

Mundirre Jisu

(Mothi 21:12-17; Mark 11:15-19; Johon 2:13-22)

45Niâtayom Jisu Mundirre bolone ar ekeko aṛe jinisko âkringsenako angko tâṛiukeʹkoe. 46Ânite angko metakeʹkoe, "Pobitro Sastrore ol menaʹa, 'Ingâʹ oraʹ koijongnaʹ oraʹ hoʹa. Kheʹ ape ana 'Ḍakataʹ aḍḍakhana' teyarkadape."

47Tâkhni khoiʹ Jisute dinâmdin Mundirre caketeʹ cedokola' lagone. Marang purohitko, dhormoren masṭarko ar Jihudi moṛolkote Âni gojeyaʹ upâi sendresanako. 48Kheʹ angkodo akalakaketeʹ ana rikikohaʹ ananaʹ jahan upâi angko bang sendraketeʹ namledako, karon âdmiko mon die Âniaʹ sanam katha atensenako.

Currently Selected:

Luk 19: EKL

Highlight

Copy

Compare