Mothi 5

Eke dhonnoako

(Luk 6:20-23)

1Jisudo aima âdmi lelketeʹ buru cetanre rakabne. Âni duruʹ tayom aiʹren celako aiʹṭheʹ hiʹnako. 2Tâkhni ânite celako niâ mente cetʹokolaʹ lagone,

3"Attate ekeko nije rangeʹ moneyako angkodo dhonnogiâko,

Karon Sorgo Rajjodo angkoaʹgiâ.

4Dhonno angko ekekodo dukoʹako,

Karon angkodo jiui lareʹ namkohaʹ.

5Ekekoaʹ sobhab nomrogitakoa angkogi dhonnogiâko,

Karon dhârtido angkoaʹgi hoʹhaʹ.

6Ekeko monte jiuite sâriaʹgi Issoraʹ icchâlaka caʹlaʹ namako angkodo dhonnogiâko,

Karon angkoaʹ icchâ puronoʹtakohaʹ.

7Ekeko mayaiʹako angkogi dhonnogiâko,

Karon angkodo maya namkohaʹ.

8Ekeoaʹ ontor khâṭitakoa angkogi dhonnogiâko,

Karon angkote Issor lelnameikohaʹ

9Âdmikoaʹ jiuire sânti âgi laʹte ekeko kâmiako angkodo dhonnogiâko

Karon Issorte angkodo gidrâ mente ṭâhukoheʹ.

10Issoraʹ icchâ laka caʹlaʹte ekeko ottacar saheyako angkodo dhonnogiâko,

Karon Sorgo Rajjodo angkoaʹgiâ.

11"Apedo dhonnogiâpe, Ing panjang laʹte âdmite jâkhni ape opomanpeyako, ottacarpeyako ar âuṛiaʹte apeyaʹ nutumte sanam lakanaʹ kharap katha menako. 12Ape huboʹape ar khusiʹape, karon Sorgore apelaʹte marang puroskar menaʹa. Ape lahare je nâbiko tahelenako âdmikote angkoho nengkaketeʹgi ottacarkaʹkoako.

Bulung ar marsalnaʹ bisoite cetʹaʹ

(Mark 9:50; 4:21; Luk 14:34-35; 8:16)

13"Apedo dhârtiren bulungkanape, paseʹ bulungnaʹ sad nosṭogena tahale alkaketeʹ anado bulung lakoʹhaʹ? Ar ana bulungdo jahan kâmiredo bang lagoʹa. Anado eken giṛiaʹ ar âdmiaʹ jangare lebedaʹgi ṭhika.#Jatrapustok 5:13

14"Apedo dhârtiren marsalkanape. Buru cetannaʹ sohordo baiketeʹ bang tahe darena. 15Ekeho ḍibiâ jolketeʹdo pâichâ latarre bang doheyako kheʹ cârkhi cetanrigi doheyako. Niâte oraʹren sanam âdmigi marsal namako. 16Analakagi apeyaʹ marsal âdmiko samnere joloʹman, jate angkote apeyaʹ manja kâmi lelketeʹ aperen sorgoren Babaoaʹ gourobako.

Mosiaʹ ân bisoite cetʹaʹ

17"Niâ kathado alo moneyape, Ingdo Mosiaʹ ân ar nâbikoaʹ ol badtakolaʹ hiʹkâning. Ingdo anako badlaʹdo bang hiʹkâning kheʹ puronlaʹ hiʹkâning. 18Ingte ape sârigi metapekâning, tiniʹdin serma ar dhârti tahenhaʹ iniʹdin Mosiaʹ ânnaʹ jahanaʹ matra se foṭa bang misuʹa, sanamgi sofoloʹhaʹ.

19"Anate hukumko bhitârnaʹ miṭiʹ kâṭiʹ hukumho jahe omanneyako ar âdmiko ana omannelaʹte cetʹokoako angkodo sorgo rajjore sanam khoiʹ kâṭiʹ men hoʹhaʹ. Kheʹ jahegi ana hukum palonako ar âdmiko palonlaʹ cetʹokoako angkodo Sorgo Rajjore sanam khoiʹ marang men hoʹhaʹ. 20Ingte ape metapekâning, dhormo guru ar Forisikoaʹ dhârmikota khoiʹ apeyaʹ judi ḍher jahanaʹ bang tahentapeya tahale ape jahanlakaketeʹgi Sorgo Rajjore oho bolo darenape.

Edre bisoite cetʹaʹ

21"Ape atenkadape, laharen âdmikoṭheʹ niâ katha men hokana, 'Alo goiʹkoape, ekete gojeiheʹ ânido bicârnaʹ daire ujugoʹheʹ.' 22Kheʹ ingte ape metapekâning, jahegi aiʹren boiha cetanre edrene ânido adalotre bicârnaʹ daire paṛoʹheʹ ar ekete aiʹren boiha metaie amdo bibekhingiâm, ânido noroknaʹ sengelnaʹ daire paṛoʹhe.

23"Analaʹte Issoraʹ uddessote sirâ cetanre amaʹ dan utsorgo somai judi disiam je, amaʹ biruddhore amren boihaoaʹ jahanaʹ menaʹ menaʹtaia, 24Tahale amaʹ dan ana sirâ samnere dohoketeʹ cagen. Laha amren boiha salaʹ arho milup ar tayomte hiʹketeʹ amaʹ dan utsorgem.

25"Jahegi amaʹ biruddhe keskheʹ adalotre ca laharigi saṭlakaketeʹ âni saote mimangsem. Ana bangkheʹ ânite am bicârokaʹ tire mamheʹ, ar bicârokte am pulisaʹ tire mamheʹ, ar puliste am jelre mamkohaʹ. 26Ingte am sârigi metamkâning, mucitʹ paisa bang ma dhâbiʹ am aṛe khoiʹ itâʹtigi oho bacoʹam.

Bebhicâr bisoite cetʹaʹ

(Mothi 19:9; Mark 10:11-12; Luk 16:18)

27"Ape atenkadape, niâ katha men hokana, 'Alo bebhicârape.'#Jatrapustok 20:14 28Kheʹ Ingte ape metapekâning, jahegi jahe kurihopon hate kamonanaʹ metʹte koyoke ânido inrigi mon monte âni salaʹ bebhicârkede."

29"Amaʹ jojma metʹte judi am papnaʹ ḍaharte idimie tahale ana oṛoʹketeʹ sâhingre giṛigirim. Amaʹ goṭa hormo norokre ca khoiʹ borong ananaʹ miṭiʹ ongso nosṭogenaʹdo amlaʹte manjaoa. 30Judi amaʹ jojma tite am papnaʹ ḍaharte ormie tahale ana getʹgiṛigirim. Amaʹ goṭa hormo norokre ca khoiʹ borong miṭing ongso nosṭodo amlaʹte manjaoa.

31"Arho men menaʹa, 'Jahetigi aiʹren basahit bâgiyilaʹ namlekheʹ ânite âni bâginaʹ kagaj maimane.'#Dosarbiboron 24:1 32Kheʹ Ingte ape metapekâning. Jahetigi bebhicârnaʹ dos bâgiketeʹ eṭaʹ jahanaʹ karonte basahit bâgie ânitedo âni bebhicâriniketeʹ rakabie. Ar ekedo bâgi hokana âni kurihopon ekete baplaie âniho bebhicâre.

Rikit bisoite cetʹaʹ

33"Arho ape atenkadape, lahaten âdmikoṭheʹ men hokana, 'Âuṛiaʹ alo rikitape, borong probhuoaʹ uddessote ape sanam rikit palonpe.' 34Kheʹ Ingte ape metapekâning, alogi rikitape. Sorgonaʹ nutumte alo rikitape, karon anado Issoraʹ singhâsonkana. 35Dhârtinaʹ nutumtedo alo rikitape, karon anado Issoraʹ janga doheyaʹ jagakantaya. Jirusalemnaʹ nutumte alo rikitape, karon anado mohan rajaoaʹ sohorkana. 36Amaʹ bohoʹ nutumtedo alo rikitam, karon ananaʹ miṭiʹ upho poṛ se hendeyaʹ khomota amaʹdo bânuʹtama. 37Apeyaʹ kathanaʹ 'He' jate 'Hegi' hoʹa ar 'Bangdo' jate 'Banggi' hoʹa, niâ khoiʹ akaṭaʹ ḍhera anado Soitanṭheʹ khoiʹ hijuʹa.

Badalsodnaʹ bisoite cetʹaʹ

(Luk 6:29-30)

38"Apedo atenkadape je, niâ katha men hokana, 'Metʹ badalte metʹ ar ḍaṭa badalte ḍaṭa.'#Jatrapustok 21:24 39Kheʹ Ingte ape metapekâning, jahegi ape salaʹ kharap beboharako angkoaʹ birudhoredo itâʹgi alo cikiape. Borong jahetigi ape jojma johare ceṭaʹpeyako angkodo leṭra johaho ceṭaʹsokoape. 40Eke amaʹ anga engelaʹ kese ânido amaʹ cadreho magiriyi. 41Jahetigi aiaʹ bojha engeketeʹ am miʹ mâil caʹlaʹte baddhomie âni saote bar mâil caʹme. 42Eke amṭheʹ jahanaʹ koie ânido maime ar eke amṭheʹ panca koe ânido mailaʹ alo osikâram.

Dusmân dulârkoaʹ bisoite cetʹaʹ

(Luk 6:27-28, 32-36)

43"Ape atenkadape men hokana, 'Aperen sorniʹ âdmiko dulârkope ar dusmândo ghrinâkope.'#Lebiopustok 19:18 44Kheʹ Ingte ape metapekâning, aperen dusmânkoho dulârkope. Ekete ape ottacarpeyako angko laʹte koijongpe, 45Jate âdmi lelnamako apedo sârigi sorgoren Babaren gidrâkanape. Ânitedo manja kharap sanamkhoiʹ cetanrigi aiʹren sing cando rakabie ar dhârmik ar odhârmik âdmiko cetanreho daʹ emoʹe. 46Ekete ape dulârpeyako eken engkogi judi apete dulârkoape tahale ki ape puroskar nampehaʹ. Osot khajna engeonkhoiʹ ki bang engkeyako? 47Ar apete judi eken aperen âdmikogi subheccha makoape tahaledo eṭaʹonkhoiʹ khoiʹdo bisi itâʹ cikâdape? Ojihudiho ki bang engka rikiako? 48Niâlaʹte mening, aperen sorgoren Baba alka khâṭigie apeho engkagi khâṭi hoʹpe.

Currently Selected:

Mothi 5: EKL

Highlight

Copy