Mark 12
12
Ângur khetren câsikoaʹ cetʹaʹ lopor
(Mothi 21:33-46; Luk 20:9-18)
1Tâkhni Jisu cetʹaʹ loporte angkoṭheʹ menlaʹ lagone, "Miṭiʹ âdmi miṭiʹ khetre ânggur lat rohekede ar ânggur khetnaʹ câriunakha beṛha makede. Tayomte âni ângur rase rikâlaʹte miṭiʹ gâḍluʹ lakede, miṭiʹ usul jogeyaʹ oṛaʹ banokede. Tayomte âni koekṭeʹ câsiṭheʹ khet ijara maketeʹ eṭaʹ disâm calone.
2Ângur beleʹnaʹ somai âni ana ânggur khetnaʹ jorenaʹ bhag âgulaʹte miṭiʹ das angko câsikoṭheʹ kolkidie. 3Kheʹ câsiko âni das sabketeʹ dalkidiako ar eken tite kolkidiako. 4Mâlikte ar miṭiʹ das ankoṭheʹ kolkidie. Câsikote âni bohoʹre dalkidiako ar âni opoman kidiako. 5Tâkhni ânite ar miʹhor kolkidie, angkote âni goiʹgirikidiako. Tayomte ânite arho thoṛa âdmi kolkeʹkoe, kheʹ angko talaren koekṭeʹ âdmiko angkote dalkeʹkoako ar eṭaʹkodo goiʹkeʹkoako.
6Tâkhni âniren ar miʹhorgi tahalene, ânido aiʹren dulârniʹ gidrâ. Ânite sanamkhoiʹ mucitre âni angkoṭheʹ kolkidie, âni menkede, 'Angko ingren gidrâ sonmaneyakohaʹ.'
7Kheʹ câsiko nijeko talare menlaʹ lagonako, 'Ni to tayomte sompottiren mâlik hoʹheʹ, hijuʹpe, abote âni gojeyabo, tahale abogi sompottiren mâlik hoʹabo' 8anate angkote âni goiʹgirikidiako, ar ânggur khetnaʹ bahirre giṛikidiako."
9Jisute angko kulikeʹkoe, "Ana ânggur khetren mâlik itâʹ cikiheʹ? Âni hiʹketeʹ angko câsiko goiʹgiṛikoe ar ângur khet eṭaʹ âdmiko ijara makoheʹ. 10Ape ki pobitro sastrore bang paṛhokanape?
'Rajmistriko aka marang konanaʹdiri bâtilgiriledako, Anagi sanamkhoiʹ dorkarnaʹ diriketeʹ rakapna.
11Niâdo Probhugi rikâkade, ar aleyaʹ metre ana aima asarjo.'"#Siringko 118:22-23
12Tâkhni angko Jihudi netakote Jisu sabeilaʹ namkedako, kheʹ âdmiko botorkeʹkoako, karon angko bujhuledako je, Âni angko uddessotigi niâ cetʹaʹ lopor lâikede. Anate angko Âni bâgiketeʹ cagenako.
Kor emoʹaʹ bisoite
(Mothi 22:15-22; Luk 20:20-26)
13Tayomte angko koyekṭeʹ âdmi Forisi ar Herodiâko Âniṭheʹ kolkeʹkoako, jate angkote Âni kathanaʹ fadre giṛi dareyako.#Mothi 22:15-46; Luk 20:40-44 14Angkote hiʹketeʹ Âni metakidiako, "Guru, ale baṛeyale Amgi sâriaʹ, Am ekeyaʹ bisoiteho bang botoroʹam, karon Am ekeyaʹ cehara lelketeʹ itâʹgi bang rikiam. Kheʹ sârigi lakaketeʹ Issoraʹ ḍahar bisoite cedaʹ makoam. Nitoʹ Am menme, Mosiaʹ ân laka Romio raja ki khajna maiaʹ ucit se bang? Aleteki âni kor maiale se bang maiale?"
15Jisute angkoaʹ bhonḍami bujhuketeʹ edreketeʹ menkede, "Ceklaʹ apete Ing purikkhadingâpe? Ing miṭiʹ dinâr âguketeʹ mangpe, ar Ing leling." 16Angko dinâr âgukedako, ar Ânite angko metakeʹkoe, "Niâ cetanre niâ chubi ar nutum ekeyaʹkana?" Angko menkedako, "Romio rajaoaʹ."
17Jisute angko metakeʹkoe, "Akaṭaʹ Romio rajaoaʹkana anado rajagi maipe, ar akaṭaʹ Issoraʹkana anado Issorgi maipe." Jisuoaʹ niâ kathate angko asarjogenako.
Goiʹ khoiʹ jiuitʹ rakaboʹ bisoite
(Mothi 22:23-33; Luk 20:27-40)
18Tayomte koekṭeʹ Sudduki Jisuṭheʹ hiʹnako ekeko mensanako goiʹ khoiʹ jiuitʹ beret mente itâʹgi bânua, ar angkote Âni kulikidiako, 19"Guru, Mosi abo laʹte olkade, 'Judi jahe âdmiren boiha begor gidrâ obosthare girthân dohoketeʹ gojoʹe tahale âni âdmi aiʹren boiharen girthân baploie ar boiharen hoketeʹ âniaʹ bongso banotaiheʹ.' 20Manjagi, satṭeʹ boiha tahalenako, palheniʹ miṭiʹ girthân baplokidie, ar âni begor gidrâ obosthare goiʹgene. 21Toyomte dosariʹte âni baplokidie, kheʹ âniho begor gidrâ obosthare goiʹgene. Tesariaʹ obosthaho angkagi hona. 22Nako satṭeʹ boihate eketigi gidrâ bang doholeʹkoako. Mucitre âni girthânho goiʹgene. 23Goiʹ tayom jâkhni angko goiʹ khoiʹ jiuitʹ beretoako, âni angko talare ekeren girthân hoʹheʹ? Karon angkote satṭeʹgi to âni baplolidiako."
24Jisute uttorre angko metakeʹkoe, "Ape ceklaʹ niâ bhul talare menaʹpeya? Ape bang baṛeyape Sastro, bang baṛeyape Issoraʹ suktinaʹ katha. 25Goiʹko talakhoiʹ jiuitʹ beretlenkheʹ angko bang baploako, borong angko sorgore sorgodutko lakagi tahanko. 26Kheʹ goiʹko bisoite, angko je jiuitoako, niâ bisoite Mosiaʹ boire ol joloʹ sengel jhâilânaʹ ongsore Issorte âni itâʹ metalidie, anaki ape bang paṛhokanape? Âni menlede, 'Ingdo Abrahamren Issor, Isahakren Issor ar Jakobren Issorkâning.'#Jatrapustok 3:2-6 27Âni goiʹkoren Issordo bangkane, jiuitkorengi Issorkane. Ape marang bhul kadape."
Sanamkhoiʹ marang hukum
(Mothi 22:34-40)
28Miṭiʹ dhormo masṭar aṛe hiʹketeʹ angkoaʹ torko atenkede. Jisute angko ṭhik uttor makaʹkoe baṛeketeʹ Âni kulikidie, "Sanam hukumnaʹ talakhoiʹ akaṭaʹ sanamkhoiʹ maranga?"
29Uttorre Jisu menkede, "Sanamkhoiʹ marang hukumdo niâ, 'He Israyel, Atenpe, aleren Probhu Issor miṭiʹgi matro Probhukane. 30Jisute âni metakidie, "Amaʹ goṭa ontor, goṭa atta, goṭa mon ar goṭa suktite amren Probhu Issor dulârim.'#Dosarbiboron 6:4-5 31Dosaraʹdo niâkana, 'Amren sorkoren âdmiko nije laka dulârkom.' Niâ barya hukum khoiʹ marang hukum ar bânua."#Lebiopustok 19:18
32Dhormo masṭarko menkedako, "Bes, guru, am sâri kathagi menkadam je, Issor miṭiʹgie ar Âni bâgiketeʹ ar eke Issorgi bânuʹkoa. 33Ar goṭa ontor, sanam buddhi ar sanam suktite Âni dulâri ar sorkoren âdmiko nije laka dulârko janoarko ar eṭaʹ sanam utsorgoko khoiʹ ḍher guruttopurno."
34Tâkhni âni buddhi suliʹ uttor makade lelketeʹ Jisute âni metakidie, "Issoraʹ Rajjo khoiʹ am aima sâhingre bânuʹmiâ." Niâtayom âni jahanaʹ katha kulilaʹ ar ekeyaʹho sâhus bang holena.
Dhormo masṭarkoṭheʹ Probhu Jisuoaʹ prosno
(Mothi 22:41-23:36; Luk 11:37-52; 20:41-47)
35Jisu Mundirre ced makolaʹ somai menkede, "Dhormo masṭarko cikâte menako je Khrisṭo#12:35 Khrisṭo hoʹkana Hibru nutum ar Khrisṭo hoʹkana Grik nutum ar nakinnaʹ mane mitʹgiâ. Dâudren hoponkane? 36Dâud to nijegi pobitro attaoaʹ goṛote niâ katha menkade,
'Probhute ingren Probhu metakidie,
Ingâʹ jojma hatere durubob,
tindhâbiʹ bang Ingte amren dusmânko amaʹ janga latarre dohokoing.' #Siringko 110:1
37Dâudte nijegi Âni Probhu metaye, tahale kalkate Mosiho Dâudren bongsodhor ho darene?" Aima âdmi hub suliʹ Ânioaʹ katha atenkedako.
38Ânioaʹ cedaʹte ânite angko metakeʹkoe, "Dhormo masṭarko khoiʹ sabdhanoʹpe, angkodo jeleng jeleng lugricitʹriʹ sorogako, ar hâṭiâ bajarre âdmikoaʹ sonman namlaʹ namako,#Mothi 23:1-7; Luk 20:45-47; 21:1-8 39angkodo somaj oraʹre marang marang jagare ar bhojnaʹ somai sonmannaʹ jagare duruʹlaʹ namako. 40Angkodo miʹhate âdmi lelsokolaʹte jeleng jeleng koijongako, armiʹhate râṛikoaʹ oraʹko dokholako. Nako âdmiaʹdo aima ḍer sâsti hoʹtakohaʹ."
Rangeʹ râṛiaʹ dan
(Luk 21:1-4)
41Jisu dan baksonaʹ samnere duruʹketeʹ, âdmiko kalkate anare ṭhep dohodako ana lelsane. Aima dhuni âdmi aima ṭhep puisâ dan makedako. 42Toyomte miʹhor rangeʹ râṛi hiʹketeʹ anare barya tamanaʹ paisa dohokede, jeṭaʹnaʹ mullo miʹ sikinaʹho komgiâ.
43Tâkhni Jisute Aiʹren celako sorre ṭâhuketeʹ metakeʹkoe, "Ingte ape sârigi metapekâning, dan baksore ekeko ṭhep puisâ dohokadako, angko sanam khoiʹ ni rangeʹ râṛi ḍhergi dohokede. 44Karon angko sanamkhoiʹgi nijeyaʹ nijeyaʹ bâṛti dhon khoiʹ thoṛa thoṛa dohokadako kheʹ ni rangeʹ râṛi aiaʹ ja kichu sombol tahalena, ananaʹ sanamgi maṭhokede."
Currently Selected:
Mark 12: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
